Jẹnẹsis

31 Ọke vwọ yanran, o de nyo rẹ emọ* ri Leban vwọ ta: “Jekọp reyọ erọnvwọn eje rẹ ọsẹ rẹ avwanre vwori re, vwẹ usun rẹ erọnvwọn rẹ ọsẹ rẹ avwanre vwori na yen o vwo koko efe nana ejobi.” 2 Ọke rẹ Jekọp de nẹ opharo ri Leban, kọ mrẹ nẹ uruemu ro djephia kpahọn rha dia kirobo ri jovwoo. 3 Ukuotọ rọyen Jihova da ta kẹ Jekọp: “Rhivwin kpo otọ rẹ esẹ wẹn, wo bru ihwo rẹ orua wẹn ra, mi che nene uwe dia ọkieje.” 4 Ọtiọyena Jekọp da vwẹ ovuẹ rhe Rechẹl vẹ Lia nẹ ayen yanrhe obo aghwa na, vwẹ asan rẹ ichuru rọyen hepha, 5 ọ da ta kẹ ayen:

“Me mrevughe nẹ uruemu rẹ ọsẹ rẹ ovwan djephia kpahan ovwẹ wene re, ẹkẹvuọvo Ọghẹnẹ rẹ ọsẹ mẹ vẹ ovwẹ herọ. 6 Vwọrẹ imuẹro, ovwan komobọ riẹnre nẹ me vwẹ ẹgba mẹ eje vwọ ga ọsẹ rẹ ovwan. 7 Ọsẹ rẹ ovwan davwẹngba vwọ ghwa vwe re, o ji wene osa mẹ abọ ihwe; ẹkẹvuọvo Ọghẹnẹ vwẹ uphẹn kẹ rọ vwọ wan vwẹ omaa. 8 Ọ da tanẹ, ‘I ri kere ipe na yen cha dia osa wẹn,’ ichuru na eje ki vwiẹ i ri kere ipe; ẹkẹvuọvo ọ da rha tanẹ, ‘I ri vwo irhiẹ na yen cha dia osa wẹn,’ ichuru na eje ki vwiẹ i ri vwo irhiẹ. 9 Ọtiọyena Ọghẹnẹ kọ reyọ ichuru rẹ ọsẹ wẹn mie, kọ vwẹ ayen kẹ vwẹ. 10 Vwẹ ọke ọvo rẹ ichuru na vwọ guọnọ mroma, me da kpare ẹro mẹ, me da mrẹ vwevunrẹ evwerhẹn nẹ ẹvwe rẹ eshare na ri nene ichuru na mroma vwo irhiẹ vẹ ipe, ayen ji kere ipe. 11 Ọtiọyena amakashe rẹ Ọghẹnẹ rẹ uyota na da ta kẹ vwẹ vwevunrẹ evwerhẹn na, ‘Jekọp!’ me da kpahen, ‘Mẹvwẹ na,’ 12 Ọ da ta, ‘Kpare ẹro wẹn, biko, rere wọ mrẹ nẹ ẹvwe rẹ eshare na eje ri nene ichuru na mroma na vwo irhiẹ vẹ ipe, ayen ji kere ipe, kidie me mrẹ erọnvwọn eje rẹ Leban ru we. 13 Mẹvwẹ Ọghẹnẹ rẹ uyota ri Bẹtẹl, asan ru wo de ku evwri ku uchivwo ọvo ye, ru wo de ve ive ọvo kẹ vwẹ. Asaọkiephana gbe vrẹn wo nẹ evunrẹ otọ nana, rere wo rhivwin kpo otọ re de vwiẹ wẹ.’”

14 Ọtiọyena Rechẹl vẹ Lia da kpahen kẹ: “Avwanre ji vwo ẹkẹn ro chekọ kẹ avwanre rẹ avwanre cha riuku rọyen vwẹ uwevwin rẹ ọsẹ rẹ avwanre? 15 Ọ dia o ni avwanre kerẹ erhorha, rọ vwọ dianẹ ọ shẹ avwanre, kọ je ria igho ra hwa phiyọ uyovwin rẹ avwanre na? 16 Efe na eje rẹ Ọghẹnẹ reyọ mie ọsẹ rẹ avwanre na, e rẹ avwanre vẹ emọ rẹ avwanre. Asaọkiephana gbe ru kemu kemu rẹ Ọghẹnẹ vuẹ wẹ nẹ wo ru.”

17 Ọtiọyena Jekọp de vrẹn, o de mu emọ rọyen vẹ eya rọyen phiyọ ikamẹl, 18 kọ reyọ ichuru rọyen eje vẹ erọnvwọn eje ro kokori, ichuru rọyen ro kokori vwẹ Padan-eram, rere o bru ọsẹ rọyen Aizik ra vwẹ otọ rẹ ihwo ri Kenan.

19 Asaọkiephana Leban re bru ẹton rẹ igodẹ rọyen, Rechẹl de cho ema ri tẹrafim* rẹ ọsẹ rọyen. 20 Vwọba, Jekọp reghe Leban ohwo rẹ Aremia na, kidie ọ vuẹrẹ nẹ ọyen djẹẹ. 21 Ọ da djẹ yanran je wan Urhie na* vrẹ, ọ vẹ erọnvwọn eje ro vwori. O de hirharoku ekogho rẹ igbenu ri Giliẹd. 22 Vwẹ ẹdẹ rerha, a da vuẹ Leban nẹ Jekọp djẹ re. 23 Ọtiọyena ọ da reyọ iniọvo* rọyen boma, ọ da vwọtua vwẹ oyan rẹ ẹdẹ ighwrẹn, ọ da tua mu vwẹ ekogho rẹ igbenu ri Giliẹd. 24 Ọghẹnẹ de bru Leban ohwo rẹ Aremia na rhe vwẹ evwerhẹn vwẹ ason, ọ da ta kẹ: “Jomaotọ kpahen oborẹ wọ cha ta kẹ Jekọp, owenẹ ọ dia obo ri yovwirin yẹrẹ obo re brare.”*

25 Ọtiọyena Leban de bru Jekọp ra, kidie Jekọp chiyin utughẹ rọyen phiyọ ugbenu na, jẹ Leban vẹ iniọvo rọyen dia itughẹ vwẹ ekogho rẹ igbenu ri Giliẹd. 26 Ọtiọyena Leban da ta kẹ Jekọp: “Die yen wo ruru na? Diesorọ wo vwo brorhiẹn ru wo vwo reghe uvwe ji mu emetẹ mẹ yanran kerẹ eviẹn ra vwẹ ọlọkọ mu reyọ? 27 Diesorọ wọ vwọ bẹbẹ djẹ yanran, ji reghe uvwe, ru wo vwo juvwe ẹvuẹ? Mane ku wọ vuẹ vwẹ jovwo, mi rhe siobọnẹ uwe yanran vẹ aghọghọ kugbe ine vẹ itamborini* kugbe ihapu. 28 Jẹ, wọ kẹ vwẹ uphẹn re me vwọ fiọnfiọn ivwrọmọ* mẹ vẹ emetẹ mẹẹ. Emu rẹ ẹkpa yen wo ruru na. 29 Mi vwo ẹgba re me vwọ wan wẹ oma, ẹkẹvuọvo Ọghẹnẹ rẹ ọsẹ wẹn vuẹ vwẹ vwẹ ason rọ wanre na nẹ, ‘Jomaotọ kpahen oborẹ wọ cha ta kẹ Jekọp, owenẹ ọ dia obo ri yovwirin yẹrẹ obo re brare.’ 30 Asaọkiephana wọ yanran kidie urhuru ru wo vwo rhivwin kpo uwevwin rẹ ọsẹ wẹn si we krẹ re, ẹkẹvuọvo diesorọ wo vwo cho eghẹnẹ mẹ?”

31 Jekọp da kpahen kẹ Leban: “Mi ru ọtiọyen kidie oshọ mu vwe, ke me ta kẹ oma mẹ nẹ, ‘Wọ sa vwẹ ẹgba vwọ reyọ emetẹ wẹn mie vwe.’ 32 Kohwo kohwo ru wọ mrẹ eghẹnẹ wẹn vwẹ obọ rọyen ko ghwu. Gba hiẹ obo ri mi vwori vwẹ irharo rẹ iniọvo rẹ avwanre, rere wọ reyọ obo re dia ọwẹn.” Ẹkẹvuọvo Jekọp riẹnre nẹ Rechẹl cho ayeen. 33 Ọtiọyena Leban da ro evunrẹ utughẹ ri Jekọp kugbe utughẹ ri Lia kugbe utughẹ rẹ eviẹn emetẹ ivẹ na, ẹkẹvuọvo ọ mrẹ ayeen. Ọ da ro otafe nẹ utughẹ ri Lia, o de kpo evunrẹ utughẹ ri Rechẹl. 34 Ẹkẹvuọvo Rechẹl reyọ ema ri tẹrafim na, o de phi ayen phiyọ obere rẹ eya vwo chidia enu rẹ ikamẹl, o de chidia enu rayen. Leban da hiẹ utughẹ na eje, ẹkẹvuọvo ọ mrẹ ayeen. 35 Ọtiọyena ọ da ta kẹ ọsẹ rọyen: “Wo muophuu ọrovwovwe, mi che se vrẹn vwẹ irharo wẹẹn, kidie orọnvwọn ro ruẹ eya na ru vwe re.” Ọtiọyena ọ da nabọ hiẹ, ẹkẹvuọvo ọ mrẹ ema ri tẹrafim naa.

36 Ọtiọyena ophu de rhi mu Jekọp, kọ ghwọkuẹ Leban. Jekọp da ta kẹ Leban: “Die yen oruchọ mẹ, umwemwu vọ yen mi ruru, ru wọ vwẹ fiki rọyen vwọtua vwẹ? 37 Asaọkiephana ru wọ vwọ hiẹ ekuakua mẹ eje nure na, die yen wọ mrẹre rọ dia ọ rẹ uwevwin wẹn? Phio phiyọ etinẹ vwẹ obaro rẹ iniọvo mẹ vẹ iniọvo wẹn, rere ayen brorhiẹn vwẹ uvwre rẹ avwanre ihwo ivẹ na. 38 Vwẹ uvwre rẹ ẹgbukpe 20 nana ri mi nene uwe dia na, igodẹ wẹn vẹ ẹvwe wẹn vwiẹ chọra kakakaa, me je re egbon rehẹ usun rẹ ichuru wẹn naa. 39 Mi mu eranvwe vuọvo rẹ eranvwe rẹ aghwa hweri bru we rhee. Mẹvwẹ komobọ yen hwosa rọyen. Owenẹ ọ dianẹ e cho eranvwe na vwẹ oghẹruvo yẹrẹ e choro vwẹ ason, wọ nokpẹn rẹ osa rọyen mie vwe. 40 Oheri here uvwe vwẹ oghẹruvo, ekpahen mu vwe vwẹ ason, ovwerhẹn ji nuvwe ẹro. 41 Ọnana yen ọ vwọ gba ẹgbukpe 20 re me vwọ hẹ uwevwin wẹn re. Me ga wẹ ẹgbukpe 14 fikirẹ emetẹ wẹn ivẹ kugbe ẹgbukpe 6 fikirẹ ichuru wẹn, ku wo dje osa mẹ ewewene abọ ihwe. 42 Ọ rha dianẹ Ọghẹnẹ rẹ ọsẹ mẹ, Ọghẹnẹ rẹ Ebraham kugbe Ọ rẹ Aizik djoshọ rọyen na* hẹ ẹbẹre mẹ jovwoo, wo rhe siobọnẹ uvwe yanran asaọkiephana vẹ abọ fefe. Ọghẹnẹ mrẹ ojaẹriọ mẹ kugbe owian ọgangan rẹ abọ mẹ, kọyensorọ ọ vwọ ghwọku we vwẹ ason rọ wanre na.”

43 Ọtiọyena Leban da kpahen kẹ Jekọp: “Emetẹ na emetẹ mẹ, emọ na emọ mẹ, ichuru na ichuru mẹ, erọnvwọn eje ru wọ mrẹ na emẹ vẹ e rẹ emetẹ mẹ. Die yen mi se ru nonẹna vwọso enana yẹrẹ vwọso emọ rayen rẹ ayen vwiẹre? 44 Asaọkiephana gba yanrhe, e jẹ avwanre re ọphọ, mẹvwẹ vẹ owẹ, kọ cha dia oseri vwẹ uvwre rẹ avwanre.” 45 Ọtiọyena Jekọp da reyọ ukuta, o de vwo vi kerẹ uchivwo. 46 Jekọp da ta kẹ iniọvo rọyen: “Ovwan tọrọ ikuta!” Ayen da tọrọ ikuta, ayen de koko ayen. Ayen vwo ru ọtiọyen nu, ayen da riemu vwẹ enu rẹ ikuta rẹ ayen kokori na. 47 Leban ko se Jiga-sahaduta,* ẹkẹvuọvo Jekọp de se Galid.*

48 Leban da ta: “Ikuta nana re kokori na ọyen oseri vwẹ uvwre mẹ vẹ ọwẹn nonẹna.” Kọyensorọ o vwo se Galid, 49 kugbe Uwevwin Orhẹrẹ na, kidie ọ tare nẹ, “E jẹ Jihova rhẹrẹ ovwẹ vẹ owẹ ọke rẹ avwanre rha mrẹ ohwohwoo. 50 Wo de gboja kẹ emetẹ mẹ na, wọ da ra reyọ eya efa vwọ ba emetẹ mẹ, dede nẹ ohwo vuọvo vẹ avwanre herọọ, karophiyọ nẹ Ọghẹnẹ oseri vwẹ uvwre mẹ vẹ ọwẹn.” 51 Leban da ta kẹ Jekọp: “Ikuta re kokori na ọna, uchivwo ri mi vwo vi vwẹ uvwre mẹ vẹ ọwẹn na jẹ ọna. 52 Ikuta nana re kokori na ọyen oseri, uchivwo na jẹ orọnvwọn ro soseri, nẹ me cha shariẹ ikuta nana re kokori na rhe wan wẹ omaa, wọ je cha shariẹ ikuta nana re kokori na vẹ uchivwo nana rhe wan vwẹ omaa. 53 E jẹ Ọghẹnẹ rẹ Ebraham kugbe Ọghẹnẹ ri Nehọ, Ọghẹnẹ rẹ ọsẹ rayen brorhiẹn vwẹ uvwre rẹ avwanre.” Jekọp da vwẹ Ọ rẹ ọsẹ rọyen Aizik djoshọ rọyen na vwo duvwun iyorin.*

54 Ọyena vwọ wan nu, Jekọp de ze izobo vwẹ ugbenu na, o de durhie iniọvo rọyen nẹ ayen rhe re ibrẹdi. Ọtiọyena ayen da re, ayen da dia ugbenu na hrọke. 55 Ẹkẹvuọvo Leban de vrẹn vwẹ edegburhiọke, ọ da fiọnfiọn ivwrọmọ* rọyen kugbe emetẹ rọyen, o de bruba kẹ ayen. Ọtiọyena Leban de vrẹn, o de rhivwin kpo.