Die Yen Wọ Cha Mrẹ Vwẹ Emẹvwa Avwanre?

Ihwo buebun rhe kpẹ ẹga-a, kidie, ẹga sa kpahen phiyọ enọ ri kpokpo ayen ẹwẹ-ẹn. Kẹ, diesorọ o vwo fo nẹ wo kpẹ emẹvwa rẹ Iseri ri Jihova? Erere vọ yen wọ cha mrẹ nẹ ayen rhe?

Wo che kuomakugbe ihwo ri vwo ẹguọnọ wẹn. Vwẹ ẹgbukpe ujorin ẹsosuọ, a ghare Inene-ri-Kristi na phiyọ ikoko sansan, ayen siomakoko ga Jihova, yono Baibol na, je bọn ohwohwo gan. (Hibru 10:24, 25) Kidie nẹ ayen vwo ẹguọnọ rẹ ohwohwo, ko mu ayen ẹro nẹ ayen hẹ uvwre rẹ iniọvo rayen. (2 Tẹsalonaika 1:3; 3 Jọn 14) Avwanre vwẹrokere udje rayen nonẹna, ọtiọyena oma kọ je vwerhen avwanre.

Wo che yono obo ra sa vwẹ irhi ri Baibol vwo ruiruo. Vwẹ ọke awanre, te imitete te imiragua vwoma kuẹgbe. Ọtiọyen ọ je hepha nonẹna. Iniọvo ri muwan reyọ Baibol na vwọ chọn avwanre uko vwọ riẹn obo ra sa vwọ reyọ irhi ri Baibol na vwo ruiruo vwẹ akpeyeren avwanre kẹdẹ kẹdẹ. (Urhi Rivẹ 31:12; Nehemaya 8:8) Ihwoeje se dje esegbuyota rayen phia womarẹ ẹkpahọnphiyọ rẹ enọ kugbe une ẹsuọ.​—Hibru 10:23.

Esegbuyota wẹn kpahen Ọghẹnẹ cha ganphiyọ. Ọyinkọn Pọl vuẹ ukoko ọvo nẹ: “Urhuru rẹ ovwan si vwe, rere . . . avwanre ohwohwo ki ru esegbuyota rẹ ohwohwo gan, te ọ rẹ ovwan kugbe ọmẹ.” (Rom 1:11, 12) Uyono ẹra rẹ ọkieje bọn esegbuyota avwanre gan, ọ je nẹrhẹ e se yeren akpọ ro shephiyọ vwẹ obaro Ọghẹnẹ.

Avwanre vwẹ uphẹn nana vwo durhiuwe nẹ wọ rhe omẹvwa avwanre, wọ sa vwọ mrẹ erere re djunute na. A cha nabọ dede uwe sasasa. Emẹvwa avwanre ọphẹ, e mie ohwo arhọghọ-ọ.

• Udje rẹ amono yen avwanre nene vwẹ emẹvwa avwanre?

• Erere vọ yin che te avwanre obọ siẹrẹ avwanre de kpẹ emẹvwa?