Jẹnẹsis
7 Ọyena vwọ wan nu, Jihova da ta kẹ Noa: “Ro evunrẹ okọ na, te owẹ te evwruwevwin wẹn eje, kidie wẹwẹ yen me mrẹre nẹ ọyen ohwo ọsoso vwẹ obaro mẹ vwẹ usun rẹ ihwo rẹ uvwiẹ nana. 2 Wọ me reyọ koka koka rẹ eranvwe re fonro ighwrighwrẹn* nene oma, te ọ rẹ ọshare vẹ aye rọyen; keranvwe keranvwe re fonroo ivivẹ ọvo, te ọ rẹ ọshare vẹ aye rọyen; 3 emama re rhan vwẹ irharheghe na jẹ ighwrighwrẹn,* te eya te eshare, rere a sa vwọ sẹro rẹ arhọ rẹ emọ rayen vwẹ akpọ na eje. 4 Kidie ẹdẹ ighwrẹn da wan nu, ki mi ruo rere osio vwọ rhọ ku otọrakpọ na vwẹ ẹdẹ 40 kugbe ason 40, ki mi si kemu kemu ri vwo arhọ re me mare nẹ otọ na.” 5 Ọtiọyena Noa de ru erọnvwọn eje rẹ Jihova vuẹrẹ nẹ o ru.
6 Noa hẹ ẹgbukpe 600 ọke rẹ oghwe vwo ku akpọ na. 7 Ọtiọyena Noa vẹ emọ rọyen, aye rọyen, kugbe eya rẹ emọ rọyen da ro okọ na tavwen oghwe na ki ku. 8 Vwọ kẹ koka koka rẹ eranvwe re fonro kugbe koka koka rẹ eranvwe ri jẹfuọn, kugbe emama re rhan kugbe kemu kemu re yan vwẹ otọ na, 9 ayen ro evunrẹ okọ na bru Noa ra ivivẹ, eya vẹ eshare, kirobo rẹ Ọghẹnẹ ji iji rọyen kẹ Noa. 10 Ẹdẹ ighwrẹn vwọ wan nu, oghwe na de ku akpọ na.
11 Vwẹ ukpe 600 rẹ akpeyeren ri Noa, vwẹ emeranvwe rivẹ rọyen, vwẹ ẹdẹ 17 rẹ emeranvwe na, vwẹ ẹdẹ yena ogbugbu rẹ ame na eje rehẹ irharheghe na da va, ẹchẹ rẹ ame rẹ idjuvwu na de rhiephiyọ. 12 Osio na da rhọ gangan ku otọrakpọ na vwẹ ẹdẹ 40 kugbe ason 40. 13 Vwẹ edẹdẹ yena, Noa da ro evunrẹ okọ na, ọ vẹ emọ rọyen Shẹm, Ham, kugbe Jefẹt, kugbe aye rọyen vẹ eya erha rẹ emọ rọyen. 14 Ayen da ro evun rọyen, ayen vẹ keranvwe keranvwe rẹ aghwa dohwo doka rọyen, kugbe keranvwe keranvwe re dia orere dohwo doka rọyen, kugbe keranvwe keranvwe ri kpono vwẹ akpọ na dohwo doka rọyen, kugbe kemama kemama re rhan dohwo doka rọyen, kọphran kọphran, kemama kemama ro vwo ibekpe. 15 Kẹ ayen rua evunrẹ okọ na brẹ Noa ra, ivivẹ ri koka koka rẹ uvwo ro vwo ẹwẹn rẹ arhọ. 16 Ọtiọyena ayen da ruọ, te eya te eshare ri koka koka rẹ uvwo, kirobo rẹ Ọghẹnẹ vuẹrẹ. Noa vwọ ruọ nu, Jihova de bi ẹchẹ na gbe.
17 Oghwe na de ku* vwẹ ẹdẹ 40 vwẹ otọrakpọ na, ame na ko buẹnphiyọ, o de mu okọ na nẹ otọ, okọ na ko phorhẹ vwẹ enu rẹ ame ro rhurhu akpọ na. 18 Ame na da rhe vọn asan eje, jẹ o buẹnphiyọ mamọ vwẹ enu rẹ akpọ na, ẹkẹvuọvo okọ na rhe phorhẹ vwẹ enu rẹ ame na. 19 Ame na bunru mamọ vwẹ akpọ na, te asan ro de rhurhu igbenu ri kpenu eje vwẹ otọ rẹ idjuvwu na ejobi. 20 Ame na vwẹ kubit* 15 vwo kpenu vrẹ igbenu na.
21 Ọtiọyena emama ri vwo arhọ eje* re yan vwẹ otọrakpọ na de ghwu—emama re rhan, eranvwe re dia orere, eranvwe rẹ aghwa, emama itete efa re yan ẹkuẹko, kugbe ihworakpọ eje. 22 Kemu kemu rọhẹ otọ ọyaya ro vwo ẹwẹn rẹ arhọ vwẹ iwen rọyen de ghwu. 23 Ọtiọyena o de si erọnvwọn eje ri vwo arhọ nẹ otọrakpọ na, te ihworakpọ, te eranvwe, te eranvwe ri kpono, kugbe emama re rhan vwẹ irharheghe na. E si ayen eje nẹ otọrakpọ na; Noa kugbe ihwo re vẹ ọyen gba hẹ okọ na ọvo yen sivwin rhọ. 24 Ame na da je vọn otọrakpọ na vwẹ ẹdẹ 150.