Jẹnẹsis
8 Ẹkẹvuọvo Ọghẹnẹ da karophiyọ Noa vẹ eranvwe rẹ aghwa na eje kugbe eranvwe re dia orere re vẹ ọyen gba evunrẹ okọ na, Ọghẹnẹ da nẹrhẹ odju ọvo dju wan akpọ na, ame na kọ kpọ ememerha. 2 Ogbugbu rẹ ame na eje rehẹ irharheghe na vẹ ẹchẹ rẹ ame rẹ idjuvwu na da kanre, ọtiọyena osio rọ rhọ nẹ idjuvwu cha na da ka.* 3 Ame na kọ kpọ ememerha nẹ otọrakpọ na. O rhi vwo te oba rẹ ẹdẹ 150, jẹ ame na kpọre mamọ re. 4 Vwẹ emeranvwe righwrẹn, vwẹ ẹdẹ 17 rẹ emeranvwe na, okọ na da rhe domaji vwẹ enu rẹ igbenu rẹ Ararat. 5 Ame na kọ kpọ yanran ọtiọtiọyen rhirin re te emeranvwe rihwe na. Vwẹ emeranvwe rihwe na, vwẹ ẹdẹ rẹsosuọ rẹ emeranvwe na, obenu rẹ igbenu na da vwomaphia.
6 Ọtiọyena ẹdẹ 40 vwọ wan nu, Noa de rhie ovakpo ro ru phiyọ okọ na, 7 o de siobọnu okpemu; okpemu na kọ rhan yanran rhan cha bẹsiẹ rẹ ame na vwọ ya nẹ otọrakpọ na.
8 Ọke vwọ yanran na, o de siobọnu erurẹ rere ọ vwọ riẹn sẹ ame na kpọ nẹ otọ na re. 9 Erurẹ na mrẹ asan vuọvo ro funro oma rọ rhan muu, ọtiọyena o de rhivwin bro rhe kidie ame na ji rhurhu akpọ na eje. Noa da rionbọ rọyen phia, ọ da reyọ ro evunrẹ okọ na. 10 Ọ da hẹrhẹ ẹdẹ ighwrẹn efa, ọ da rhoma siobọnu erurẹ na nẹ okọ na. 11 Ọke rẹ erurẹ na vwo bro rhe vwẹ omarẹ ovwọnvwọn, ọ da mrẹ nẹ ọbe rẹ oliv rọ kọrọ nu obọ hẹ ugbunu rọyen! Ọtiọyena Noa da riẹn nẹ ame na kpọ nẹ otọrakpọ na re. 12 Ọ da rhoma hẹrhẹ ẹdẹ ighwrẹn efa. O de siobọnu erurẹ na, ẹkẹvuọvo o rhe rhivwin bro rhe ọfaa.
13 Asaọkiephana vwẹ ukpe 601, vwẹ emeranvwe rẹsosuọ, vwẹ ẹdẹ rẹsosuọ rẹ emeranvwe na, jẹ ame na kpọ nẹ otọrakpọ na re; Noa de si ẹbẹre ọvo rẹ obenu* rẹ okọ na no, ọ da mrẹ nẹ otọ na ya ememerha re. 14 Vwẹ emeranvwe rivẹ, vwẹ ẹdẹ 27 rẹ emeranvwe na, jẹ otọrakpọ na ya re.
15 Asaọkiephana Ọghẹnẹ da ta kẹ Noa: 16 “Ro otafe nẹ evunrẹ okọ na, wẹwẹ, aye wẹn, emọ wẹn kugbe eya rẹ emọ wẹn. 17 Reyọ emama ri vwo arhọ eje ri koka koka rẹ uvwo nene oma, te emama re rhan, te eranvwe na, kugbe eranvwe na eje ri kpono vwẹ otọrakpọ na, rere ayen dia buebun vwẹ akpọ na, rere ayen vwiẹ ji bunphiyọ vwẹ otọrakpọ na.”
18 Ọtiọyena Noa da ro otafe, ọ vẹ emọ rọyen, aye rọyen, kugbe eya rẹ emọ rọyen. 19 Kemama kemama ri vwo arhọ, keranvwe keranvwe ri kpono kugbe kemama kemama re rhan, erọnvwọn eje re yan vwẹ akpọ na da ro otafe nẹ okọ na dohwo dorua rọyen. 20 Ọtiọyena Noa da so agbada kẹ Jihova, ọ da reyọ evo vwẹ usun rẹ eranvwe re fonro na eje kugbe emama re rhan eje re fonro, o de ze izobo rẹ ẹtorhẹ vwẹ enu rẹ agbada na. 21 Jihova ko nyo ọnrhe ọvwevwerhen. Ọtiọyena Jihova da ta vwevunrẹ ubiudu rọyen: “Me rha cha hanrhe* otọ na fikirẹ ohworakpọ ọfaa, kidie iroro rẹ ubiudu rẹ ohworakpọ brare nẹ ọkiemọ rhe; me rha cha ghwọrọ kemu kemu ri vwo arhọ kirobo mi ruru naa. 22 Nẹ ọke nana yanran, ẹkọn vẹ evuon, ekpahen vẹ oheri, ọke uvo vẹ ọke ekpahen, kugbe ason vẹ uvo rha cha dobọji vwẹ akpọ na ọfaa.”