Gidiọn Phi Ihwo rẹ Midian Kparobọ

Ọke ọvo vwo te, emọ rẹ Izrẹl na da rhoma chukoku Jihova, ayen ke ga eghẹnẹ rẹ efian. Ẹgbukpe ighwrẹn yen ihwo rẹ Midian cho eranvwe rayen je guọghọ ekankọn rayen. Ihwo rẹ Izrẹl na ki siomanẹ vwevunrẹ inu rẹ eragha vẹ igbenu rere ayen sa vwọ vrabọ rẹ ihwo rẹ Midian. Ayen da rẹ Jihova nẹ o sivwin ayen. Jihova de ji amakashe bru ọshare ọvo re se Gidiọn. Amakashe na da ta: ‘Jihova sane owẹ vwọ dia ọgbofovwin rode.’ Gidiọn da nọ: ‘Mavọ mi se vwo sivwin Izrẹl? Mẹvwẹ ohwo diodi.’

Mavọ yen Gidiọn cha vwọ riẹn nẹ Jihova jẹrẹ reyọ? O de phi ẹton rẹ ogegede phiyotọ, ọ da vuẹ Jihova: ‘Vwẹ urhiọke, irho da kpọrhọ ẹton rẹ ogegede na jẹ otọ na pha yaya, ke me riẹn nẹ wọ guọnọre nẹ mi re sivwin Izrẹl.’ Ọke vwo ghini rhie, ẹton rẹ ogegede na kpọrhọre jẹ otọ na pha yaya! Ẹkẹvuọvo Gidiọn da rhoma tanẹ ọyen guọnọre nẹ ẹton rẹ ogegede na dia yaya rere otọ na kpọrhọ. Ọ vwọ ghene phia ọtiọyen, Gidiọn da rhe mrẹvughe nẹ Jihova ghene sanọ. O de koko isodje rọyen rere ayen re nene ihwo rẹ Midian họnre.

Jihova da vuẹ Gidiọn: ‘Me cha nẹrhẹ ihwo rẹ Izrẹl phikparobọ. Ẹkẹvuọvo wo se roro nẹ ẹgba wẹn yen wo vwo phikparobọ kidie isodje wẹn bunrun. Gba vuẹ kohwo kohwo rẹ oshọ muẹ nẹ o rhivwin kpo.’ Ọtiọyena, isodje 22,000 de rhivwin kpo 10,000 ọvo kọyen chekọ. Jihova da rhoma ta: ‘Isodje na ji bun nọ. Mu ayen kpo urhie na rere ayen da ame. Isodje re da ame ji nẹ oma riariẹ sẹ ọvwẹghrẹn cha, yen wọ jẹ reyọ.’ Isodje 300 ọvo yen ru ọtiọyen. Jihova de ve nẹ isodje tutuno nana yen che phi isodje rẹ Midian 135,000 kparobọ.

Vwẹ ason yena, Jihova da vuẹ Gidiọn: ‘Ọke wo che vwo nene ihwo rẹ Midian họnre tere!’ Gidiọn da kẹ eshare ri nenire na ewanre kugbe etoto re phi urhukpẹ phiyọ evun rayen. Ọ da vuẹ ayen nẹ, ‘Ovwan ni vwe, rere ovwan ru obo ri mi ruru.’ Gidiọn de hworo owanre rọyen, ọ da guọghọ ọtoto rọyen, ọ da kpare urhukpẹ rọyen na kpenu, o de kperi: ‘Ọlọkọ rẹ Jihova vẹ ọ rẹ Gidiọn!’ Eshare 300 na de ji ru ọtiọyen. Oshọ de mu ihwo rẹ Midian na ayen ki muẹ djẹ. Kẹ ayen họnra ohwohwo. Womarẹ ukẹcha rẹ Jihova, ihwo rẹ Izrẹl de phi ivwighrẹn rayen kparobọ.