Oborẹ Avwanre se Yono nẹ Ẹbe Ivẹ ri Pita Siri

1. Ọmọke krẹn tavwen ọyinkọn Pita ki ghwu, die yen ẹwẹn ọfuanfon na muro vwo ru?

ỌYINKỌN Pita riẹnre nẹ ọyen che ghwu kẹrẹkpẹ. Vwẹ uvwre rẹ ikpe buebun rọ fuevun ga na, ọ vẹ Jesu wian kugbe, o rhie ẹchẹ re vwo ghwoghwo vwẹ asan efa phiyọ, ọ je ga kerẹ ọvo vwẹ usun rẹ ẹko rọvwẹrote na. Ẹkẹvuọvo iruo ri Pita ji rhi re-e. Vwẹ omarẹ ikpe 62-64 C.E., ẹwẹn ọfuanfon muro vwo si ẹbe ivẹ​—ọbe ri Pita 1 vẹ ọ rẹ 2 vwẹ Baibol na. Ọ tare nẹ ọyen rhẹro rọyen nẹ ẹbe ivẹ nana cha vwẹ ukẹcha kẹ Inenikristi ọke rẹ ọyen de ghwu nu.​—2 Pi 1:​12-15.

2. Diesorọ ẹbe ri Pita siri na vwo fo aruọke?

² Pita si ẹbe ivẹ rọyen na vwẹ ọke rẹ ihwo re vẹ ọyen gba ga kuẹgbe vwo hirharoku “edavwini sansan” re “lagha” ayen. (1 Pi 1:6) Ihwo umwemwu davwẹngba rẹ ayen vwọ ghwa iyono rẹ efian vẹ iruemu ri jẹfuọn rhe ukoko na. (2 Pi 2:​1, 2, 14) Inenikristi re dia Jerusalẹm che hirharoku “oba rẹ emu na eje” kẹrẹkpẹ, kọyen ọke rẹ isodje ri Rom cha vwọ ghwọrọ orere yena kugbe eyeren rẹ ihwo ri Ju. (1 Pi 4:7) Aphro herọ-ọ ẹbe ri Pita na cha Inenikristi uko vwọ riẹn oborẹ ayen se ru vwo chirakon rẹ edavwini rẹ ọke yena ji muegbe vwọ kẹ edavwini re cha obaro.b

3. Diesorọ a vwọ fuẹrẹn ẹbe rẹ ẹwẹn ọfuanfon mu Pita vwo si?

³ Dede nẹ Inenikristi rẹ ẹgbukpe ujorin rẹsosuọ yen Pita si ẹbe rọyen rhe, Jihova vwẹ ayen vwọ ba Ota Rọyen. Ọtiọyena avwanre sa mrẹ erere nẹ ayen rhe asaọkiephana. (Ro 15:4) Rọ vwọ dianẹ akpọ ro titi uruemu ri jẹfuon yen avwanre de yerẹn na, avwanre ji hirharokuẹ edavwini re sa nẹrhẹ ọ bẹn ra vwọ ga Jihova. Vwọba, o rhe che kri-i, avwanre che rhiẹromrẹ ukpokpogho rọ gan vrẹ ọ rọ vwẹ eyeren rẹ ihwo ri Ju vwo toba. Avwanre mrẹ ẹkarophiyọ eghanghanre evo vwẹ ẹbe ivẹ ri Pita siri na. Enana cha cha avwanre uko vwo rhẹro rẹ ẹdẹ ri Jihova ọkieje, phi oshọ rẹ ohworakpọ kparobọ, ji vwo ẹguọnọ okokodo kpahen ohwohwo. Oka rẹ ẹkarophiyọ eghanghanre yena je cha vwẹ ukẹcha kẹ ekpako vwọ riẹn oborẹ ayen sa vwọ nabọ vwẹrote edavwẹ rẹ igodẹ na.

RHE RHẸRO

4. Kirobo re djere vwẹ 2 Pita 3:​3, 4, die yen sa nẹrhẹ esegbuyota rẹ avwanre yeghe?

⁴ Ihwo ri jẹ esegbuyota evwo kpahen aroẹmrẹ ri Baibol na yen riariẹ avwanre phiyọ. Ihwo re vwọsua sa vwẹ avwanre jehwẹ kidie avwanre hẹrhẹ oba na vẹ oruru vwẹ ikpe buebun re. Ihwo evo tanẹ ọ cha rhe kakaka-a. (Se 2 Pita 3:​3, 4.) Avwanre de nyo eta tiọyen mie ọrovwuwevwin, ohwo rẹ avwanre vẹ ọyen gba wian kuẹgbe, yẹrẹ ohwo rẹ orua rẹ avwanre, esegbuyota rẹ avwanre se yeghe. Pita dje obo re sa vwẹ ukẹcha kẹ avwanre.

5. Die yen sa cha avwanre uko vwọ vwẹ ẹro abavo vwo ni oba rẹ eyeren nana? (2 Pita 3:​8, 9)

⁵ Ihwo evo se no nẹ Jihova gbeghẹrẹ ro vwo phioba phiyọ eyeren umwemwu nana. Eta ri Pita sa cha avwanre uko vwọ vwẹ ẹro abavo vwo ni ota nana, ọ karophiyọ avwanre nẹ ẹro ri Jihova vwo nẹ ọke fẹnẹ ọ rẹ ihworakpọ shesheri. (Se 2 Pita 3:​8, 9.) Vwọ kẹ Jihova, ẹgbukpe uriorin ọvo pha kerẹ ẹdẹ ọvo. Jihova vwo edirin, kidie ọ guọnọre nẹ ohwo vuọvo ghwọrọ-ọ. Jẹ ẹdẹ rọyen na de te, eyeren nana ko che vwoba. Ọyen okpuphẹn rẹ avwanre vwọ reyọ ọke ro chekọ na vwo soseri kẹ ihwo rẹ ẹgborho na eje.

6. Mavọ yen avwanre sa vwọ “kọn” ẹdẹ ri Jihova “phiyọ ẹwẹn ọkieje”? (2 Pita 3:​11, 12)

⁶ Pita jiriro kẹ avwanre nẹ a “kọn” ẹdẹ ri Jihova “phiyọ ẹwẹn ọkieje.” (Se 2 Pita 3:​11, 12.) Vwẹ idjerhe vọ? Ọyen ọ rẹ avwanre vwo roro kokodo kpahen ebruphiyọ rẹ akpọ kpokpọ na kẹdi kẹdẹ, ọ da dia obo re se ru. Vwẹ ẹwẹn roro nẹ wọ wẹn odju rọ ghene fon, wọ riemu rọ kẹ ohwo omakpokpọ, wo dede ihwo ru wo vwo ẹguọnọ kpahen ra vwọ rhọvwọn ayen nẹ ushi cha, wo ji yono ihwo ri yerin vwẹ ikpe ujorin buebun re wanre orugba rẹ aroẹmrẹ ri Baibol sansan. Erorokodo tiọyena cha cha avwanre uko vwo rhẹro rẹ ẹdẹ yena ọkieje, ọ je cha nẹrhẹ avwanre vwo imuẹro nẹ oba na cha rhe kẹrẹkpẹ. Kidie nẹ avwanre “riẹn ọnana” kpahen obaro na, iyono rẹ efian rhe che se sun avwanre ghwru-u.​—2 Pi 3:17.

PHI OSHỌ RẸ OHWORAKPỌ KPAROBỌ

7. Mavọ yen oshọ rẹ ohworakpọ se vwo djobọte avwanre?

⁷ Avwanre vwọ kọn ẹdẹ ri Jihova phiyọ ẹwẹn ọkieje na, ọnana muẹ avwanre vwo ghwoghwo iyẹnrẹn esiri na kẹ ihwo efa. Dedena, vwẹ ẹdia evo, oshọ re vwo ghwoghwo se mu avwanre. Diesorọ? Kidie oshọ rẹ ohworakpọ se mu avwanre vwẹ ọmọkẹ. Ọyen obo re phia kẹ Pita. Vwẹ ason ra reyọ Jesu vwo guẹdjọ na, Pita se dje oma rọyen phia kerẹ ọvo vwẹ usun rẹ idibo ri Jesu-u, ọ tobọ je sen abọ erha nẹ ọyen vughire-e. (Mt 26:​69-75) Ẹkẹvuọvo, ọyinkọn Pita phi oshọ rọyen kparobọ ọke vwọ yanran na, je tanẹ: “Ovwan djoshọ rẹ oborẹ ayen djoshọ rọye-en yẹrẹ we jẹ udu bru ovwa-an.” (1 Pi 3:14) Eta ri Pita kẹ avware imuẹro nẹ avwanre se phi oshọ rẹ ohworakpọ kparobọ.

8. Die yen sa cha avwanre uko vwo phi oshọ rẹ ohworakpọ kparobọ? (1 Pita 3:15)

⁸ Die yen sa cha avwanre uko vwo phi oshọ rẹ ohworakpọ kparobọ? Pita vuẹ avwanre nẹ: “Ru Kristi na fon kerẹ Ọrovwori vwevunrẹ ubiudu rẹ ovwan.” (Se 1 Pita 3:15.) Ọnana churobọ si re vwo roro kokodo kpahan ẹdia vẹ ogangan rẹ Ọrovwavwanre kugbe Ovie na, Kristi Jesu. Wọ da rua ẹnwan yẹrẹ oshọ de mu we ọke rẹ uphẹn wo vwo ghwoghwo iyẹnrẹn esiri na kẹ ihwo efa de rhiephiyọ, karophiyọ Ovie rẹ avwanre. Vwẹ ẹwẹn roro nẹ wọ mrẹ ro vwo suẹn vwẹ obodjuvwu vẹ emekashe buebun re che se keri-i re riarierẹ phiyọ. Karophiyọ nẹ o vwo “ogangan eje vwẹ odjuvwu kugbe otọrakpọ na,” ọ vẹ owẹ je cha dia “vwẹ ẹdẹ na eje rhirin re te okuphiyọ rẹ eyeren na.” (Mt 28:​18-20) Pita jiriro kẹ avwanre nẹ a “choma ọkieje” ra vwọ chochọn rẹ esegbuyota rẹ avwanre. Wọ guọnọ soseri vwẹ obẹ iruo, isikiru, yẹrẹ vwẹ asan efa kpregede? Roro kpahen ọke ru wo se vwo ru ọtiọyen, rere wo muegbe rẹ oborẹ wọ cha ta phiyotọ. Nẹrhovwo vwọ kẹ uduefiogbere vẹ imuẹro nẹ Jihova cha cha wẹ uko vwo phi oshọ rẹ ohworakpọ kparobọ.​—Iru 4:29.

“VWO ẸGUỌNỌ OKOKODO”

9. Vwẹ ẹdia ọvo, idjerhe vọ yen Pita vwo jẹ ẹguọnọ e djephia? (Ni uhoho na.)

⁹ Pita yono obo rọ sa vwọ nabọ dje ẹguọnọ phia. Ọ hẹ etiyin ọke ri Jesu vwọ tanẹ: “Me vwẹ iji kpokpọ kẹ ovwan, nẹ ovwan vwo ẹguọnọ rẹ ohwohwo; kirobo ri mi vwo ẹguọnọ rẹ ovwan, ovwan ji vwo ẹguọnọ rẹ ohwohwo.” (Jọ 13:34) Dedena, ọke vwọ yan obaro, Pita she vwọ kẹ ọnyẹ, ọ da sen nẹ ọyen che nene iniọvo eshare vẹ eya ri jẹ ihwo ri Ju ẹdia, riemu kugbe-e. Ọyinkọn Pọl se oborẹ Pita ruru na “omeru,” yẹrẹ uruemu rẹ omeru. (Ga 2:​11-14) Pita rhiabọreyọ ọkpọvi yena, o de yono norhe. Vwẹ ẹbe rọyen ivẹ na, ọ kanrunumuo nẹ ọ dia avwanre di vwo ẹguọnọ rẹ iniọvo avwanre eshare vẹ eya ọvo-o, ẹkẹvuọvo e ji dje ẹguọnọ na phia.

10. Tivọ yen “ẹguọnọ rọ vrabọ rẹ omeru” nẹcha? Djekpahọn. (1 Pita 1:22)

¹⁰ Pita tare nẹ avwanre vwo “ẹguọnọ rọ vrabọ rẹ omeru” kpahen iniọvo rẹ avwanre vẹ ayen gba ga. (Se 1 Pita 1:22.) “Uyota na” rẹ avwanre “kerhọ rọyen” na yen ẹguọnọ tiọyena nẹcha. Uyota nana churobọ si uyono na nẹ “Ọghẹnẹ ghwomaphiyọ ẹbẹre ọvo jẹ ọvo vwo-o.” (Iru 10:​34, 35) Avwanre cha sa tanẹ avwanre nene iji ri Jesu kpahen ẹguọnọ-ọ, ọ da dianẹ ihwo evo vwevunrẹ ukoko na yen avwanre dje ẹguọnọ kẹ ukperẹ ihwo eje. Ọyen uyota nẹ, avwanre sa kẹre ihwo evo nọ ihwo efa kirobo ri Jesu ji ruru. (Jọ 13:23; 20:2) Ẹkẹvuọvo Pita karophiyọ avwanre nẹ a davwẹngba vwo vwo “ẹguọnọ rẹ iniọvo”​—avwanre eya vẹ eshare eje rọ dia oka rẹ ẹguọnọ rẹ ihwo orua vwo kpahen ohwohwo.​—1 Pi 2:17.

11. Die yen o churobọ si e vwo vwo “ẹguọnọ okokodo kpahen” ihwo efa “nẹ otọ ubiudu rhe”?

¹¹ Pita jiriro kẹ avwanre nẹ e “vwo ẹguọnọ okokodo kpahen ohwohwo nẹ otọ ubiudu rhe.” Vwẹ ẹdia nana, e vwo vwo ẹguọnọ “okokodo” churobọ si ra vwọ davwẹngba vwo dje ẹguọnọ kẹ ohwo tobọ vwẹ ọke rọ da bẹn kẹ avwanre re vwo ru ọtiọyen. Kerẹ udje, ọ da dianẹ oniọvo ọvo gbe avwanre ku yẹrẹ ru obo re da avwanre vwo? Orọnvwọn rẹsosuọ rọ cha ro ẹwẹn avwanre ọyen e vwo ru orukeri ukperẹ e vwo dje ẹguọnọ phia. Jẹ, Pita yono mie Jesu nẹ Ọghẹnẹ vwo omavwerhovwẹn kpahen orukeri-i. (Jọ 18:​10, 11) O de si nẹ: “Ovwan reyọ umiovwo vwọ hwosa rẹ umiovwo-o yẹrẹ vwẹ ekan hwosa rẹ eka-an. Ukperẹ ọtiọyen, vwẹ emu esiri hwosa.” (1 Pi 3:9) Jẹ ẹguọnọ okokodo mu we vwo dje uruemu esiri vẹ erorokẹ phia, tobọ vwọ kẹ ihwo ri ru obo re da wẹ.

12. (a) Die ọfa yen ẹguọnọ okokodo che mu avwanre vwo ru? (b) Kirobo re djere vwẹ ividio na Sẹro Okẹ rẹ Ọghanghanre rọ Dia Oyerinkugbe, die yen wọ guọnọ davwẹngba vwo ru?

¹² Vwẹ ọbe rẹsosuọ ro siri, Pita reyọ ota na “ẹguọnọ okokodo” vwo ruiruo. Oka rẹ ẹguọnọ tiọyena, ọ ghwa dia imwemwu evo yen o rhurhẹ-ẹ, ẹkẹvuọvo o “rhurhu imwemwu buebun.” (1 Pi 4:8) Ọ sa dianẹ Pita karophiyọ oborẹ Jesu yoniro kpahen evwoghovwo vwẹ ikpe buebun re wanre. Vwẹ ọke yena, ọkiọvo Pita rorori nẹ ọyen ohwo esiri rọ vwọ tanẹ ọyen che vwo ghovwo oniọvo rọyen “te abọ ighwrẹn.” Ẹkẹvuọvo Jesu yoniro​—vẹ avwanre​—nẹ e vwo ghovwo “te abọ 77,” ro mudiaphiyọ nẹ e kere-e. (Mt 18:​21, 22) Ọ da dianẹ wọ mrẹ bẹnbẹn wọ vwọ reyọ uchebro nana vwo ruiruo, wo jẹ ofu dje we-e! O vwo ọke evo rẹ idibo ri Jihova eje re gbare-e na vwọ mrẹ bẹnbẹn rẹ ayen vwọ reyọ vwo ghovwo. Obo re ma ghanre asaọkiephana ọyen wo vwo ru obo ru wo se ru rere wọ sa vwọ reyọ vwo ghovwo oniọvo wẹn, rere ufuoma sa vwọ dia uvwre rẹ ovwan.c

EKPAKO, OVWAN VWẸROTE IGODẸ NA

13. Die yen sa nẹrhẹ ọ dia bẹnbẹn vwọ kẹ ekpako rẹ ayen vwọ vwẹrote iniọvo rayen rẹ eya vẹ eshare?

¹³ O muẹro nẹ o vwo ọke vuọvo rẹ obo ri Jesu vuẹ Pita ọke ro vwo vrẹnushi rhe nu nẹ, “Vwẹrote igodẹ itete mẹ na” vwọ chọrọ ẹro-o. (Jọ 21:16) Wọ da dia ọkpako, riẹn nẹ iji yena ji shekpahen owẹ. Dedena, ọ sa dia bẹnbẹn rẹ ọkpako vwọ mrẹ ọke vwo ruiruo ọghanghanre nana. Ekpako me riẹn nẹ owian rẹsosuọ rayen ọyen ọ rẹ ayen vwo dje ẹguọnọ kẹ ihwo orua rayen, kẹ ayen erọnvwọn rẹ ayen guọnọre, je cha ayen uko vwo sikẹre Jihova. Ayen je kobaro vwẹ iruo aghwoghwo na ọtiọyen ji te re vwo muegbe je ta eta vwẹ uyono, isikoko, kugbe eghwẹkoko. Evo rayen ji muẹ eghwa efa rẹ ayen vwọ ga vwẹ Umẹ Rọvwẹrote Omaesivwo yẹrẹ nene Akon Iruo rẹ Ebabọn Vwẹ Oghọn Ukoko wian kuẹgbe. Ekpako ghini vwo ewian buebun!

14. Die yen se mu ekpako vwọ vwẹrote igodẹ na? (1 Pita 5:​1-4)

¹⁴ Pita vuẹ iniọvo re dia ekpako kerẹ ọyen nẹ ayen “vwẹrote igodẹ rẹ Ọghẹnẹ.” (Se 1 Pita 5:​1-4.) Wọ da dia ọkpako, avwanre riẹnre nẹ wo vwo ẹguọnọ rẹ iniọvo wẹn rẹ eya vẹ eshare, wọ je guọnọ vwẹrote ayen. Ẹkẹvuọvo, vwẹ ọkievo wo se no nẹ iruo vọn wẹ obọ yẹrẹ oma ghwọrọ owẹ te asan rẹ wo rhe che se ruiruo yena-a. Die yen wo se ru? Vuẹ Jihova kpahen edavwẹ wẹn eje. Pita de si: “Ohwo ro gbodibo, e jẹ ọ vwẹroso ẹgba rẹ Ọghẹnẹ siobọnẹ kẹ ohwo.” (1 Pi 4:11) Ọ sa dianẹ iniọvo wẹn rẹ eya vẹ eshare hirharokuẹ ebẹnbẹn re che se sino karekare vwẹ eyeren nana-a. Ẹkẹvuọvo karophiyọ nẹ Jesu Kristi rọ dia “onotu rẹ isuigodẹ na,” sa cha ayen uko vwọ vrẹ oborẹ wo se ru. O se ru ọtiọyen asaọkiephana kugbe akpọ kpokpọ rọ cha na. Oborẹ Ọghẹnẹ guọnọ mie ekpako, ọyen ọ rẹ ayen vwo vwo ẹguọnọ rẹ iniọvo rayen, vwẹrote ayen, je “dia udje vwọ kẹ igodẹ na.”

15. Mavọ yen ọkpako ọvo vwọ vwẹrote igodẹ na? (Ni uhoho na.)

¹⁵ William rọ dia ọkpako rọ ga krẹre, riẹn obo rọ ghanre te a vwọ vwẹrote igodẹ na. Ọga ri COVID-19 rọ ro akpọeje na vwọ tonphiyọ, ọ vẹ ekpako efa de brorhiẹn rẹ ayen vwo se ohwo ọvuọvo vwẹ ẹko rayen kudughwrẹn kudughwrẹn. Ọ da ta oboresorọ ayen vwo ru ọtiọyen: “Buebun rẹ iniọvo na ọvo yen dia, ọtiọyena ọ pha lọlọhọ rẹ ayen vwo vwo iroro rọ chọre.” Siẹrẹ oniọvo de vwo ebẹnbẹn, William kọ jomaotọ kerhọ rere ọ sa vwọ riẹn edavwẹ rọyen vẹ obo rọ guọnọre. Ọ da riẹn nu, kọ guọnọ ividio yẹrẹ erọnvwọn efa vwẹ wẹbsaiti avwanre rọ sa vwọ vwẹ ukẹcha kẹ oniọvo na. Ọ da tanẹ, “Ofori nẹ a vwẹrote igodẹ na asaọkiephana vrẹ obo ri jovwo. Avwanre davwẹngba mamọ vwọ cha ihwo uko vwo yono kpahen Jihova; o ji fo nẹ avwanre je davwẹngba tiọyena vwọ vwẹrote igodẹ na, rere avwanre vwẹ ukẹcha kẹ igodẹ ri Jihova vwọ dia evunrẹ uyota na.”

VWẸ UPHẸN KẸ JIHOVA RO VWO RU UYONO WẸN RE

16. Idjerhe vọ yen avwanre sa vwọ reyọ obo re yono nẹ ẹbe ri Pita siri na vwo ruiruo?

¹⁶ Avwanre ta ota kpahen erọnvwọn evo re yono nẹ ẹbe ivẹ rẹ ẹwẹn ọfuanfon mu Pita vwo si. Ọkiọvo wọ jokaphiyọ ẹdia ọvo ro de fo nẹ wo ru yovwinphiyọ. Kerẹ udje, wọ guọnọ rhe roro kpahan ebruphiyọ ra cha riavwerhen rọyen vwẹ akpọ kpokpọ rọ cha na vrẹ obo ri jovwo? Wo bru ẹkẹn kẹ oma wẹn ru wo vwo soseri vwẹ iruo, isikuru, yẹrẹ vwẹ ẹdia efa kpregede re? Wọ mrẹ idjerhe wo se vwo dje ẹguọnọ okokodo kẹ iniọvo wẹn eshare vẹ e rẹ eya vrẹ obo ri jovwo? Ekpako, ovwan vwo owenvwe ovwan vwọ vwẹrote igodẹ ri Jihova nẹ otọ rẹ evun rhe? Vwọrẹ uyota, wọ da fuẹrẹn oma wẹn, wọ sa mrẹ asan evo ro de fo nẹ wo ru yovwinphiyọ, ẹkẹvuọvo wo jẹ ofu dje we-e. “Ọrovwori na ohwo esiri,” ọ cha cha wẹ uko vwo ru yovwinphiyọ. (1 Pi 2:3) Pita kẹ avwanre imuẹro nẹ, “Ọghẹnẹ . . . ko ru uyono rẹ ovwan re, o che ru ovwan gan, ọ cha kẹ ovwan ogangan, ọ cha vwẹ awọ rẹ ovwan vwo muotọ kokoroko.”​—1 Pi 5:10.

17. Erere vọ yen che norhe siẹrẹ avwanre da wian gangan je vwẹ uphẹn kẹ Jihova nẹ o yono avwanre?

¹⁷ O vwo ọke ọvo ri Pita vwo roro nẹ ọyen muwan ro vwo sikẹrẹ Ọmọ rẹ Ọghẹnẹ-ẹ. (Lu 5:8) Ẹkẹvuọvo womarẹ ukẹcha rẹ ẹguọnọ ri Jihova kugbe Jesu, Pita da wian gangan vwọ dia odibo ri Kristi. Ọtiọyena, a da rhọnvwe kẹ Pita nẹ ọ “ro Uvie ri bẹdẹ rẹ Ọrovwavwanre kugbe Osivwin rẹ avwanre, Jesu Kristi.” (2 Pi 1:11) Ọyena ghini okposa dẹn! Wọ da wian gangan kerẹ Pita je vwẹ uphẹn kẹ Jihova nẹ o yono uwe, wo ji che vwo osa rẹ arhọ ri bẹdi bẹdẹ. ‘Usivwin che te we obọ fikirẹ esegbuyota wẹn.’​—1 Pi 1:9.