Ẹvwọphia ri Jọn
6 Me da mrẹ ọke rẹ Omogodẹ na vwo rhie ọvo vwẹ usun rẹ isiaphrẹ ighwrẹn na, mi de nyo ọvo vwẹ usun rẹ emama ekpokpọ ẹne na rọ ta vẹ urhuru rọ họhọ agbraran nẹ: “Yanrhe!” 2 Me da mrẹ, nighere! iyesi ọfuanfon ọvo, ohwo ro chidia enu rọyen yọnrọn umurhabọ; a da vwẹ erhu rẹ ovie kẹ, ọ da yanran ko phiẹkparobọ, o de phikparobọ karekare.
3 Ọke ro vwo rhie usiaphrẹ rivẹ na, mi de nyo emama ọkpokpọ rivẹ na rọ tanẹ: “Yanrhe!” 4 Iyesi ọfa da yan phia, ọ vwara gbagbagba, a da rhọnvwe kẹ ohwo ro chidia enu rọyen nẹ ọ reyọ ufuoma vwo nẹ akpọ na rere ayen vwo hwe omoma rayen, a da vwẹ ọlọkọ rode vwọ kẹ.
5 Ọke ro vwo rhie usiaphrẹ rerha na, mi de nyo emama ọkpokpọ rerha na rọ tanẹ: “Yanrhe!” Me da mrẹ, nighere! iyesi obiebi, ohwo ro chidia enu rọyen vwẹ ovwanvwọ vwọ yọnrọn obọ. 6 Mi de nyo obo re họhọ urhuru ọvo vwẹ uherevie rẹ emama ekpokpọ ẹne na rọ tanẹ: “Ikuati ọvo* rẹ iwiti idinarọs* ọvo, ikuati erha* rẹ ibali idinarọs* ọvo; wo muẹ evwri rẹ oliv kugbe iwaini na muẹ ghwọrọ-ọ.”
7 Ọke ro vwo rhie usiaphrẹ rẹne na, mi de nyo urhuru rẹ emama ọkpokpọ rẹne na rọ tanẹ: “Yanrhe!” 8 Me da mrẹ, nighere! iyesi ọvo rọ pha munẹ munẹ, odẹ rẹ ohwo ro chidia enu rọyen, Ughwu. Ushi* vwọ kpahọn chachacha. A da kẹ ayen ogangan vwẹ enu rẹ ẹkẹn ọvo rẹ ẹkẹn ẹne rẹ akpọ na, rere ayen vwẹ ọlọkọ ogrongron kugbe ọkanrovwẹ rẹ emu kugbe ọtiekọ kugbe eranvwe rẹ aghwa rẹ otọrakpọ na vwo hwe ihwo.
9 Ọke ro vwo rhie usiaphrẹ riyorin na, me da mrẹ vwẹ obotọ rẹ agbada na erhi* rẹ ihwo re hweri fikirẹ ota rẹ Ọghẹnẹ kugbe fikirẹ oseri rẹ ayen seri. 10 Ayen de kperi vẹ urhuru ọgangan tanẹ: “Ọke vọ yen wọ cha hẹrhẹ te, Ọrovwori ro Me Kpenu, ọfuanfon kugbe uyota, tavwen wo ki guẹdjọ je reihri rẹ ọbara rẹ avwanre vwo mie ihwo re dia akpọ na?” 11 A da vwẹ ewun ọfuanfon rọ pha grongron vwọ kẹ ayen ohwo ọvuọvo, a da vuẹ ayen nẹ ayen ji rovwoma emerha bẹsiẹ rẹ ukeri rẹ idibo re dia irivẹ rayen kugbe iniọvo rayen ra guọnọ hwe kirobo re hwe ayen na cha vwọ gba.
12 Ọke ro vwo rhie usiaphrẹ resan na, me da mrẹ otọ ro kpoghori gangan; ọnre na da rhe dia biebi kerẹ amwa rẹ esiso ra vwẹ ẹton* ru, emeranvwe na da rhe dia kerẹ ọbara, 13 isio rẹ obodjuvwu na de she rhe otọrakpọ na kerẹ ọke rẹ odju ọgangan de djuẹ urhe rẹ ifigi, rẹ emamọ rọyen re je rhe vware-e da kpanra she ye. 14 Odjuvwu na de kpirhin koko kerẹ ukpirhin ọbe, ọ da ranvwiẹ, kugbenu kugbenu kugbe kotọ kotọ rẹ ame riariẹ phiyọ de nẹ asan rẹ ayen hepha. 15 Ọyena vwọ wan nu, ivie rẹ akpọ na, ihwo ride na, inotu ride rẹ isodje, edafe na, ihwo ri vwo ẹgba, kọviẹn kọviẹn kugbe kọmuvwiẹ kọmuvwiẹ de siomanu vwẹ inu rẹ ikuta* kugbe vwẹ ohri rẹ eragha rẹ igbenu na. 16 Kẹ ayen ta kẹ igbenu na kugbe eragha na nẹ: “She rhurhu avwanre wo si avwanre nu vwo nẹ opharo rẹ Ohwo ro chidia ekete na, kugbe vwo nẹ ophu rẹ Omogodẹ na, 17 kidie ẹdẹ rode rẹ ophu rayen rhire, kẹ ono yen se mudia?”