Erere Rehẹ Omaẹriẹnsuon

DIE YEN OMAẸRIẸNSUON?

Omaẹriẹnsuon churobọ si

• e vwo vwo oderin hẹrhẹ obo ra guọnọre

• a vwọ nyoma je domajẹ

• wo vwo ruiruo ra kẹ wẹ re, ọ da tobọ dianẹ iruo na je we-e

• wọ vwọ vwẹ ọdavwẹ rẹ ihwo efa vwọ kobaro kẹ ọwẹ

DIESORỌ OMAẸRIẸNSUON VWỌ GHANRE?

Emọ ri vwo uruemu rẹ omaẹriẹnsuon sa sẹn obo re brare, ọ da tobọ họhọ obo ri yovwirin. Vwọ fẹnẹ ọyena, emọ ri ghwe vwo uruemu rẹ omaẹriẹnsuo-on

• se muophu djọghrọ djọghrọ

• sa rioja rẹ omaemuophiyọ ọgangan

• se phopho isigati je reyọ ihuvwun egangan yẹrẹ da udi vroma

• se jẹ omamọ rẹ emu ẹriọ

Ehiahiẹ ọvo re ruru djerephia nẹ emọ ri vwo uruemu rẹ omaẹriẹnsuon vwo nẹ ọke emọ rhe, nabọ nene urhi, ayen je fobọ vwo ebẹnbẹn rẹ igho vẹ omakpokpọ ọke rẹ ayen de te omiragua re-e. Uyono yena de mu ogbuẹbe ọvo re se Angela Duckworth vwẹ University rẹ Pennsylvania vwọ ta: “E vwo vwo uruemu rẹ omaẹriẹnsuon dia obo re chọre-e.”

OBO RE SE VWO YONO EMỌ OMAẸRIẸNSUON

Yono obo ra tanẹ, ẹjo, wo mi ji ru nene.

ODJEKẸ RI BAIBOL: “E jẹ ota rẹ ovwan ‘E’ dia e, ‘Ẹjo’ rẹ ovwan me dia ẹjo.”​—Matiu 5:​37.

Emọ se si isiesi yẹrẹ viẹ gangan vwọ davwen esẹ vẹ ini rayen ni e se vwo ru oborẹ ayen guọnọre kẹ ayen​—ọ sa tobọ dia asan otu dede. Oni yẹrẹ ọsẹ na da kẹ ayen oborẹ ayen guọnọre na, ọtiọtiọyen kọyen ayen che rhe ruẹ siẹrẹ ayen da guọnọ orọnvwọn.

Vwọ fẹnẹ ọyena, oni yẹrẹ ọsẹ na da tanẹ ẹjo o de ji ru ọtiọyen, ọmọ na che yono uyono ọghanghanre ọvo vwẹ akpeyeren​—nẹ, ọ dia ọkieje yen oborẹ a guọnọre se vwo te ohwo obọ-ọ. Dr. David Walsh de si: “Vwọrẹ uyota, ihwo re riẹn oma suẹn yen oma ma vwerhan. Ọ chọre a vwọ ghẹrẹ emọ rẹ avwanre ghwanre vẹ ẹwẹn rẹ ayen vwo roro nẹ ọkieje yen oborẹ ayen guọnọre che vwo te ayen obọ.”a

Wọ rha vwẹ kemu kemu rẹ ọmọ wẹn nokpẹn rọyen vwọ kẹ-ẹ, ọ cha nẹrhẹ ọ lọhọ o vwo sun oma rọyen vwẹ obaro obọ​—yẹrẹ kẹnoma kẹ erọnvwọn kerẹ ihuvwun egangan, ọfanrhiẹn egbe vẹ iruemu efa tiọyen re sa so omaẹwan vwọ kẹ vẹ ihwo efa.

Chọn emọ wẹn uko vwọ riẹn obo re cha phia siẹrẹ ayen de ru obo ri yovwirin yẹrẹ obo re brare.

ODJEKẸ RI BAIBOL: “Kemu kemu rẹ ohwo kọn ọyen o ji che vun.”​—Galesha 6:7.

Ofori nẹ ọmọ wẹn riẹn nẹ o vwo obo ri nẹ obuko ri kemu kemu rẹ avwanre ruẹ cha, nẹ a rha riẹn oma su-un, erhuvwu che se no rhe-e. Kerẹ udje, ọ da dianẹ ọmọshare wẹn fobọ muophu mamọ, ọ cha nẹrhẹ ihwo kẹnoma kẹ. Ẹkẹvuọvo, o de vwo uruemu re vwo sun ophu siẹrẹ e de gbeku, yẹrẹ vwo odirin ukperẹ o vwo gbe oyanghan​—ihwo che sikẹrẹ. Chọn ọmọ wẹn uko vwọ riẹn nẹ o de vwo uruemu rẹ omaẹriẹnsuon, o che yeren omamọ rẹ akpọ.

Yono ọmọ wẹn vwo vughe obo re ma ghanre.

ODJEKẸ RI BAIBOL: “Vwo imuẹro rẹ erọnvwọn re ma ghanre.”​—Filipae 1:​10.

Omaẹriẹnsuon chọn avwanre uko vwọ kẹnoma kẹ obo re brare, ọ je chọn avwanre uko vwo ruẹ obo ri fori, ọ da tobọ dianẹ o je avwanre-e. Ofori nẹ wo yono ọmọ wẹn obo rọ sa vwọ riẹn obo re brorhiẹn rẹ erọnvwọn re ma ghanre, ọ me je yan mu ayen. Jẹ ọmọ wẹn ke ru obo re ma ghanre. Kerẹ udje, o ruiruo ra kẹrẹ vwẹ isikuru nu tavwen ọ ke heha.

Dia omamọ rẹ udje.

ODJEKẸ RI BAIBOL: “Kidie mi phi udje na phiyotọ kẹ ovwan nẹ kirobo ri mi ghwe ru kẹ ovwan na, ovwan ji ru ọtiọyen.”​—Jọn 13:15.

Ọmọ wẹn cha mrẹ obo wo ruẹ siẹrẹ ivun de miovwo uwe. Vwẹ udje wẹn vwo djephia kẹ ọmọ wẹn nẹ omaẹriẹnsuon vẹ erere. Kerẹ udje, ọmọ wẹn de ru obo re chọre, wo muophu gidi gidi gbanẹ wo sun oma wẹn?