Iruo rẹ Iyinkọn Na

16 Ọtiọyena o de rhi te Dabe, ọtiọyen ji te Listra. Odibo ọvo re se Timoti hẹ etiyin, ọmọ rẹ aye ọvo rọ dia ohwo ri Ju ro segbuyota ẹkẹvuọvo ọsẹ rọyen ohwo ri Grik, 2 iniọvo rehẹ Listra vẹ Aikoniọm nẹ omamọ iyẹnrẹn kpahọn. 3 Pọl de dje owenvwe phia rọ vwọ reyọ Timoti nene oma, ọ da reyọ ọ da yanvwọ fikirẹ ihwo ri Ju rehẹ ekogho yena, kidie ayen eje riẹnre nẹ ọsẹ rọyen ohwo ri Grik. 4 Ayen vwọ wan irere na, jẹ ayen vuẹ iniọvo na oborẹ iyinkọn na vẹ ekpako rehẹ Jerusalẹm brorhiẹn rọyen rere ayen se vwo ru nene. 5 Ọtiọyena, esegbuyota rẹ ikoko na kọ ganphiyọ, ayen ki ji buẹnphiyọ kẹdi kẹdẹ.

6 Vwọba, ayen da wan Frigia kugbe ẹkuotọ ri Galesha, kidie ẹwẹn ọfuanfon na rhọnvwe kẹ ayen nẹ ayen ta ota na vwẹ ubrakpọ rẹ Esha-a. 7 Vwo kpobarophiyọ, ọke rẹ ayen vwo te Maisha, ayen da davwẹngba rẹ ayen vwo kpo Bitinia, ẹkẹvuọvo ẹwẹn ri Jesu rhọnvwe kẹ aye-en. 8 Ọtiọyena ayen da wan Maisha vrẹ, ayen de rhi te Troas. 9 Vwẹ ason, Pọl da mrẹ emramrẹ ọvo—ọshare ri Masidonia ọvo mudia etiyin, jẹ ọ rẹ nẹ: “Yanrhe obẹ Masidonia wọ rhe cha avwanre uko.” 10 Ugege rọ vwọ mrẹ emramrẹ na nu, avwanre da davwẹngba rẹ avwanre vwo kpo Masidonia, kidie avwanre mrẹvughe nẹ Ọghẹnẹ yen se avwanre nẹ avwanre re ghwoghwo iyẹnrẹn esiri na kẹ ayen.

11 Ọtiọyena avwanre da ro okọ nẹ Troas, avwanre de bi phiọngun kpo Samotras, ẹkẹvuọvo vwẹ ẹdẹ rọ vwọ kpahọn avwanre de kpo Neapolis; 12 avwanre de nẹ etiyin kpo Filipae, orere rẹ ẹkuotọ ọfa suẹn rọ dia otorere rẹ ubrakpọ ri Masidonia. Avwanre dia orere nana vwẹ ẹdẹ evo. 13 Vwẹ Ẹdẹ Urovwoma avwanre de kpo otafe rẹ orere na, kpo orhoma rẹ urhie ọvo, asan rẹ avwanre rorori nẹ ihwo de koko nẹrhovwo, avwanre de chidia etiyin, kẹ avwanre nene eya ri kokori vwẹ etiyin ta ota. 14 Jẹ aye ọvo re se Lidia rọ shẹ emwa ri vwo ikọlọ rẹ ipọpo, ro nẹ orere ri Tayataira rhe rọ je ga Ọghẹnẹ kerhọ, Jihova* de rhie ubiudu rọyen phiyọ rere o rhiabọreyọ erọnvwọn ri Pọl ta na. 15 Ọke rọ vẹ evwruwevwin rọyen vwo bromaphiyame nu, ọ da rẹ avwanre nẹ: “Ovwan de ni vwe kerẹ ohwo rọ fuevun kẹ Jihova,* ovwan gba yanrhe rhe dia uwevwin mẹ.” Ọ da rẹ avwanre te asan rẹ avwanre de nene.

16 Asaọkiephana rẹ avwanre vwo kpo asan ra da nẹrhovwo na, odibo ọmọtẹ ọvo ro vwo ẹwẹn rẹ Idẹbono da rhe vwa avwanre, ẹwẹn na vwẹ ukẹcha kẹ vwọ mraro. Ọ nẹrhẹ inini rọyen mrẹ erere buebun womarẹ aroẹmrẹ rọyen. 17 Ọmọtẹ nana ko nene Pọl vẹ avwanre, jẹ o kperẹ phia nẹ: “Eshare nana idibo rẹ Ọghẹnẹ ro Me Kpenu na, ayen ghwoghwo idjerhe rẹ usivwin na vwọ kẹ ovwan.” 18 O ru ọnana vwẹ ẹdẹ buebun. Ukuotọ rọyen, ofu de rhi dje Pọl, o de hirharokuo ọ da ta kẹ ẹwẹn na nẹ: “Me ta kẹ wẹ vwẹ odẹ ri Jesu Kristi nẹ, nẹ oma rọyen.” O de nẹ oma rọyen ugege* yena.

19 Ọke rẹ inini rọyen vwọ mrẹ nẹ idjerhe rẹ erere rayen wan cha na gberi, ayen de shabọ phiyọ Pọl vẹ Sailas, ayen de kpono ayen kpo afieki na bru isun na ra. 20 Ayen vwọ reyọ ayen bru isun rẹ orere na ra, ayen da tanẹ: “Eshare nana kpokpo orere rẹ avwanre na mamọ. Ayen ihwo ri Ju, 21 ayen ghwoghwo ẹkuruemu rẹ urhi rhọnvwe kẹ avwanre nẹ a reyọ yẹrẹ ru nene-e, kidie avwanre ihwo ri Rom.” 22 Otu na de vrẹn vwọso ayen, ọke ra vwọ bẹrẹ iwun dje ayen oma nu, isun na da tanẹ a vwẹ ibiurhe vwọ fa ayen. 23 Ọke re vwo hwe ayen oma bruku nu, ayen de do ayen phiyọ uwodi, ayen de jurhi kẹ ohwo rọ rhẹrẹ ihwo rehẹ uwodi na nẹ ọ nabọ rhẹrẹ ayen. 24 Kidie nẹ e ji oka rẹ urhi ọtiọyen kẹ, o de do ayen phiyọ uwodi rọhẹ obevun, ọ da vwẹ igoni kanre awọ rayen.

25 Ẹkẹvuọvo vwẹ omarẹ uherevie ason, Pọl vẹ Sailas ke nẹrhovwo je so une vwo jiri Ọghẹnẹ, jẹ ihwo efa re mu phiyọ uwodi na kerhọ rayen. 26 Siẹvuọvo na otọ de kpogho gangan, te ẹdia rẹ ichivwo rẹ uwodi na de kpogho. Vwọba, ẹchẹ na eje de mu rhie siẹvuọvo, ejọnrọn ra vwọ kanre ohwo ọvuọvo da rhan. 27 Ọke rẹ ohwo rọ rhẹrẹ ihwo rehẹ uwodi na vwo vrẹn, rọ je vwọ mrẹ nẹ ẹchẹ rẹ uwodi na rhiephiyọ, o de yoro ọlọkọ rọyen phia, kọ guọnọ hwe oma rọyen, kidie o rorori nẹ ihwo re mu phiyọ uwodi na djẹ vabọ nure. 28 Ẹkẹvuọvo Pọl de kperi phia nẹ: “Wo hwe oma wẹ-ẹn, kidie avwanre eje hẹ etinẹ!” 29 Ọtiọyena ọ da tanẹ e mu urhukpẹ rhe, ọ da họrhọ ro evunrẹ uwodi na, oshọ de muo gangan, o de she teyen otọ vwẹ obaro ri Pọl vẹ Sailas. 30 Ọ da reyọ ayen ro otafe, ọ da tanẹ: “Ega, die yen mi che ru mi vwo vwo usivwin?” 31 Ayen da tanẹ: “Se Ọrovwori na Jesu gbuyota, ku wo vwo usivwin, wẹ vẹ evwruwevwin wẹn.” 32 Ọtiọyena, ayen da ta ota ri Jihova* kẹ vẹ ihwo eje rehẹ uwevwin rọyen. 33 Ọ da reyọ ayen vwẹ ason yena ra hworhẹ era rayen. Ọ vẹ evwruwevwin rọyen ejobi de bromaphiyame, ayen hwọke-e. 34 Ọ da reyọ ayen rhe uwevwin rọyen, o de mu emu phiyọ imẹjẹ kẹ ayen, ọ vẹ evwruwevwin rọyen eje da ghọghọ gangan kidie o se Ọghẹnẹ gbuyota asaọkiephana re.

35 Ọke vwo rhie, isun na de ji elọkpa rhe tanẹ: “Siobọnẹ eshare yena.” 36 Ọ rọ rhẹrẹ ihwo rehẹ evunrẹ uwodi na da vuẹ Pọl eta rayen na nẹ: “Isun na ji ihwo rhe nẹ e siobọnẹ ovwan ihwo ivẹ na. Ọtiọyena ovwan gba ro otafe rere ovwan yanran vwọrẹ ufuoma.” 37 Ẹkẹvuọvo Pọl da vuẹ ayen nẹ: “Ayen fa avwanre vwẹ azagba jẹ ọ dia e brorhiẹn hwe* avwanre-e dede nẹ avwanre ihwo ri Rom, ayen de do avwanre phiyọ uwodi. Kẹ ayen guọnọ bẹbẹ siobọnẹ avwanre? Ẹjo kakaka! E jẹ ayen komobọ rhe rhe reyọ avwanre phia.” 38 Elọkpa na da niyẹnrẹn rẹ eta nana vwọ kẹ isun na, oshọ de mu ayen gangan ọke rẹ ayen vwo nyo nẹ eshare na ihwo ri Rom. 39 Ọtiọyena ayen da rhe rhi yovwunu kẹ ayen, ọke rẹ ayen vwọ reyọ ayen phia nu, ayen da tanẹ ayen vrẹn nẹ orere na. 40 Ẹkẹvuọvo ọke rẹ ayen vwo vrẹn nẹ uwodi na nu, ayen de kpo uwevwin ri Lidia; ayen vwọ mrẹ iniọvo na, ayen de phiuduphiyọ ayen awọ, ayen da yanran.