Uvi rẹ Aghwanre re Bunu

1. Ẹwẹn vọ yen ihwo buebun vwo kpahen uchebro rẹ aghwanre rọhẹ Baibol na? (Isẹ 1:​20, 21)

VWẸ ẹkuotọ buebun, ọkieje yen a vwọ mrẹ iniọvo rẹ avwanre ri muẹdia vwẹ asan rẹ ihwo wan, re vwẹ ẹbe kẹ ihwo vẹ opharo ehwẹ. Ọ je sa dianẹ wo vwobọ vwẹ oka rẹ iruo aghwoghwo nana jovwo re. Ọkiọvo ọnana nẹrhẹ wo roro kpahen obo rehẹ ọbe rẹ Isẹ rọ ta ota kpahen aghwanre ro bunu vwẹ azagba rere ihwo se vwo nyo uchebro rọyen. (Se Isẹ 1:​20, 21.) Baibol na vẹ ẹbe rẹ ukoko na vọnre vẹ “aghwanre” ri Jihova. Aghwanre nana yen oborẹ ihworakpọ guọnọre rere ayen se vwo vwo arhọ ri bẹdẹ. Oma vwerhen avwanre ọke rẹ ohwo da reyọ ẹbe avwanre. Jẹ ọ dia ihwo eje yen rhọnvwa reyọ aye-en. Evo tobọ guọnọ yono kpahen Baibol na-a. Efa vwẹ avwanre jehwẹ. Ayen no nẹ Baibol na kpo awanre re. Efa je ta erharhe eta kpahen iyono ri Baibol ri shekpahen ẹfuọn, kẹ ayen no nẹ ihwo ri nene urhi na sianro, nẹ ayen vwẹ ihwo efa vwo guẹdjọ. Dedena, ọkieje yen Jihova vwo rhie uphẹn phiyọ rere kohwo kohwo se vwo vwo aghwanre rọyen. Vwẹ idjerhe vọ?

2. Tivọ yen a da sa mrẹ uvi rẹ aghwanre, kẹ orhiẹn vọ yen ihwo buebun bruru?

² Idjerhe ọvo rẹ Jihova vwo rhie uphẹn phiyọ rere ihwo se vwo vwo uvi rẹ aghwanre yen womarẹ Ota rọyen rọ dia Baibol na. Ọbe yena herọ kẹ ihwo buebun. Kẹ ẹbe efa ra fan nẹ Baibol na rhe vwo? A kpẹvwẹ Jihova nẹ buebun rẹ ẹbe nana herọ vwẹ ephẹrẹ re vrẹn 1,000. Ihwo re kerhọ, kọyen ihwo ri se je reyọ oborẹ ayen seri vwo ruiruo cha mrẹ erere. Ẹkẹvuọvo, ihwo buebun brorhiẹn rẹ ayen vwo jẹ erhọn ri Jihova ẹka. Ayen de che brorhiẹn, aghwanre romobọ rayen kọyen ayen vwo ruiruo, ayen me je kerhọ rẹ uchebro rẹ ihworakpọ. Ayen sa tobọ nẹ avwanre kueku kidie avwanre brorhiẹn re vwo yeren akpọ nene oborẹ Baibol na tare. Uyono nana cha ta ota kpahen oboresorọ ihwo vwo ruẹ ọtiọyen. Ẹsosuọ, e jẹ roro kpahen obo re se vwo vwo aghwanre ro nẹ obọ ri Jihova rhe.

ERIANRIẸN RI JIHOVA NẸRHẸ E VWO AGHWANRE

3. Die yen ofori nẹ e ru e se vwo vwo uvi rẹ aghwanre?

³ Aghwanre se mudiaphiyọ ẹgba ra vwọ reyọ obo ra riẹnre vwo bru omamọ rẹ orhiẹn. Jẹ uvi rẹ aghwanre vrẹn ọtiọyen. Baibol na da ta: “Oshọẹdjẹ rẹ Ọrovwohwo na ọyẹ ẹtuọhọ rẹ ẹghwanre, erianriẹn rẹ Ọfuanfọn Ọvuọvo na ọye orẹmrẹ.” (Isẹ 9:10) Ọtiọyena, e de vwo orhiẹn ọghanghanre re che bru, e jẹ muo kpahen ẹro rẹ Jihova vwo nẹ emu rọ dia “erianriẹn rẹ Ọfuanfọn Ọvuọvo na.” E se ru ọyena siẹrẹ e de yono Baibol na vẹ ẹbe efa ra fan nẹ Baibol na rhe. E de ru ọtiọyen, je djephia nẹ e vwo uvi rẹ aghwanre.​—Isẹ 2:​5-7.

4. Diesorọ ọ vwọ dianẹ Jihova ọvo yen sa kẹ avwanre uvi rẹ aghwanre?

⁴ Jihova ọvo yen sa kẹ avwanre uvi rẹ aghwanre. (Rom 16:27) Diesorọ a sa vwọ tanẹ obọ ri Jihova yen aghwanre nẹ cha? Ọrẹsosuọ, Jihova yen Ọmemama na, ọtiọyena ọ riẹn emama rọyen eje fiotọ. (Une 104:24) Ọrivẹ, kemu kemu rẹ Jihova ruẹ dje aghwanre rọyen phia. (Rom 11:33) Ọrerha, ọkieje yen uchebro rẹ aghwanre rẹ Jihova vwọphia vwẹ Baibol na vwo fierere kẹ ihwo re vwẹ ayen ruiruo. (Isẹ 2:​10-12) A da guọnọ vwo uvi rẹ aghwanre, kẹ ofori nẹ e rhiabọreyọ uyota eghanghanre rehẹ Baibol na, e mi ji mu orhiẹn re brẹ kpahen ayen je reyọ ayen vwo ruiruo vwẹ akpeyeren.

5. Die yen nẹ obuko rọyen cha siẹrẹ ihwo rha rhọnvwe nẹ obọ ri Jihova yen uvi aghwanre nẹ cha-a?

⁵ Ihwo buebun vwẹ akpọ na rhọnvwa nẹ emama na eje vwo erhuvwu e je vọn vẹ igbevwunu, jẹ ayen sian nẹ Ọmemama herọ-ọ, kẹ ayen tanẹ erọnvwọn mamarhe. Efa rẹ avwanre mrẹ tanẹ ayen se Ọghẹnẹ gbuyota, ẹkẹvuọvo ayen ni iwan ri Baibol na nẹ i kpo awanre re, ọ rẹ ẹwẹn rayen kọyen ayen vwo ruẹ. Die yen nẹ obuko rọyen rhire? Akpọ na yovwẹn phiyọ kidie nẹ ayen yeren akpọ nene aghwanre romobọ rayen ukperẹ ọ rẹ Ọghẹnẹ? Ayen se vwo uvi rẹ omavwerhovwẹn yẹrẹ iphiẹrophiyọ kpahen obaro na re? Oborẹ avwanre mrẹ vwẹ akpọ na nẹrhẹ e vwo imuẹro kpahen uyota nana: “O vwo aghwanre-e, o vwo ẹruọ-ọ, o vwo iroro-o o se ru emuọvo kpahe Ọrovwohwo-o.” (Isẹ 21:30) Ọnana yen mu avwanre vwọ yare Jihova nẹ ọ kẹ avwanre uvi rẹ aghwanre. Ọ da ohwo mamọ nẹ ihwo buebun ruẹ ọtiọye-en. Diesorọ?

OBORESORỌ IHWO VWỌ SIẸN AGHWANRE RI JIHOVA

6. Kirobo rehẹ Isẹ 1:​22-25, ẹko rẹ ihwo vọ yen siẹn aghwanre ri Jihova?

⁶ Ihwo buebun davwerhọn ọke rẹ aghwanre de “bunu vwẹ evun rẹ urhuvwu” na-a. Kirobo rẹ Baibol na tare, ẹko rẹ ihwo erha yen siẹn aghwanre: “Ihwo ighẹnghẹn na,” “otu re jehwẹ” kugbe “ẹkpa” rẹ ihwo. (Se Isẹ 1:​22-25.) E ja fuẹrẹn iruemu re nẹrhẹ ihwo tiọyena sen aghwanre ri Jihova kugbe obo ra sa vwọ kẹnoma kẹ iruemu tiọyena.

7. Diesorọ ihwo evo vwo brorhiẹn rẹ ayen vwọ dia “ihwo ighẹnghẹn”?

⁷ “Ihwo ighẹnghẹn na” yen ihwo ri se kemu kemu rẹ ayen nyori gbuyota, eyen ihwo ra je fobọ phiẹn. (Isẹ 14:15.) Ọke buebun yen avwanre vwọ yan kare ihwo ọtiọyena vwẹ iruo rẹ aghwoghwo na. Kerẹ udje, roro kpahen iduduru rẹ ihwo rẹ ilori rẹ ẹga yẹrẹ ihwo rehẹ ẹdia rẹ usuon phiẹn ghwru re. O gbe ihwo buebun unu ọke rẹ ayen da riẹn nẹ ilori rẹ ẹga yẹrẹ ihwo rehẹ ẹdia usuon phiẹn ayen. Ẹkẹvuọvo, ihwo re djunute vwẹ Isẹ 1:22 brorhiẹn rẹ ayen vwọ dia ẹdia rẹ ughẹnghẹn rayen na kidie ọyen obo ri je ayen. (Jer. 5:31) Oma vwerhen ayen rẹ ayen vwo ruẹ nene ọhọ romobọ rayen, ayen je guọnọ yono kpahen oborẹ Baibol na tare yẹrẹ yeren akpọ nene iwan rọye-en. Buebun pha kerẹ aye ọvo ro kpo ẹga mamọ vwẹ Quebec, Canada rọ vuẹ oniọvo ọshare ọvo ro rhi ghwoghwo ota kẹ nẹ, “orherẹn avwanre da phiẹn avwanre, oma rọyen yen o ruru, ọ dia avwanre-e!” Vwọrẹ uyota, avwanre guọnọ vwẹrokere ihwo ri brorhiẹn rẹ ayen vwo ghẹ-ẹn!​—Isẹ 1:32; 27:12.

8. Die yen cha vwẹ ukẹcha kẹ avwanre vwo vwo uvi rẹ aghwanre?

⁸ Uchebro ri Baibol na muẹro, ro vwo bru avwanre uche nẹ e ghẹ-ẹn, ẹkẹvuọvo, a “vwẹ iroro [avwanre] dia omiragua.” (1 Kọr. 14:20) E che vwo uvi rẹ aghwanre siẹrẹ a da reyọ uchebro ri Baibol na vwo ruiruo vwẹ akpeyeren avwanre. Ememerha na, ka cha rhe mrẹ oborẹ odjekẹ ri Baibol na vwọ chọn avwanre uko vwọ kẹnoma kẹ ebẹnbẹn ji brorhien rẹ aghwanre. Ofori nẹ e roro kpahen ẹyan-obaro avwanre vwẹ ẹdia nana. Ọ da dianẹ e yono Baibol na ji kpo uyono vwẹ ọkievo rhire na, a sa nọ oma avwanre oboresorọ a je rhe vwomakpahotọ kẹ Jihova ji bromaphiyame-e. Kẹ, ọ da rha dianẹ e bromaphiyame re vwo, a yan-obaro kerẹ oghwoghwota vẹ oyono rẹ iyẹnrẹn esiri na? Orhiẹn rẹ avwanre brẹ djephia sẹ a reyọ odjekẹ ri Baibol na vwo ruiruo? Avwanre dje iruemu Onenikristi phia ọke ra vẹ ihwo efa de ruẹkuẹgbe? O de vwo asan re de ru yovwinphiyọ, e jẹ e roro kokodo kpahen odjekẹ ri Jihova, rọ “nẹrhẹ ogbori ghwanra.”​—Une 19:7.

9. Mavọ yen “otu re jehwẹ” vwo djephia nẹ ayen siẹn aghwanre?

⁹ Ẹko rẹ ihwo rivẹ re siẹn aghwanre ro nẹ obọ rẹ Ọghẹnẹ rhe yen “otu re jehwẹ.” Ọkiọvo, avwanre yan kare ihwo nana vwẹ iruo aghwoghwo na. Oma vwerhen ayen rẹ ayen vwọ reyọ ihwo efa vwọ jehwẹ. (Une 123:4) Baibol na vwẹ orhọn-esion vwọphia nẹ vwẹ oba rẹ ẹdẹ na, otu re reyọ ihwo vwọ jehwẹ che bunphiyọ. (2 Pita 3:​3, 4) Kerẹ egọ ri Lọt, ihwo evo nonẹna je reyọ ẹro ri phovwin vwo nẹ orhọn-esion ro nẹ obọ Ọghẹnẹ rhe. (Jẹn. 19:14) Evo reyọ ihwo ri yeren akpọ nene uchebro ri Baibol vwọ jehwẹ. Otu re reyọ ihwo jehwẹ “nene urhuru sivwe rẹ ugboma rayen.” (Jud 7, 17, 18) Oborẹ Baibol na djisẹ rẹ otu re vwẹ ihwo jehwẹ wan ghwe shamu vẹ iruemu rẹ ihwo ri she nẹ ukoko vẹ e re sen Jihova!

10. Kirobo re djisẹ vwẹ Une Rẹ Ejiro 1:​1, die yen se ru e vwo jẹ ihwo re reyọ ihwo efa vwọ jehwẹ ẹdia?

¹⁰ Die yen se ru e vwo jẹ ihwo re reyọ ihwo efa vwọ jehwẹ ẹdia? Emuọvo ọvo re se ru yen, a vwọ kẹnoma kẹ ihwo ri brenu kpahen kemu kemu. (Se Une Rẹ Ejiro 1:1.) Ọnana mudiaphiyọ nẹ a cha kerhọ yẹrẹ se ovuẹ vuọvo ri shekpahen ihwo ri she nẹ ukoko-o. A riẹnre nẹ e rhe nomaso-o, e se vwo ẹwẹn re vwo brenu, ọ me nẹrhẹ e vwo ẹwẹn ivivẹ kpahen Jihova kugbe odjekẹ rẹ ukoko rọyen vwọphia. Ọnana vwo jẹ phia, a sa nọ oma avwanre: ‘Siẹrẹ a da vwẹ odjekẹ kpokpọ yẹrẹ odjefiotọ vwọphia, mi brenu yẹrẹ ta eta brabra kpahọn? Ọyen ẹkuruemu mẹ re me vwọ tẹnroviẹ oruchọ rẹ ihwo re kobaro rẹ iruo ukoko na?’ A da fobọ dobọ rẹ uruemu nana ji, oma avwanre cha vwerhen Jihova.​—Isẹ 3:​34, 35.

11. Ẹro vọ yen “ẹkpa” rẹ ihwo na vwo nẹ iwan ri Jihova ri shekpahen ẹfuọn?

¹¹ Ẹko rẹ ihwo rerha re siẹn aghwanre yen “ẹkpa” rẹ ihwo. Ayen ẹkpa rẹ ihwo kidie ayen rhọnvwe yeren akpọ nene irhi rẹ Ọghẹnẹ ri shekpahen ẹfuọ-ọn. Obo ri je ayen kọyen ayen ruẹ. (Isẹ 12:15) Ihwo ọtiọyena sen Jihova rọ dia esiri rẹ aghwanre na. (Une 53:1) A da yan kare ayen vwẹ iruo rẹ aghwoghwo na, ọkieje yen ayen vwọ ta erharhe eta kẹ avwanre kidie nẹ avwanre muọghọ kẹ iwan ri Baibol na. Ẹkẹvuọvo, ayen cha sa kẹ avwanre emu esiri vuọvo-o. Baibol na da ta: “Aghwanre kpenu nọ kẹ ẹkpa; o che se rhie unu vwẹ anurhoro na-a.” (Isẹ 24:7) Ẹkpa rẹ ihwo na vwo eta rẹ aghwanre vuọvo vwẹ unu-u. A gbe ta-a rẹ Jihova vwo si avwanre orhọn nẹ a “kẹnẹ oma kẹ ohwo ẹkpa”!​—Isẹ 14:7.

12. Die yen cha chọn avwanre uko vwo jẹ ẹkpa egbe?

¹² Vwọ fẹnẹ ihwo ri vwo utuoma kpahen uchebro ro nẹ obọ rẹ Ọghẹnẹ rhe, avwanre vwo ẹguọnọ rẹ obo rẹ Ọghẹnẹ ruẹ emu wan eriyin ji te iwan rọyen ri shekpahen ẹfuọn. A sa kpuriẹnphiyọ ẹguọnọ re vwo kpahen iwan rẹ Ọghẹnẹ siẹrẹ a da reyọ erere ro no cha vwọ vwanvwe oja rẹ ihwo re senrọ ria. Vwẹ oniso rẹ ebẹnbẹn rẹ ihwo sua ke oma rayen kidie nẹ ayen gbe ẹkpa vwọ sen uchebro rẹ aghwanre ri Jihova. Gbe rhe roro kpahen obo rẹ akpọ wẹn yovwin te kidie nẹ wo nyupho rẹ Ọghẹnẹ.​—Une 32:​8, 10.

13. Jihova gba avwanre rhiabọreyọ uchebro rẹ aghwanre rọyen?

¹³ Aghwanre ri Jihova herọ vwọ kẹ ihwo ejobi, jẹ ọ gba ohwo rhiabọreyọ-ọ. Ẹkẹvuọvo, o djisẹ rẹ obo re cha phia kẹ ohwo rọ sen aghwanre. (Isẹ 1:​29-32) Ihwo re rhọnvwe nyupho ri Jihova-a “cha re emamọ rẹ idjerhe rayen.” Ọke vwọ yanran na, kẹ ayen che yeren akpọ rọ vọnre vẹ oja kugbe ọmiaovwẹ fikirẹ oborẹ ayen yeren akpọ wan, ukuotọ rọyen Jihova me rha ghwọrọ ayen kufia. Vwọ fẹnẹ ayen, Jihova ve kẹ ihwo re kerhọ je reyọ uchebro rẹ aghwanre vwo ruiruo nẹ “ohwo rọ kerhọn mẹ oma ko fuo, oma ko fuo, ọ gbe djẹ oshọ rẹ umiọvwo-o.”​—Isẹ 1:33.

UVI RẸ AGHWANRE FIERERE KẸ AVWANRE

14-15. Die yen Isẹ 4:23 yono avwanre?

¹⁴ Ọkieje yen a vwọ mrẹ erere siẹrẹ a da reyọ aghwanre ro nẹ obọ rẹ Ọghẹnẹ rhe vwo ruiruo. Kirobo re yono re, Jihova rhie uphẹn phiyọ rere kohwo kohwo se vwo vwo aghwanre rọyen. Kerẹ udje, vwẹ ọbe rẹ Isẹ, Jihova kẹ avwanre uchebro re se vwo ruiruo re cha nẹrhẹ akpeyeren avwanre yovwinphiyọ. E gbe ja fuẹrẹn idje ẹne rẹ uchebro rẹ aghwanre yena.

¹⁵ Sẹro rẹ ubiudu wẹn rẹ udje na. Baibol na da ta: “Jẹn udu wẹn sasa vwẹ ọke ejobi; kidie evun rọye ogbugbu rẹ arhọ va nẹ cha.” (Isẹ 4:23) Roro kpahen obo ra guọnọre a sa vwo sẹro rẹ ubiudu rẹ avwanre. Ofori nẹ a re omamọ rẹ emu, sasa oma je kẹnoma kẹ erharhe rẹ iruemu. Ọtiọyen ọ je guọnọ ẹgbaẹdavwọn a sa vwọ sẹro rẹ ubiudu avwanre rẹ udje na. O fori nẹ e se Ota rẹ Ọghẹnẹ kẹdẹ kẹdẹ. Avwanre muegbe rẹ uyono, kpo uyono na ji vwobọ ayen. E de muomaphiyọ iruo rẹ aghwoghwo na ọkieje, jẹ oruru rẹ avwanre ganphiyọ. Avwanre sen obo re cha nẹrhẹ e vwo erharhe rẹ iruemu womarẹ a vwọ kẹnoma kẹ korọnvwọn korọnvwọn rọ sa yanghan iroro rẹ avwanre kerẹ erharhe rẹ ighe vẹ erharhe rẹ igbeyan.

16. Diesorọ uchebro rehẹ Isẹ 23:​4, 5 vwo fo kẹ avwanre nonẹna?

¹⁶ Jẹ oborẹ wo vwori te kẹ wẹ. Baibol na bru avwanre uche: “Wo jẹ owian wẹn dia ọ ra vwọ ghwẹ efe koko ọvo-o. . . . Ọke wọ da ghwa kpare aro mrẹ re, ọ me ghwa ranvwiẹ; kidie siẹvuọvo na ọ me ghwa bẹrẹ ibekpe, ọ me ghwa rhan kpenu kerẹ egodi.” (Isẹ 23:​4, 5) Igho vẹ ekuakua rẹ ihwo vwori sa va ayen abọ kpregede. Dedena, edafe ro enwan rẹ oborẹ efe rayen vwo bunphiyọ, igbere je guọnọ fe. Ọnana yensorọ ayen vwo vwobọ vwẹ erọnvwọn ri miovwin iruemu rayen, oyerinkugbe rẹ ayen vẹ ihwo efa vwori kugbe oma kpokpọ rayen. (Isẹ 28:20; 1 Tim. 6:​9, 10) Vwọ fẹnẹ ayen, aghwanre chọn avwanre uko vwọ vwẹ ẹro abavo vwo nẹ igho. Ẹro abavo ọtiọyena nẹrhẹ a kẹnoma kẹ urhuru, e mi rhi vwo ẹwẹn otekẹvwẹ vẹ omavwerhovwẹn.​—Aghwo. 7:12.

17. Kirobo re djunute vwẹ Isẹ 12:​18, mavọ yen se vwo vwo “ẹrẹnvwe rẹ ọvwiroro”?

¹⁷ Roro te tavwen wọ ke ta. E rhe nomaso-o, eta avwanre sa so ukuoma. Baibol na da ta: “Ohwo ọvo herọ rẹ eta rọye epha kpatakpata kerẹ adjara ro duvwẹ ohwo, ẹkẹvuọvo ẹrẹnvwe rẹ ọvwiroro sivwẹ ohwo.” (Isẹ 12:18) A sẹro rẹ oyerinkugbe siẹrẹ a da kẹnoma kẹ iguegun. (Isẹ 20:19) Eta rẹ avwanre se vwo sivwin ihwo ukperẹ ukuoma, kẹ ofori nẹ e se Ota rẹ Ọghẹnẹ ji roro kpahọn ọkieje. (Luk 6:45) E de roro kokodo kpahen oborẹ Baibol na tare, eta avwanre ke sa dia kerẹ “ogbugbu rẹ aghwanre,” ọ me nẹrhẹ ẹwẹn rẹ ihwo totọ.​—Isẹ 18:4.

18. Mavọ yen obo rehẹ Isẹ 24:6 sa vwọ chọn avwanre uko vwẹ iruo rẹ aghwoghwo na siẹrẹ a da reyọ vwo ruiruo?

¹⁸ Nene odjekẹ. Baibol na vwo uvi rẹ uchebro nana vwọphia: “Aghwanre ọye e vwo phiẹ ofovwi kua. iroro buebu ọye obọẹkparọ.” (Isẹ 24:6.) Roro kpahen oborẹ odjekẹ nana sa vwo chọn wẹ uko vwo phikparobọ vwẹ iruo rẹ aghwoghwo vẹ eyono na siẹrẹ wọ da reyọ vwo ruiruo. Ukperẹ e vwo ru iruo rẹ aghwoghwo na nene ọhọre romobọ rẹ avwanre, kẹ ofori nẹ e ruo nene odjekẹ ra vwọ kẹ avwanre. A mrẹ odjekẹ aghwanre ọtiọnana womarẹ eta re mu kpahen Baibol na rẹ iniọvo ri tedje vwọphia ji te idje ra vwọphia vwẹ emẹvwa avwanre. Vwọba, ukoko ri Jihova kẹ avwanre erọnvwọn re vwo ruiruo kerẹ ẹbe vẹ ividio re sa chọn ihwo uko vwo vwo ẹruọ rẹ Baibol na. Yono obo ra reyọ ekuakua nana vwo ruiruo.

19. Ẹwẹn vọ yen rhe we kpahen aghwanre ri Jihova? (Isẹ 3:​13-18)

¹⁹ Se Isẹ 3:​13-18. Mavọ yen uvi rẹ uchebro rehẹ Baibol na vwerhen avwanre oma te! E ghini se vwo uvi rẹ omavwerhovwẹn ababọ rẹ uchebro nana? Vwẹ uyono nana, a fuẹrẹn idje rẹ aghwanre rehẹ ọbe rẹ Isẹ ra sa reyọ vwo ruiruo re. Vwọrẹ uyota, eta rẹ aghwanre ri Jihova yen vọn Baibol na. E gbe je brorhiẹn re vwo yeren akpọ nene aghwanre ri Jihova ọkieje. Ọtiọyena, ọ dia ẹro rẹ akpọ na vwo nẹ aghwanre yen ma ghanre kẹ avwanre-e, ẹkẹvuọvo o mu avwanre ẹro dẹn nẹ, “e re gbanerọ [aghwanre] gangan eye ihwo ri vwo aghọghọ rode na!”