Idjerhe vọ Yen Ekpako na Vwọ Vwẹrote Ukoko Na?

Ukoko avwanre vwo ilori ẹga ra hwosa kẹ-ẹ. Ukperẹ ọtiọyen, eshare ri muwan eyen e vwo muẹ rere e “ghẹrẹ ishọshi [ukoko, NW ] rẹ Ọrovwohwo,” kirobo rọ hepha vwẹ ọke ra vwọ ton ukoko Inene-ri-Kristi na phiyọ. (Iruo 20:28) Ekpako nana, eyen ihwo ri vwo omamọ oyerinkugbe vẹ Jihova, ayen vwẹrote ukoko na, “ọ dia ọ rẹ ẹgbahọ-ọ ẹkẹvuọvo ọ ro nẹ udu rhe, ọ dianẹ ra vwọ mrẹ erere rẹ omaẹvuọ-ọ ẹkẹvuọvo re ruo vẹ evun phẹnphẹn.” (1 Pita 5:1-3) Oka rẹ iruo vọ yen ayen ruẹ?

Ayen vwẹrote avwanre. Ekpako na reyọ Baibol na vwọ chọn iniọvo na uko rere ayen se vwo sikẹrẹ Jihova. Dedenẹ Ọghẹnẹ vwẹ uphẹn ọghanghanre nana vwọ kẹ ayen, ekpako na nẹ oma rayen kerẹ isu-un, ukperẹ ọtiọyen ayen toroba osasavwe vẹ aghọghọ rẹ ukoko na. (2 Kọrẹnt 1:24) Kirobo rẹ osuigegede nabọ vwẹrote igegede rọyen ọvuọvo, ọtiọyen ekpako na je davwẹngba vwo vughe ohwo ọvuọvo vwevunrẹ ukoko na.​—Isẹ 27:23.

Ayen yono avwanre obo re se vwo ru ọhọre Ọghẹnẹ. Kudughwrẹn kudughwrẹn, ekpako na vwẹrote emẹvwa rẹ ukoko na, rẹ ayen vwọ bọn esegbuyota rẹ avwanre gan. (Iruo 15:32) Eshare nana yen kobaro rẹ iruo aghwoghwo na, ayen ji yono avwanre ena sansan revwo ruiruo na.

Ayen bọn avwanre gan. Rere oyerinkugbe rẹ avwanre vẹ Ọghẹnẹ sa vwọ ganphiyọ, ekpako na vwẹ eta ri Baibol na vwo bru avwanre uche vwẹ Ọguan Ruvie yẹrẹ vwẹ uwevwin avwanre.​—Jems 5:14, 15.

Vwọba iruo rayen vwevunrẹ ukoko na, ekpako na ji vwo iruo rẹ ayen ruẹ vẹ oghwa rẹ orua rẹ ayen muẹ, re reyọ ọke rayen. Ofori nẹ avwanre muọghọ kẹ iniọvo nana re wian mamọ na.​—1 Tẹsalonaika 5:12, 13.

• Iruo vọ yen ekpako na ruẹ?

• Idjerhe vọ yen ekpako na vwo dje ẹguọnọ kẹ avwanre?