“Ọyen Okẹ ro Me Yovwin ra kẹ Vwẹ Re”

Ọyena yen ota rẹ ọmọtẹ ọvo rọhẹ ẹgbukpe 13 tare ọke ra vwọ vwẹ ọmọ rẹ eranko vwo ru ẹse kẹ. Aye ọvo rọ dia ọneki tare nẹ ikọmputa rẹ ọsẹ rọyen vwo ru ẹse kẹ ọke rọ vwọ hẹ isikuru yen okẹ ro wene akpeyeren rọyen. Ọshare ọvo rọ ghwa rọnvwọn nu tare nẹ ikadi rẹ aye rọyen vwẹ obọ ru, rọ vwọ kẹ ọke rẹ ayen vwo ru ẹkarophiyọ rẹsosuọ rẹ orọnvwe rayen yen okẹ ro me yovwin kparobọ ra kẹ rẹ re.

Kukpe kukpe yen ihwo ghwọrọ ọke vwọ hiẹ guọnọ okẹ “ro me yovwin” rẹ ayen cha vwọ kẹ ohwo rẹ orua yẹrẹ ugbeyan vwẹ ọke rẹ irueru rẹ oghẹresan. Ihwo buebun guọnọ nyo eta kerẹ e rẹ ihwo tare vwẹ ẹkorota rẹsosuọ na mie ihwo rẹ ayen kẹre okẹ. Kẹ owẹ vwo? Wọ guọnọ kẹ okẹ yẹrẹ reyọ okẹ rọ kẹ ohwo omavwerhovwẹn?

Okẹ tiọyena ghene vwerhoma mamọ, ọ dia fikirẹ obo ro ru kẹ ohwo ra kẹre ọke na ọvo-o, ẹkẹvuọvo ji te omavwerhovwẹn ro rhe ọkokẹ na. Ọyena uyota dẹn, kidie Baibol na tare nẹ: “Ẹrhovwo herọ kẹ ọkokẹ nọ ohwo ra kẹ.” (Iruo Rẹ Iyinkọn Na 20:35) Vwọrẹ uyota, omavwerhovwẹn ro rhe ọkokẹ sa ganphiyọ siẹrẹ ohwo ra kẹre okẹ na da vwẹ ẹro ọghanghanre vwo no.

Ọtiọyena mavọ yen wọ sa vwọ nẹrhẹ okẹ ru wọ kẹ ohwo so omavwerhovwẹn kẹ wẹ vẹ ohwo ru vwọ vwerọ kẹ? Ọ da rha dianẹ wọ sa kẹ okẹ “ro me yovwi-in” vwo, die wo se ru rere okẹ wẹn na vwọ so omavwerhovwẹn kẹ ohwo ru wọ vwerọ kẹ?