AKPEYEREN RẸ INENIKRISTI
Davwẹngba Vwọ Riẹn Iroro rẹ Ọghẹnẹ
Avwanre guọnọ ru obo re vwerhen Jihova oma vwẹ erọnvwọn eje rẹ avwanre ruẹ. (Isẹ 27:11) E se vwo ru ọtiọyen, ofori nẹ orhiẹn rẹ avwanre dje iroro rẹ Ọghẹnẹ phia ọ da tobọ dianẹ a mrẹ urhi ri phiọgun ro shekpahen ẹdia na-a. Die yen sa chọn avwanre uko vwo ru ọtiọyen?
Vwo omamọ rẹ ọrhuẹrẹphiyotọ rẹ uyono ri Baibol. Kọke kọke re de se Baibol na, kọ ghwa họhọ nẹ e nene Jihova ghwọrọ ọke kuẹgbe. Avwanre sa riẹn iroro ri Jihova siẹrẹ a da fuẹrẹn obo ro nene ihwo rọyen yerin wan vẹ idje rẹ ihwo ri ru erhuvwu yẹrẹ umiovwo vwẹ ẹro rọyen. Avwanre da guọnọ brorhiẹn, ẹwẹn ọfuanfon na sa chọn avwanre uko vwọ karophiyọ iyono vẹ odjekẹ eghanghanre rẹ avwanre yonori vwẹ Ota rẹ Ọghẹnẹ.—Jọn 14:26.
Ru ehiahiẹ. Wọ da guọnọ brorhiẹn, gba nọ oma wẹn, ‘Ẹkpo ri Baibol vọ yẹrẹ ikuegbe ri Baibol vọ yen sa chọn vwẹ uko vwọ riẹn iroro ri Jihova kpahen ota nana?’ Nẹrhovwo rhe Jihova vwọ kẹ ukẹcha rere wọ reyọ ekuakua re vwo ru ehiahiẹ re herọ vwẹ ejajẹ wẹn vwo ruiruo, ayen cha chọn wẹ uko vwọ mrẹ iyono ri Baibol ri shekpahen ẹdia wẹn na.—Une 25:4.
NI IVIDIO NA AVWANRE CHA “VWẸ ERHIORI DJẸ ONẸ” NA—RE OMAMỌ EMU, RERE WỌ KPAHENPHIYỌ ENỌ NANA:
Okeke vọ yen eghene aye na hirharoku vwẹ ividio na?
Mavọ yen wọ sa vwọ reyọ ekuakua re vwo ru ehiahiẹ vwọ chọn oma wẹn uko siẹrẹ wo de hirharoku okeke re họhọ ọyena?
Erere vọ yen a cha mrẹ a da ghwọrọ ọke vwo ru ehiahiẹ ji ru uyono ri Baibol romobọ re sa chọn avwanre uko vwo bru omama orhiẹn?—Hib. 5:13, 14