Die Yen E Ruẹ Vwẹ Oghọn Ukoko?

Iniọvo rehẹ Bẹtẹl ga vwẹ akon iruo sansan re vwẹrote iruo aghwoghwo na vwẹ ẹkuotọ sansan. Evo ruiruo rẹ efanfan, efa wian vwẹ asan ra da teyen ẹbe, asan ra da sẹro rẹ ẹbe, istudio re de ruẹ uhworo vẹ ividio, yẹrẹ ayen ruiruo efa.

Umẹ Rọvwẹrote Oghọn Ukoko yen vwẹrote iruo nana. Ẹko Rọvwẹrote na vwẹ iruo rẹ ẹroevwote rẹ oghọn ukoko ọvuọvo vwọ kẹ Umẹ Rọvwẹrote Oghọn Ukoko; ekpako erha kpenu yen ga vwẹ umẹ nana. Umẹ nana nẹ iyẹnrẹn rẹ ẹyan-obaro vẹ ebẹnbẹn re vwomaphia vwẹ ẹkuotọ rẹ ayen da ga vwọ kẹ Ẹko Rọvwẹrote na. Iyẹnrẹn nana nẹrhẹ Ẹko Rọvwẹrote na se brorhiẹn rẹ eta ra cha vwọphia vwẹ uyono, isikoko yẹrẹ vwẹ ẹbe re che si. Nọke ra ruọkẹ yen e vwo jẹ iniọvo ri mudia kẹ esiri ukoko kpẹ eghọn ukoko, iniọvo nana vwẹ ukẹcha vwọ kẹ Umẹ Rọvwẹrote Oghọn Ukoko sansan rere ayen se vwo ruiruo rayen fiotọ. (Isẹ 11:14) Ọrhuẹrẹphiyotọ oghẹresan je herọ rẹ iniọvo re ji rhe na vwọ ta ota rẹ uchebro vwọ kẹ iniọvo rehẹ ẹkuotọ rẹ oghọn ukoko na hepha.

Oghọn ukoko na vwẹ ukẹcha kẹ ikoko rehẹ ẹkuotọ na. A vwẹ iniọvo evo vwo mu vwẹ oghọn ukoko na re ghwobọphiyọ ọbe ro shekpahen ikoko kpokpọ re che vwo mu. Evo vwẹrote iruo rẹ ekobaro, imishọnare vẹ iniruo okinriariẹ re ga vwẹ ẹkuotọ na. Efa vwẹrote ọrhuẹrẹphiyotọ rẹ eghwẹkoko, ebanbọn rẹ Eguan Ruvie, kugbe ẹbe re muẹ vwo rhe ikoko sansan. Iruo na eje re ruẹ vwẹ oghọn ukoko toroba ẹyan-obaro rẹ iruo aghwoghwo na.​—1 Kọrẹnt 14:33, 40.

• Ukẹcha vọ yen Umẹ Rọvwẹrote Oghọn Ukoko na vwọ kẹ Ẹko Rọvwẹrote na?

• Iruo vọ yen e ruẹ vwẹ Oghọn Ukoko?