Die Yen Ẹga Orua?

Nẹ awanre rhe, ọyen Jihova vwọ guọnọ nẹ ihwo orua ghwọrọ ọke kugbe, rere oyerinkugbe rayen vwọ ganphiyọ, ayen ji vwo sikẹrẹ Jihova. (Urhi Rivẹ 6:6, 7) Kọyen sorọ erua rẹ Iseri ri Jihova vwo ruẹ ẹga orua kudughwrẹn kudughwrẹn, rẹ ayen vwo yono kpahen iyovwinreta ri Baibol sansan ri shekpahen ọdavwẹ rẹ orua rayen. Ọ da tobọ dianẹ wẹwẹ ọvo yen dia uwevwin, wo se sikẹrẹ Ọghẹnẹ womarẹ uyono ri Baibol romobọ.

Ọyen ọke revwo siẹkẹrẹ Jihova. “Si kẹrẹ Ọghẹnẹ, rere o si kẹre owẹ.” (Jems 4:8) Avwanre sa riẹn Jihova phiyọ siẹrẹ avwanre da vwẹ Baibol na vwo yono kpahen uruemu rọyen vẹ obo ro ruẹ. Ovwan sa tuọnphiyọ vẹ ẹkpo ri Baibol re che se vwẹ udughwrẹn na vwevunrẹ Isikuru rẹ Iruo Ruvie Na. A sa ghare ẹdia sansan rẹ isese na kẹ ohwo vuọvo vwevunrẹ orua na; siẹrẹ e de se nu, ihwo na eje ki djekpahen oborẹ ayen yono no rhe.

Ọ nẹrhẹ ihwo rẹ orua na siẹkẹrẹ ohwohwo. Siẹrẹ ihwo rẹ orua de yono Baibol na kuẹgbe, ọ cha nẹrhẹ oyerinkugbe rayen ganphiyọ. A guọnọre nẹ ẹga orua dia ọke rẹ omavwerhovwẹn vẹ ufuoma, rere ọ dia oborẹ ihwo rẹ orua na rhẹro rọyen ọkieje. Oborẹ emọ na ghwanre te yen emiọvwọ che ni vwọ sane iyovwinreta rẹ ayen vwo ru ẹga orua na; o se nẹ Watchtower vẹ Awake! rhe yẹrẹ wẹbsaiti avwanre, jw.org. Ovwan sa tota kpahen obẹnbẹn ọvo rẹ emọ na hirharoku vwẹ isikuru vẹ oborẹ ayen se vwo phio kparobọ. Ovwan ji se ni ividio sansan rehẹ JW Broadcasting (tv.jw.org), je ta ota kpahan ayen. Ovwan ji se yono ine ra cha so vwẹ uyono, ji muegbe rẹ ememu phiyotọ rẹ ovwan cha re siẹrẹ e de ru ẹga orua na nu.

Ọke rẹ orua na ghwọrọ kuẹgbe vwọ ga Jihova kudughwrẹn kudughwrẹn, cha nẹrhẹ ihwoeje vwevunrẹ orua na vwo omavwerhovwẹn kpahen Ota Ọghẹnẹ, ayen me je mrẹ ebruphiyọ rọyen.​—Une Rẹ Ejiro 1:1-3.

• Diesorọ avwanre vwo phiẹ ọke phiyotọ vwọ kẹ ẹga orua?

• Die yen emiọvwọ ru rere ẹga orua rayen vwọ dia ọke omavwerhovwẹn?