Diesorọ Iseri ri Jihova Vwo ru Ewene Phiyọ Iyono Rayen Evo?

Ọkieje yen avwanre vwo muẹ iyono rẹ avwanre kpahen Baibol na, ọtiọyena, avwanre de ru ewene phiyọ oborẹ avwanre segbuyota, ọyena odjephia nẹ avwanre rhi vwo ẹruọ rẹ uyota ri Baibol na phiyọ vrẹ obo ri jovwo.a

Ewene tiọyena rhọnvwephiyọ odjekẹ ri BaIbol na rọhẹ Isẹ 4:18: “Ẹkẹvuọvo idjerhe rẹ ohwo esiri ọhọhọ ọke ro rhie cha, ro lo gala gala bẹsiẹ rẹ ọke vwo kpo.” Kirobo rẹ ọnre na lo phia ememerha ye, ọtiọyen Ọghẹnẹ je vwẹ uphẹn kẹ avwanre vwo vwo ẹruọ rẹ uyota ri Baibol na ememerha, vwẹ ọke rọyen. (1 Pita 1:​10-​12) Vwo nene aroẹmrẹ ri Baibol na, Ọghẹnẹ cha nẹrhẹ idibo rọyen vwo ẹruọ rẹ uyota ri Baibol na vwẹ “ọke rẹ oba na.”​​—Daniẹl 12:4.

E jẹ ewene re ruẹ na gbe avwanre unu yẹrẹ kpokpo avwanre ẹwẹ-ẹn. Idibo rẹ Ọghẹnẹ vwẹ ọke awanre ji ru ewene phiyọ ororochọ evo rẹ ayen vwori, ọtiọyen ji te oborẹ ayen rhẹro rọyen.

• Mosis kobaro kẹ ọrhuẹrẹphiyotọ rẹ Ọghẹnẹ womarẹ ọ vwọ vwomakpahotọ kerẹ osivwin vwọ kẹ ẹgborho rẹ Izrẹl ọke rọ vwọ hẹ ẹgbukpe 40.​​—Iruo rẹ Iyinkọn Na 7:​23-​25, 30, 35.

• Iyinkọn na se vwo ẹruọ rẹ aroẹmrẹ ro shekpahen ughwu vẹ evrẹnushi ri Mesaya na-a.​​—Aizaya 53:​8-​12; Matiu 16:​21-​23.

• Inenikristi evo vwẹ ẹgbukpe ujorin rẹsosuọ vwo ororochọ kpahen “ẹdẹ ri Jihova” na.​​—2 Tẹsalonaika 2:​1, 2.

Ọke vwọ yanran na, Ọghẹnẹ da kpọ ororochọ rayen na vi, avwanre ji vwo vwẹ ẹwẹn nẹ o ji che rhe ruẹ ọtiọyen kẹ avwanre.​​—Jems 1:5.