“Oniọvọ Wẹn Che Vrẹn Vwobọ”!

1. Mavọ yen ọmọshare ọvo dje iphiẹrophiyọ ro vwo kpahen evrẹnushi na phia?

ỌMỌSHARE ọvo re se Matthew, ọ mwa okpọga ọvo rọ nẹrhẹ a bẹrẹ abọ buebun. Ọke rọ vwọ hẹ ẹgbukpe ighwrẹn, ọ vẹ orua rọyen de ni ọrhuẹrẹphiyotọ rẹ JW Broadcasting^® re ruẹ kemeranvwe kemeranvwe. Vwẹ okuphiyọ rẹ ọrhuẹrẹphiyotọ na, ayen da mrẹ ividio rẹ une re vwo dede ihwo ri ghwuru ra kpare nushi.b Ayen vwo nughe na nu, Matthew de bru ọsẹ vẹ oni rọyen ra, yọnrọn obọ rayen, ọ da ta: “Ọsẹ vẹ Oni mẹ, ovwan mrẹre nẹ, ọ da tobọ dianẹ mi ghwuru, mẹ cha rhoma vrẹn vwẹ evrẹnushi na. Ovwan sa hẹrhẹ ovwẹ; erọnvwọn eje che shephiyọ.” Wọ sa vwẹ ẹwẹn roro oborẹ oma vwerhen ọsẹ vẹ oni na te rẹ ayen vwọ mrẹ oborẹ esegbuyota ro vwo kpahen evrẹnushi na gan te?

2-3. Diesorọ o vwo fo nẹ e roro kpahen ive rẹ evrẹnushi na?

² Nọke ra ruọke, o fori nẹ e roro kpahen ive rẹ evrẹnushi rọ cha vwẹ obaro ri Baibol na ta ota kpahen. (Jọ 5:​28, 29) Diesorọ? Kidie a riẹn ọke re che vwo she ro okpọga yẹrẹ ohwo re vwo ẹguọnọ kpahen che vwo ghwu va avwanre abọ kpregede-e. (Agh 9:11; Jem 4:​13, 14) Iphiẹrophiyọ rẹ evrẹnushi na sa chọn avwanre uko vwo chirakon rẹ ebẹnbẹn tiọyena. (1 Tẹ 4:13) Baibol na kẹ avwanre imuẹro nẹ Ọsẹ avwanre rọhẹ odjuvwu nabọ vughe avwanre o ji vwo ẹguọnọ avwanre mamọ. (Lu 12:7) Roro kpahen obo ri Jihova Ọghẹnẹ vughe avwanre te rọ vwọ rhoma rhọvwọn avwanre vẹ iroro kugbe iruemu ri rhe avwanre jovwo gbagba. Mavọ yen ọ vwerhoma te Jihova vwọ kẹ avwanre uphẹn rẹ arhọ ri bẹdẹ, a da tobọ ghwu dede ọ cha rhọvwọn avwanre!

³ Vwẹ uyono nana, a cha ta ota kpahen oboresorọ avwanre vwo vwo imuẹro kpahen ive rẹ evrẹnushi na. Vwọba, a je cha fuẹrẹn ikuegbe rẹ ọbọngan rọhẹ ẹkpo ri Baibol re mu uyono nana kpahen rọ tare nẹ: “Oniọvọ wẹn che vrẹn vwobọ.” (Jọ 11:23) Ọ rọ koba, e che yono obo re se vwo ru iphiẹrophiyọ re vwo kpahen evrẹnushi na ganphiyọ.

OBORESORỌ E SE VWO VWO IMUẸRO KPAHEN IVE RẸ EVRẸNUSHI NA

4. E ki se se oborẹ ohwo veri gbuyota, imuẹro vọ yen o fori nẹ e vwo? Djudje rọyen.

⁴ E ki se vwo imuẹro kpahen ive, o fori nẹ e vwo imuẹro nẹ ohwo ro ve ive na vwo owenvwe vẹ ẹgba, ro vwo ru obo ro veri na. Kerẹ udje: Vwẹ ẹwẹn roro nẹ ogiribo rode guọghọ uwevwin wẹn totọ. Ugbeyan ọvo de ve kẹ wẹ nẹ, ‘Me cha vwẹ ukẹcha kẹ wẹ vwọ rhoma bọn uwevwin na.’ Ohwo rẹ uyota yen o ruẹ, wo ji vwo imuẹro nẹ o vwo owenvwe rọ vwọ chọn wẹ uko. Ọ da dia ohwo rọ tẹn ona rẹ ebabọn ji vwo ekuakua ra guọnọre, wọ cha riẹn nẹ o vwo ẹgba rọ sa vwọ chọn wẹ uko. Ọtiọyena wo che vwo imuẹro kpahen ive na. Kẹ ive rẹ Ọghẹnẹ kpahen evrẹnushi na vwo? O ghini vwo owenvwe vẹ ẹgba ro vwo ruo?

5-6. Diesorọ o vwo mu avwanre ẹro nẹ Jihova vwo owenvwe rọ vwọ kpare ihwo ri ghwuru?

⁵ Jihova vwo owenvwe rọ vwọ rhọvwọn ihwo ri ghwuru? Aphro herọ-ọ, o vworo. Ọ reyọ ẹwẹn ọfuanfon rọyen vwo mu ihwo vwo si kpahen ive rẹ evrẹnushi rọ cha vwẹ obaro vwẹ Baibol na. (Aiz 26:19; Ho 13:14; Ẹvw 20:​11-13) Ọkieje Jihova de ve ive, ọyen o vwo ruo gba. (Jos 23:14) Vwọrẹ uyota, Jihova vwo owenvwe rọ vwọ rhọvwọn ihwo ri ghwuru. Diesorọ a vwọ ta ọtiọyen?

⁶ Roro kpahen oborẹ Job tare. O vwo imuẹro nẹ ọyen da tobọ ghwu dede, Jihova guọnọre nẹ ọyen rhoma dia. (Job 14:​14, 15.) Jihova ji vwo owenvwe tiọyen kpahen idibo rọyen eje ri ghwuru. Ọ guọnọre nẹ ayen rhoma dia vwọrẹ omakpokpọ vẹ omavwerhovwẹn. Kẹ iduima rẹ ihwo ri ghwuru ri vwo uphẹn rẹ ayen vwo yono uyota na kpahen Jihova-a vwo? Ọghẹnẹ rẹ ẹguọnọ na vwo owenvwe rọ je vwọ kpare ayen nushi. (Iru 24:15) Ọ guọnọre nẹ ayen vwo uphẹn vwọ dia igbeyan rọyen je dia otọrakpọ na bẹdẹ. (Jọ 3:16) O phẹnre dẹn nẹ Jihova vwo owenvwe rọ vwọ rhọvwọn ihwo ri ghwuru.

7-8. Diesorọ o vwo mu avwanre ẹro nẹ Jihova vwo ẹgba rọ vwọ rhọvwọn ihwo ri ghwuru?

⁷ Jihova ghini vwo ẹgba rọ vwọ kpare ihwo ri ghwuru? Dẹn! Ọyen hẹ “Ọrovwoẹgba na.” (Ẹvw 1:8) Ọtiọyena o vwo ẹgba rọ vrẹ ẹgba ro se vwo phi ivwighrẹn rọyen kparobọ, ji te ughwu dede. (1 Kọ 15:26) Ọnana vwẹ ọbọngan vẹ uchebro vwọ kẹ avwanre. Roro kpahen obo re phia kẹ oniọvo aye Emma Arnold. Ọke re vwo phi ofovwin rẹ akpọeje rivẹ, ọ vẹ orua rọyen hirharoku ẹdia egangan re davwen esegbuyota rayen ni. Ro vwo bru ọmọtẹ rọyen uche kpahen ihwo rẹ ayen vwo ẹguọnọ kpahen ri ghwuru vwẹ ọko rẹ oja ri Nazi, ọ da ta: “ọ da dianẹ ihwo ri ghwu re rha cha sa dia ọfa-a, kọyen ughwu vwo ẹgba vrẹ Ọghẹnẹ, jẹ ọ dia ọtiọyen ọ hepha-a.” Vwọrẹ uyota, o vwo emu vuọvọ rọ gan nọ Jihova-a! Ọghẹnẹ ro me kpenu rọ ma arhọ na ji vwo ẹgba rọ vwọ rhọvwọn ihwo ri ghwuru.

⁸ Emu ọfa rọ sorọ avwanre vwọ riẹn nẹ Ọghẹnẹ sa kpare ihwo ri ghwuru ọyen ẹgba ro vwori rọ vwọ karophiyọ emu eje. O mu odẹ kẹ isio ọvuọvo. (Aiz 40:26) Vwọba, ọ karophiyọ ihwo eje ri ghwu re. (Job 14:13; Lu 20:​37, 38) Rọ vwọ karophiyọ erọnvwọn eje ri shekpahen ihwo rọ cha rhọvwọn nushi bẹnre-e, ji te uruemu, iroro, ekroma kugbe oborẹ ayen rhiẹromrẹ vwẹ akpeyeren.

9. Diesorọ wo vwo vwo imuẹro kpahen ive ri Jihova ro shekpahen evrẹnushi vwẹ obaro na?

⁹ Aphro herọ-ọ nẹ e se vwo imuẹro kpahen ive ri Jihova kpahen evrẹnushi rọ cha vwẹ obaro na kidie avwanre riẹnre nẹ o vwo ẹgba vẹ owenvwe ro vwo ru obo ro veri. Ji roro kpahen orọnvwọn ọfa rọ nẹrhẹ ive rẹ Ọghẹnẹ kpahen evrẹnushi na mu avwanre ẹro: Jihova kpare ihwo ri ghwuru nushi jovwo re. Vwẹ ọke awanre, ọ vwẹ ẹgba kẹ eshare evo re fuevun, ji te Jesu, ayen vwọ kpare ihwo ri ghwuru nushi. E jẹ a ta ota kpahen ikuegbe rẹ evrẹnushi ọvo ri Jesu, ra niyẹnrẹn rọyen phiyọ Jọn uyovwin 11.

UGBEYAN RI JESU ỌGHANGHANRE ỌVO GHWU VABỌ

10. Die yen phiare ọke rẹ Jesu vwo ruiruo rẹ aghwoghwo rọyen vwẹ obo ovrẹ ri Jọdan, kẹ die yen o ruru? (Jọn 11:​1-3)

¹⁰ Se Jọn 11:​1-3. Vwẹ ẹwẹn roro obo re phiare vwẹ Betani vwẹ oba rẹ ukpe ri 32 C.E. Jesu vwo igbeyan evo re kẹrẹ vwẹ ọko nana​—Lazarọs kugbe iniọvo rọyen emetẹ ivẹ, Meri vẹ Mata. (Lu 10:​38-42) Ẹkẹvuọvo oma rẹ Lazarọs ganre-e, ọnana da nẹrhẹ osho mu iniọvo rọyen. Ayen da vwẹ ovuẹ vwo rhe Jesu, rọhẹ obo ovrẹ ri Jọdan, ọ cha reyọ ẹdẹ ivẹ tavwen ọ ke sa yan te Betani. (Jọ 10:40) Ọ da ohwo mamọ nẹ, Lazarọs ghwuru omarẹ ọke rẹ ohwo re ji ri na vwo te asan rẹ Jesu hepha. Dede nẹ Jesu riẹnre nẹ ugbeyan rọyen na ghwe ghwu nu obọ, ọ je dia asan rọ hepha na ẹdẹ ivẹ tavwen o ki mu oyan phiyọ vwo kpo Betani. Ọtiọyena ọke rẹ Jesu vwo te oboyin, jẹ Lazarọs ghwuru ọsoso ẹdẹ ẹne re. Jesu guọnọ ru orọnvwọn ro che fi erere kẹ igbeyan rọyen je ghwa ujiri vwo rhe Ọghẹnẹ.​—Jọ 11:​4, 6, 11, 17.

11. Die yen e se yono vwo nẹ ikuegbe nana kpahen oborẹ uvi rẹ ugbeyan mudiaphiyọ?

¹¹ Ikuegbe nana yono avwanre oborẹ uvi rẹ ugbeyan mudiaphiyọ. Roro kpahọn: Ọke rẹ Meri vẹ Mata vwọ reyọ ovuẹ vwo rhe Jesu, ọ dia ayen vuẹ rẹ nẹ ọ rhe Betani-i. Ayen de tanẹ oma rẹ ugbeyan rọyen ganre-e. (Jọ 11:3) Jesu sa rhọvwọn Lazarọs vwẹ asan rọ hepha ọke ro vwo ghwu. Dedena, Jesu de kpo Betani ra vwomaba igbeyan rọyen Meri kugbe Mata. Wo vwo ugbeyan rọ sa chọn wẹ uko ọ da tobọ dianẹ wọ vuẹrẹ nẹ o ru ọtiọye-en? Ọ da dia ọtiọyen kọyen wọ sa vwẹrosuọ vwẹ “ẹdoja.” (Isẹ 17:17) Kerẹ Jesu, e ja dia oka rẹ ugbeyan ọtiọyen vwọ kẹ ihwo efa! Asaọkiephana e je rhivwin kpo ikuegbe na a mrẹ obo re phiare.

12. Die yen Jesu ve kẹ Mata, kẹ diesorọ a sa vwọ tanẹ ọ dia ive ghevweghe-e? (Jọn 11:​23-26)

¹² Se Jọn 11:​23-26. Ọke rẹ Mata vwọ riẹn nẹ Jesu sikẹrẹ Betani re, o de brokpakpa djẹ bro ra je tanẹ: “Ọrovwohwo, ọ diane wọ hẹ etinẹ nọ, oniọvo mẹ na e ghwu-u.” (Jọ 11:21) Vwọrẹ uyota, o rhe se sivwin Lazarọs. Ẹkẹvuọvo o vwo obo re rho vrẹ ọnana rẹ Jesu vwo vwẹ ẹwẹn rọ guọnọ ru. Ọ da ta: “Oniọvọ wẹn che vrẹn vwobọ.” Ọ da vuẹ Mata oboresorọ o vwo vwo imuẹro kpahen obo rọ tare na, “Mẹvwẹ hẹ evrẹnushi na kugbe arhọ na.” E, Ọghẹnẹ kẹ rẹ ẹgba rọ vwọ rhọvwọn ihwo ri ghwuru. Ọkiọvo vwẹ obuko re, ọ rhọvwọn ọmọtẹ ọvo ro ghwe ghwu nu obọ ọ je rhọvwọn eghene ọshare ọvo, ọ sa dianẹ ẹdẹdẹ ro ghwuru na. (Lu 7:​11-15; 8:​49-55) Ẹkẹvuọvo kẹ ọ sa rhọvwọn ohwo ro ghwuru ọsoso ẹdẹ ẹne rẹ oma rọyen ji gbon re?

“LAZARỌS, YANRHE!”

13. Vwo nene obo rehẹ Jọn 11:​32-35, die yen Jesu ruru ọke rọ vwọ mrẹ Meri vẹ ihwo efa re viẹ? (Ni uhoho na.)

¹³ Se Jọn 11:​32-35. Vwẹ ẹwẹn roro obo re rhoma phia. Meri, oniọvo ri Lazarọs ọmọtẹ, de ji bru Jesu ra. Je vwariẹn eta vuọvo rẹ oniovo rọyen vuẹ rẹ na nẹ: “Ọrovwohwo, ẹ dianọ wọ hẹ etinẹ nọ, oniọvo mẹ na e ghwu-u.” Ọ vẹ ihwo efa rehẹ etiyin muomaphiyọ mamọ. Ọ da Jesu mamọ ọke rọ vwọ mrẹ ji nyo umri rayen re viẹ. Fikirẹ arodọnvwẹ ro vwo kpahen igbeyan rọyen na, Jesu da je viẹ. Ọ riẹn obo rọ da ohwo te siẹrẹ ohwo re vwo ẹguọnọ kpahen de ghwu. Vwọrẹ uyota, o vwo owenvwe ro vwo si obo re nẹrhẹ ayen viẹ na no!

14. Die yen oborẹ Jesu ruru ọke rẹ Meri vwọ viẹ yono avwanre kpahen Jihova?

¹⁴ Oborẹ Jesu ruru ọke rọ vwọ mrẹ Meri rọ viẹ yono avwanre nẹ Jihova ọyen Ọghẹnẹ ro gbe arodọnvwẹ. Diesorọ a sa vwọ ta ọtiọyen? Kirobo re yonori vwẹ uyono rọ wanre na, Jesu nabọ vwẹrokere iroro vẹ oborẹ Ọsẹ rọyen ruẹ erọnvwọn wan gbagba. (Jọ 12:45) Ọtiọyena e de se kpahen oborẹ aro rẹ igbeyan ri Jesu dọn rọ tẹdia ro de nene ayen viẹ, a sa tanẹ ọtiọyen yen oma ji ruẹ Jihova siẹrẹ ọ da mrẹ avwanre re viẹ. (Un 56:8) Aphro herọ-ọ ọnana cha nẹrhẹ wo vwo owenvwe wo vwo sikẹrẹ Ọghẹnẹ avwanre ro gbe arodọnvwẹ na.

15. Kirobo ra niyẹnrẹn rọyen vwẹ Jọn 11:​41-44, die yen phiare vwẹ asan re shi Lazarọs phiyọ. (Ni uhoho na.)

¹⁵ Se Jọn 11:​41-44. Ọke rẹ Jesu vwo te asan re shi Lazarọs phiyọ ọ da tanẹ e mu oragha na no. Mata da sen tanẹ, enẹna jẹ oma rọyen gbon re. Jesu da vuẹ: “Me ta kẹ owẹ nẹ wo de segbuyota wọ cha mrẹ urinrin rẹ Ọghẹnẹ?” (Jọ 11:​39, 40) Jesu da kpare opharo kpenu ọ da nẹrhovwo. Ọ guọnọ vwẹ urinrin rẹ obo re cha phia eje vwọ kẹ Jihova. Jesu de kperi phia tanẹ: “Lazarọs, yanrhe!” Lazarọs da yan phia! Jesu ghwe ru emu rẹ igbevwunu rẹ ihwo evo rorori nẹ ọ cha sa phia-a.​—Ni study note rọhẹ Jọn 11:​17, NW ọ rẹ Oyibo.

16. Idjerhe vọ yen ikuegbe rọhẹ Jọn uyovwin 11 sa vwọ nẹrhẹ esegbuyota re vwo kpahen iphiẹrophiyọ rẹ evrẹnushi na ganphiyọ?

¹⁶ Ikuegbe ra niyẹnrẹn rọyen phiyọ Jọn uyovwin 11 nẹrhẹ esegbuyota re vwo kpahen iphiẹrophiyọ rẹ evrẹnushi na ganphiyọ. Vwẹ idjerhe vọ? Karophiyọ oborẹ Jesu vuẹ Mata: “Oniọvọ wẹn che vrẹn vwobọ.” (Jọ 11:23) Kerẹ Ọsẹ rọyen, Jesu vwo owenvwe vẹ ẹgba ro vwo ru obo ro veri. Oviẹ rọ viẹre na djerephia nẹ ọ guọnọ kpare ihwo ri ghwuru ji si ọmiaovwẹ rẹ ughwu sua no. Ọke rẹ Lazarọs vwọ yan nẹ evunrẹ ushi na rhe, Jesu rhoma djephia obọ ọfa nẹ o vwo ẹgba rọ vwọ rhọvwọn ihwo ri ghwuru. Vwọba, roro kpahen oborẹ Jesu vuẹ Mata: “Me ta kẹ owẹ nẹ wo de segbuyota wọ cha mrẹ urinrin rẹ Ọghẹnẹ?” (Jọ 11:40) Avwanre vwo oboresorọ e vwo vwo imuẹro nẹ ive rẹ Ọghẹnẹ ro shekpahen evrẹnushi na che ghini rugba. Kẹ die yen e se ru rere imuẹro nana sa vwọ ganphiyọ?

DIE YEN E SE RU RERE IPHIẸROPHIYỌ RE VWO KPAHEN EVRẸNUSHI NA SA VWỌ GANPHIYỌ

17. Die yen ofori nẹ e vwo vwẹ ẹwẹn siẹrẹ e de se kpahen ikuegbe rẹ evrẹnushi rehẹ Baibol na?

¹⁷ Se ji roro kokodo kpahen evrẹnushi re phia wan re. Baibol na djunute ikuegbe rẹ ihwo ẹrenren ra kpare nushi vwẹ otọrakpọ na.c Diesorọ wọ rha jomaotọ fuẹren ikuegbe nana ọvuovo-o? Wo vwo ruẹ ọtiọyen ye, karophiyọ nẹ eshare, eya vẹ emọ rẹ ikuegbe nana shekpahen, eyen ihwo re ghene dia vwẹ ọke rọ wanre. Vwo oniso rẹ obo wo se yono vwo nẹ ikuegbe nana rhe. Roro kpahen oborẹ ikuegbe ọvuọvo dje owenvwe vẹ ẹgba rẹ Ọghẹnẹ vwori rọ vwọ kpare ihwo ri ghwuru. Marho, roro kpahen evrẹnushi rọ ma ghanre kparobọ rọ dia ọ ri Jesu. Karophiyọ nẹ ihwo buebun yen rhiẹromrẹ ra vwọ kparọ nushi nu, ọnana jẹ emuọvo kiriguo re mu esegbutyota avwanre kpahen.​—1 Kọ 15:​3-6, 20-22.

18. Mavọ wọ sa vwọ reyọ ine re ta ota kpahen iphiẹrophiyọ rẹ evrẹnushi na vwo ruiruo? (Ni eta rehẹ obotọ na.)

¹⁸ So “ine” rẹ ukoko na re ta ota kpahen iphiẹrophiyọ rẹ evrẹnushi na.d (Ẹf 5:19) Ine nana nẹrhẹ imuẹro vẹ esegbuyota re vwo kpahen iphiẹrophiyọ rẹ evrẹnushi na ganphiyọ. Kerhọ rẹ ine na. Yono ayen, wọ je ta ota kpahen oborẹ ibieta ra vwọ so ine na mudiaphiyọ vwẹ ẹga rẹ orua wẹn. So ayen ku uyovwin wo ji roro kpahen ayen vwẹ ubiudu wẹn. Ọ da dianẹ wo hirharoku ọdavwini ro phi arhọ wẹn phiyọ ẹdia rẹ imuoshọ yẹrẹ ohwo wo vwo ẹguọnọ kpahen ghwu va wẹ abọ, ẹwẹn ọfuanfon ri Jihova cha chọn wẹ uko vwọ karophiyọ ine nana je mrẹ ọbọngan vẹ uchebro vwo nẹ ayen rhe.

19. Die yen e so roro kpahen oborẹ evrẹnushi na cha dia? (Ni ekpeti na “Die Wọ Cha nọ Ayen?”)

¹⁹ Reyọ ẹgba iroro wẹn wo ruiruo. Jihova kẹ avwanre ẹgba ra vwọ mrẹ oma avwanre nẹ avwanre hẹ akpọ ọkpokpọ na re. Oniọvo aye ọvo da ta: “Me ghwọrọ ọke grongron vwo roro nẹ me evunrẹ akpọ ọkpokpọ na re tẹdia rọ da hohọ nẹ me tobọ nyo ọnrhe rẹ idodo ri gbon phaphapha vwẹ iparadaisi.” Vwẹ ẹwẹn roro nẹ wọ mrẹ eya vẹ eshare re fuevun vwẹ ọke awanre. Ono yen wo rhẹro wọ vwọ mrẹ? Onọ vọ yen wọ cha nọ? Vwẹ ẹwẹn roro ihwo ru wo vwo ẹguọnọ kpahen ri ghwu re ru wọ vẹ ayen cha rhoma dia kugbe. Roro kpahen obo rọ cha dia wọ da mrẹ ayen​—eta rẹsosuọ wọ cha vuẹ ayen, obo wọ cha gbane ayen wan, kugbe oviẹ rẹ aghọghọ.

20. Die yen ofori nẹ avwanre ru?

²⁰ Avwanre kpẹvwẹ Jihova mamọ vwọ kẹ ive rẹ evrẹnushi na! Avwanre se vwo imuẹro nẹ ive nana che rugba kidie Jihova vwo owenvwe vẹ ẹgba ro vwo ru obo ro veri. E ja davwẹngba vwo ru esegbuyota re vwo kpahen uvi rẹ iphiẹrophiyọ nana ganphiyọ. E de ru ọtiọyen, ke che sikẹrẹ Ọghẹnẹ ro ve ive nana kẹ avwanre nẹ, ‘Ihwo ru wo vwo ẹguọnọ kpahen ri ghwuru che vrẹn!’