Diutaronomi

31 Ọtiọyena Mosis da yanran ra ta eta nana kẹ Izrẹl eje, 2 ọ da ta kẹ ayen: “Mẹ hẹ ẹgbukpe 120 nonẹna. Mi rhe che se sun ovwaan, kidie Jihova vuẹ vwẹ nẹ, ‘Wọ cha shariẹ Jọdan nana vrẹẹ.’ 3 Jihova Ọghẹnẹ rẹ ovwan yen cha kobaro kẹ ovwan vwọ shariẹ vrẹ, ọyen komobọ yen cha ghwọrọ ẹgborho nana rehẹ obaro rẹ ovwan na, kẹ ovwan cha djẹ ayen yanran. Joshua yen ohwo rọ cha reyọ ovwan vwọ shariẹ vrẹ kirobo rẹ Jihova tare. 4 Jihova che ru ayen kirobo ro ru Saihọn vẹ Ọg, ivie rẹ ihwo rẹ Amọ, kugbe etọ rayen ọke rọ vwọ ghwọrọ ayen. 5 Jihova che phi ayen kparobọ vwọ kẹ ovwan, ovwan mi ru ayen vwo nene iji na eje re me vwọ kẹ ovwan. 6 Ovwan fiudugberi rere ovwan goma. Ovwan djoshọ yẹrẹ phariẹ vwẹ obaro rayeen, kidie Jihova Ọghẹnẹ rẹ ovwan vẹ ovwan yen gba yanran na. Ọ cha yanjẹ ovwan vwo yẹrẹ kpairoro vrẹ ovwaan.”

7 Mosis de se Joshua, o da ta kẹ vwẹ irharo rẹ Izrẹl eje: “Fiudugberi rere wọ goma, kidie wẹ yen ohwo rọ cha reyọ ihwo nana ro otọ rẹ Jihova duvwun iyorin rọyen kẹ esẹ rayen ride nẹ ọyen cha vwọ kẹ ayen, ku wọ cha vwọ kẹ ayen kerẹ uku. 8 Jihova yen ohwo rọ kobaro kẹ ovwan na, ọ vẹ ovwan cha dia ọkieje. Ọ cha yanjẹ ovwan vwo yẹrẹ kpairoro vrẹ ovwaan. Ovwan djoshọ yẹrẹ phariẹẹ.”

9 Ọtiọyena Mosis de si Urhi nana phiyotọ, ọ da vwọ kẹ irherẹn na, ihwo ri Livae ri muẹ ekpeti rẹ ọphọ ri Jihova na, kugbe ekpako rẹ Izrẹl eje. 10 Mosis da vwẹ iji kẹ ayen, ọ da ta: “Vwẹ oba rẹ ikpe ighwrighwrẹn vwẹ ọke re bruphiyọ vwẹ ukpe rẹ obọesiono na, vwẹ uvwre rẹ ọke rẹ Orẹ rẹ Itughẹ* na, 11 ọke rẹ Izrẹl eje da vwomaphia vwẹ obaro ri Jihova Ọghẹnẹ rẹ ovwan vwẹ asan rọ sanere, wo mi se Urhi nana vwọ kẹ Izrẹl eje nyo. 12 Koko ihwo na, eshare, eya, emọ,* kugbe erhorha rehẹ irere* rẹ ovwan, rere ayen sa vwọ kerhọ ji yono kpahen Jihova Ọghẹnẹ rẹ ovwan je djoshọ rọyen, ayen me je jomaotọ ru nene eta rẹ Urhi nana eje. 13 Ọke yena, emọ rayen eje re je rhe riẹn Urhi nana jovwoo ke cha kerhọ ji yono obo ra djoshọ rẹ Jihova Ọghẹnẹ rẹ ovwan vwẹ ẹdẹ na eje rẹ ovwan cha vwọ dia otọ rẹ ovwan cha shariẹ Jọdan vrẹ ra re ughwẹ rọyen na.”

14 Jihova da ta kẹ Mosis: “Nighere! Ọke wo che vwo ghwu na sikẹre re. Se Joshua rere ovwan vwẹ oma rẹ ovwan phia* vwẹ utughẹ ra da vwoma na, rere me reyọ vwo mu.” Ọtiọyena Mosis vẹ Joshua da yanran, ayen da vwomaphia vwẹ utughẹ ra da vwoma na. 15 Jihova da vwomaphia vwẹ utughẹ na vwevunrẹ evwru, evwru na de mudia asan ra wan rua utughẹ na.

16 Asaọkiephana Jihova da ta kẹ Mosis: “Nighere! Wo che ghwu* re, ihwo nana vẹ eghẹnẹ erhorha re riariẹ ayen phiyọ na cha ton ọfanrhiẹn egbe phiyọ vwẹ otọ rẹ ayen cha ra na. Ayen che chukoku uvwe, ayen je cha phan ọphọ re me vẹ ayen rere na. 17 Ọke yena ophu mẹ kọ cha tua kpahen ayen, ki mi che chukoku ayen ji si opharo mẹ nu vwọ kẹ ayen bẹsiẹ ra vwọ ghwọrọ ayen. Ọke rẹ okpetu vẹ ukpokpogho buebun de bru ayen rhire, kẹ ayen cha tanẹ, ‘Ọ dia Ọghẹnẹ rẹ avwanre ro jẹ ohri rẹ avwanre ẹdia yen nẹrhẹ okpetu nana bru avwanre rhe na?’ 18 Ẹkẹvuọvo ki mi ji che si opharo mẹ nu vwọ kẹ ayen vwẹ ẹdẹ yena fikirẹ imwemwu na eje rẹ ayen ruru rẹ ayen vwo kuomarhẹriẹ bru eghẹnẹ efa ra.

19 “Asaọkiephana ovwan si une nana phiyotọ kẹ oma rẹ ovwan rere ovwan reyọ vwo yono ihwo rẹ Izrẹl. Jẹ ayen yono* rere une nana vwọ dia oseri mẹ vwọso ihwo rẹ Izrẹl. 20 Ọke re me da reyọ ayen vwọ ro otọ ri mi duvwun iyorin rọyen kẹ esẹ rayen ride—otọ rọ djẹ ọkẹre rẹ ameivie vẹ ame ọnyọn—ayen da re evun rayen vọn, o de ji yovwin kẹ ayen re,* kẹ ayen che kuomarhẹriẹ bru eghẹnẹ efa ra je ga ayen, ayen rhe che muọghọ kẹ vwẹẹ, kẹ ayen cha phan ọphọ mẹ. 21 Ọke rẹ okpetu vẹ ukpokpogho buebun de bru ayen rhe, une nana kọ cha dia oseri vwọ kẹ ayen (e jẹ ọ chọrọ emọ rayen ẹroo), kidie me riẹn iroro rẹ udu rayen nure tavwen me ke tobọ reyọ ayen ro otọ ri mi duvwun iyorin rọyen na.”

22 Ọtiọyena Mosis de si eta rẹ une nana phiyotọ vwẹ ẹdẹ yena, ọ da vwẹ ayen vwo yono ihwo rẹ Izrẹl.

23 Ọ* da vwẹ Joshua ọmọ ri Nọn vwo mu, ọ da ta: “Fiudugberi rere wọ goma, kidie wẹ yen ohwo rọ cha reyọ ihwo rẹ Izrẹl ro otọ ri mi duvwun iyorin rọyen kẹ ayen na, mi che nene uwe dia ọkieje.”

24 Ugege rẹ Mosis ghwe vwo si eta rẹ Urhi nana eje phiyọ ọbe nu, 25 Mosis da vwẹ iji vwọ kẹ ihwo ri Livae ri muẹ ekpeti rẹ ọphọ ri Jihova na, ọ da ta: 26 “Ovwan reyọ ọbe rẹ Urhi nana rere ovwan phio phiyọ ọkọkọ rẹ ekpeti rẹ ọphọ ri Jihova Ọghẹnẹ rẹ ovwan na, rere ọ dia oseri vwọso ovwan vwẹ etiyin. 27 Kidie mẹvwẹ komobọ nabọ riẹn ẹvwọsuọ rẹ ovwan kugbe udu ọgangan rẹ ovwan.* Ovwan de se gbe vwọso Jihova gan te enẹ ọke re me vwọ hẹ akpọ re me vẹ ovwan je vwọ herọ na, kẹ mavọ yen ọ cha gan te ọke ri mi de ghwu nu! 28 Koko ekpako rẹ uvwiẹ rẹ ovwan kugbe inotu rẹ ovwan eje bru vwe rhe, rere me ta eta nana kẹ ayen nyo, je vwẹ idjuvwu na vẹ otọrakpọ na vwo soseri vwọso ayen. 29 Me nabọ riẹn nẹ mi de ghwu nu, ovwan che jẹ umwemwu eruoo, ovwan ji che kuomarhẹriẹ vwo nẹ idjerhe ri mi ji iji rọyen kẹ ovwan na. Vwọrẹ imuẹro, okpetu che shenyẹ ovwan vwẹ oba rẹ ẹdẹ na, kidie ovwan che ru obo re brare vwẹ ẹro ri Jihova, ovwan cha nẹrhẹ ivun miovwo womarẹ iruo rẹ obọ rẹ ovwan.”

30 Ọtiọyena Mosis da vwanriẹn eta rẹ une nana vwo nẹ ọtonphiyọ re duvwun oba vwọ kẹ ọghwẹgbe rẹ Izrẹl ejobi nyo: