Jihova Chirakon rẹ Jona

Ninive, ọyen orere rẹ Asiria, ihwo rọyen ru umwemwu mamọ. Jihova da vuẹ ọmraro rọyen Jona nẹ ọ ra vuẹ ihwo na nẹ ayen kurhẹriẹ. Ẹkẹvuọvo, Jona da djẹ kpo asan ọfa. Ọ da ro okọ ro kpo Tarshish.

Okọ na vwọ hẹ abadi na, ọgbọghọ rode ọvo da tonphiyọ, oshọ ko muẹ ihwo ri biẹ okọ na. Kẹ ayen nẹrhovwo rhe eghẹnẹ rayen, jẹ ayen nọ: ‘Die yen suọ ọnana?’ Ukuotọ rọyen, Jona da vuẹ ayen: ‘Mẹvwẹ yen sorọ. Me djẹ kẹ iruo rẹ Jihova vwọ kẹ vwẹ. Do vwe phiyọ abadi na, ọgbọghọ na kọ cha daji.’ Ihwo ri biẹ okọ na guọnọ do Jona phiyọ urhie na-a, ẹkẹvuọvo Jona da vuẹ ayen nẹ ayen ruo. Ayen vwo ghini do phiyọ abadi na, asan eje da fọ riẹin.

Jona roro nẹ o che ghwu. O vwo divwẹn kpo obotọ rẹ urhie na jẹ ọ nẹrhovwo kẹ Jihova. Jihova de ji erin rode ọvo rhe, ọ da rọ Jona ẹkẹvuọvo o hwere-e. Vwẹ evun rẹ erin na, Jona da nẹrhovwo: ‘Mi veri nẹ mi che nyupho wẹn ọkieje.’ Jihova sẹro rẹ arhọ rẹ Jona vwevunrẹ erin na ẹdẹ erha, o de ruo erin na kpa Jona phiyọ otọ ọyaya.

Jihova vwo sivwin Jona nure na, ko mudiaphiyọ nẹ Jona rhe che kpo Ninive ọfa-a? Ẹjo. Jihova da rhoma vuẹ nẹ o kpo oboyin. Jona da yanran. O vwo te oboyin, ọ da vuẹ erharhe ihwo na nẹ, ‘Ẹdẹ 40 yen chekọ ka cha ghwọrọ Ninive.’ Orọnvwọn ọvo ro rhẹro rọye-en da phia, ihwo rẹ Ninive da kerhọ ayen de kurhẹriẹ. Ovie rẹ Ninive da vuẹ ihwo rọyen: ‘Ovwan kperi se Ọghẹnẹ, ovwan kurhẹriẹ. Ọkiọvo Ọghẹnẹ sa dobọ rẹ oghwọrọ na ji.’ Jihova vwọ mrẹ nẹ ihwo na kurhẹriẹ re, ọ rha ghwọrọ orere na ọfa-a.

Ivun de miovwo Jona kidie Ọghẹnẹ rha ghwọrọ orere na-a. Di roro: Jihova chirakon rẹ Jona, o ji gbe arodọnvwẹ kẹ, ẹkẹvuọvo Jona gbe arodọnvwẹ kẹ ihwo na-a. Ukperẹ ọtiọyen o de re chidia otọ rẹ okankọn ọvo vwẹ otafe rẹ orere na, o de si opharo phiyọ. Okankọn re Jona chidia otọ rọyen na de rhi ghwu, ivun ko miovwo Jona. Jihova da vuẹ: ‘Wo vwo ọdavwẹ rẹ okankọn nana vrẹ ihwo rẹ Ninive. Mi che gbe arodọnvwẹ kẹ ayen, me rha cha ghwọrọ aye-en.’ Die yen ẹkpo na? Ihwo rẹ Ninive ghanre nẹ okankọn.