Die Yen Ọhọre Ọghẹnẹ?

Ọghẹnẹ guọnọre nẹ avwanre yeren akpọ rẹ ufuoma vẹ omavwerhovwẹn vwẹ iparadaisi bẹdẹ!

Wo se roro, ‘Mavọ yen ọnana cha phia wan?’ Baibol na tare nẹ Uvie Ọghẹnẹ che ruo; Ọghẹnẹ guọnọre nẹ ihwo riẹn kpahen Uvie yena kugbe ọhọre rọyen vwọkẹ avwanre.​—Une Rẹ Ejiro 37:11, 29; Aizaya 9:7.

Ọghẹnẹ guọnọre nẹ avwanre mrẹ erere komobọ.

Kirobo rẹ ọsẹ ro vwo ẹguọnọ, guọnọ erhuvwu rẹ emọ rọyen, ọtiọyen Ọsẹ avwanre rọhẹ obodjuvwu je guọnọ nẹ avwanre yeren akpọ rẹ omavwerhovwẹn bẹdẹ bẹdẹ. (Aizaya 48:17, 18) O veri nẹ “ohwo ro ru ọhọre rẹ Ọghẹnẹ kọ dia bẹdẹ.”​—1 Jọn 2:17.

Ọghẹnẹ guọnọre nẹ avwanre yan vwẹ idjerhe rọyen.

Baibol na tare nẹ Ọmemama rẹ avwanre guọnọ “yono avwanre idjerhe rọyen” rere avwanre “nene ada rọyen.” (Aizaya 2:2, 3) O koko “ihwo fiki rẹ odẹ rọyen” rere ayen vwo ghwoghwo ọhọre rọyen nene akpọneje.​—Iruo 15:14.

Ọghẹnẹ guọnọre nẹ avwanre kuomakugbe ga ọyen.

Ẹga rẹ uyota na koko ihwo kuẹgbe, ọ je nẹrhẹ ayen vwo ẹguọnọ rẹ ohwohwo, ukperẹ ọ vwọ hra ayen. (Jọn 13:35) Amono yin yono ihwo vwẹ kasan kasan obo re se vwo kuomakugbe ga Ọghẹnẹ? Avwanre durhiuwe nẹ wọ guọnọ ẹkpahọnphiyọ na vwevunrẹ ibroshọ nana.