Enọ rẹ Ihwo ri se Ẹbe Avwanre Nọre

Mavọ yen umubruwevwin rọhẹ uwevwin ẹga ri Solomọn bọnre na kpenu te?

Umubruwevwin na yen a wan rua asan Ọfuanfon rọhẹ uwevwin ẹga na. Vwo nene oborẹ New World Translation of the Holy Scriptures ra vwọphia ukpe ri 2023 ki rhi te, “umubruwevwin rọhẹ obaro na gron te kubit 20, ọ vẹ ohẹhẹre rẹ uwevwin na abavo, o de rhe kpenu te 120.” (2Ik 3:4) Efanfan ri Baibol efa je tanẹ umubruwevwin na ji kpenu te “kubit 120,” ro mudiaphiyọ nẹ o te imita 53 yẹrẹ (ichiyin 175)!

Ẹkẹvuọvo, New World Translation ra vwophia vwẹ 2023 ta kpahen umubruwevwin rọhẹ uwevwin ẹga ri Solomọn bọnre na nẹ: “O kpenu te kubit 20,” yẹrẹ omarẹ imita 9 yẹrẹ (ichiyin 30) vwọ ro enu.a Roro kpahen oboresorọ e vwo ru ewene nana.

1 Ivie 6:3 djunute oborẹ umubruwevwin na kpenu tee. Jerimaya ro si ẹkpo ri Baibol yena, vuẹ avwanre oborẹ umubruwevwin na gron te kugbe oborẹ o kodo te, o djunute obo ro kpenu tee. Vwọba, uyovwirota rọ vwọ kpahọn, nabọ dje erọnvwọn efa re pha ghanghanre vwẹ uwevwin ẹga na, eyen Abadi ẹrovwo na, erọnvwọn re vwo muẹ oghwa ihwe, kugbe ichivwo rẹ ẹrovwo ivẹ rehẹ otafe rẹ umubruwevwin na. (1Iv 7:15-37) Ọ da dianẹ umubruwevwin na reyọ imita 50 vwo kpenu vrẹ uwevwin ẹga na, kẹ diesorọ Jerimaya rhe djunutee? Ikpe ujorin buebun vwo wan nu, Igbikuegbe rẹ ihwo ri Ju evo de si nẹ, umubruwevwin na kpenu vrẹ uwevwin ẹga ri Solomọn bọnre naa.

Ihwo evo ri yono ẹbe kodo je phrọ nẹ igbẹhẹ rẹ uwevwin ẹga na cha sa yọnrọn umubruwevwin ro kpenu te kubit 120. Iwevwin ri kpenu mamọ ra reyọ briki vẹ eragha vwọ bọn vwẹ awanre, kerẹ anurhoro uwevwin ẹga rọhẹ Ijipt, pha hẹhẹre mamọ vwẹ obotọ jẹ ọ pha hwahwa vwẹ obenu. Ẹkẹvuọvo uwevwin ẹga ri Solomọn bọnre fẹnẹre. Ihwo evo ri yono ẹbe kodo vwo imuẹro nẹ igbẹhẹ uwevwin na vwo ọkpan vrẹ imita 2.7 rọ dia (ichiyin 9) yẹrẹ kubit 6. Ogbikuegbe ọvo re se Theodor Busink rọ je riẹn kpahen obo ra bọn uwevwin da ta: “Vwo nene oborẹ asan ra wan rua uwevwin ẹga na vwo ọkpan te, umubruwevwin na che se kpenu te kubit 120.”

Ọ sa dianẹ obo rehẹ 2 Ikun Rivie 3:4 na osichọ. Dede nẹ ẹkpo ri Baibol nana vwẹ imanuskripti awanre evo tare nẹ “120,” ẹbe efa ra nabo riẹn odẹ, kerẹ Codex Alexandrinus rọ vrẹ ikpe 1500 re kugbe Codex Ambrosianus rọ vrẹ ikpe 1400 re, tare nẹ “kubit 20.” Die yen sa nẹrhẹ ọ chọ osiọbe na obọ ro vwo si “120”? Eta na “ujorin” kugbe “kubit” hoho ohwohwo vwẹ Hibru. Koyensorọ osiọbe se si “ujorin” ukperẹ “kubit.”

Vwọrẹ uyota, dede nẹ avwanre davwẹngba e vwo vwo ẹruọ erọnvwọn nana eje, je riẹn oborẹ uwevwin ẹga ri Solomọn bọnre na hepha abavo, jẹ obo re ma ghanre yen a vwọ tẹnrovi oborẹ uwevwin ẹga ri Solomọn bọnre na rionbọra​—rọ dia uwevwin ẹga rode na. Mavọ yen ọ vwerhoma te nẹ Jihova durhiẹ idibo rọyen eje nẹ e rhe ga vwẹ uwevwin ẹga yena!​—Hib 9:11-14; Ẹvw 3:12; 7:9-17.