Ọbe rẹsosuọ ri Samuẹl

17 Ihwo ri Filistia de se ituofovwin rayen koko vwọ kẹ ofovwin. Ayen da ghwomakoko vwẹ Sokoh, rọ dia ọ ri Juda, ayen de wonphiyọ* uvwre ri Sokoh vẹ Azika, vwẹ Ifẹs-damim. 2 Sọl vẹ ihwo rẹ Izrẹl de siomakoko, ayen de wonphiyọ Iyara* rẹ Ilah, ayen da tẹnrẹn urhiẹ rẹ ofovwin ra vwa ihwo ri Filistia. 3 Ihwo ri Filistia hẹ ẹbẹre ọvo rẹ ugbenu na, ihwo rẹ Izrẹl da rha hẹ ẹbẹre ro chekọ rẹ ugbenu na, iyara na hẹ uherevie rayen.

4 Etiyin ọgba ofovwin ọvo de nẹ asan rẹ ihwo ri Filistia wonphiyọ na rhe; odẹ rọyen Golayat, ohwo ri Gat, o gron te kubit esan kugbe ispani ọvo.* 5 Ọ vwẹ erhu rẹ ẹrovwo vwo tughẹ uyovwin, o ji ku ophapha rẹ udu rẹ ẹrovwo* phiyọ. Ọnyẹ rẹ ophapha rẹ udu rẹ ẹrovwo na shẹkẹl 5,000.* 6 O ku erọnvwọn ra vwọ sẹro rẹ awọ ra vwẹ ẹrovwo ru phiyọ awọ rọyen, ọ je vwẹ javilin rẹ ẹrovwo vwo gbere igabọ rọyen. 7 Udjen rẹ oshuẹ rọyen ra vwẹ urhe ru pha kerẹ urhe rẹ ihwo ri ruẹ emwa kiẹn oruru phiyọ, uyovwin rẹ oshuẹ rọyen ra vwẹ utehru ru na họhọ te shẹkẹl 600;* jẹ ohwo ro muẹ ekpọfia rọyen yan vwẹ obaro rọyen. 8 Ọtiọyena o de mudia, o de se ihwo rẹ Izrẹl vwẹ asan rẹ ayen tẹnrẹn urhiẹ phiyọ na, ọ da ta kẹ ayen nẹ: “Diesorọ ovwan vwọ rhe rhe tẹnrẹn urhiẹ rẹ ofovwin? Mẹvwẹ dia ohwo ri Filistia, ovwan dia idibo ri Sọl? Ovwan sane ọshare ọvo kẹ oma rẹ ovwan rere o bru vwe rhe. 9 O de se nene uvwe họnre je teyen ovwẹ hwe, kẹ avwanre cha dia idibo rẹ ovwan. Ẹkẹvuọvo mi de phio kparobọ je teyọn hwe, kẹ ovwan cha dia idibo rẹ avwanre je ga avwanre.” 10 Ohwo ri Filistia na da tanẹ: “Me vwẹ urhiẹ rẹ ofovwin rẹ Izrẹl vwọ jehwẹ nonẹna.* Ovwan kẹ vwẹ ọshare ọvo rere mẹ vẹ ọyen họnre!”

11 Ọke rẹ Sọl vẹ ihwo rẹ Izrẹl eje vwo nyo eta rẹ ohwo ri Filistia na, uguegue da ro ayen oma, oshọ de mu ayen gangan.

12 Asaọkiephana Devid ọmọ ri Jẹsi, ohwo rẹ Ẹfrata ro nẹ Bẹtlẹhẹm ri Juda rhe. Jẹsi vwo emeshare ẹrenren, ọ je ghwore vwẹ ọke ri Sọl. 13 Emeshare erha ri Jẹsi re dia ekpako nene Sọl kpo ofovwin na. Edẹ rẹ emeshare erha rọyen ri kpo ofovwin na yen Elayab ọmọkpako, Abinadab ọrivẹ, Shama ọrerha. 14 Devid yen ọ rẹ otete ejobi, erha re dia ekpako na nene Sọl.

15 Devid ko nẹ asan ri Sọl ra vwẹrote igodẹ rẹ ọsẹ rọyen vwẹ Bẹtlẹhẹm, o de ru nu, o mi rhivwin rhe. 16 Vwẹ uvwre rẹ ọke nana, ohwo ri Filistia na me yanrhe obaro, o mi mudia kurhiọke kurhiọke kugbe kovwọnvwọn kovwọnvwọn vwẹ ẹdẹ 40.

17 Ọtiọyena Jẹsi da ta kẹ ọmọ rọyen Devid nẹ: “Biko reyọ ifah* ọvo rẹ ibali nana ra vwọ tọn na vẹ ibrẹdi ihwe nana, rere wo brokpakpa mu ayen rhe iniọvo wẹn vwẹ asan rẹ ayen wonphiyọ na. 18 Reyọ ẹkẹn ihwe rẹ ichizi* nana rhe onotu rẹ uriorin na; vwọba, wọ me je nokpẹn rẹ oborẹ erọnvwọn hepha vwọ kẹ iniọvo wẹn, rere wọ ghwẹ iyẹnrẹn mie ayen rhe vwe.” 19 Ayen vẹ Sọl kugbe eshare rẹ Izrẹl ri chekọ na eje nene ihwo ri Filistia họnra vwẹ Iyara* rẹ Ilah.

20 Ọtiọyena Devid de vrẹn vwẹ edegburhiọke, ọ da vuẹ ohwo ọvo nẹ ọ vwẹrote igodẹ na; o de mu ekuakua na, ọ da yanran kirobo rẹ Jẹsi vwẹ iji kẹ. Ọke ro vwo te asan rẹ ayen wonphiyọ na, jẹ otuofovwin na rha yan kpo asan rẹ ayen de phiẹ ofovwin na, jẹ ayen kperẹ ukperi rẹ ofovwin. 21 Izrẹl vẹ ihwo ri Filistia na da tẹnrẹn urhiẹ rẹ ofovwin, urhiẹ rẹ ofovwin ọvo de hirharoku urhiẹ rẹ ofovwin ro chekọ. 22 Devid de brokpakpa yanjẹ eghwa rọyen na vwo kẹ ọrọvwẹrote eghwa na nẹ ọ vwẹrote, ọ da djẹ kpo asan rẹ ayen da tẹnrẹn urhiẹ rẹ ofovwin na. Ọke ro vwo te etiyin, kọ nọ kpahan oborẹ erọnvwọn hepha vwọ kẹ iniọvo rọyen.

23 Ọ vẹ ayen vwọ ta ota na, ọgba ofovwin re se Golayat, ohwo ri Filistia ro nẹ Gat rhe na da rhe. O nẹ urhiẹ rẹ ofovwin rẹ ihwo ri Filistia na rhe, ọ da ta eta vuọvo rọ ta jovwo na, Devid de nyo. 24 Ọke rẹ eshare rẹ Izrẹl eje vwọ mrẹ ọshare na, oshọ de mu ayen, ayen da mrẹ djẹ. 25 Eshare rẹ Izrẹl na ke tanẹ: “Wọ mrẹ ọshare nana rọ cha na? Ọ cha cha rhe vwẹ Izrẹl vwọ jehwẹ.* Ovie na cha vwẹ efe buebun kẹ ohwo rọ teyenrọ hwe, ọ cha vwẹ ọmọtẹ rọyen vwọ kẹ, e rhe che mie uwevwin rẹ ọsẹ rọyen arhọghọ vuọvo rẹ ihwo rẹ Izrẹl jẹẹ.”

26 Devid kọ nọ eshare ri mudia kẹrẹ na nẹ: “Die yen e che ru kẹ ohwo rọ teyen ohwo ri Filistia ro mudia oboyin na hwe ji si ekan nẹ Izrẹl? Ono yen ohwo ri Filistia nana rọ yanvweree na, rọ vwọ vwẹ urhiẹ rẹ ofovwin rẹ Ọghẹnẹ ro jeghwo na vwọ jehwẹ?”* 27 Ihwo na da je vuẹ ota vuọvo na nẹ: “Ọnana yen obo re che ru kẹ ohwo rọ teyenrọ hwe.” 28 Ọke rẹ oniọvo rọyen Elayab rọ dia ọkpako ejobi vwo nyo rọ vwọ ta ota kẹ eshare na, ivun ri Devid de miovwo, ọ da tanẹ: “Diesorọ wọ vwọ rhe obonẹ? Ono yen wọ yanjẹ imigodẹ na vwo kẹ vwẹ aton na? Me nabọ riẹn uruemu re vwo ruẹ obo re vwo uturhi rọyeen ro rhe we, vẹ orharhe iroro rọhẹ ubiudu wẹn; wọ de rhe obonẹ rhi nughe rẹ ofovwin na.” 29 Ọtiọyena Devid da tanẹ: “Die yen mi ruru? Onọ yen me de nọ!” 30 Ọtiọyena o de chukokuo hirhe opharo ku ohwo ọfa, ọ da nọ onọ vuọvo na, ihwo na da je vwẹ ẹkpahọnphiyọ vuọvo na vwọ kẹ.

31 Eta ri Devid na de shephiyọ ihwo evo erhọ, ayen da ra niyẹnrẹn rọyen kẹ Sọl. Sọl da tanẹ e se rhe. 32 Devid da ta kẹ Sọl nẹ: “E jẹ udu nẹ ohwo vuọvo awọ fiki rọyeen. Odibo wẹn cha yanran re nene ohwo ri Filistia nana họnre.” 33 Ẹkẹvuọvo Sọl da ta kẹ Devid nẹ: “Wọ cha sa yanran re nene ohwo ri Filistia nana họnree, kidie omotete yen wo ruẹ, jẹ vwo nẹ ọke eghene rọyen rhe yen ọ vwọ dia isodje.”* 34 Devid da ta kẹ Sọl nẹ: “Ọke rẹ odibo wẹn vwo suẹn igodẹ rẹ ọsẹ rọyen, okpohrokpo rhere, ọtiọyen ji te okorhi, ayen ọvuọvo de mu ogodẹ vwo nẹ uchuru na. 35 Me da vwọ tua je teyọn she, mi de sivwon nẹ unu rọyen. Ọke ro vwo vrẹn vwọso ovwẹ, me da yọnrọn ẹton rọyen,* me da vwọ fotọ, mi de hwe. 36 Odibo wẹn teyen okpohrokpo vẹ okorhi hwe, ohwo ri Filistia nana rọ yanvweree na cha dia kerẹ ọvo rayen, kidie ọ vwẹ urhiẹ rẹ ofovwin rẹ Ọghẹnẹ ro jeghwo na vwọ jehwẹ.”* 37 Devid da je ta: “Jihova ro sivwin uvwe vwo nẹ obọ rẹ okpohrokpo vẹ okorhi na yen ohwo ro che sivwin uvwe nẹ obọ rẹ ohwo ri Filistia nana.” Ọtiọyena Sọl da ta kẹ Devid nẹ: “Yanran, e jẹ Jihova nene uwe dia.”

38 Asaọkiephana Sọl de ku iwun rọyen phiyọ Devid. Ọ da vwẹ erhu ẹrovwo vwo tughẹ uyovwin, o vwo ru ọyena nu, o de ku ewun rẹ ẹrovwo phiyọ. 39 Ọtiọyena Devid da gba ọlọkọ rọyen si iwun rọyen, kọ davwẹngba rọ vwọ yanran, ẹkẹvuọvo ọ sa yanraan kidie ọ riẹn obo ra ghwa ayeen. Devid da ta kẹ Sọl nẹ: “Me cha sa ghwa erọnvwọn nana yanraan, kidie me riẹn obo ra ghwa ayeen.” Ọtiọyena Devid de ku ayen nu. 40 Ọ da tọrọ ọkpọ rọyen, ọ da sane ibiukuta iyorin re pha rionrionrion vwo nẹ otọ rẹ ivwori* na, o de phi ayen phiyọ emekpu rọhẹ ekpu rọ ghwa kpo igodẹ esuon, vẹ islingi* rọ yọnre vwẹ obọ rọyen. Kọ yan brẹ ohwo ri Filistia na ra.

41 Ohwo ri Filistia na ko siẹkẹrẹ Devid phiyọ, jẹ ohwo ro muẹ ekpọfia rọyen kobaro kẹ. 42 Ọke rẹ ohwo ri Filistia na vwo ni, rọ vwọ mrẹ Devid, o de no saka je jẹfia, kidie ọyen omotete ro di vwo erhuvwu. 43 Ọtiọyena ohwo ri Filistia na da ta kẹ Devid nẹ: “Mẹvwẹ eranko, ru wo vwo bru vwe cha ohọnre vẹ ibiurhe?” Ọtiọyena ohwo ri Filistia na da vwẹ eghẹnẹ rọyen vwo duvwun iyorin kẹ Devid. 44 Ohwo ri Filistia na da ta kẹ Devid nẹ: “Gbe bru vwe rhe, me cha vwẹ uvwo wẹn kẹ ephran rẹ idjuvwu na kugbe eranvwe rẹ aghwa na.”

45 Devid da kpahen kẹ ohwo ri Filistia na nẹ: “Wo bru vwe cha ohọnre vẹ ọlọkọ, oshuẹ, kugbe javilin, ẹkẹvuọvo mi bru we cha ohọnre vwẹ odẹ ri Jihova rẹ otuofovwin na, Ọghẹnẹ rẹ urhiẹ rẹ ofovwin rẹ Izrẹl, ohwo ru wọ vwọ jehwẹ na.* 46 Nonẹna Jihova che phi we phiyọ obọ mẹ, ke me cha teyen owẹ hwe ji bru uyovwin wẹn no; nonẹna me cha vwẹ irivwin rẹ asan rẹ ihwo ri Filistia wonphiyọ na kẹ ephran rẹ idjuvwu na kugbe eranvwe rẹ aghwa rẹ otọrakpọ na re; ihwo rehẹ akpọ na eje ke cha riẹn nẹ Ọghẹnẹ hẹ Izrẹl. 47 Ihwo eje re ghwẹkoko vwẹ etinẹ na* cha riẹn nẹ ọ dia ọlọkọ yẹrẹ oshuẹ yen Jihova vwo sivwẹẹn, kidie ofovwin na ọ ri Jihova, o che phi ovwan eje phiyọ obọ rẹ avwanre.”

48 Ọtiọyena ohwo ri Filistia na de vrẹn, ko siẹkẹrẹ Devid phiyọ, ẹkẹvuọvo Devid da djẹ kpakpata kpo obo ofovwin na ra vwa ohwo ri Filistia na. 49 Devid de duvwun obọ phiyọ ekpu rọyen, ọ da tọrọ ubiukuta ọvo nẹ evun rọyen rhe. Ọ da sa, o de she arhare rẹ ohwo ri Filistia na, ubiukuta na da ro arhare rọyen, o de she bọvwọn opharo rhuotọ. 50 Ọtiọyena Devid da vwẹ islingi vẹ ubiukuta ọvo vwo phi ohwo ri Filistia na kparobọ; ọ da teyen ohwo ri Filistia na she ji hwe ghwu, dede nẹ Devid vwo ọlọkọ vwẹ obọọ. 51 Devid da djẹ yanran re mudia enu rọyen. Ọtiọyena ọ da yọnrọn ọlọkọ rẹ ohwo ri Filistia na, o de yoro nẹ ako rọyen, o de vwo bru uyovwin rọyen no rere o vwo muẹro nẹ o ghwuru. Ọke rẹ ihwo ri Filistia vwọ mrẹ nẹ ọgba rayen ghwu nure, ayen da djẹ.

52 Ọtiọyena ihwo rẹ Izrẹl vẹ e ri Juda de vrẹn, kẹ ayen kperẹ, ayen da vwọtua ihwo ri Filistia vwo nẹ iyara na rhirin re te anurhoro rẹ Ẹkrọn, irivwin rẹ ihwo ri Filistia ra teyen hwe de she nene idjerhe na vwo nẹ Sheareim, rhirin re te Gat kugbe Ẹkrọn. 53 Ọke rẹ ihwo rẹ Izrẹl vwo rhivwin nẹ ẹvwọtua ọgangan rẹ ihwo ri Filistia na rhe, ayen da kua asan rẹ ayen wonphiyọ na fiotọ.

54 Ọtiọyena Devid de mu uyovwin rẹ ohwo ri Filistia na, o de muo rhe Jerusalẹm, ẹkẹvuọvo o phi ekuakua ofovwin rẹ ohwo ri Filistia na phiyọ utughẹ robọ rọyen.

55 Ọke rẹ Sọl vwọ mrẹ Devid rọ yanran ra vwa ohwo ri Filistia na, ọ da nọ Abna, onotu rẹ otuofovwin na nẹ: “Ọnana ọmọ rẹ ono, Abna?” Abna da kpahen nẹ: “Wọ vwọ herọ yerẹn na,* E ovie, me riẹnree!” 56 Ovie na da tanẹ: “Ra guọnọ ohwo ro vwo emeghene na.” 57 Ugege rẹ Devid vwo rhivwin nẹ asan rọ da teyen ohwo ri Filistia na hwe rhe, Abna da reyọ rhe obaro ri Sọl, jẹ uyovwin rẹ ohwo ri Filistia na hẹ obọ rọyen. 58 Asaọkiephana Sọl da nọ nẹ: “Wẹwẹ ọmọ rẹ ono, ọmọ na?” Devid da kpahen nẹ: “Mẹvwẹ ọmọ rẹ odibo wẹn Jẹsi, ohwo ri Bẹtlẹhẹm na.”