Jẹnẹsis

3 Asaọkiephana ọrọdekọ na kọyen ma ghwanre* vwẹ usun rẹ eranvwe rẹ aghwa na eje rẹ Jihova Ọghẹnẹ mare. Ọtiọyena ọ da ta kẹ aye na: “Ọghẹnẹ ghene ta kẹ ovwan nẹ ovwan ria vwo nẹ kurhe kurhe rọhẹ ogba naa?” 2 Ọtiọyena aye na da ta kẹ ọrọdekọ na: “Avwanre sa re omamọ rẹ irhe rehẹ ogba na. 3 Ẹkẹvuọvo vwọ kpahen omamọ rẹ urhe rọhẹ uherevie rẹ ogba na, Ọghẹnẹ tare nẹ, ‘Ovwan riọọ, ẹjo, ovwan djobọtee; ovwan da riọ, ovwan che ghwu.’” 4 Ọtiọyena ọrọdekọ na da ta kẹ aye na: “Ẹjo, ovwan che ghwuu. 5 Kidie Ọghẹnẹ riẹnre nẹ vwẹ ẹdẹdẹ rẹ ovwan rerọ, ẹro rẹ ovwan ko rhie, kẹ ovwan dia kerẹ Ọghẹnẹ, kẹ ovwan riẹn obo ri yovwirin vẹ obo re brare.”

6 Ukuotọ rọyen, aye na da mrẹ nẹ urhe na fẹriọ, o fẹro, e, urhe na vwo erhuvwu. Ọtiọyena kọ kọrọ emamọ rọyen ria. Ọyena vwọ wan nu, ọ da je vwẹ evo kẹ ọshare rọyen ọke rọ vẹ ọyen vwọ herọ, ọshare na kọ riọ. 7 Ọtiọyena ẹro rayen ihwo ivẹ na de rhie, ayen da rhe mrẹvughe nẹ ayen banphiyọ. Ayen de ko ẹbe rẹ ifigi kugbe, ayen da vwẹ ayen vwo rhurhu ẹban rayen.

8 Ọke vwọ yan obaro, ayen de nyo urhuru ri Jihova Ọghẹnẹ ọke rọ vwọ yan vwevunrẹ ogba na, omarẹ ọke rẹ odju ri phiẹphiẹphiẹ vwo djuẹ,* ọshare na vẹ aye rọyen de siomanu vwo nẹ obaro ri Jihova Ọghẹnẹ vwẹ uvwre rẹ irhe rẹ ogba na. 9 Jihova Ọghẹnẹ ko se ọshare na, jẹ ọ ta: “Tivọ wọ hepha?” 10 Ukuotọ rọyen ọ da ta: “Mi nyo urhuru wẹn vwevunrẹ ogba na, ẹkẹvuọvo oshọ mu vwe kidie me banphiyọ, ọtiọyena mi de siomanu.” 11 Ọghẹnẹ da nọ: “Ono yen vuẹ wẹ nẹ wọ banphiyọ? Gbanẹ wọ re omamọ rẹ urhe re me vuẹ wẹ nẹ wọ ria naa?” 12 Ọshare na da ta: “Aye wọ vwọ kẹ vwẹ nẹ ọ vẹ ovwẹ dia na yen kẹ vwẹ omamọ rẹ urhe na, ọtiọyena me da riọ.” 13 Jihova Ọghẹnẹ da ta kẹ aye na: “Ọnana die yen wo ruru na?” Aye na da kpahen: “Ọrọdekọ na yen phiẹn vwẹ, ọtiọyena me da riọ.”

14 Ọtiọyena Jihova Ọghẹnẹ da ta kẹ ọrọdekọ na: “Fikirẹ ọnana ru wo ruru na, wẹwẹ kọyen ọ ra hanrhere vwẹ usun rẹ eranvwe na eje re dia orere kugbe eranvwe na eje re dia aghwa. Evun wẹn yen wo che vwo kpono, ekpẹn kọyen wọ cha re vwẹ ẹdẹ rẹ akpọ wẹn eje. 15 Ki mi che phi eghrẹn* phiyọ uvwre wẹn vẹ ọ rẹ aye na, kugbe uvwre rẹ ọmọ* wẹn vẹ ọmọ* rẹ aye na. Ọ cha guọghọ* uyovwin wẹn, ku wọ cha rhovwọn uchukowọ rọyen.”

16 Ọ da ta kẹ aye na: “Mi che ruo rere ọmiaovwẹ wọ cha mrẹ ọke wọ da mrevun vwọ ganphiyọ; vwevunrẹ omiamiavwe yen wo de che vwiẹ emọ, urhuru rẹ ọshare wẹn che si we, ọshare wẹn ko sun we.”

17 Ọ da ta kẹ Adam:* “Kidie nẹ wọ kerhọ rẹ urhuru rẹ aye wẹn, wọ da re omamọ rẹ urhe re me vwẹ fiki rọyen vwọ vwẹ iji nana kẹ wẹ nẹ, ‘Wọ riọọ’ na, ekan vwọ kẹ otọ na fiki wẹn. Vwevunrẹ ọmiaovwẹ ọyen wọ da cha re obo ri che nẹ evun rọyen rhe vwẹ ẹdẹ rẹ akpeyeren wẹn eje. 18 Idjigbẹn vẹ ekpia yen cha djẹ norhe vwọ kẹ wẹ, ku wọ re ẹbe rẹ aghwa na. 19 Wọ cha wian gangan ọdja me dja wẹ tavwen wọ ke mrẹ emu* re, bẹsiẹ wo vwo rhivwin kpo otọ na, kidie evun rọyen yen a reyọ owẹ nurhe. Ekpẹn yen wọ hepha, ekpẹn yen wo ji che rhivwin ra.”

20 Ọnana vwọ wan nu, Adam de se aye rọyen Ivi,* kidie ọyen cha dia oni rẹ ihwo eje ri yerẹn. 21 Jihova Ọghẹnẹ da vwẹ ophiẹn rẹ eranvwe vwo ru iwun igrongron vwọ kẹ Adam vẹ aye rọyen kuphiyọ. 22 Jihova Ọghẹnẹ da ta: “Enẹna ọshare na rhe dia kerẹ avwanre re, kidie ọ rhe riẹn obo ri yovwirin vẹ obo re brare re. Asaọkiephana rere o vwo jẹ obọ rọyen ẹriẹn rọ da kọrọ omamọ rẹ urhe rẹ arhọ na, rọ vwọ riọ je dia bẹdi bẹdẹ,—” 23 Ọtiọyena Jihova Ọghẹnẹ da djẹ nẹ ogba rẹ Idẹn na rere o voro otọ ra reyerọ nurhe na. 24 Ọ da djẹ ọshare na phia, o de phi chẹrub* kugbe ọlọkọ rẹ erhanre ro djuẹ riariẹ phiyọ ẹbẹre ọnre va nẹcha rẹ ogba rẹ Idẹn na, rere ayen rhẹrẹ idjerhe ra wan kpo asan rẹ urhe rẹ arhọ na hepha.