“Me vẹ Owẹ Dia Vwẹ Iparadaisi”

1. Tavwen Jesu ki ghwu, die yen ọ vuẹ oji ọvo rọ kẹrerẹ? (Luk 23:​39-43)

JESU vẹ iji ivẹ re hwe kẹrẹ na rioja, jẹ ayen fuẹn ẹwẹn ememerha. (Luk 23:​32, 33) Iji ivẹ na ta erharhe eta kpahen Jesu, ọyen odjephia nẹ ayen dia idibo rọye-en. (Mat. 27:44; Mak 15:32) Ẹkẹvuọvo, ọvo usun rayen de wene ẹwẹn. Ọ da ta: “Jesu karohọ ovwẹ vwẹ ọke wo de te uvie rẹ ogangan wẹn na.” Jesu da kpahen: ‘Uyota me ta kẹ owẹ nonẹ na, me vẹ owẹ dia vwẹ Iparadaisi.’ (Se Luk 23:​39-43.) O vwo emu vuọvo ro djerephia nẹ oji nana rhiabọreyọ ovuẹ rẹ “uvie rẹ odjuvwu” rẹ Jesu ghwoghwori ọke rọ vwọ hẹ otọrakpọ na-a. O ji vwo ọke vuọvo rẹ Jesu vwọ tanẹ ọshare nana cha dia Uvie na vwẹ odjuvwu-u. (Mat. 4:17) Jesu ta ota kpahan otọrakpọ na ro che hirhephiyọ Iparadaisi vwẹ obaro na. Diesorọ a sa vwọ ta ọtiọyen?

2. Die yen djerephia nẹ oji ro kurhẹriẹ na ohwo ri Ju?

² Ọhọhọre nẹ oji ro kurhẹriẹ na ohwo ri Ju. Ọ da ta kẹ oji ochekọ na: “Wọ djẹ oshọ rẹ Ọghẹnẹ-ẹ, ọ dia orhiẹ rẹ ughwu ọvuọvo na e bru hwe vẹ avwanre-e?” (Luk 23:40) Ọghẹnẹ yen ihwo ri Ju na ga, ẹkẹvuọvo ihwo rẹ ẹgborho na ga eghẹnẹ buebun. (Eyan. 20:​2, 3; 1 Kọr. 8:​5, 6) Mane kẹ iji ivẹ na ihwo rẹ ẹgborho na jovwo, ọkiọvo kọ rha nọ nẹ, “Wọ djoshọ rẹ eghẹnẹ na?” Vwọba, e ji Jesu bru “igegede rẹ uwevwi rẹ Izrẹl ri ghwruru,” ọ dia ihwo rẹ ẹgborho na yen e jiro brura-a. (Mat. 15:24) Ọghẹnẹ vuẹ ihwo rẹ Izrẹl nẹ, ọyen cha rhọvwọn ihwo ri ghwuru nushi. Ọ sa dianẹ oji ro kurhẹriẹ na riẹn ọnana, kidie eta rọ tare na djerephia nẹ, ọhọhọre nẹ ọ riẹnre nẹ Jihova cha rhọvwọn Jesu o vwo sun vwẹ Uvie rẹ Ọghẹnẹ. Ọ sa dianẹ ọshare na ji vwo iphiẹrophiyọ nẹ Ọghẹnẹ cha rhọvwọn ọyen nushi.

3. Die yen sa djẹ ro ẹwẹn rẹ oji na ọke rẹ Jesu vwo djunute Iparadaisi? Djekpahọn. (Jẹnẹsis 2:15)

³ Ọ vwọ dianẹ oji ro kurhẹriẹ na ohwo ri Ju na, ọhọhọre nẹ ọ riẹn kpahen Adam vẹ Ivi kugbe Iparadaisi rẹ Jihova phi ayen phiyọ na. Ọtiọyena, ọ sa dianẹ oji na vwo imuẹro nẹ Iparadaisi rẹ Jesu ta ota kpahan na ọyen ogba oyoyovwin vwẹ otọrakpọ na.​—Se Jẹnẹsis 2:15.

4. Die yen eta rẹ Jesu vuẹ ọvo usun rẹ iji na mu avwanre vwo roro kpahen?

⁴ Ofori nẹ eta rẹ Jesu ta kẹ oji na mu avwanre vwo roro kpahen oborẹ akpeyeren cha dia vwẹ Iparadaisi. Avwanre se yono erọnvwọn evo kpahen Iparadaisi vwo nẹ usuon rẹ ufuoma rẹ Ovie Solomọn. Avwanre se rhẹro rọyen nẹ Jesu rọ rho nọ Solomọn vẹ ihwo ri che nene sun na che ru akpọ na phiyọ Iparadaisi. (Mat. 12:42) Ọtiọyena, ofori nẹ “igodẹ efa” na riẹn oborẹ ayen che ru rẹ ayen sa vwọ dia ihwo ri muwan re cha dia Iparadaisi na bẹdẹ.​—Jọn 10:16.

MAVỌ YEN AKPEYEREN CHA DIA VWẸ IPARADAISI?

5. Mavọ yen wo rorori nẹ akpeyeren cha dia vwẹ Iparadaisi?

⁵ Die yen djẹ ro ẹwẹn wẹn siẹrẹ wo de roro kpahan Iparadaisi na? Ọkiọvo ẹwẹn wẹ se kpo ogba oyoyovwin rọ họhọ ọ rẹ Idẹn. (Jẹn. 2:​7-9) Wọ sa karophiyọ aroẹmrẹ ri Maika rọ tare nẹ ihwo rẹ Ọghẹnẹ che chidia “dohwo dotọ ri vain kugbe fig rọye.” (Maika 4:​3, 4) Ẹkpo ri Baibol ọvo rọ tare nẹ emuọre cha vọn asan eje, sa djẹ ro owẹ ẹwẹn. (Une 72:16; Aiz. 65:​21, 22) Ọtiọyena, wọ sa mrẹ oma wẹn vwẹ ogba oyoyovwin jẹ wo chidia obaro rẹ imẹjẹ rọ vọnre vẹ emu evwevwerhen. Wọ sa vwẹ ẹwẹn vwo roro ekankọn vẹ idodo ri gbon phaphapha vwẹ aphopho na. Ọ je sa dianẹ wo nyo edo rẹ ehwẹ rẹ ihwo rẹ orua vẹ igbeyan ji te ihwo ra rhọvwọn nushi rhe ri yerẹn kuẹgbe wurhie wurhie. Enana ra vwẹ ẹwẹn roro na dia evwerhẹn ghevweghe-e. Aphro herọ-ọ, enana eje cha phia vwẹ otọrakpọ na. Vwọba, a je cha wian owian rọ kẹ ohwo omavwerhovwẹn vwẹ Iparadaisi.

6. Die yen e che ru vwẹ Iparadaisi? (Ni uhoho na.)

⁶ Jihova ma avwanre ra vwọ riavwerhen rẹ iruo avwanre. (Aghwo. 2:24) A cha wian owian buebun vwẹ uvwre Usuon rẹ Ẹgbukpe Uriorin rẹ Kristi na. Ihwo re wan ukpokpogho rode na vrẹ vẹ iduduru rẹ ihwo ra cha rhọvwọn nushi rhe na cha guọnọ emwa, emuọre vẹ asan rẹ ayen cha dia. E se vwo ru enana, avwanre eje che vwobọ vwẹ owian rọ kẹ ohwo omavwerhovwẹn. Kirobo Adam vẹ Ivi rhe ru vwẹ ogba rẹ ayen hepha jovwo na, avwanre eje che vwo uphẹn re vwo ru akpọ na phiyọ Iparadaisi. Vwẹ ẹwẹn roro obo rọ cha vwerhen oma te, re che vwo yono iduduru rẹ ihwo ra cha rhọvwọn nushi rhe na re ghwa riẹn kpahen Jihova vẹ ọhọre rọye-en je chọn ihwo re fuevun uko ri yerin ọke grongron tavwen Jesu ke rhe otọrakpọ na vwọ riẹn obo re phiare rhanvwe ọke rẹ ayen vwo ghwu nu!

7. Imuẹro vọ yen avwanre se vwo, kẹ, diesorọ?

⁷ Avwanre vwo imuẹro nẹ akpeyeren vwẹ Iparadaisi cha dia yoyovwin, vọn vẹ ufuoma, erọnvwọn eje me je dia utute. Diesorọ? Kidie, Jihova dje oborẹ akpeyeren cha dia kẹ avwanre vwẹ otọ usuon rẹ Ọmọ rọyen. A mrẹ udje ọnana womarẹ ikuegbe rẹ usuon rẹ Ovie Solomọn.

USUON RẸ OVIE SOLOMỌN DJE OBORẸ IPARADAISI CHA DIA

8. Mavọ yen eta rehẹ Une Rẹ Ejiro 37:​10, 11, 29 vwo rugba ọke rẹ Devid vwo si ayen nu? (Ni “Enọ Rẹ Ihwo Ri Se Ẹbe Avwanre Nọre” rọhẹ Uwevwin Orhẹrẹ nana.)

⁸ Ẹwẹn ọfuanfon na mu Ovie Devid vwo si kpahen oborẹ akpeyeren cha dia ọke rẹ ovie ro vwo aghwanre rọ je fuevun de che chidia ekete rẹ usuon vwẹ obaro na. (Se Une Rẹ Ejiro 37:​10, 11, 29.) Ọkieje yen avwanre vwo se Une Rẹ Ejiro 37:11 kẹ ihwo efa ọke re de nene ayen ta ota kpahen Iparadaisi rọ cha na. Ọyena shephiyọ kidie Jesu djunute ẹkpo ri Baibol yena vwẹ ota rọ tare vwẹ enu rẹ ugbenu na, ro djerephia nẹ eta yena che rugba vwẹ obaro na. (Mat. 5:5) Eta ri Devid ji dje oborẹ akpeyeren cha dia ọke rẹ Ovie Solomọn de che sun. Ọke rẹ Solomọn vwo sun Izrẹl, ihwo rẹ Ọghẹnẹ riavwerhen rẹ ufuoma vẹ oyovwen rẹ oghẹresan vwẹ “otọ rọ djẹ vẹ ameivie vẹ ọnyọn.” Ọghẹnẹ da ta: “Ovwan da yan vwẹ evun rẹ irhi mẹ . . . , ke Me cha vwẹ ufuoma vwọ kẹ otọ na ejobi, ovwan de shevwerhẹ, emu kemu ọvuọvo rhe bru ovwan udu-u.” (Liv. 20:24; 26:​3, 6) Ive yena rugba ọke rẹ Solomọn vwo sun. (1 Ikun 22:9; 29:​26-28) Jihova ji ve nẹ irumwemwu “gbe cha dia-a.” (Une 37:10) Ọtiọyena, eta rehẹ Une Rẹ Ejiro 37:​10, 11, 29 rugba vwẹ ọke awanre, i ji che rugba vwẹ obaro na.

9. Die yen Ovie rẹ aye ri Sheba ta kpahen usuon rẹ Ovie Solomọn?

⁹ Ovie aye ri Sheba nyo kpahen akpeyeren rẹ oyovwen vẹ ufuoma rẹ ihwo rẹ Izrẹl riavwerhen rọyen vwẹ otọ rẹ usuon ri Solomọn. Osun yena rọ dia ogboko na, da rhe Jerusalẹm rhe vwẹ ẹro rọyen mrẹ obo ro nyori na komobọ. (1 Ivie 10:1) Ọ vwọ frẹkotọ ni usuon ri Solomọn nu, ọ da ta: “Ubro rẹ ikun na e gbe kẹ vwẹ. . . . Aghọghọ kẹ eya wẹn. Aghọghọ kẹ idibo wẹn nana, re vwẹ kọke kọke mudia vwẹ obaro wẹn ri nyo ẹghwanre wẹn.” (1 Ivie 10:​6-8) Ẹkẹvuọvo, oborẹ akpeyeren hepha vwẹ otọ rẹ usuon ri Solomọn, ọyen ghwa umudje rẹ oborẹ Jihova che ru vwọ kẹ ihworakpọ eje vwẹ otọ rẹ usuon rẹ Ọmọ Rọyen Jesu.

10. Idjerhe vọ yen Jesu vwo yovwin vrẹ Solomọn?

¹⁰ Jesu rho vrẹ Solomọn vwẹ kidjerhe kidjerhe. Solomọn ọyen ohwo ro jẹgba rẹ umwemwu egangan chọ obọ, ukuotọ rọyen, ọ da so ọmiaovwẹ kẹ ihwo rẹ Ọghẹnẹ. Ẹkẹvuọvo, Jesu ohwo ọgbagba. (Luk 1:32; Hib. 4:​14, 15) Jesu fuevun kẹ Ọghẹnẹ dede nẹ o hirharoku edavwini egangan ri nẹ obọ rẹ Eshu rhe. Jesu djerephia nẹ, ọ cha vwẹ ọke vuọvo ru umwemwu yẹrẹ orọnvwọn vuọvo rọ cha so ọmiaovwẹ kẹ ihwo ro suẹ-ẹn. Ọyehẹ Ovie ro me yovwin rẹ avwanre se vwo.

11. Amono yen che nene Jesu sun?

¹¹ Jesu che vwo ihwo 144,000 ri che nene sun vwọ vwẹrote ihworakpọ ji ru ọhọre ri Jihova vwọ kẹ otọrakpọ na gba. (Ẹvwọ. 14:​1-3) Ihwo nana rhiẹromrẹ ọdavwini je rioja ọke rẹ ayen vwọ hẹ otọrakpọ na. Ọtiọyena, ayen cha nabọ vwo ẹruọ rẹ oborẹ ihworakpọ hirharokuẹ. Iruo vọ kiriguo yen ihwo ri che nene Jesu sun na che ru?

IRUO VỌ YEN IHWO RA JẸREYỌ NA CHE RU?

12. Iruo vọ yen Jihova cha vwọ kẹ ihwo 144,000 na?

¹² Iruo rẹ Jesu vẹ ihwo ri che nene sun che ru na, rho vrẹn ọ ra kẹ Solomọn dibidibi. Iduduru rẹ ihwo rehẹ ẹkuotọ vuọvo yen Solomọn vwẹrote. Ẹkẹvuọvo, ihwo ri che sun vwẹ Uvie rẹ Ọghẹnẹ na cha vwẹrote iduima rẹ ihwo rehẹ akpọneje. Ọyen okpuphẹn rode dẹn yen Jihova vwọ kẹ ihwo 144,000 na!

13. Iruo rẹ oghẹresan vọ yen ihwo ri che nene Jesu sun na che ru?

¹³ Kerẹ Jesu, ihwo 144,000 na cha dia ivie kugbe irherẹn. (Ẹvwọ. 5:10) Vwẹ otọ rẹ Urhi rẹ Mosis na, irherẹn na yen ihwo rẹsosuọ ri vwo oghwa rẹ ayen vwọ vwẹrote ẹdia rẹ omakpokpọ rẹ ihwo na je chọn ayen uko vwo sikẹrẹ Jihova. Urhi na, ọyen “uhoho rẹ emu esiri rọ cha na.” Ọtiọyena, ọyen obo re gbare ra vwọ tanẹ ihwo ri che nene Jesu sun na che vwobọ vwẹ owian rẹ oghẹresan rẹ ayen vwọ vwẹrote ẹdia rẹ omakpokpọ rẹ ihwo na je chọn ayen uko vwo sikẹrẹ Jihova. (Hib. 10:1) Enẹna, avwanre ghwa riẹn oborẹ ivie vẹ irherẹn nana che vwo nene ihwo rẹ ayen che sun vwẹ otọrakpọ na ta ota kugbe-e. O toro ọrhuẹrẹphiyotọ rẹ Jihova ruru-u, avwanre se vwo imuẹro nẹ vwẹ Iparadaisi rọ cha na, Jihova cha kẹ ihwo re cha dia otọrakpọ na odjekẹ rẹ ayen guọnọre.​—Ẹvwọ. 21:​3, 4.

DIE YEN OFORI NẸ “IGODẸ EFA” NA RU AYEN SA VWỌ DIA VWẸ IPARADAISI?

14. Oyerinkugbe vọ yehẹ uvwre rẹ “igodẹ efa” na vẹ iniọvo ri Kristi?

¹⁴ Jesu se ihwo ri che nene sun na “imigegede.” (Luk 12:32) Ọ je ta ota kpahen ẹko rivẹ, ro seri “igodẹ efa.” Ẹko ivẹ nana yen kuomagbe dia igegede vuọvo. (Jọn 10:16) Ẹko ivẹ nana wian kuẹgbe enẹna, ayen je cha wian kugbe rhi te ọke rẹ akpọ na che vwo hirhe phiyọ Iparadaisi. Vwẹ ọke yena, “imigegede” na cha dia odjuvwu, “igodẹ efa” na mi rhe vwo iphiẹrophiyọ rẹ ayen vwo yeren akpọ rẹ omavwerhovwẹn vwẹ otọrakpọ na bẹdẹ. Ẹkẹvuọvo, o vwo erọnvwọn ro fori nẹ “igodẹ efa” na ru enẹna rere ayen sa vwọ dia vwẹ Iparadaisi.

15. (a) Idjerhe vọ yen “igodẹ efa” na vwo biẹcha iniọvo ri Kristi? (b) Mavọ yen wọ sa vwọ vwẹrokere udje rẹ oniọvo rọhẹ asan ra da shẹ ihuvwun na? (Ni uhoho na.)

¹⁵ Oji ro kurhẹriẹ na ghwuru tavwen o ki vwo uphẹn ro vwo dje ọdavwaro phia kpahen oborẹ Jesu ru kẹ na vọnvọn. Vwọ fẹnẹ oji na, avwanre re dia “igodẹ efa” na vwo uphẹn buebun asaọkiephana re vwo dje ọdavwaro phia kẹ Jesu. Kerẹ udje, avwanre dje ẹguọnọ re vwo kpahọn phia womarẹ oborẹ e nene iniọvo rọyen ra jẹreyọ na yerẹn wan. Jesu tare nẹ ọnana yen o che ni vwo guẹdjọ rẹ igodẹ na. (Mat. 25:​31-40) Avwanre se bicha iniọvo ri Kristi na womarẹ a vwọ chọn ayen uko vẹ oruru vwẹ iruo rẹ aghwoghwo vẹ odibo egbe na. (Mat. 28:​18-20) Ọnana yen sorọ avwanre vwọ guọnọ reyọ ekuakua re vwo yono Baibol na rẹ ayen vwọ kẹ avwanre vwo ruiruo, kerẹ ọbe ri Vwo Omavwerhovwẹn Bẹdẹ! na. Ọ da dianẹ wo ji rhi vwo ohwo vwọ vwẹ Baibol yono-o, wo se bru ẹkẹn kẹ oma vwọ reyọ uyono ri Baibol vwo mu kẹ ihwo te asan rẹ ẹgba wẹn teri?

16. Die yen se ru enẹna e vwo muegbe ra sa vwọ dia vwẹ Uvie rẹ Ọghẹnẹ?

¹⁶ Ofori nẹ a hẹrhẹ te ọke ra vwọ dia Iparadaisi na tavwen a ke dia oka rẹ ohwo rẹ Jihova guọnọre nẹ ọ dia etiyi-in. Enẹna, a sa davwẹngba vwọ dia ihwo rẹ uyota vwẹ eta vẹ uruemu rẹ avwanre ji yeren akpọ abavo. Avwanre je sa fuevun kẹ Jihova, ọrivẹ orọnvwe avwanre vẹ iniọvo rehẹ ukoko na. A da davwẹngba vwo yerin nene iwan rẹ Ọghẹnẹ vwẹ akpọ rẹ umwemwu nana, kẹ ọ je cha lọhọ re vwo ru ọtiọyen vwẹ Iparadaisi. E ji se yono ena vẹ iruemu ri djerephia nẹ e muegbe e vwo yerin vwẹ akpọ yena. Ni uyovwinrota na “Wo Muegbe Wọ Vwọ Vwẹ Otọrakpọ na ‘Reuku’?” rọhẹ Uwevwin Orhẹrẹ nana.

17. Ofori nẹ ofu rẹ umwemwu re ru wanre dje avwanre? Djekpahọn.

¹⁷ O ji fo nẹ a davwẹngba vwọ kpairoro vrẹn ẹwẹn rẹ abe ro se rhe avwanre fikirẹ imwemwu egangan re ru wanre. Ẹkẹvuọvo, e che se nẹ izobo rẹ ọtanhirhe na kerẹ uphẹn ra vwọ vwẹ “ẹro koko ru umwemwu” e mi guomariase-e. (Hib. 10:​26-31) Jẹ, e de se kurhẹriẹ nẹ umwemwu ọgangan re ruru, guọnọ ukẹcha rẹ ekpako na ji wene uruemu rẹ avwanre, ke se vwo imuẹro nẹ Jihova vwo ghovwo avwanre riẹriẹriẹ re. (Aiz. 55:7; Iruo 3:19) Karophiyọ eta rẹ Jesu vuẹ ihwo ri Farisi na: “Mi rhi se evwata-a, ẹkẹvuọvo iruimwemwu.” (Mat. 9:13) Izobo rẹ ọtanhirhe na vwo ẹgba ro se vwo phoro imwemwu rẹ avwanre eje no.

WỌ SA DIA BẸDẸ VWẸ IPARADAISI

18. Die wọ guọnọ nene oji rọ vẹ Jesu gbe ghwu vwẹ ẹdẹ vuọvo na ta ota kpahen?

¹⁸ Wọ sa mrẹ oma wẹn vwẹ Iparadaisi rẹ wo vwo nene oji rọ vẹ Jesu gbe ta ota na gbikun? Aphro herọ-ọ nẹ, ovwan ihwo ivẹ cha ta ota kpahen ọdavwaro rẹ ovwan vwo kpahen izobo ri Jesu na. Wọ sa vuẹ nẹ o gbikun rẹ obo re phiare inọke evo tavwen Jesu ki ghwu kẹ wẹ kugbe oborẹ oma ruro ọke rẹ Jesu vwọ kpahenphiyọ oyare rọyen. Ọkiọvo, oji na je sa nọ wẹ kpahen oborẹ akpeyeren hepha vwẹ uvwre rẹ ẹdẹ re koba rẹ akpọ rẹ Eshu na. Ọ cha dia okpuphẹn a vẹ ihwo kerẹ ọshare yena vwo yono Baibol na kugbe!​—Ẹfe. 4:​22-24.

19. Diesorọ ofu rẹ akpeyeren vwẹ Iparadaisi che vwo jẹ ohwo e dje? (Ni uhoho rọhẹ opharo ọbe na.)

¹⁹ Ofu akpeyeren vwẹ Iparadaisi che dje ohwo-o. Kẹdẹ kẹdẹ yen avwanre vẹ omamọ rẹ ihwo che vwo yerinkugbe je wian owian re kẹ ohwo omavwerhovwẹn. Ọ rọ ma vwerhoma, kẹdẹ kẹdẹ yen e che vwo vughe Ọsẹ avwanre rọhẹ odjuvwu phiyọ je riavwerhen rẹ erọnvwọn eje rọ vwọ kẹ avwanre. E che yono erọnvwọn kpokpọ kpahọn ọkieje ji yono emu buebun kpahen emama rọyen. Avwanre vwo yerẹn yanran na, jẹ ẹguọnọ re vwo kpahen Ọghẹnẹ kodophiyọ. Mavọ yen akpẹvwẹ Jihova vẹ Jesu te, rẹ ayen vwo ve kẹ avwanre nẹ a sa dia bẹdẹ vwẹ Iparadaisi!