Ẹvwọphia ri Jọn
17 Ọvo vwẹ usun rẹ emekashe ighwrẹn ri vwo imize ighwrẹn na da rhe, ọ da ta kẹ vwẹ nẹ: “Yanrhe, mi che dje orhiẹn re bru hwe igberadja rode na ro chidia enu rẹ ame buebun na kẹ wẹ, 2 ohwo rẹ ivie rẹ akpọ na nene gbe ọfanrhiẹn,* rẹ ihwo rehẹ akpọ na da iwaini rẹ ọfanrhiẹn* rọyen vroma.”
3 Ọ da vwẹ ẹgba rẹ ẹwẹn na vwo mu vwe ro evunrẹ aton ọvo. Me da mrẹ aye ọvo ro chidia enu rẹ eranvwe rẹ aghwa ọvo rọ pha vwavware, rọ vọnre vẹ edẹ rẹ ẹgua, ro ji vwo iyovwin ighwrẹn kugbe idjo ihwe. 4 Aye na ku ewun ro vwo ikọlọ rẹ ipọpo kugbe ọ rẹ ọvwavware phiyọ, ọ ghwẹ oro kugbe eragha eghanghanre kugbe ivie eghanghanre* phiyọ, ọ yọnrọn uko rẹ oro rọ vọnre vẹ erọnvwọn ri tuẹn ohwo oma kugbe erọnvwọn ri jẹfuọn rẹ ọfanrhiẹn* rọyen. 5 E si odẹ ọvo phiyọ arhare rọyen, odẹ na igbunu: “Babilọn Rode na, oni rẹ igberadja na kugbe ọ rẹ erọnvwọn ri tuẹn ohwo oma rẹ akpọ na.” 6 Me da mrẹ nẹ aye na da ọbara rẹ ihwo efuanfon na kugbe ọbara rẹ iseri ri Jesu vroma.
Ọke me vwọ mrẹ, o gbevwunu mamọ. 7 Ọtiọyena amakashe na da ta kẹ vwẹ nẹ: “Diesorọ o vwo gbe we unu? Me cha vuẹ wẹ igbunu rẹ aye na kugbe ọ rẹ eranvwe rẹ aghwa ro muro na, ro vwo iyovwin ighwrẹn kugbe idjo ihwe na: 8 Eranvwe rẹ aghwa ru wọ mrẹre na herọ jovwo, ẹkẹvuọvo ọ rha herọ-ọ, dedena ọ guọnọ nẹ ukpotọ ro jẹ oba evwo na cha, ko che kpo oghwọrọ. O che gbe ihwo re dia akpọ na unu, ihwo rẹ odẹ rayen je rhe dia ukpirhin ọbe na vwo nẹ ọtonphiyọ rẹ akpọ na rhe-e, ọke rẹ ayen da mrẹ oborẹ eranvwe rẹ aghwa na vwọ herọ jovwo, ẹkẹvuọvo ọ rha herọ-ọ, dedena ọ cha rhoma dia.
9 A guọnọ aghwanre e ki se vwo ẹruọ rẹ ọnana: Iyovwin ighwrẹn na mudiaphiyọ igbenu ighwrẹn rẹ aye na chidia enu rayen. 10 Ivie ighwrẹn yen herọ: Iyorin she re, ọvo herọ enẹna, ọ ro chekọ na je rhe-e; ẹkẹvuọvo ọke rọ da rhe, ọmọke krẹn yen ọ cha dia. 11 Eranvwe rẹ aghwa rọ herọ jovwo ẹkẹvuọvo rọ rha herọ-ọ na, ọyen jẹ ovie rẹrenren, ẹkẹvuọvo evunrẹ ighwrẹn na yen o nurhe, o de kpo oghwọrọ.
12 Idjo ihwe ru wọ mrẹre na mudiaphiyọ ivie ihwe ra je rhe vwẹ uvie kẹ-ẹ, ẹkẹvuọvo a kẹ ayen ogangan kerẹ ivie vwẹ unọke ọvo vẹ eranvwe rẹ aghwa na. 13 Enana vwo iroro ọvo, ọtiọyena ayen da vwẹ ẹgba kugbe ogangan rayen vwọ kẹ eranvwe rẹ aghwa na. 14 Enana che nene Omogodẹ na họnre, ẹkẹvuọvo kidie nẹ ọyen Ọrovwori rẹ irivwori kugbe Ovie rẹ ivie, Omogodẹ na che phi ayen kparobọ. Vwọba, ihwo re vẹ ọyen gba herọ re seri ra jẹreyọ re je fuevun ji che ru ọtiọyen.”
15 Ọ da ta kẹ vwẹ nẹ: “Ame ru wọ mrẹre na rẹ igberadja na chidia enu rọyen na mudiaphiyọ ihwo kugbe otu buebun kugbe ẹgborho kugbe ẹrẹnvwe.* 16 Idjo ihwe ru wọ mrẹre kugbe eranvwe rẹ aghwa na, enana che vwo utuoma kpahen igberadja na, ayen cha kua fiotọ je banphiyọ, ayen cha re uvwo rọyen je vwẹ erhanre torhẹ karekare. 17 Kidie Ọghẹnẹ phiro phiyọ ubiudu rayen rẹ ayen vwo ru nene iroro rọyen, e, rẹ ayen vwo ru nene iroro ọvuọvo rẹ ayen vwori rẹ ayen vwọ vwẹ uvie rayen vwọ kẹ eranvwe rẹ aghwa na, bẹsiẹ rẹ eta rẹ Ọghẹnẹ na che vwo rugba. 18 Aye ru wọ mrẹre na mudiaphiyọ orere rode na ro vwo uvie vwẹ enu rẹ ivie rẹ akpọ na.”