Ẹyano
14 Asaọkiephana Jihova da ta kẹ Mosis: 2 “Vuẹ ihwo rẹ Izrẹl nẹ ayen kuomarhẹriẹ rere ayen wonphiyọ* obaro ri Paihahairọt, vwẹ uvwre ri Migdọl kugbe abadi na, asan ra da kparo mrẹ Bel-zifọn. Ovwan mi wonphiyọ asan rọ kẹrẹ abadi na, jẹ ovwan hirharokuo. 3 Ọke yena Fero kọ cha ta kpahen ihwo rẹ Izrẹl: ‘Ayen beghe vwọrẹ otighi vwẹ otọ na. Aton na ke ayen dje re.’ 4 Me cha vwẹ uphẹn kẹ ubiudu ri Fero rere ọ dia gangan, kọ cha vwọtua ayen, ke me cha vwẹ urinrin kẹ oma mẹ womarẹ Fero kugbe otuofovwin rọyen ejobi; ihwo rẹ Ijipt ke cha ghene riẹn nẹ mẹvwẹ yen Jihova.” Ọtiọyen kọyen ayen ruru.
5 Ọke vwọ yan obaro, a da niyẹnrẹn kẹ ovie rẹ Ijipt nẹ ihwo na djẹ re. Ugege yena, Fero vẹ idibo rọyen de wene ẹwẹn rayen kpahen ihwo na, ayen da ta: “Diesorọ avwanre vwo ru ọnana, rẹ avwanre vwo siobọnu ihwo rẹ Izrẹl re wian kẹ avwanre kerẹ eviẹn?” 6 Ọtiọyena o de muegbe rẹ ekpẹrẹ rẹ ofovwin rọyen, ọ da reyọ ihwo rọyen nene oma. 7 Ọ da reyọ ekpẹrẹ 600 rọ sanere kugbe ekpẹrẹ rẹ Ijipt ri chekọ eje vẹ egba ofovwin vwẹ enu rẹ akpẹrẹ ọvuọvo. 8 Ọtiọyena Jihova da vwẹ uphẹn kẹ ubiudu ri Fero ovie rẹ Ijipt nẹ ọ dia gangan, ọ da vwọtua ihwo rẹ Izrẹl, jẹ ihwo rẹ Izrẹl yanran vwọrẹ uduefiogbere.* 9 Ihwo rẹ Ijipt na da vwọtua ayen, iyesi ri Fero re churu ekpẹrẹ si ejobi vẹ isodje rọyen re gua iyesi kugbe otuofovwin rọyen ki siẹkẹrẹ ayen ọke rẹ ayen vwo wonphiyọ asan rọ kẹrẹ abadi na vwẹ Paihahairọt, ro hirharoku Bel-zifọn.
10 Ọke rẹ Fero vwo sikẹrẹ ayen, ihwo rẹ Izrẹl da kpare ẹro rayen, ayen da mrẹ ihwo rẹ Ijipt re vwọtua ayen. Oshọ de mu ihwo rẹ Izrẹl, kẹ ayen kperẹ se Jihova. 11 Ayen da ta kẹ Mosis: “Kidie nẹ asan re shẹ ihwo phiyọ hẹ evunrẹ Ijiptii kọyensorọ wọ vwọ reyọ avwanre rhe etinẹ rhi ghwu vwẹ aton na? Die yen wo ru avwanre na, ru wo vwo sun avwanre nẹ Ijipt? 12 Ọ dia orọnvwọn vuọvo nana yen avwanre vuẹ wẹ vwẹ Ijipt ọke rẹ avwanre vwọ tanẹ, ‘Yanjẹ avwanre vwo rere avwanre ga ihwo rẹ Ijipt’? Kidie o yovwirin rẹ avwanre vwọ ga ihwo rẹ Ijipt vwọ vrẹ ọ rẹ avwanre vwo ghwu vwevunrẹ aton na.” 13 Ọtiọyena Mosis da ta kẹ ihwo na: “Ovwan djoshọọ. Ovwan mudia gan rere ovwan mrẹ oborẹ Jihova che sivwin ovwan wan nonẹna. Kidie ihwo rẹ Ijipt rẹ ovwan mrẹ nonẹna, ovwan rha cha mrẹ ayen ọfaa. 14 Jihova komobọ cha họnre kẹ ovwan, ovwan che hwomamu.”
15 Asaọkiephana Jihova da ta kẹ Mosis: “Diesorọ wo vwo kperẹ se vwe? Vuẹ ihwo rẹ Izrẹl nẹ ayen vrẹn nẹ asan rẹ ayen wonphiyọ na. 16 Vwọ kẹ wẹ, kpare ọkpọ wẹn rere wọ rionbọ wẹn phiyọ enu rẹ abadi na rere wọ gharọ, ihwo rẹ Izrẹl sa vwọ wan uherevie rẹ abadi na vwẹ otọ ọyaya. 17 Vwọ kẹ vwẹ, me cha vwẹ uphẹn vwọ kẹ ubiudu rẹ ihwo rẹ Ijipt re vwọ dia gangan, rere ayen vwọ ro evun rọyen nene ayen; ọtiọyena ke me cha vwẹ urinrin kẹ oma mẹ womarẹ Fero vẹ otuofovwin rọyen eje, ekpẹrẹ rẹ ofovwin rọyen, kugbe isodje rọyen re gua iyesi. 18 Ihwo rẹ Ijipt ke cha ghene riẹn nẹ mẹvwẹ yen Jihova, ọke me da vwẹ urinrin kẹ oma mẹ womarẹ Fero, ekpẹrẹ rẹ ofovwin rọyen, kugbe isodje rọyen re gua iyesi.”
19 Ọtiọyena amakashe rẹ Ọghẹnẹ rẹ uyota na rọ kobaro kẹ ọghwẹgbe rẹ Izrẹl da kparoma, o de kpo obuko rayen, evwru na rọhẹ obaro rayen de kpo obuko, ọ da domaji vwẹ obuko rayen. 20 Ọtiọyena ọ da dia uvwre rẹ ihwo rẹ Ijipt vẹ ihwo rẹ Izrẹl. Vwẹ ẹbẹre ọvo, ọ da rhe dia evwru ro muebri. Vwẹ ẹbẹre ro chekọ, ọ da vwẹ orẹmrẹ phia vwẹ ason na. Ọtiọyena ẹbẹre ọvo rhe sikẹrẹ ẹbẹre ro chekọ vwẹ ason yena ejee.
21 Asaọkiephana Mosis da riẹn obọ rọyen phiyọ enu rẹ abadi na; Jihova da reyọ odju ọgangan ro nẹ ẹbẹre ọnre va nẹcha na rhe vwo dju ame rẹ abadi na rhivwin vwẹ ason yena eje, ọ da nẹrhẹ abadi na hirhephiyọ otọ ọyaya, ame na da ghare oma. 22 Ọtiọyena ihwo rẹ Izrẹl da wan uherevie rẹ abadi na vwẹ otọ ọyaya, ame na da họhọ igbẹhẹ vwẹ obọrhen vẹ obohwẹre rayen. 23 Ihwo rẹ Ijipt da vwọtua ayen, iyesi ri Fero eje vẹ ekpẹrẹ rẹ ofovwin rọyen kugbe isodje rọyen re gua iyesi, ke vwọ kpahan ayen rua evunrẹ abadi na. 24 Vwẹ orhẹrẹ rẹ urhiọke na,* Jihova de ni ihwo rẹ Ijipt vwo nẹ erhanre kugbe evwru na, o de phi otighi phiyọ ohri rẹ ihwo rẹ Ijipt. 25 Ko yoro idjugẹn rẹ akpẹrẹ rẹ iyesi rayen no rere ọ vwọ dia bẹnbẹn rẹ ayen vwọ djẹ ayen, ihwo rẹ Ijipt na ke ta: “E jẹ avwanre djẹ nẹ asan rẹ ihwo rẹ Izrẹl hepha, kidie Jihova họnra kẹ ayen vwọsua ihwo rẹ Ijipt.”
26 Jihova da ta kẹ Mosis: “Rionbọ wẹn phia vwẹ enu rẹ abadi na rere ame na vwo rhivwin rhi rhurhu ihwo rẹ Ijipt, ekpẹrẹ rẹ ofovwin rayen, kugbe isodje rayen re gua iyesi.” 27 Ugege yena Mosis da rionbọ rọyen phia vwẹ enu rẹ abadi na, ọke vwo rhie cha re, abadi na de rhivwin kpo obo rọ hepha jovwo. Ọke rẹ ihwo rẹ Ijipt vwọ djẹ kẹ, Jihova de do ihwo rẹ Ijipt na phiyọ evunrẹ abadi na. 28 Ame na ro rhivwin cha na de rhurhu ekpẹrẹ rẹ ofovwin na vẹ isodje re gua iyesi kugbe otuofovwin ri Fero eje ri nene ayen ro abadi na. Ọvuọvo dede sivwin rhọọ.
29 Ẹkẹvuọvo ihwo rẹ Izrẹl da yan vwẹ otọ ọyaya vwẹ otọ rẹ abadi na, ame na da rhe họhọ igbẹhẹ vwẹ obọrhen vẹ obohwẹre rayen. 30 Ọtiọyena Jihova de sivwin Izrẹl vwẹ ẹdẹ yena vwo nẹ obọ rẹ ihwo rẹ Ijipt, Izrẹl da mrẹ ihwo rẹ Ijipt ri ghwuru vwẹ orhoma rẹ abadi na. 31 Izrẹl je mrẹ ẹgba* rode rẹ Jihova vwọ họnre ihwo rẹ Ijipt na, ihwo na ke djoshọ rẹ Jihova, ayen de vwo esegbuyota kpahen Jihova kugbe odibo rọyen Mosis.