Ukeri

16 Ọtiọyena Kora ọmọ rẹ Izha, ọmọ ri Kohat, ọmọ ri Livae de vrẹn, ọ vẹ Detan kugbe Abairam emọ rẹ Elayab, kugbe Ọn ọmọ ri Pilẹt rọ dia ọmọ ri Rubẹn. 2 Ayen vẹ eshare rẹ Izrẹl 250 re dia isun rẹ ọghwẹgbe na, ihwo ra sanere vwẹ ọghwẹgbe na, eshare ri titiri, de vrẹn vwọso Mosis. 3 Ọtiọyena ayen de siomakoko vwọso Mosis vẹ Erọn, ayen da ta kẹ ayen: “Ọ rẹ ovwan gan nọ re! Ọghwẹgbe na eje fonro, ayen eje, Jihova jehẹ ohri rayen. Kẹ diesorọ ovwan vwọ kparoma rẹ ovwan kpenu vwẹ ọghwẹgbe ri Jihova?”

4 Ọke rẹ Mosis vwo nyo ọnana, o de she bọvwọn opharo rhuotọ. 5 Ọtiọyena ọ da vuẹ Kora vẹ ihwo ri biẹcha: “Vwẹ urhiọke, Jihova che dje ohwo rọ dia ọrọyen phia, ohwo rọ fonro, ohwo ro che bro ra, kohwo kohwo rọ jẹre yen che bro ra. 6 Ovwan ru ọnana: Ovwan reyọ orọnvwọn ra vwọ torhẹ insẹnsi, Kora vẹ ovwan eje ri biẹcha, 7 rere ovwan ghwẹ erhanre phiyọ ayen, ovwan je ghwẹ insẹnsi phiyọ ayen vwẹ obaro ri Jihova vwẹ odẹ rọ cha na, ohwo rẹ Jihova jẹre, ọyen ohwo rọ fonro. Ọ rẹ ovwan emọ ri Livae na gan nọ re!”

8 Mosis da ta kẹ Kora: “Biko kerhọ, ovwan emọ ri Livae. 9 O rhe fiemu kẹ ovwan nẹ Ọghẹnẹ rẹ Izrẹl hẹriẹ ovwan vwo nẹ ọghwẹgbe rẹ Izrẹl, ọ da rhọnvwe kẹ ovwan nẹ we sikẹrẹ ọyen rere ovwan ruiruo rẹ ẹga rẹ itabanako ri Jihova ji mudia obaro rẹ ọghwẹgbe na rere ovwan gbodibo kẹ ayen, 10 nẹ ọ reyọ ovwan vẹ iniọvo rẹ ovwan eje re dia emọ ri Livae kẹrẹ oma? Kẹ ovwan je guọnọ reyọ ẹdia rẹ orherẹn na? 11 Fikirẹ ọnana, wẹ vẹ ihwo eje ri biẹcha wẹ na siomakoko vwọso Jihova. Vwọ kẹ Erọn, ono yen ọ hepha rẹ ovwan vwo guẹn hunhunhun kpahọn?”

12 Ọke vwọ yanran na, Mosis da vuẹ rhe Detan vẹ Abairam emọ rẹ Elayab nẹ ayen rhe, ẹkẹvuọvo ayen da ta: “Avwanre cha rhee! 13 Ọ ru wo ru avwanre na ji rhi te, ru wọ vwọ reyọ avwanre vwo nẹ otọ rọ djẹ ọkẹre rẹ ameivie vẹ ame ọnyọn rere wọ teyen avwanre hwe vwevunrẹ aton na? Asaọkiephana wọ je guọnọ reyọ oma wẹn vwo ru osun rọ ma kenu vwọ kẹ avwanre?* 14 Obo rọ hepha, wọ je rhe reyọ avwanre ro otọ vuọvo rọ djẹ ọkẹre rẹ ameivie vẹ ame ọnyọn yẹrẹ ku wọ kẹ avwanre udju vẹ ogba rẹ ivaini kerẹ ughwẹẹ. Wo che yoro ẹro rẹ eshare yena no? Avwanre cha rhee!”

15 Ọtiọyena ophu de mu Mosis gangan, ọ da ta kẹ Jihova: “Wo nẹ izobo rẹ eka rayeen. Me je rhe reyọ ekẹkẹtẹ vuọvo mie ayen yẹrẹ so omaẹwan kẹ ọvo vwẹ usun rayeen.”

16 Ọtiọyena Mosis da ta kẹ Kora: “Wẹ vẹ ihwo ri biẹcha wẹ vwomaphia vwẹ obaro ri Jihova vwẹ odẹ rọ cha na, wẹwẹ vẹ ayen kugbe Erọn. 17 Ohwo ọvuọvo me reyọ orọnvwọn rọyen rọ vwọ torhẹ insẹnsi rere ọ ghwẹ insẹnsi phiyọ, ohwo ọvuọvo me vwẹ orọnvwọn rọyen rọ vwọ torhẹ insẹnsi phia vwẹ obaro ri Jihova, erọnvwọn ra vwọ torhẹ insẹnsi 250, ọtiọyen ji te we vẹ Erọn, ohwo ọvuọvo vẹ orọnvwọn rọyen rọ vwọ torhẹ insensi.” 18 Ọtiọyena ayen ohwo ọvuọvo da reyọ orọnvwọn rọyen rọ vwọ torhẹ insẹnsi, ayen de phi erhanre vẹ insẹnsi phiyọ ayen, ayen de mudia asan ra wan rua utughẹ ra da vwoma na, ayen vẹ Mosis kugbe Erọn. 19 Kora vwo koko ihwo ri biẹcha na vwọso ayen vwẹ asan ra wan rua utughẹ ra da vwoma na, urinrin ri Jihova da vwomaphia kẹ ọghwẹgbe na eje.

20 Jihova da ta kẹ Mosis vẹ Erọn: 21 “Ovwan hẹrioma rẹ ovwan vwo nẹ ohri rẹ ẹko nana, rere me sa vwọ ghwọrọ ayen ichichiyin na.” 22 Ọtiọyena ayen de she bọvwọn opharo rhuotọ, ayen da ta: “E Ọghẹnẹ, Ọghẹnẹ rẹ ẹwẹn rẹ ihwo eje,* umwemwu rẹ ohwo ọvo kọyen cha nẹrhẹ wo muophu gangan kpahen ọghwẹgbe na eje?”

23 Jihova da ta kẹ Mosis: 24 “Ta ota kẹ ọghwẹgbe na rere wọ vuẹ ayen nẹ, ‘Ovwan vrẹn nẹ asan rẹ itughẹ ri Kora, Detan, kugbe Abairam hepha!’”

25 Ọtiọyena Mosis de vrẹn, o de bru Detan vẹ Abairam ra, ekpako rẹ Izrẹl nenire. 26 Ọ da ta kẹ ọghwẹgbe na: “Biko, ovwan bioma nẹ itughẹ rẹ ihwo umwemwu nana, we djobọte emu vuọvo rọ dia ọrayeen, rere e vwo jẹ ovwan ehwerhe kuẹfia vwẹ umwemwu rayen eje.” 27 Ugege yena ayen de vrẹn nẹ asan rẹ itughẹ ri Kora, Detan, kugbe Abairam hepha. Detan vẹ Abairam da yan phia, ayen de mudia anurhoro rẹ itughẹ rayen, ayen vẹ eya rayen, emọ rayen emeshare, kugbe imitete rayen.

28 Ọtiọyena Mosis da ta: “Womarẹ ọnana yen ovwan cha vwọ riẹn nẹ Jihova yen ji vwe nẹ mi ru erọnvwọn nana eje, nẹ ọ dia ẹwẹn robọ mẹ* yen mi vwo ruẹ ayeen: 29 Ihwo nana de ghwu oka rẹ ughwu rẹ ihwo eje ghwẹ, ojaẹriọ rayen da je dia ọvuọvo kerẹ ọ rẹ ihworakpọ eje, kọyen ọ dia Jihova yen ji vwee. 30 Ẹkẹvuọvo Jihova de ru obo ri gbe ohwo unu kpahen ayen, otọ na de rhiephiyọ* ji mu ayen vẹ erọnvwọn eje rẹ ayen vwori rọ, ayen da ro otọ ọkpokpọ yanran kpo evun rẹ Ushi,* kẹ ovwan cha ghene riẹn nẹ eshare nana muọghọ kẹ Jihovaa.”

31 Ugege rọ vwọ ta eta nana eje nu, otọ rẹ ayen mudia na da bẹre rhiephiyọ. 32 Otọ na de rhiephiyọ,* o de mu ayen rọ vẹ evwruwevwin rayen kugbe ihwo eje re ka ẹbẹre ri Kora vẹ ekuakua rayen eje. 33 Ọtiọyena ayen vẹ ihwo eje re ka ẹbẹre rayen da ro otọ ọkpokpọ kpo evun rẹ Ushi,* otọ na de rhurhu ayen, ọtiọyena ayen da ghwọrọ vwo nẹ ohri rẹ ọghwẹgbe na. 34 Ihwo rẹ Izrẹl eje re riariẹ ayen phiyọ da djẹ ọke rẹ ayen vwo kperẹ, kidie ayen tare: “Oshọ muẹ avwanre nẹ otọ na se mu avwanre rọ!” 35 Erhanre de nẹ obọ ri Jihova rhe, ọ da torhẹ eshare 250 re torhẹ insẹnsi na.

36 Asaọkiephana Jihova da ta kẹ Mosis: 37 “Vuẹ Ẹlieza ọmọ rẹ Erọn orherẹn na nẹ ọ reyọ orọnvwọn ra vwọ torhẹ insẹnsi na nẹ erhanre na, kidie ayen fonro. Je vuẹ nẹ ọ hra erhanre na vwẹ asan ro sherabọ emerha. 38 E jẹ a vwẹ erọnvwọn ra vwọ torhẹ insẹnsi rẹ eshare ri ru umwemwu rọ nẹrhẹ ayen ghwu* na vwo ru imize ephẹphẹghẹ vwọ phare agbada na, kidie ayen vwẹ ayen phia vwẹ obaro ri Jihova, ọtiọyena ayen da rhe dia fuanfon. E jẹ ayen dia kerẹ oka vwọ kẹ ihwo rẹ Izrẹl.” 39 Ọtiọyena Ẹlieza orherẹn na da reyọ erọnvwọn ra vwọ torhẹ insẹnsi ra vwẹ ẹrovwo vwo ru rẹ ihwo rẹ erhanre torhẹre na vwọ phia jovwo na, o de duvwun ayen vwọ phare agbada na, 40 kirobo rẹ Jihova vuẹrẹ womarẹ Mosis. Ọyen ẹkarophiyọ vwọ kẹ ihwo rẹ Izrẹl nẹ e jẹ ohwo vuọvo ra rhọnvwe kẹẹ* rọ dia ọmọ rẹ Erọnii yancha rhe torhẹ insẹnsi vwẹ obaro ri Jihovaa, e jẹ ohwo vuọvo je dia kerẹ Kora vẹ ihwo ri bicha naa.

41 Vwẹ ẹdẹ rọ vwọ kpahọn, ọghwẹgbe rẹ ihwo rẹ Izrẹl eje ki guẹn hunhunhun kpahan Mosis vẹ Erọn, ayen da ta: “Ovwan ihwo ivẹ na teyen ihwo ri Jihova hwe re.” 42 Ọke rẹ ọghwẹgbe na vwo koko vwọso Mosis vẹ Erọn nu, ayen de kuomarhẹriẹ hirhe opharo ku utughẹ ra da vwoma na, nighere! evwru na rhurhiro, urinrin ri Jihova da vwomaphia.

43 Mosis vẹ Erọn de rhi mudia obaro rẹ utughẹ ra da vwoma na, 44 Jihova da ta kẹ Mosis: 45 “Ovwan sioma rẹ ovwan vwo nẹ ohri rẹ ọghwẹgbe nana rere me ghwọrọ ayen ichichiyin na.” Ọtiọyena ayen de she bọvwọn opharo rayen rhuotọ. 46 Mosis da ta kẹ Erọn: “Reyọ orọnvwọn ra vwọ torhẹ insẹnsi na rere wọ ghwẹ erhanre nẹ agbada na phi phiyọ, wọ me je ghwẹ insẹnsi phiyọ rere wọ yanran kpakpata bru ọghwẹgbe na ra rere wo ru arhuẹrẹ fiki rayen, kidie Jihova muophu re, ọtiekọ na tonphiyọ re!” 47 Ugege yena, Erọn da reyọ kirobo rẹ Mosis tare, ọ da djẹ ro ohri rẹ ọghwẹgbe na, nighere! ọtiekọ na tonphiyọ vwẹ ohri rẹ ihwo na re. Ọtiọyena ọ da ghwẹ insẹnsi na phiyọ orọnvwọn ra vwọ torhẹ insẹnsi na, ko ruẹ arhuẹrẹ fikirẹ ihwo na. 48 O de mudia uvwre rẹ irivwin na vẹ ihwo rehẹ akpọ, ukuotọ rọyen ọtiekọ na da dobọji. 49 Ihwo rẹ ọtiekọ na hweri da dia 14,700, vwọ vrẹ ihwo ri ghwuru fikirẹ Kora. 50 Ọke rẹ Erọn vwo rhivwin bru Mosis ra vwẹ asan ra wan rua utughẹ ra da vwoma na, jẹ ọtiekọ na dobọji re.