Jẹnẹsis

29 Ọyena vwọ wan nu, Jekọp da rhoma ton oyan rọyen phiyọ, o de kpo otọ rẹ ihwo rehẹ Ẹbẹre Ọnre Va Nẹcha. 2 Asaọkiephana ọ da mrẹ orhare ọvo vwẹ udju na, ẹko rẹ igodẹ erha sherhẹn kẹrẹ, kidie orhare na yen a da vwẹ ame kẹ igodẹ na kọke kọke. Ukuta rode ọvo hẹ unu rẹ orhare na. 3 Ọke rẹ ẹko rẹ igodẹ na eje de koko vwẹ etiyin nu, ayen mi ghorie ukuta na vwo nẹ unu rẹ orhare na, ayen me vwẹ ame kẹ igodẹ na, ayen de ru ọtiọyen nu, ayen mi ghorie ukuta na rhivwin kpo asan rọ hepha jovwo vwẹ unu rẹ orhare na.

4 Ọtiọyena Jekọp da ta kẹ ayen: “Iniọvo mẹ, tivọ yen ovwan nurhe?” Ayen da kpahen: “Heran yen avwanre nurhe.” 5 Ọ da ta kẹ ayen: “Ovwan vughe Leban, uvwrọmọ ri Nehọ?” ayen da kpahen: “Avwanre vughire.” 6 Ọtiọyena ọ da ta kẹ ayen: “Oma rọyen ganre?” Ayen da kpahen: “Oma rọyen ganre. Ọmọtẹ rọyen Rechẹl yen yancha vẹ igodẹ na!” 7 Ọtiọyena ọ da ta: “Ọnre na ji rhi shekpotọọ. Ọnana dia ọke re vwo koko igodẹ naa. Ovwan vwẹ ame kẹ igodẹ na rere ovwan ra vwẹ emu kẹ ayen.” 8 Ọtiọyena ayen da ta: “A cha rhọnvwe nẹ avwanre ru ọtiọyeen, bẹsiẹ e vwo koko ẹko rẹ igodẹ na eje nu ji ghorie ukuta na nẹ unu rẹ orhare na. Tavwen avwanre ke vwẹ ame kẹ igodẹ na.”

9 Ọ vẹ ayen je vwọ ta ota na, Rechẹl da rhe vẹ igodẹ rẹ ọsẹ rọyen, kidie osuigodẹ rẹ aye yen o ruẹ. 10 Ọke rẹ Jekọp vwọ mrẹ Rechẹl rọ dia ọmọtẹ ri Leban, oniọvo oni rọyen, kugbe igodẹ ri Leban, Jekọp de brokpakpa yanran, o de ghorie ukuta na nẹ unu rẹ orhare na, ọ da vwẹ ame vwọ kẹ igodẹ ri Leban oniọvo oni rọyen. 11 Ọtiọyena Jekọp da fiọnfiọn Rechẹl, ọ da kpare urhuru rọyen, ọ da viẹ. 12 Jekọp kọ vuẹ Rechẹl nẹ ọyen ohwo rẹ orua* rẹ ọsẹ rọyen kugbe ọmọ ri Rebeka. Rechẹl da djẹ yanran ra vuẹ ọsẹ rọyen.

13 Ugege rẹ Leban vwo nyo kpahen Jekọp, ọmọ rẹ oniọvo rọyen ọmọtẹ, ọ da djẹ ra vwa. Ọ da gbanọ, ọ da fiọnfiọn. Ọ da reyọ rhe uwevwin rọyen. Jekọp kọ vuẹ Leban kpahan erọnvwọn nana eje. 14 Leban da ta kẹ: “Wẹwẹ ghini ubeku vẹ uvwo mẹ.”* Ọtiọyena o de nene dia ọsoso emeranvwe ọvo.

15 Ọtiọyena Leban da ta kẹ Jekọp: “Kidie nẹ wẹwẹ ohwo rẹ orua mẹ* na, ku wọ cha ga vwẹ ọphẹ? Vuẹ vwẹ obo me cha hwa kẹ wẹ?” 16 Asaọkiephana Leban vwo emetẹ ivẹ. Odẹ rẹ ọ rẹ ọkpako na Lia, odẹ rẹ ọ rẹ otete na ke rha hẹ Rechẹl. 17 Ẹro ri Lia vwo erhuvwuu, ẹkẹvuọvo Rechẹl rhe dia aye vẹ erhuvwu yoyovwin. 18 Jekọp vwo ẹguọnọ ri Rechẹl, ọtiọyena ọ da ta: “Mi vwo owenvwe me vwọ ga wẹ ẹgbukpe ighwrẹn fikirẹ ọmọtẹ wẹn otete Rechẹl.” 19 Ọtiọyena Leban da ta: “O yovwirin me vwọ reyọ vwọ kẹ wẹ ukperẹ me vwọ reyọ vwọ kẹ ọshare ọfa. Gbe nene uvwe dia.” 20 Jekọp da ga ẹgbukpe ighwrẹn fikirẹ Rechẹl, ẹkẹvuọvo vwẹ ẹro rọyen, e ghwa họhọ ẹmẹdẹ ibro fikirẹ ẹguọnọ ro vwo kpahọn.

21 Ọtiọyena Jekọp da ta kẹ Leban: “Kẹ vwẹ aye mẹ kidie ẹdẹ mẹ gbare, rere mi nene vwerhẹn.” 22 Ọtiọyena Leban de koko eshare eje rehẹ asan na, ọ da re orẹ. 23 Ẹkẹvuọvo ovwọnvwọn vwo te, ọ da reyọ ọmọtẹ rọyen Lia bro ra rere o nene vwerhẹn. 24 Leban je reyọ Zilpa rọ dia odibo rọyen ọmọtẹ vwọ kẹ ọmọtẹ rọyen Lia kerẹ odibo. 25 Vwẹ urhiọke, Jekọp da mrẹ nẹ Lia! Ọtiọyena ọ da ta kẹ Leban: “Die yen wo ru vwe na? Ọ dia Rechẹl yen me vwẹ fiki rọyen ga wẹ? Diesorọ wọ vwọ phiẹn vwẹ?” 26 Ọtiọyena Leban da ta: “Ọ dia ẹkuruemu rẹ avwanre vwẹ etinẹ rẹ aye otete na vwọ kare ọ rẹ ọkpako rọvwọọn. 27 Re orẹ rẹ udughwrẹn rẹ aye nana, wo de ru ọtiọyen nu, ke me kẹ wẹ aye ro chekọ na, rere wọ ga vwẹ ẹgbukpe ighwrẹn efa.” 28 Jekọp de ru ọtiọyen, ọ da re orẹ rẹ udughwrẹn rẹ aye nana, ọyena vwọ wan nu, ọ da vwẹ Rechẹl ọmọtẹ rọyen vwọ kẹ kerẹ aye. 29 Vwọba, Leban da vwẹ odibo ọmọtẹ rọyen Bilha vwọ kẹ ọmọtẹ rọyen Rechẹl, rere ọ dia odibo rọyen.

30 Jekọp de ji nene Rechẹl vwerhẹn, o de vwo ẹguọnọ ri Rechẹl vrẹ Lia, ọ da ga ẹgbukpe ighwrẹn efa. 31 Jihova vwọ mrẹ nẹ o vwo ẹguọnọ ri Liaa,* o de ruo rere ọ mrevun,* ẹkẹvuọvo Rechẹl da dia ẹgan. 32 Ọtiọyena Lia da mrevun, o de vwiẹ ọmọshare, o de se Rubẹn,* kidie ọ tare: “Fikiridie Jihova mrẹ ojaẹriọ mẹ re, asaọkiephana ọshare mẹ che vwo ẹguọnọ mẹ.” 33 Ọ da rhoma mrevun, o de vwiẹ ọmọshare, ọ da ta: “Kidie Jihova kerhọ re, e vwo ẹguọnọ mẹẹ, ọtiọyena ọ da je kẹ vwẹ ọnana.” O de se Simiọn.* 34 Ọ da rhoma mrevun obọfa, o de vwiẹ ọmọshare, ọ da ta: “Asaọkiephana ọshare mẹ che sikẹrẹ ovwẹ, kidie mi vwiẹ emeshare erha kẹ re.” Ọtiọyena e de se Livae.* 35 Ọ da rhoma mrevun, o de vwiẹ ọmọshare, ọ da ta: “Ọke nana mi che jiri Jihova.” O de se Juda.* Ọyena vwọ wan nu, ọ da dobọ rẹ evwiẹ ji.