A VWỌ YANMUẸ OHWO NA
UYONO 9
Erorokẹ
Odjekẹ ri Baibol: “Otu re ghọghọ, nene ayen ghọghọ; otu re viẹ, nene ayen viẹ.”—Ro 12:15.
Obo ri Jesu Ruru
1. Ni IVIDIO na, yẹrẹ se Mak 6:30-34, rere ovwan ta ota kpahen enọ ri nenire:
Diesorọ Jesu vẹ iyinkọn rọyen vwọ guọnọ nẹ “ayen ọvo dia etiyin”?
Die yen mu Jesu vwo yono otu na?
Die Yen Avwanre Yono Mie Jesu?
2. Avwanre guọnọ ghwoghwo iyẹnrẹn esiri na kẹ ihwo je vwẹ ukẹcha kẹ ayen.
Vwẹrokere Jesu
3. Nabọ kerhọ. Vwẹ uphẹn kẹ ohwo na vwọ ta ẹwẹn rọyen phia. Ọ da ta ọdavwẹ rọyen, je vwẹ iroro vẹ obo rọ rhọnvwephiyọ-ọ vwọphia, wo gbotaphiyọ unu-u, yẹrẹ brokpakpa gbobọnyẹ obo rọ ta-a. Wọ da nabọ kerhọ kẹ, jẹ wo dje kẹ nẹ wo vwo ọdavwẹ kpahen obo ro roro.
4. Roro kpahen ohwo ro dje omavwerhovwẹn phia na. Vwo nene oborẹ ovwan ta ota kpahen jovwo re, gba nọ oma wẹn:
‘Diesorọ o vwo fo nẹ ọ riẹn uyota na?’
‘Mavọ yen uyono ri Baibol sa vwọ nẹrhẹ akpọ ro yerẹn enẹna vẹ ọ rẹ obaro na yovwinphiyọ?’
5. Ta ota kpahen erọnvwọn re sa chọn uko. Wo hwe ọke wo ki dje oborẹ uyono ri Baibol sa vwọ kpahenphiyọ enọ rọyen je chọn uko-o.