Emekashe rẹ Idẹbono na Izighẹ!
Eshu vẹ emekashe rọyen djoma gangan, ayen ji muoshọ. Vwẹ ọke awanre, Eshu hwe eranvwe vẹ idibo ri Job. Ọ vwẹ “odju rode” vwọ guọghọ uwevwin rẹ emọ ihwe ri Job hepha, emọ na de ghwu. Ọyena vwọ wan nu, ọ da “vwẹ era ri gbo ọnrhe bru Job nẹ ẹhẹrhowọ re te ekrekruyovwin rọyen.”—Job 1:7-19; 2:7.
Vwẹ ọke ri Jesu, emakashe rẹ Idẹbono ji ru ihwo evo phiyọ idin vẹ irhuẹro. (Matiu 9:32, 33; 12:22) Ayen ru ọshare ọvo djadja, te ẹdia rọ vwọ vwẹ ukuta bru era phiyọ oma rọyen. (Mak 5:5) Ayen je nẹrhẹ ọmọshare ọvo phiyọ oviẹ ọgangan, ayen vwerọ ghwiẹ otọ, “ko gbule.”—Luk 9:42.
Vwẹ ọke awanre, emekashe rẹ Idẹbono vwẹ ọga vwo mu ihwo evo, ayen je nẹrhẹ efa she ewẹnwẹn
Nonẹna, Eshu vẹ emekashe rọyen ji hwe ihwo kirobo ri jovwo. Vwọrẹ uyota, umwemwu rayen rhoma rhe ganphiyọ, ra vwọ djẹ ayen nẹ odjuvwu rhe nu. Ikuegbe re nyo vwẹ akpọ na dje ọnana phia. Ayen vwẹ ọga mu ihwo evo, ayen je kpokpo ihwo efa vwẹ ason, djẹ ayen ovwerhẹn yẹrẹ nẹrhẹ ayen vwerhẹn evwerhẹn ro muoshọ. Ayen vwẹ ọnẹphiẹ vwo gbe ihwo ẹgua, ayen fovwo ihwo phiyọ orhuẹ, izighẹ yẹrẹ fovwo ayen vwo churẹ ghwẹ.
Nonẹna, emekashe rẹ Idẹbono fovwo ihwo vwo gbe ozighi; ayen kpokpo ihwo vwẹ ason, je nẹrhẹ ayen vwerhẹn evwerhẹn ri muoshọ
Lintina, rọ dia Suriname, gbikun oborẹ amakashe rẹ Idẹbono ọvo hwe ihwo 16 vwẹ orua rọyen, vẹ obo rọ vwẹ oja riọ vwẹ ẹgbukpe 18 soso. Fikirẹ obo ro rhiẹromrẹ, Lintina da ta nẹ “oma vwerhen emakashe rẹ Idẹbono na siẹrẹ ayen da vwẹ oja vwọ re ihwo bẹsiẹ ihwo na vwo ghwẹ.”
Ẹkẹvuọvo Jihova sa chochọn rẹ idibo rọyen nẹ abọ rẹ Eshu.—Isẹ 18:10.