Rha Rhuaphiyọ Vwẹ Ẹguọnọ Wẹn

1. Erhọ yen erọnvwọn evo wo yono kpahen wọ vwọ ton eyono ri Baibol phiyọ?

WỌ KAROPHIYỌ ọke wọ vwọ ton eyono ri Baibol phiyọ? Ọ sa dianẹ o gbe we unu wọ vwọ riẹn nẹ Ọghẹnẹ vwo odẹ. Ọkiọvo ẹwẹn wẹn te otọ wọ vwọ riẹn nẹ Ọghẹnẹ torhẹ ihwo vwẹ ẹtẹrhe rẹ erhanre-e. Oma vwerhen owẹ wọ vwọ riẹn nẹ wọ cha rhoma mrẹ ihwo ru wo vwo ẹguọnọ kpahen ri ghwuru ji nene ayen dia vwẹ iparadaisi vwẹ otọrakpọ na.

2. Vwọ vrẹ eyono ri Baibol na, ẹdia efa vọ yen wo de ru yovwinphiyọ? (Ẹfesọs 5:1, 2)

² Wo vwo yono kpahen Baibol na phiyọ ye, ẹguọnọ ru wo vwo kpahen Jihova kọ rhe ganphiyọ. Ẹguọnọ yena yen mu we vwọ reyọ obo ru wo yonori vwo ruiruo. Ọnana da nẹrhẹ wo bru omamọ erhiẹn re mu kpahen odjekẹ ri Baibol na. Wo de ru iroro vẹ iruemu wẹn yovwinphiyọ kidie wọ guọnọ ru obo re vwerhen Ọghẹnẹ oma. Kirobo rẹ omotete vwẹrokere ọse vẹ oni ro vwo ẹguọnọ, wọ da vwẹrokere Ọse wẹn rọhẹ odjuvwu.—Se Ẹfesọs 5:1, 2.

3. Enọ vọ yen a sa nọ oma rẹ avwanre?

³ A sa nọ oma rẹ avwanre: ‘Ẹguọnọ mi vwo kpahen Jihova ganre enẹna vrẹ ọke me ka vwọ mrẹ uyota na vughe? Ghwe vwo nẹ ọke mi vwo bromaphiyame rhire na, iruemu kugbe iroro mẹ vẹ ọhọre ri Jihova shephiyọ—marho mi de dje ẹguọnọ kẹ iniọvo na?’ Ọ da dianẹ “ẹguọnọ ru wo vwori ẹsosuọ” djiro re, wo jẹ ofu dje we-e. Emu ọtiọyen je phia kẹ Inenikristi ẹgbukpe ujorin rẹsosuọ. Jesu kpairoro vrẹ aye-en, ọ je cha kpairoro vrẹ avwanre-e. (Ẹvw 2:4, 7) Ọ riẹnre nẹ e ji se ru ẹguọnọ rẹ avwanre vwori ra ka vwọ mrẹ uyota na vughe ẹsosuọ ganphiyọ.

4. Die yen a cha ta ota kpahen vwẹ uyono nana?

⁴ Uyono nana cha ta ota kpahen oborẹ avwanre se vwo ru ẹguọnọ re vwo kpahen Jihova vẹ ihwo efa ganphiyọ. A je cha jokaphiyọ ebruphiyọ evo ri che te avwanre vẹ ihwo efa obọ siẹrẹ e de ru ẹguọnọ rẹ avwanre ganphiyọ.

JẸ ẸGUỌNỌ RU WO VWO KPAHEN JIHOVA RHA RHUAPHIYỌ

5-6. Ebẹnbẹn vọ yen ọyinkọn Pọl hirharoku ọke ro vwo ruiruo aghwoghwo rọyen, kẹ die yen nẹrhẹ ọ sa ga Jihova ọkieje?

⁵ Ọyinkọn Pọl mrẹ omavwerhovwẹn vwẹ ẹga rọ vwọ kẹ Jihova, ẹkẹvuọvo o vwo ebẹnbẹn buebun ro che yerin ghene. Ọkieje yen Pọl vwọ yan ugbo oshesheri, jẹ oyan ọtiọyena pha bẹnbẹn ọke yena. Ọkievo vwẹ oyan rọyen na, Pọl hirharoku “imuoshọ rẹ urhie” kugbe “imuoshọ vwo nẹ obọ rẹ igbunegbu.” O ji vwo ọkievo ivwighrẹn vwo gboja kẹ re. (2Kọ 11:23-27) Ọ dia ọkieje yen iniọvo ri Pọl vẹ ayen gba ga kuẹgbe vwo dje ọdavwaro kpahen obo ro ruru vwọ vwẹ ukẹcha kẹ aye-en.—2Kọ 10:10; Fil 4:15.

⁶ Die yen vwẹ ukẹcha kẹ Pọl vwọ ga Jihova ọkieje? Pọl yono erọnvwọn buebun kpahen iruemu ri Jihova nẹ Baibol na rhe kugbe obo ro rhiẹromrẹ. Pọl vwo imuẹro nẹ Jihova vwo ẹguọnọ rọyen. (Ro 8:38, 39; Ẹf 2:4, 5) O de rhi vwo ẹguọnọ ri Jihova mamọ. Pọl dje ẹguọnọ rọyen kẹ Jihova ro vwo “gbodibo kẹ ihwo efuanfon na . . . ji vwo ruẹ ọtiọyen te ọke na.”—Hib 6:10.

7. Ọrhọ yen idjerhe ọvo avwanre se vwo ru ẹguọnọ rẹ vwo kpahen Jihova ganphiyọ?

⁷ Ẹguọnọ re vwo kpahen Jihova cha rhophiyọ siẹrẹ a da frẹkotọ se Baibol na. Ru wo vwo se Baibol na, davwẹngba vwo vwo oniso rẹ oborẹ ẹkpo ọvuọvo ta kpahen Jihova. Nọ oma wẹn: ‘Mavọ yen asan ri mi seri na vwo djephia nẹ Jihova vwo ẹguọnọ mẹ? Ọrhọ yen obo re sorọ mi vwo vwo ẹguọnọ ri Jihova?’

8. Mavọ yen ẹrhovwo sa vwọ cha avwanre uko vwo ru ẹguọnọ re vwo kpahen Ọghẹnẹ ganphiyọ?

⁸ Idjerhe ọfa e se vwo ru ẹguọnọ avwanre ganphiyọ yen a vwọ nẹrhovwo nẹ ubiudu avwanre rhe Jihova ọkieje. (Un 25:4, 5) E de ru ọtiọyen, Jihova kọ cha kpahenphiyọ ẹrhovwo avwanre. (1Jọ 3:21, 22) Khanh oniọvo aye ọvo vwẹ Asia da ta: “Obo ri mi yono kpahen Jihova yen nẹrhẹ mi vwo ẹguọnọ rọyen, jẹ me vwọ mrẹ obo rọ kpahen phiyọ ẹrhovwo mẹ wan, ẹguọnọ mi vwo kpahọn da rhe ganphiyọ. Ọnana da nẹrhẹ mi vwo owenvwe mi vwo ru obo re vwerhọn.”b

JẸ ẸGUỌNỌ RU WO VWO KẸ IHWO EFA RHOPHIYỌ

9. Idjerhe vọ yen Timoti vwo djephia nẹ ọyen rhuaphiyọ vwẹ ẹguọnọ ro vwo kpahen iniọvo na?

⁹ Ikpe evo vwọ wan ri Pọl vwo kurhẹriẹ nu, ọ da mrẹ eghene ọshare ọvo re se Timoti. O vwo ẹguọnọ ri Jihova vẹ Ihwo efa. Pọl da vuẹ iniọvo ri Filipae: “Mi vwo ohwo ọfa ro vwo uruemu kerẹ [Timoti] rọ cha nabọ vwẹrote ọdavwẹ rẹ ovwa-an.” (Fil 2:20) Ọ dia ẹgba ri Timoti vwori kerẹ ohwo rọ tẹn ona rẹ ota eta yẹrẹ ohwo rọ riẹn obo re ru erọnvwọn yen Pọl ta ota kpaha-an, ẹkẹvuọvo ẹguọnọ ri Timoti vwo kpahen iniọvo na. Aphro herọ-ọ nẹ ikoko ri Timoti kinrin vwẹ ọke yena rhẹro rẹ ẹcha rọyen.—1Kọ 4:17.

10. Idjerhe vọ yen Anna vẹ ọshare rọyen vwo dje ẹguọnọ rẹ ayen vwo kpahen iniọvo na phia?

¹⁰ Ofori nẹ a gbẹn idjerhe sansan ra sa vwọ cha iniọvo rẹ avwanre uko. (Hib 13:16) Roro kpahen obo re phia kẹ Anna re djunute vwẹ uyono rọ wanre na. Ọke rẹ ogiribo ọgangan na vwọ wan nu, ọ vẹ ọshare rọyen da kọn bru oniọvo ọvo rẹ odju na guọghọ ikpamaku rẹ uwevwin rọyen. Ọtiọyena, ayen de noso nẹ iwun rayen pha gbegbe. Anna da ta: “Avwanre da ghwiẹ iwun rayen, fọnrhọn, kpa, nabọ kpirhin ayen, je reyọ iwun na eje vwo rhe ayen. Vwọ kẹ avwanre ọnana bẹnre-e, fikirẹ oborẹ avwanre ruru na, avwanre vẹ iniọvo na da rhe dia uvi rẹ igbeyan rhi te nonẹna.” Ẹguọnọ rẹ Anna vẹ ọshare rọyen vwo kpahen iniọvo na yen mu ayen vwọ vwẹ ukẹcha phia.—1Jọ 3:17, 18.

11. (a) Mavọ yen oma ru ihwo siẹrẹ avwanre de dje ẹguọnọ kẹ ayen? (b) Vwo nene obo rehẹ Isẹ 19:17, die yen Jihova ruẹ siẹrẹ avwanre de dje ẹguọnọ phia?

¹¹ Siẹrẹ avwanre de dje uruemuesiri vẹ ẹguọnọ kẹ ihwo efa, ihwo vwo oniso rẹ ẹgbaẹdavwọn rẹ avwanre vwọ vwẹrokere Jihova. Ọ cha nẹrhẹ ayen dje ọdavwaro phia kpahen uruemuesiri rẹ avwanre vrẹ obo ri jovwo. Ọkieje yen Khanh, ra ta ota kpahen siẹvure vwọ karophiyọ ihwo re vwẹ ukẹcha kẹ. Ọ da ta: “Oborẹ iniọvo eya na eje ri mu vwe kpo aghwoghwo na ruru da vwẹ aro. Ayen rhi mu vwe kpo emuọre vwẹ oghẹruvo, avwanre vwọ re nu, ayen de ji mu vwe kpo. Me da rhe mrẹvughe nẹ ọ dia ọmọrhiẹ owian yen ayen wianre-e. Ẹkẹvuọvo ayen ruro vẹ omavwerhovwẹn.” Vwọrẹ uyota, ọ dia ihwo eje yen cha kpẹvwẹ ẹse re ru kẹ aye-en. Ọnana yen obo ri Khanh ta kpahen ihwo re vwẹ ukẹcha kẹ: “Manẹ ke me sa kpẹvwẹ ẹse rẹ ayen ru kẹ vwẹ na, ẹkẹvuọvo me riẹn asan rẹ ayen eje dia-a. Jẹ, Jihova riẹn asan rẹ ayen dia, me je rẹ nẹ ọ hwosa kẹ ayen vwọ kẹ vwẹ.” Ota ri Khanh na gbare. Ọ da tobọ dianẹ erọnvwọn rẹ avwanre ruru na te emu ọvo-o, Jihova vwo oniso rayen. O no kerẹ izobo rọ pha ghanghanre kugbe osa rọ re re rọ cha hwa.—Se Isẹ 19:17.

12. Idjerhe vọ yen iniọvo eshare se vwọ dje ẹguọnọ phia kẹ ukoko na? (Ni uhoho na.)

¹² Ọ da dianẹ owẹ oniọvo ọshare, mavọ yen wo se vwo dje ẹguọnọ phia kẹ ihwo efa ji ru erọnvwọn re sa cha ayen uko? Eghene ọshare re se Jordan nọ ọkpako ọvo kpahen obo ro se ru vwọ vwẹ ukẹcha kẹ ukoko na. Ọkpako na da nabọ jiro kpahen ẹyan-obaro ro ru re je vwẹ uchebro kẹ kpahen obo ro se vwo ru yovwinphiyọ. Kerẹ udje, ọ vuẹrẹ nẹ ọ rha fobọ kpo Ọguan Ruvie ji yenre iniọvo na, vwobọ vwẹ uyono, nene ẹko rọ hepha kpo aghwoghwo ọkieje, je gbẹn idjerhe sansan ọ vwọ vwẹ ukẹcha kẹ ihwo efa. Jordan vwọ reyọ uchebro ra vwọ kẹ na vwo ruiruo, o de rhi noso nẹ vwọ vrẹ ena kpokpọ ro yonori, ẹguọnọ ro vwo kpahen iniọvo na da je rhe ganphiyọ. Jordan da rhe riẹn nẹ siẹrẹ a da vwẹ ohwo vwo mu odibo rowian, ọ dia ọke yena yen owian rọ vwọ vwẹ ukẹcha kẹ ukoko na vwọ tonphiyọ-ọ; ukperẹ ọtiọyen, ọkieje yen ọ cha vwọ vwẹ ukẹcha phia.—1Ti 3:8-10, 13.

13. Mavọ yen ẹguọnọ mu oniọvo ọshare re se Christian vwọ rhoma ga kerẹ ọkpako?

¹³ Kẹ ọ da rha dianẹ wọ gare kerẹ odibo rowian yẹrẹ ọkpako jovwo re vwo? Jihova karophiyọ owian ru wo ruru vwẹ obuko re kugbe ẹguọnọ ro mu we vwo ruo. (1Kọ 15:58) Vwọba, ọ je mrẹ ẹguọnọ ru wo djephia ọkieje. Oma vwerhen oniọvo ọshare ọvo re se Christian ọke re vwo sio nẹ ọkpako-o. Ẹkẹvuọvo, ọ da ta: “Mi de brorhiẹn mi vwo ru obo mi se ru eje vwọ ga Jihova fikirẹ ẹguọnọ mi vwo kpahọn—te ọ dianẹ mẹvwẹ ọkpako yẹrẹ mi jẹ ọkpako ẹdia.” Ọke vwọ yanran na, a da rhoma reyọ vwo mu ọkpako. Christian da je ta: “Omoshọ ke mu vwe a vwọ vuẹ vwẹ nẹ me cha rhoma ga kerẹ ọkpako. Ẹkẹvuọvo mi de brorhiẹn nẹ ọ da dianẹ Jihova gbe arodọnvwẹ kẹ vwẹ me vwọ rhoma ga kerẹ ọkpako, mi che ruo fikirẹ ẹguọnọ mi vwo kpahọn kugbe iniọvo mẹ.”

14. Die wo yono vwo nẹ ota rẹ oniọvo aye ro nẹ Georgia rhe?

¹⁴ Idibo ri Jihova ji dje ẹguọnọ kẹ irivẹ rayen. (Mt 22:37-39) Kerẹ udje, oniọvo aye ọvo re se Elena, rọ dia ẹkuotọ ri Georgia, da ta: “Ẹsosuọ, orọnvwọn ọvo ro mu vwe vwo ghwoghwo yen ẹguọnọ ri mi vwo kpahen Jihova. Ẹkẹvuọvo, ẹguọnọ mi vwo kpahen Ọse mẹ rọhẹ odjuvwu vwọ ganphiyọ ye, ẹguọnọ mẹ kpahen irivẹ mẹ kọ je rhe ganphiyọ. Me davwẹngba vwo roro kpahen ebẹnbẹn rẹ ayen vwori kugbe uyovwinrota ro se te ayen ubiudu. Ọkieje mi de roro kpahen ayen, ọnana kọ nẹrhẹ mi vwo owenvwe me vwọ vwẹ ukẹcha phia.”—Ro 10:13-15.

EBRUPHIYỌ RO NO CHA SIẸRẸ E DE DJE ẸGUỌNỌ KẸ IHWO EFA

15-16. Kirobo rehẹ ihoho na, ebruphiyọ vọ yen no cha siẹrẹ e de dje ẹguọnọ kẹ ihwo efa?

¹⁵ Siẹrẹ avwanre de dje ẹguọnọ kẹ iniọvo na, ọ dia ayen ọvo yen mrẹ erere-e. Ọke rẹ ọga ri COVID-19 vwọ tonphiyọ, oniọvo ọshare re se Paolo vẹ aye rọyen vwẹ ukẹcha kẹ iniọvo eya buebun re kpakore kpahen oborẹ ayen sa vwọ reyọ ifonu rayen vwo ruiruo rẹ aghwoghwo na. Oniọvo aye ọvo rọ ka mrẹ bẹnbẹn rọ vwọ reyọ ifonu rọyen vwo ruiruo rẹ aghwoghwo na da nabọ rhe tẹn ona rọyen. Ọ da reyọ ifonu na vwo durhie ihwo rẹ orua rọyen kpo Ẹkarophiyọ na. Ihwo ujorha soso da vwomaba irueru na womarẹ ividio kọnfrẹsin! Oniọvo aye na vẹ ihwo orua rọyen eje mrẹ erere nẹ ẹgbaẹdavwọn ri Paolo vẹ aye rọyen. Ọke vwọ yanran na, oniọvo aye na de si rhe Paolo: “Wo ruru gangan wo vwo yono avwanre ihwo re kpakore. Ọdavwẹ ri Jihova vwo kpahen avwanre vẹ ẹgbaẹdavwọn wẹn cha sa chọrọ ovwẹ ẹro-o.”

¹⁶ Paolo yono uyono ọghanghanre ọvo nẹ obo re phiare na rhe. Ọ nẹrhẹ ọ karophiyọ nẹ ẹguọnọ ghanre vrẹ erianriẹn yẹrẹ ona re vwori. Ọ da ta: “Me ka ga kerẹ oniruo rẹ okinriariẹ. Enẹna, me rhe mrẹvughe re nẹ ọ da tobọ dianẹ eta mẹ chọrọ iniọvo na ẹro, ayen je karophiyọ ukẹcha re me vwọ kẹ ayen.”

17. Ono ọfa yen mrẹ erere siẹrẹ avwanre de dje ẹguọnọ phia?

¹⁷ Avwanre eje mrẹ erere re rhẹro rọye-en siẹrẹ e de dje ẹguọnọ kẹ ihwo efa. Jonathan, rọ dia New Zealand, rhọnvwe phiyọ ọnana. Vwẹ oghẹruvo ri Saturday ọvo, ọ da mrẹ ọkobaro ro ruiruo rẹ aghwoghwo na vwẹ akọkọ rẹ idjerhe. Vwẹ oghẹruvo rẹ ẹdijana efa re vwọ kpahọn, Jonathan de brorhiẹn rọ vwọ vwomaba ọkobaro na. Ọ nama riẹn erere ro che te obọ fikirẹ uruemu nana ro djephia na-a. Jonathan da ta: “Vwẹ akpeyeren mẹ vwẹ ọke yena, oma rẹ iruo aghwoghwo na ghwa vwerhen ovwẹ-ẹ. Ẹkẹvuọvo, me vwọ mrẹ ena rẹ ọkobaro na vwo ruiruo vẹ oborẹ iruo aghwoghwo rọyen yanphiaro wan, ọnana da nẹrhẹ mi rhi vwo omavwerhovwẹn kpahen iruo aghwoghwo na. Vwọba, mi de ji vwo uvi ugbeyan rọ cha vwẹ uko vwo sikẹrẹ Jihova, riavwerhen rẹ iruo aghwoghwo na, je yan obaro vwẹ ukoko na.

18. Die yen Jihova guọnọre nẹ avwanre ru?

¹⁸ Jihova guọnọre nẹ ẹguọnọ re vwo kpahọn vẹ ihwo efa rhophiyọ. Kirobo re yono re, e se ru ẹguọnọ re vwo kpahen Jihova ganphiyọ womarẹ e vwo se Baibol na, roro kokodo kpahen obo re seri kugbe ra vwọ nẹrhovwo rhe ọkieje. Avwanre se ru ẹguọnọ re vwo kpahen iniọvo avwanre ganphiyọ womarẹ a vwo gbẹn idjerhe efa sansan ra vwọ vwẹ ukẹcha kẹ ayen. Ẹguọnọ avwanre vwọ rhuaphiyọ ye, ke che sikẹrẹ Jihova vẹ iniọvo avwanre phiyọ. Avwanre vẹ ayen ki che vwo uvi rẹ oyerinkugbe bẹdẹ bẹdẹ!