Ẹbẹre 1: Oborẹ Inenikristi Segbuyota

Iseri ri Jihova nene uwe yono Baibol na, wọ da rhe riẹn uyota na. Aphro herọ-ọ, obo wo yonori chọn wẹ uko vwo vwo omamọ oyerinkugbe vẹ Ọghẹnẹ, ọ je nẹrhẹ wo vwo iphiẹrophiyọ kpahen obaro na vẹ ebruphiyọ rẹ Uvie rẹ Ọghẹnẹ cha ghwa rhe vwẹ akpọ kpokpọ na. Esegbuyota wo vwo kpahen Ota rẹ Ọghẹnẹ rhoma ganphiyọ, wọ je mrẹ ebruphiyọ buebun womarẹ uyono ẹra rẹ ọkieje. Wọ je nabọ rhe riẹn oborẹ Jihova vẹ ihwo rọyen yerẹn wan nonẹna.—Zek. 8:23.

Wo vwo muegbe vwọ kẹ omaebrophiyame na, wọ cha mrẹ erere vwo nẹ ẹfuẹrẹn rẹ oborẹ Baibol na yonori, ọke rẹ ekpako na de nene uwe chidia. (Hib. 6:1-3) Jihova che bruba ẹgbaẹdavwọn wẹn ru wo vwo yono kpahọn, ọ je cha kẹ wẹ arhọ ri bẹdẹ.—Jọn 17:3.

1. Diesorọ wọ vwọ guọnọ bromaphiyame?

2. Ono yen Jihova?

• “Ọrovwohwo na Ọghẹnẹ rọ evun rẹ odjuvwu vẹ enu rẹ akpọ rọ herọ vwẹ obotọ na; ọfa herọ-ọ.”—Urhi 4:39.

• “Wẹwẹ, rẹ odẹ wẹ dia Jihova na, Wẹ ọvo yen Me Kpenu vwẹ akpọ na ejobi.”—Une 83:18, NW.

3. Diesorọ o vwo fo nẹ wọ reyọ odẹ rẹ Ọghẹnẹ vwo ruiruo?

• “Enẹ ovwan nẹ ẹrhovwo: Ọsẹ rẹ avwanre rọ hẹ obo odjuvwu, Jẹn avwanre vwẹ ọghọ kẹ odẹ wẹn.”—Mat. 6:9.

• “Kohwo kohwo ro se odẹ rẹ Ọrovwohwo kọ rhọ.”—Rom 10:13.

4. Edẹ vọ yen Baibol na vwo djisẹ ri Jihova?

• “Ọrovwohwo na ọye Ọghẹnẹ ri bẹdẹ na, ọye Ọmẹma rẹ oba rẹ akpọ na.”—Aiz. 40:28.

• “Ọsẹ rẹ avwanre rọ hẹ obo odjuvwu.”—Mat. 6:9.

• “Ọghẹnẹ hẹ ẹguọnọ.”—1 Jọn 4:8.

5. Die wọ sa vwọ kẹ Jihova Ọghẹnẹ?

• “Wọ me vwẹ udu wẹn ejobi guọnọ Ọrovwohwo Ọghẹnẹ vwẹ ẹnwẹn wẹn ejobi, kugbe iroro wẹn ejobi ji kugbe ogangan wẹn ejobi.”—Mak 12:30.

• “Ọrovwohwo Ọghẹnẹ wẹn ọvo ọye wọ ga, ọye ọvo wo shiguẹ kẹ.”—Luk 4:8.

6. Diesorọ wọ vwọ guọnọ fuevun kẹ Jihova?

• “Ghwanre, ọmọ mẹ, rere udu mẹ vwọ ghọghọ, rere me mrẹ ota kpahe kẹ ohwo rọ vwo ovwẹ jehwẹ.”—Isẹ 27:11.

7. Ono yen wọ cha nẹrhovwo rhe, vwẹ odẹ rẹ ono?

• “Uyota, uyota, me [Jesu] ta kẹ ovwan, ovwan da nọ kemu kemu vwẹ obọ rẹ Ọsẹ na, kọ vwọ kẹ ovwan vwẹ odẹ mẹ.”—Jọn 16:23.

8. Erhọ yen erọnvwọn evo wọ sa nẹrhovwo kpahen?

• “Enẹ ovwan nẹ ẹrhovwo: Ọsẹ rẹ avwanre rọ hẹ obo odjuvwu, Jẹn avwanre vwẹ ọghọ kẹ odẹ wẹn. Jẹn uvie wẹn rhe, ru ẹguọnọ wẹn vwẹ akpọ na kirobo re ruẹ vwẹ obo odjuvwu. Emu ri kẹdẹ kẹdẹ vwẹ ọ ri nonẹ kẹ avwanre. Vwẹ imwemwu rẹ avwanre rhovwo avwanre, Kirobo me vwo rhovwo ọrivẹ rẹ avwanre. Wo suẹn avwanre ro ọdavwini-i, ẹkẹvuọvo si avwanre nẹ ukpokpogho.”—Mat. 6:9-13.

• “Ọnana kọye ẹroẹvwọsuọ rẹ avwanre vwori vwẹ evun rọye, nẹ avwanre da nọ ekpẹn rẹ emu ro shephihọ ọhọre rọye ko nyo kẹ avwanre.”—1 Jọn 5:14.

9. Die yen sa nẹrhẹ Jihova jẹ ẹrhovwo rẹ ohwo enyo?

• “Ayen che kperi se Ọrovwohwo ẹkẹvuọvo yọ cha kpahe kẹ aye-en; . . . fikiridie uruemu rayen pha miomiovwi.”—Maika 3:4.

• “Ẹro rẹ Ọrovwohwo e hẹ enu rẹ ọvwata, erhọ rọye rhie phihọ kẹ ẹrhovwo rayen. Ẹkẹvuọvo Ọrovwohwo mukpahe otu ri ruẹ umwemwu.”—1 Pita 3:12.

10. Ono yen Jesu Kristi?

• “Saimọn Pita da kpahe ọ da ta nẹ, Wẹ hẹ Kristi na, Ọmọ rẹ Ọghẹnẹ ri bẹdẹ na.”—Mat. 16:16.

11. Die yen nẹrhẹ Jesu rhe akpọ na?

• “Ọ dianẹ Ọmọ rẹ ohwo rhere re e vwo gbe odibo kẹ-ẹ, ẹkẹvuọvo re o vwo gbe odibo, rere ọ vwẹ arhọ rọye tan ihwo buebu.”—Mat. 20:28.

• “Mi ji re gbe ikun esiri rẹ uvie rẹ Ọghẹnẹ kẹ irere efa rhe; fiki rẹ ọnana e vwo ji vwe rhe.”—Luk 4:43.

12. Mavọ wo se vwo dje ọdavwaro phia kpahen izobo ri Jesu?

• “Yo ghwu kẹ ihwo ejobi, rere ayen otu re herọ na vwo jẹ dia kẹ omobọ rayen ọfa ẹkẹvuọvo vwọ kẹ ohwo rọ vwi fiki rayen ghwu rọ da rhoma vrẹn.”—2 Kọr. 5:15.

13. Ogangan vọ yen Jesu vwori?

• “Ogangan ejobi re hẹ odjuvwu vẹ akpọ, a vwẹ ayen kẹ vwẹ.”—Mat. 28:18.

• “Kọye Ọghẹnẹ vwọ kparọ kpenu gangan o de mu odẹ ro kpenu nọ odẹ kodẹ kẹ.”—Fil. 2:9.

14. Wo vwo imuẹro nẹ Ẹko Rọvwẹrote Iruo rẹ Iseri ri Jihova na yen “odibo esiri” rẹ Jesu vwo mu?

• “Ono hẹ omamọ rẹ odibo esiri na, re ẹsiẹ rẹ ọrovworo da rhe o de vwo mu olori rẹ uwevwi rọye, rọ da vwẹ emu kẹ ayen re vwẹ ọke yena?”—Mat. 24:45.

15. Ẹwẹn ọfuanfon na ohwo?

• “Amakashe na da ta kẹ, [“ẹwẹn ọfuanfon,” NW] na che bru we rhe, ogangan rẹ Ọro Mekpenu na ko che rhurhu uwe; ọtiọye ọmọ re che vwiẹ na ke se ọfuanfon, ọmọ rẹ Ọghẹnẹ.”—Luk 1:35.

• “Ọ da dianẹ, wẹ rẹ ohwo umwemwu, da riẹn obo ra vwẹ emu oyoyovwi kẹ emọ wẹn, komavọ ọ rho te rẹ ọsẹ robo odjuvwu sa vwẹ [“ẹwẹn ọfuanfon,” NW] kẹ otu re nọrọ?”—Luk 11:13.

16. Idjerhe vọ yen Jihova vwọ reyọ ẹwẹn ọfuanfon rọyen vwo ruiruo re?

• “Vwẹ ota rẹ Ọrovwohwo na ọye odjuvwu na vwọ mama, obo re vọnrọ ejobi kẹ ẹnwẹ rẹ unu rọye.”—Une 33:6.

• “Ẹkẹvuọvo ovwan che vwo ẹgba siẹ rẹ [“ẹwẹn ọfuanfon,” NW] na de bru ovwan rhe nu; ovwan ke cha dia iseri mẹ . . . re te oba rẹ akpọ na.”—Iruo 1:8.

• “Aroẹmrẹ re hẹ ọbe ọfuanfon na de dia obo rẹ ohwo ọvo di muẹ otọ rọye fa-a, fikiridie o vwo aroẹmrẹ ọvuọvo ro di nẹ udu rẹ obọ rẹ ohwo cha-a, ẹkẹvuọvo ihwo rẹ [“ẹwẹn ọfuanfon,” NW] na muru re ta ota ro nẹ obọ rẹ Ọghẹnẹ rhe.”—2 Pita 1:20, 21.

17. Die yen Uvie rẹ Ọghẹnẹ?

• “Ọghẹnẹ rẹ odjuvwu na cha vwẹ uvie ọvo mu, ra sa guọghọ-ọ eyẹ e che siobọ nẹ ekete rọye kẹ ihwo ọfa-a. Ọ cha guọghọ ivie nana ejobi ibribro ọ me vwẹ ayen te oba, ko mudia bẹdẹ.”—Dan. 2:44.

18. Mavọ yen Uvie rẹ Ọghẹnẹ se vwo fierere kẹ wẹ?

• “Ko ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eyẹ oviẹ eyẹ odjadja ọfa-a, kidie emu rẹ awanre na wanvrẹn nure.”—Ẹvwọ. 21:4.

19. Mavọ wo ru riẹn nẹ ebruphiyọ rẹ Uvie na cha rhe kẹrẹkpẹ?

• “Idibo rọye da bẹbẹ bro rhe nẹ, ta kẹ avwanre, ọkevọ emu nana cha vwọ phia? eyẹ kọrhọ re cha dia oka rẹ ẹcha rẹ ọmọ rẹ ohwo, kugbe oba rẹ akpọ na? Jesu da kpahe ọ da ta kẹ ayen nẹ . . . ẹgborho cha vwọ so ẹgborho, uvie cha vwọ so uvie, owẹvwe che fi, otọ che kpogho vwẹ asan buebu. Ka cha ta ota rẹ iyẹnrẹ esiri na wan akpọ na ejobi, rere ọ vwọ dia iseri kẹ ẹgborho na ejobi: tavwe rẹ oba na ki rhi te.”—Mat. 24:3, 4, 7, 14.

• “Ẹkẹvuọvo jẹ ọnana ro owẹ nẹ, vwẹ oba rẹ ẹdẹ na ẹdẹ ebrabra cha rhe. Kidie ihwo cha guọnọ omaobọ rẹ ayen nọ, e cha guọnọ igho nọ, i che phuoma nọ, i che ni oma rhuarho nọ, e cha harhe ekan nọ, i gbi che mu ọghọ kẹ esẹ vẹ ini-i, e gbe cha riẹn ẹse-e, e gbe cha guọnọ ẹfuọ-ọn, i gbi vwo omaeririo-o, e gbi se fue ọhọre rẹ aye-en, ri miovwi odẹ rẹ ihwo, ke vẹn ro umwemwu, ke djoma, ki tuoma rẹ emu esiri, ke shẹ ihwo, zighi zighi, ke vọn vẹ ophiẹvwe, ke guọnọ omavwerhe jẹ ẹguọnọ rẹ Ọghẹnẹ vwo, ri muẹ ofian rẹ ẹga baroma ẹkẹvuọvo yẹ ayen sian ogangan rọ herọ. Kẹnoma kẹ ihwo ọtiọye na.”—2 Tim. 3:1-5.

20. Mavọ wo se vwo djephia nẹ Uvie na ghanre kẹ wẹ?

• “Gba ka guọnọ uvie rẹ Ọghẹnẹ tavwe, kugbe ọvwata rọye.”—Mat. 6:33.

• “Jesu da ta kẹ idibo rọye nẹ, ohwo da guọno nẹ ọye nene uvwe, e jọ sen oma rọye re o mu [“urhe roja,” NW] rọye re o nene uvwe.”—Mat. 16:24.

21. Ono yen Idẹbono, kẹ amono yen emakashe rọyen?

• “Ovwan ọ rẹ ọsẹ rẹ ovwan Idẹbono . . . Ozighẹ o ruẹ nẹ otọrhe.”—Jọn 8:44.

• “A da djẹ Okpodje rode na rhe otọ, ọrọdekọ rẹ awanre na, re se Idẹbono kugbe Ukọn na, ọphiẹn rẹ akpọ na ejobi—a da djẹ vẹ emakashe rọye ejobi wotọ.”—Ẹvwọ. 12:9.

22. Die yen Eshu ta kpahen Jihova vẹ ihwo re vwẹ ẹga vwọ kẹ?

• “Aye na da ta kẹ ọrọdekọ na, Avwanre sa re emamọ rẹ irhe rẹ udju na; ẹkẹvuọvo Ọghẹnẹ tare nẹ, Wa ria emamọ rẹ urhe rọ uherevie rẹ udju na-a, eyẹ wa vwẹ obọ te-e, we de rhe ghwu. Ẹkẹvuọvọ ọrọdekọ na da ta kẹ aye na, We che ghwu-u. Kidie Ọghẹnẹ riẹnre nẹ ọke wa da riọ ẹro rẹ ovwan ko rhie, ku wa họhọ Ọghẹnẹ, rọ riẹn erhuvwu vẹ umiovwo.”—Jẹn. 3:2-5.

• “Edjọ da kpahe kẹ Ọrovwohwo, Ohọroma a vwọ hwaosa rẹ ohọroma! Obo rẹ ohwo vwori ejobi ọ vwọ hwa osa rẹ urhuarho rọye.”—Job 2:4.

23. Mavọ wo se vwo djephia nẹ eta rẹ Eshu na efian?

• “Ga [Ọghẹnẹ] vwẹ udu wẹn ejobi.”—1 Ikun 28:9.

• “Rhiri bẹsiẹ mi vwo ghwu mi se ku ase mẹ fia-a.”—Job 27:5.

24. Diesorọ ihwo vwo ghwẹ?

• “Kirobo rẹ umwemwu wan oma rẹ ohwo ọvo rhe akpọ rẹ ughwu da wan oma rẹ umwemwu rhe na, ọtiọye na ughwu da hrabọ ro ihwo ejobi fikiridie ihwo ejobi ru umwemwu.”—Rom 5:12.

25. Ẹdia vọ yen ihwo ri ghwuru hepha?

• “Ihwo ekpokpọ riẹnre nẹ ayen che ghwu, ẹkẹvuọvo ihwo ri ghwuru riẹn emu ọvuọvo-o.”—Aghwo. 9:5.

26. Iphiẹrophiyọ vọ yen herọ vwọ kẹ ihwo ri ghwuru?

• “Evrẹnushi herọ kẹ ihwo te ihwo ọsoso te i ri jẹ ọsoso ẹdia.”—Iruo 24:15.

27. Bro ihwo yen che nene Jesu sun vwẹ odjuvwu?

• “Nighe, Omogodẹ na de mudia vwẹ Ugbenu ri Zayọn, ihwo uriori ujughwrẹ gbẹ ẹne re si odẹ rọye kugbe odẹ rẹ Ọsẹ rọye phihọ arhare rayen.”—Ẹvwọ. 14:1.