Ọrẹsosuọ re si Rhe Ihwo ri Kọrẹnt
11 Ovwan vwẹrokere uvwe, kirobo re me vwẹrokere Kristi.
2 Mi jiri ovwan kidie vwẹ erọnvwọn eje ovwan karophiyọ ovwẹ, ovwan je nabọ ruẹ nene obo ri mi yono ovwan. 3 Ẹkẹvuọvo, me guọnọ jẹ ovwan riẹn nẹ uyovwin ri kọshare kọshare yen Kristi, uyovwin rẹ aye yen ọshare, uyovwin ri Kristi ke rha Ọghẹnẹ. 4 Kọshare kọshare rọ nẹrhovwo yẹrẹ mraro jẹ ọ vwẹ orọnvwọn rhurhu uyovwin rọyen, phọphọ uyovwin rọyen; 5 ẹkẹvuọvo kaye kaye rọ nẹrhovwo yẹrẹ mraro jẹ ọ vwẹ orọnvwon rhurhu uyovwin rọye-en phọphọ uyovwin rọyen, kidie ọ pha kerẹ aye rọ wanre uyovwin rọyen. 6 Siẹrẹ aye rhe rhurhu uyovwin rọye-en, e gbe jẹ o bru ẹton rọyen; ẹkẹvuọvo ọ da dianẹ ọyen emu rẹ ophọphọvwe rẹ aye vwo bru ẹton rọyen yẹrẹ wanrọ, e gbe jẹ o rhurho.
7 Ofori ọshare vwo rhurhu uyovwin rọye-en, kidie ọyen uhoho kugbe urinrin rẹ Ọghẹnẹ, ẹkẹvuọvo aye yen urinrin rẹ ọshare. 8 Kidie ọshare nẹ oma rẹ aye rhe-e, ẹkẹvuọvo aye nẹ oma rẹ ọshare rhe. 9 Vwọba, ọ dia a ma ọshare fikirẹ aye-e, ẹkẹvuọvo a ma aye fikirẹ ọshare. 10 Kọyensorọ o vwo fo nẹ aye rhurhu uyovwin rọyen kerẹ oka rẹ omaevwokpotọ kẹ ogangan rẹ usuon fikirẹ emekashe na.
11 Vwọ vrẹ ọyena, vwevunrẹ Ọrovwori na, aye herọ-ọ ọshare cha sa dia-a, ọshare je herọ-ọ aye cha sa dia-a. 12 Kidie kirobo rẹ aye nẹ oma rẹ ọshare rhe na, ọtiọyen ọshare je womarẹ aye rhe; ẹkẹvuọvo erọnvwọn eje nẹ obọ rẹ Ọghẹnẹ rhe. 13 Ovwan brorhiẹn na komobọ: O shephiyọ rẹ aye vwọ nẹrhovwo rhe Ọghẹnẹ jẹ o rhurhu uyovwin rọye-en? 14 Kẹ, obo ra ma ohworakpọ wan rhe yono ovwan nẹ ọyen emu rẹ ophọphọvwe rẹ ọshare vwo vwo ẹton ogrongron, 15 ẹkẹvuọvo aye de vwo ẹton ogrongron ọyen urinrin vwọ kẹ? Kidie a vwẹ ẹton rọyen kẹ ukperẹ obo ro vwo rhurhu uyovwin. 16 Ẹkẹvuọvo, ohwo ọvo da phrọ nẹ uyono nana gbare-e, avwanre rhe vwo uyono ọfa-a, ikoko rẹ Ọghẹnẹ ji vwo-o.
17 Jẹ, me vwọ vwẹ odjekẹ nana kẹ ovwan na, mi jiri ovwa-an, kidie umiovwo rẹ omẹvwa ovwan sua kẹ ovwan bun vrẹ erhuvwu rọ ghwa cha. 18 Ẹsosuọ eje, mi nyori nẹ ọke rẹ ovwan de siomakoko kerẹ ukoko, ohẹriẹ dia ohri rẹ ovwan; mi se ota yena gbuyota vwo te ẹdia. 19 Kidie ẹko sansan che jẹ ohri rẹ ovwan ẹdia-a, rere e se vwo vughe otu ri vwo ẹroesiri rẹ Ọghẹnẹ vwẹ ohri rẹ ovwan.
20 Ovwan de siomakoko vwẹ asan ọvo, ọ dia ọ rẹ ovwan ghene vwọ re Emu Ovwọnvwọn rẹ Ọrovwori na-a. 21 Kidie dohwo demu rẹ ovwọnvwọn rọyen ria tavwen ovwan ke riọ, ọtiọyena owẹnvwe hwe ọvo, jẹ udi muẹ ọfa. 22 Ovwan rhe vwo uwevwin rẹ ovwan da re je da? Gbanẹ ovwan jẹ ukoko rẹ Ọghẹnẹ fia je nẹrhẹ oma vua otu ri vwo emuọvo-o? Die kọyen me sa ta kẹ ovwan? Mi gbe jiri ovwan? Mi jiri ovwan vwẹ ọnana-a.
23 Kidie obo me reyọ mie Ọrovwori na yen me je vwọ kẹ ovwan, nẹ Ọrovwori na Jesu reyọ ibrẹdi vwẹ ason ra cha vwọ shẹ na, 24 rọ vwọ kpẹvwẹ Ọghẹnẹ nu, o de bro, ọ da tanẹ: “Ọnana mudiaphiyọ ugboma mẹ, ra cha vwọ kpahotọ fikirẹ ovwan. Ovwan rhe ruẹ ọnana vwọ karophiyọ ovwẹ.” 25 O de ji ru ọtiọyen kpahen uko na ọke rẹ ayen vwọ riemu rẹ ovwọnvwọn na nu, ọ da tanẹ: “Uko nana mudiaphiyọ ọphọ kpokpọ na, ra rere womarẹ ọbara mẹ. Ovwan rhe ruẹ ọnana vwọ karophiyọ ovwẹ, kọke kọke rẹ ovwan da da.” 26 Kidie kọke kọke rẹ ovwan re ibrẹdi nana je da vwo nẹ uko nana, jẹ ovwan ghwoghwo ughwu rẹ Ọrovwori na bẹsiẹ rọ vwọ rhe.
27 Ọtiọyena, kohwo kohwo rọ re ibrẹdi na yẹrẹ da vwo nẹ uko rẹ Ọrovwori na jẹ o muwa-an, cha riabe vwọ kpahen ugboma kugbe ọbara rẹ Ọrovwori na. 28 E jẹ ohwo ka fuẹrẹn oma rọyen, rere o vwo vwo imuẹro nẹ obo ro ruẹ shephiyọ tavwen ọ ke re ibrẹdi na je da vwo nẹ uko na. 29 Kidie ohwo rọ rere je da, jẹ ọ riẹn oborẹ ugboma na mudiaphiyọ-ọ, ọ rere je da ẹdjọeguo vwọso oma rọyen. 30 Ọyensorọ buebun rẹ ovwan vwọ vwiẹrẹ je muọga, rẹ evo je vwọ vwerhẹn vwọrẹ ughwu.* 31 Jẹ avwanre da riẹn oka rẹ ohwo rẹ avwanre hepha, a rha cha vwẹ avwanre vwo guẹdjọ-ọ. 32 Dedena a da vwẹ avwanre vwo guẹdjọ, Jihova* yen ghwọkuẹ avwanre rere e vwo jẹ orhiẹn ebro hwe avwanre vẹ akpọ na. 33 Ọtiọyena iniọvo mẹ, ọke rẹ ovwan de siomakoko rẹ ovwan vwọ riọ, ovwan hẹrhẹ ohwohwo. 34 Ohwo rẹ owẹnvwe hwe, e jẹ ọ riemu nẹ uwevwin rhe, rere omaesiokoko rẹ ovwan vwo jẹ ọ rẹ ẹdjọeguo ẹdia. Ẹkẹvuọvo, vwọ kpahen eta ri chekọ na, me cha rhuẹrẹ ayen phiyọ ọke me da rhe.