Jẹnẹsis
50 Josẹf da gbane ọsẹ rọyen, ọ da viẹ kuo je fiọnfiọn. 2 Ọyena vwọ wan nu, Josẹf da vwẹ iji kẹ idibo rọyen re dia ebo na, nẹ ayen rhuẹrẹ orivwin rẹ ọsẹ rọyen phiyọ.* Ọtiọyena ebo na da rhuẹrẹ orivwin rẹ Izrẹl phiyọ, 3 ayen da vwẹ ọsoso rẹ ẹdẹ 40 vwo ruo, kidie ọnana yen ọsoso rẹ ọke ra vwọ rhuẹrẹ orivwin na phiyọ, ihwo rẹ Ijipt na ke viẹ fiki rọyen vwẹ ẹdẹ 70.
4 Ẹdẹ rẹ uvweri rọyen na vwọ wan nu, Josẹf da ta kẹ aguare* ri Fero: “Ọ da dianẹ me mrẹ ẹroesiri rẹ ovwan, ovwan gba vwẹ ovuẹ nana kẹ Fero: 5 ‘Ọsẹ mẹ nẹrhẹ ovwẹ duvwun iyorin, rọ vwọ ta: “Nighere! Mi ghwẹ re. Wo mi shi vwe phiyọ ushi mẹ re me tọn phiyọ ukuta vwẹ otọ ri Kenan.” Biko, juvwe yanran re shi ọsẹ mẹ, mi de ru ọtiọyen nu, ki mi che rhivwin rhe.’” 6 Fero da kpahen: “Yanran rere wo re shi ọsẹ wẹn kirobo rọ ghwa nẹrhẹ wo duvwun iyorin na.”
7 Ọtiọyena Josẹf da yanran re shi ọsẹ rọyen, idibo ri Fero eje de nene, ekpako rẹ aguare rọyen kugbe ekpako rẹ otọ rẹ Ijipt eje 8 vẹ evwruwevwin ri Josẹf eje kugbe iniọvo rọyen, vẹ evwruwevwin rẹ ọsẹ rọyen. Emọ rayen itete kugbe igodẹ rayen vẹ ichuru rayen ọvo yen ayen yan jovwo vwẹ otọ ri Goshẹn. 9 Ekpẹrẹ rẹ ofovwin vẹ iguiyesi ji nene, ẹko rẹ ihwo na bunru mamọ. 10 Ọtiọyena ayen de rhi te asan re de wonro ibi ekankọn rẹ Etad, rọhẹ ekogho ri Jọdan na, ayen de vwere uvweri ọgangan vwẹ etiyin, o de vwere ọsẹ rọyen vwẹ ẹdẹ ighwrẹn. 11 Ihwo re dia otọ na re dia ihwo ri Kenan da mrẹ ayen ri vwere uvweri vwẹ asan re de wonro ibi ekankọn rẹ Etad, ayen de kperi: “Ọnana uvweri ọgangan kẹ ihwo rẹ Ijipt!” Ọyensorọ re vwo se Ebel-mizreim,* ọ hẹ ekogho ri Jọdan na.
12 Ọtiọyena emọ rọyen de ru kẹ kirobo rọ ghwa vuẹ ayen. 13 Emọ rọyen de muo ro otọ ri Kenan, ayen de sho phiyọ unu rẹ ukuta rọhẹ udju ri Makpila, udju rọhẹ obaro ri Mamre, rẹ Ebraham dẹ mie Ifrọn ohwo ri Hẹt na, kerẹ asan re se shi ohwo phiyọ. 14 O vwo shi ọsẹ rọyen nu, Josẹf vẹ iniọvo rọyen kugbe ihwo eje ri nenire re shi ọsẹ rọyen de rhivwin kpo Ijipt.
15 Ọke rẹ iniọvo ri Josẹf vwọ mrẹ nẹ ọsẹ rayen ghwure, ayen da ta: “Ọ sa dianẹ ivun miovwo Josẹf kpahan avwanre, kọ cha hwosa rẹ erọnvwọn ebrabra eje rẹ avwanre ruro kẹ avwanre.” 16 Ọtiọyena ayen da vwẹ ovuẹ nana rhe Josẹf: “Ọsẹ wẹn ji iji nana phiyotọ tavwen o ki ghwu: 17 ‘Ọnana yen oborẹ ovwan cha ta kẹ Josẹf: “Me rẹ wẹ, biko vwo ghovwo oruchọ rẹ iniọvo wẹn kugbe umwemwu rẹ ayen ruru, rẹ ayen vwọ so omaẹkuọn tiọnana kẹ wẹ.”’ Asaọkiephana biko, vwo ghovwo oruchọ rẹ idibo rẹ Ọghẹnẹ rẹ ọsẹ wẹn.” Josẹf da viẹ ọke rẹ ayen vwọ vuẹ eta nana. 18 Ọtiọyena iniọvo rọyen da je rhe, ayen de shiguẹ bọvwọn opharo rhuotọ vwẹ obaro rọyen, ayen da ta: “Asaọkiephana avwanre eviẹn wẹn!” 19 Josẹf da ta kẹ ayen: “Ovwan djoshọọ. Mẹvwẹ yehẹ ẹdia rẹ Ọghẹnẹ? 20 Dede nẹ ovwan vwo ẹwẹn rẹ ovwan vwọ so omaẹwan kẹ vwẹ, Ọghẹnẹ vwo ẹwẹn rọ vwọ rhẹriẹ phiyọ obo ri yovwirin, ro ji vwo sivwin arhọ rẹ ihwo buebun kirobo ro ruẹ nonẹna. 21 Asaọkiephana ovwan djoshọọ. Me cha rha vwẹ emuọre kẹ ovwan vẹ emọ rẹ ovwan itete.” Ọtiọyena ọ da vwẹ uchebro kẹ ayen je ta eta rẹ uduephiophiyawọ kẹ ayen.
22 Josẹf da je dia Ijipt, ọ vẹ evwruwevwin rẹ ọsẹ rọyen. Josẹf da dia akpọ ẹgbukpe 110. 23 Josẹf mrẹ uvwiẹ rerha rẹ emọ rẹ Ifrem, ọtiọyen ji te emọ ri Mekiẹ, ọmọ ri Manasẹ. E vwiẹ ayen phiyọ awọ ri Josẹf.* 24 Ọke vwọ yanran, Josẹf da ta kẹ iniọvo rọyen: “Mi ghwẹ re, ẹkẹvuọvo Ọghẹnẹ che jẹ ovwan ẹkarophiyọọ, vwọrẹ uyota, ọ cha reyọ ovwan nẹ otọ nana vwo kpo otọ ro duvwun iyorin rọyen kẹ Ebraham, Aizik, kugbe Jekọp.” 25 Ọtiọyena Josẹf da nẹrhẹ emọ rẹ Izrẹl duvwun iyorin, rọ vwọ ta: “Ọghẹnẹ che jẹ ovwan ẹkarophiyọọ. Ovwan me ghwẹ ibeku mẹ nẹ etinẹ na.” 26 Josẹf de ghwu ọke rọ vwọ hẹ ẹgbukpe 110, a da rhuẹrẹ orivwin rọyen phiyọ, e de muo phiyọ okọ rẹ orivwin vwẹ Ijipt.