Ukeri

11 Asaọkiephana ihwo na ki brenu mamọ vwẹ obaro ri Jihova. Ọke rẹ Jihova vwo nyo, ophu rọyen da tua, erhanre ro nẹ obọ ri Jihova rhe kọ tuan vwẹ ohri rayen, ọ da torhẹ evo vwẹ ughere rẹ asan rẹ ayen wonphiyọ* na. 2 Ọke rẹ ihwo na vwo kperẹ se Mosis, ọ da rẹ Jihova, erhanre na de fun. 3 Ọtiọyena e de se asan na Tabẹra,* kidie erhanre ro nẹ obọ ri Jihova rhe tuanre vwẹ ohri rayen.

4 Otu buebun rẹ ihwo sansan* rehẹ ohri rayen de dje urhurusivwe romobọ rayen phia, ihwo rẹ Izrẹl da rhoma tuẹn oviẹ phiyọ, ayen da ta: “Ono yen cha kẹ avwanre eranvwe re? 5 Avwanre nabọ karophiyọ iyerin rẹ avwanre ria ọphẹ vwẹ Ijipt, ọtiọyen ji te ikukumba, iwọtamelọni, iliki, ituta, kugbe igaliki! 6 Ẹkẹvuọvo asaọkiephana ẹgba rhe rhe avwanree.* Avwanre rha mrẹ emu vuọvoo jokparẹ imana nana.”

7 Obo rọ hepha, imana na pha kerẹ ubi ri kọrianda, ọ họhọ igọmu ri dẹliọm.* 8 Ihwo na me hrabọ ra tọrọ, ayen me vwẹ ikuta robọ vwọ lọ yẹrẹ vwẹ odo vwo duvwon. Ayen me vwẹ ipọtu vwo chere yẹrẹ reyọ vwo ru ibrẹdi re pha ghorien ghorien, avwerhen rọyen pha kerẹ ikeki ọvwevwerhen ra vwẹ evwri gua. 9 Ọke rẹ irho na de tue vwẹ asan rẹ ayen wonphiyọ na vwẹ ason, imana na me je rhọ kuo.

10 Mosis de nyo edo rẹ ihwo na re viẹ, korua korua, kohwo kohwo vwẹ anurhoro rẹ utughẹ rọyen. Ophu de mu Jihova gangan, ivun de ji miovwo Mosis mamọ. 11 Ọtiọyena Mosis da ta kẹ Jihova: “Diesorọ wo vwo gboja kẹ odibo wẹn? Diesorọ mi vwo jẹ ẹroesiri wẹn ẹmrẹ, ru wo vwo mu oghwa rẹ ihwo nana eje nyẹ vwẹ? 12 Mẹvwẹ yen mrevun rẹ ihwo nana eje? Mẹvwẹ yen vwiẹ ayen, ru wọ vwọ vuẹ vwẹ nẹ, ‘Mu ayen phiyọ obọ wẹn kirobo rẹ odibo* muẹ ọmọ ra vwẹ evie kẹ,’ vwo kpo otọ ru wo duvwun iyorin nẹ wọ cha vwọ kẹ esẹ rayen ride? 13 Tivọ me da cha mrẹ eranvwe re me cha vwọ kẹ ihwo nana eje? Kidie ayen viẹ hwe vwe nẹ, ‘Kẹ avwanre eranvwe re!’ 14 Mẹvwẹ ọvo che se mu oghwa rẹ ihwo nana ejee; ọ rho nọ kẹ vwẹ. 15 Ọ da dianẹ ọtiọna yen wo che ru vwe, biko teyen ovwẹ hwe asaọkiephana. Ọ da dianẹ me mrẹ ẹroesiri wẹn re, wo juvwe mrẹ okpetu ọfaa.”

16 Jihova da kpahen kẹ Mosis: “Koko eshare 70 kẹ vwẹ vwo nẹ ekpako rẹ Izrẹl, eshare ru wọ mrẹvughe nẹ ayen* ekpako kugbe inotu rẹ ihwo na, wọ me reyọ ayen kpo utughẹ ra da vwoma na, rere wẹ vẹ ayen mudia etiyin. 17 Mi che wontọ rhi nene uwe ta ota vwẹ etiyin, ke me cha reyọ evo vwẹ usun rẹ ẹwẹn rọhẹ oma wẹn, ki mi che phio phiyọ oma rayen, kẹ ayen cha vwẹ ukẹcha kẹ wẹ vwo mu oghwa rẹ ihwo na, rere wẹwẹ ọvo vwo je muo. 18 Wọ me vuẹ ihwo na nẹ, ‘Ovwan ru oma rẹ ovwan fon hẹrhẹ odẹ rọ cha na, ovwan cha ghene re eranvwe kidie Jihova nyo oviẹ rẹ ovwan rẹ ovwan vwọ ta: “Ono yen cha kẹ avwanre eranvwe re? Ekuakua shephiyọ kẹ avwanre vwẹ Ijipt.” Vwọrẹ imuẹro, Jihova cha kẹ ovwan eranvwe, kẹ ovwan cha re. 19 Ovwan cha riọ, ọ dia ẹdẹ ọvo yẹrẹ ẹdẹ ivẹ yẹrẹ ẹdẹ iyorin yẹrẹ ẹdẹ ihwe yẹrẹ ẹdẹ ujee, 20 ẹkẹvuọvo vwẹ ọsoso rẹ emeranvwe ọvo, bẹsiẹ rọ vwọ wan iwen rẹ ovwan rhe je dia emu rẹ utuoma kẹ ovwan, kidie ovwan sen Jihova, ohwo rọhẹ ohri rẹ ovwan na, kẹ ovwan viẹ hwe, rẹ ovwan vwọ ta: “Diesorọ avwanre vwo vrẹn nẹ Ijipt?”’”

21 Ọtiọyena Mosis da ta: “Ihwo re me hẹ ohri rayen na eshare 600,000 re vwẹ owọ yan, jẹ owẹwẹ komobọ tare nẹ, ‘Me cha vwẹ eranvwe kẹ ayen, kẹ ayen cha re evun vọn vwẹ ọsoso rẹ emeranvwe ọvo’! 22 E de hwe ọsoso rẹ ichuru rẹ igodẹ vẹ erhuẹn, i che te ayen re? Yẹrẹ e de mu iyerin na eje rehẹ evunrẹ abadi na, i che te ayen re?”

23 Ọtiọyena Jihova da ta kẹ Mosis: “Obọ ri Jihova krẹ nọ? Asaọkiephana wọ cha mrẹ sẹ obo re me tare na cha phia kẹ wẹ yẹrẹ ọ cha phiaa.”

24 Ọtiọyena Mosis da yanran ra ta eta ri Jihova kẹ ihwo na. O de koko eshare 70 vwo nẹ ekpako rẹ ihwo na, ọ da vwẹ ayen vwo mudia riariẹ utughẹ na phiyọ. 25 Jihova de wontọ rhe vwevunrẹ evwru, ọ da ta ota kẹ, ọ da reyọ evo vwẹ usun rẹ ẹwẹn rọhẹ oma rọyen na, o de phio phiyọ oma rẹ ọvuọvo rẹ ekpako 70 na. Ugege rẹ ẹwẹn na vwọ ro oma rayen, kẹ ayen ruẹ kerẹ emraro,* ẹkẹvuọvo ayen rhe ruo ọfaa.

26 O vwo eshare ivẹ vwẹ usun rayen re jehẹ asan rẹ ayen wonphiyọ na. Edẹ rayen Ẹldad vẹ Midad. Ẹwẹn na kọ rua ayen oma kidie ayen hẹ usun rẹ ihwo re si edẹ rayen phiyotọ, ẹkẹvuọvo ayen ro otafe vwo kpo asan utughẹ naa. Ọtiọyena kẹ ayen ruẹ kerẹ emraro vwẹ asan rẹ ayen wonphiyọ na. 27 Eghene ọshare ọvo da djẹ yanran ra niyẹnrẹn kẹ Mosis: “Ẹldad vẹ Midad ruẹ kerẹ emraro vwẹ asan re wonphiyọ na!” 28 Ọtiọyena Joshua ọmọ ri Nọn rọ dia odibo ri Mosis nẹ ọke eghene rọyen rhe da kpahen, rọ vwọ ta: “Ọrovwovwe Mosis, dobọ rayen ji!” 29 Ẹkẹvuọvo Mosis da ta kẹ: “Wọ rioma fiki mẹ? Ẹjo, mane kẹ ihwo ri Jihova eje sa dia emraro rere Jihova phi ẹwẹn rọyen phiyọ oma rayen!” 30 Ọyena vwọ wan nu, Mosis vẹ ekpako rẹ Izrẹl na de rhivwin kpo asan rẹ ayen wonphiyọ na.

31 Odju ọvo ro nẹ obọ ri Jihova rhe ko djuẹ ikueli nẹ abadi na cha je nẹrhẹ ayen she riariẹ asan rẹ ayen wonphiyọ na, vwẹ omarẹ oyan rẹ ẹdọke ọvo vwẹ ẹbẹre nana kugbe oyan rẹ ẹdọke ọvo vwẹ ẹbẹre ro chekọ na riariẹ asan rẹ ayen wonphiyọ na, ayen ma kpenu te omarẹ kubit* ivẹ vwo nẹ otọ na. 32 Ọtiọyena vwẹ ẹdẹ yena eje kugbe ason na eje kugbe ẹdẹ rọ vwọ kpahọn, ihwo na de muomaphiyọ ekoko rẹ ikueli na. O vwo ohwo vuọvo ro koko hanvwe vrẹ homa* ihwee, kẹ ayen vwẹ ayen vwọ hwa otọ riariẹ asan rẹ ayen wonphiyọ na vwọ kẹ oma rayen. 33 Eranvwe na je vwọ hẹ akon rayen, tavwen ayen ke sa riọ, ophu ri Jihova da tua kpahen ihwo na, Jihova kọ ghwiẹ ihwo na vẹ oghwọrọ rode.

34 Ọtiọyena ayen de se asan na Kibrọt-hateava,* kidie etiyin ayen shi ihwo ri dje urhurusivwe romobọ phia phiyọ. 35 Vwo nẹ Kibrọt-hateava, ihwo na de kpo Hazirọt, ayen da dia Hazirọt.