Jẹnẹsis

32 Jekọp de kpo asan rọ ra, emekashe rẹ Ọghẹnẹ da vwa. 2 Ugege rọ vwọ mrẹ ayen, Jekọp da ta: “Ọnana utughẹ rẹ Ọghẹnẹ!” O de se asan na Mehaneim.*

3 Ọyena vwọ wan nu, Jekọp de ji ikọn kobaro kẹ oma rọyen bru oniọvo rọyen Isọ ra vwẹ otọ ri Siẹ, vwẹ ekogho* rẹ Idọm, 4 ọ da vwẹ iji kẹ ayen: “Ọnana yen oborẹ ovwan cha ta kẹ ọrovwovwe Isọ, ‘Ọnana yen oborẹ odibo wẹn Jekọp tare: “Mi nene Leban dia* vwẹ ọke grongron rhi te ọke nana. 5 Mi vwo erhuẹn, ekẹkẹtẹ, igodẹ, kugbe idibo rẹ eshare vẹ eya, me vwẹ ovuẹ nana vwo rhe ọrovwovwe rere me sa vwọ mrẹ ẹroesiri wẹn.”’”

6 Ọke vwọ yanran, ikọn na de rhivwin bru Jekọp rhe, ayen da ta: “Avwanre mrẹ oniọvo wẹn Isọ, asaọkiephana ọ hẹ idjerhe bru we cha, ọ vẹ eshare 400 re vẹ ọyen gba herọ.” 7 Oshọ de rhi mu Jekọp gangan, kọ rua ẹnwan. Ọtiọyena ọ da ghare ihwo re vẹ ọyen gba herọ phiyọ ẹko ivẹ, ọtiọyen ji te igodẹ na, erhuẹn na, kugbe ikamẹl na. 8 Ọ da ta: “Isọ da họnre ẹko ọvo, ẹko ro chekọ na kọ sa djẹ vabọ.”

9 Ọyena vwọ wan nu, Jekọp da ta: “E Ọghẹnẹ rẹ ọsẹ mẹ Ebraham kugbe Ọghẹnẹ rẹ ọsẹ mẹ Aizik, E Jihova, wẹwẹ rọ ta kẹ vwẹ nẹ, ‘Rhivwin kpo otọ rẹ esẹ wẹn, wo bru ihwo rẹ orua wẹn ra, ki mi che ru emu esiri kẹ wẹ,’ 10 Mi muwan rẹ ẹguọnọ ro jẹ rhẹriẹ eje kugbe evun-ẹfuọn eje ru wo dje kẹ odibo wẹẹn, kidie ọkpọ mẹ ọvo yen me vwọ wan Jọdan nana vrẹ, jẹ asaọkiephana mi hirhephiyọ ẹko ivẹ re. 11 Sivwin uvwe, me rẹ wẹ, vwo nẹ obọ rẹ oniọvo mẹ Isọ, kidie oshọ mu vwe nẹ ọ sa rhe họnre ovwẹ, ọtiọyen ji te ini na vẹ emọ rayen. 12 Wọ tare nẹ, ‘Vwọrẹ imuẹro, mi che ru emu esiri kẹ wẹ, me cha nẹrhẹ emọ* wẹn dia kerẹ ekpẹn rẹ abadi na ri bun vrẹ obo re se keri.’”

13 Ọ da dia etiyin hrọke. Ọ da reyọ evo vwẹ usun rẹ ekuakua ro vwori ro che vwo ruẹse kẹ oniọvo rọyen Isọ: 14 Ẹvwe rẹ eya 200, okri* 20, igodẹ rẹ eya 200, egbon 20, 15 ikamẹl 30 re vwẹ evie kẹ emọ rayen, erhuẹn rẹ eya 40, erhuẹn rẹ eshare 10, ekẹkẹtẹ rẹ eya 20 kugbe ekẹkẹtẹ rẹ eshare ride 10.

16 Ọ da vwẹ ayen kẹ idibo rọyen ẹkuẹko, ọ da ta kẹ idibo rọyen: “Ovwan kobaro kẹ vwẹ, ovwan jẹ ẹko ọvo sherabọ kẹ ọ rọ vwọ kpahọn.” 17 Ọ da je ta kẹ ọrẹsosuọ na: “Ọ da dianẹ oniọvo mẹ Isọ vwa wẹ, ọ da nọ nẹ, ‘Ono yen onini wẹn, tivọ yen wọ ra, kugbe ono yen vwo enana re kobaro kẹ wẹ na?’ 18 wọ me tanẹ, ‘Odibo wẹn Jekọp yen vwo ayen. Ọyen okẹ ro vwo rhe ọrovwovwe Isọ, nighere! ọyen komobọ jehẹ obuko rẹ avwanre cha.’” 19 Ọ da je vwẹ iji kẹ ọrivẹ, ọrerha, kugbe ihwo eje re vwọ kpahen ẹko rẹ ichuru na: “Ota nana yen ovwan cha ta kẹ Isọ ọke rẹ ovwan da vwa. 20 Ovwan me je ta, ‘Odibo wẹn Jekọp yehẹ obuko rẹ avwanre na.’” Kidie ọ ta kẹ oma rọyen: ‘Mi de phoro aro kẹ womarẹ okẹ re me cha vwọ kobaro kẹ oma mẹ, ọke me da mrẹ, ko che rhiabọreyọ ovwẹ vwọrẹ ẹguọnọ.’ 21 Ọtiọyena e de mu okẹ na yanran kobaro kẹ, ẹkẹvuọvo ọyen komobọ da vwerhẹn asan rẹ ayen wonphiyọ* na hrọke.

22 Ọke vwọ yanran vwevunrẹ ason yena, o de vrẹn, ọ da reyọ eya rọyen ivẹ, idibo rọyen rẹ emetẹ ivẹ kugbe emọ rọyen emeshare 11, ọ da shariẹ urhie ri Jabọk vrẹ. 23 Ọtiọyena ọ da reyọ ayen, ọ vẹ ayen da shariẹ ivwori* na, ọ da je reyọ erọnvwọn eje ri chekọ ro vwori nene oma.

24 Ukuotọ rọyen Jekọp ọvo kọyen herọ. Ọshare ọvo de nene muabọ rhi duvwun edegburhiọke. 25 Ọke rọ vwọ mrẹ nẹ o se phio kparobọọ, o de djobọte ubeku rẹ ọchọn rọyen; ubeku rẹ ọchọn ri Jekọp da rhoghran ọke ro vwo nene muabọ. 26 Ọyena vwọ wan nu, ọ da ta: “Juvwe yanran kidie ọke rhie cha re.” Ọtiọyena ọ da ta: “Me cha yanjẹ uwe vwoo jokpanẹ wo bruba kẹ vwẹ tavwen.” 27 Ọtiọyena ọ da nọ: “Die yen odẹ wẹn?” ọ da kpahen: “Jekọp.” 28 Ọ da ta: “Odẹ wẹn rha cha dia Jekọp ọfaa, ẹkẹvuọvo kẹ Izrẹl,* kidie wo nene Ọghẹnẹ vẹ ihworakpọ muabọ, ukuotọ rọyen wo de phikparobọ.” 29 Jekọp da nọ: “Biko vuẹ vwẹ odẹ wẹn.” Ẹkẹvuọvo ọ da ta: “Diesorọ wọ vwọ nokpẹn rẹ odẹ mẹ?” Ọtiọyena o de bruba kẹ vwẹ etiyin. 30 Jekọp de se asan na Pẹnaẹl,* kidie ọ tare nẹ, “Me mrẹ opharo rẹ Ọghẹnẹ, dedena e sivwin arhọ* mẹ.”

31 Uvo da rhe rhovwon muo ugege rọ vwọ wanvrẹ Pẹnuẹl,* ẹkẹvuọvo kọ sẹghrẹ owọ fikirẹ ọchọn rọyen. 32 Kọyensorọ rhi te nonẹna, emọ rẹ Izrẹl vwo vwo ẹkuruemu rẹ ayen vwo jẹ iriẹn rẹ ekpoghowọ rọhẹ ubeku rẹ ọchọn na ẹriọ, kidie o djobọte ubeku rẹ ọchọn ri Jekọp vwẹ asan iriẹn rẹ ekpoghowọ na.