Jẹnẹsis
33 Asaọkiephana Jekọp da kpare ẹro rọyen, ọ da mrẹ Isọ rọ cha, ọ vẹ eshare 400 re vẹ ọyen gba herọ. Ọtiọyena ọ da ghare emọ na vwẹ uvwre ri Lia, Rechẹl, kugbe idibo eya ivẹ na. 2 Ọ da vwẹ idibo eya na vẹ emọ rayen vwọ kobaro, Lia vẹ emọ rọyen da vwọ kpahen ayen, Rechẹl vẹ Josẹf da rha vwọ kpahen ayen vwẹ obuko. 3 Ọtiọyena ọyen komobọ da kobaro kẹ ayen, ọ da vwẹ uyovwin kpotọ abọ ighwrẹn ro vwo siẹkẹrẹ oniọvo rọyen.
4 Ẹkẹvuọvo Isọ da djẹ bro ra, ọ da gbanọ, ọ da fiọnfiọn, ayen de shugo rẹ oviẹ. 5 Ọke rọ vwọ kpare ẹro rọyen je mrẹ eya na vẹ emọ na, ọ da ta: “Enana amono yen e vẹ owẹ gba herọ na?” ọ da kpahen: “Enana emọ rẹ Ọghẹnẹ vwo dje ẹroesiri kẹ odibo wẹn.” 6 Ọtiọyena idibo eya na vẹ emọ rayen da yanrhe, ayen da vwẹ uyovwin kpotọ, 7 Lia da je yanrhe vẹ emọ rọyen, ayen da vwẹ uyovwin kpotọ. Josẹf da je yanrhe vẹ Rechẹl, ayen da vwẹ uyovwin kpotọ.
8 Isọ da ta: “Diesorọ wo vwo ji ẹko rẹ ihwo nana eje re me vware na bru vwe rhe?” Ọ da kpahen: “Rere me sa vwọ mrẹ ẹroesiri rẹ ọrovwovwe.” 9 Isọ da ta: “Mi vwo ekuakua buebun gbidiki oniọvo mẹ. Reyọ ekuakua wẹn rhivwin.” 10 Ẹkẹvuọvo Jekọp da ta: “Ẹjo, biko, me da mrẹ ẹroesiri wẹn re, gba reyọ okẹ mẹ na mie vwe, kidie me vwẹ ayen rhe rere me sa vwọ mrẹ opharo wẹn. Me mrẹ opharo wẹn re kerẹsiẹ ra da mrẹ nẹ me mrẹ opharo rẹ Ọghẹnẹ, rọ vwọ dianẹ wo dede uvwe reyọ vẹ omavwerhovwẹn. 11 Biko reyọ okẹ rẹ ebruphiyọ mẹ re vwo rhe we na, kidie mi vwo ẹroesiri rẹ Ọghẹnẹ, mi ji vwo erọnvwọn eje re me guọnọre.” Kọ rẹ re te ọke rọ vwọ reyọ.
12 Ọke vwọ yanran, Isọ da ta: “E jẹ avwanre mu oyan phiyọ rere a yanran, juvwe kobaro kẹ wẹ.” 13 Ẹkẹvuọvo ọ da ta kẹ: “Ọrovwovwe riẹnre nẹ emọ na jẹ imitete, mi ji vwo igodẹ vẹ erhuẹn re vwẹ evie kẹ emọ rayen. E de bru ayen okpakpa gan nọ vwẹ ẹdọke ọvo, ichuru na eje che ghwu. 14 Biko, e jẹ ọrovwovwe kobaro kẹ odibo rọyen, ẹkẹvuọvo me cha rha yan ememerha kirobo rẹ ẹgba rẹ ichuru mẹ vẹ emọ na muru, bẹsiẹ ri mi vwo bru ọrovwovwe rhe vwẹ Siẹ.” 15 Ọtiọyena Isọ da ta: “Biko juvwe yanjẹ ihwo mẹ evo vwo kẹ wẹ.” Ọ da ta: “Diesorọ wo che vwo ru ọnana? Juvwe de mrẹ ẹroesiri rẹ ọrovwovwe.” 16 Ọtiọyena vwẹ ẹdẹ yena, Isọ de rhivwin kpo Siẹ.
17 Jekọp de kpo Sọkọt, ọ da bọn uwevwin ọvo kẹ oma rọyen, ọ da je bọn urhuẹn sansan vwọ kẹ ichuru rọyen. Kọyensorọ ro vwo se asan na Sọkọt.*
18 O vwo vrẹn nẹ Padan-eram nu, Jekọp de rhi te orere ri Shikẹm gbẹrhẹnẹdẹ vwẹ otọ ri Kenan, o de chiyin utughẹ rọyen kẹrẹ orere na. 19 Ọtiọyena ọ da vwẹ idọnọ efuanfon 100 vwọ dẹ ẹkẹn ọvo rẹ udju ro chiyin utughẹ rọyen phiyọ vwo mie emọ ri Hemọ, ọsẹ ri Shikẹm. 20 Ọ da so agbada ọvo phiyọ etiyin, o de se Ọghẹnẹ, Ọghẹnẹ rẹ Izrẹl.