Jẹnẹsis
11 Asaọkiephana akpọ na eje je jẹ ephẹrẹ* ọvuọvo, ayen ji vwo oghẹre eta ọvuọvo. 2 Ayen vwo kpo ẹbẹre ọnre va nẹcha, ayen da mrẹ iyara ọvo vwẹ otọ ri Shaina, etiyin kọyen ayen dia. 3 Ọtiọyena ayen da ta kẹ ohwohwo: “Ovwan yanrhe! E jẹ avwanre ma ibriki rere avwanre vwẹ erhanre vwo ru ayen gan.” Ọtiọyena ayen da vwẹ ibriki vwo ruiruo ukperẹ ukuta, ayen da je reyọ bitumẹn vwo ru obo ra vwọ tan ayen kuẹgbe.* 4 Asaọkiephana ayen da ta: “Ovwan yanrhe! E jẹ avwanre bọn orere ọvo vwọ kẹ oma rẹ avwanre kugbe uwevwin ro kpenu rẹ enu rọyen che te obo idjuvwu na, rere avwanre vwo odẹ ro titiri, ọ rha dia ọtiọyeen, avwanre cha hra nene otọrakpọ na eje.”
5 Ọtiọyena Jihova de wontọ ra mrẹ orere na kugbe uwevwin ro kpenu rẹ emọ rẹ ihworakpọ bọnre na. 6 Jihova da ta: “Nighere! Ayen ẹko rẹ ihwo ọvo re jẹ ephẹrẹ ọvuọvo, gbe ni oborẹ ayen ruẹ na. Asaọkiephana o rhe vwo orọnvwọn vuọvo rẹ ayen vwori vwẹ ẹwẹn nẹ ayen che ru, rọ cha bẹn ayen eruoo. 7 Yanrhe! E jẹ avwanre wontọ kpo etiyin rere avwanre tighi ephẹrẹ rayen, ayen vwo jẹ ẹruọ rẹ ephẹrẹ rẹ ohwohwo evwo.” 8 Ọtiọyena Jihova da hra ayen nẹ etiyin ro otọrakpọ na eje, ememerha na ayen da dobọ rẹ ebanbọn rẹ orere na ji. 9 Kọyensorọ e vwo se Bebẹl,* kidie etiyin Jihova de tighi ephẹrẹ rẹ akpọ na eje, Jihova da hra ayen nẹ etiyin ro otọrakpọ na eje.
10 Ọnana ikuegbe ri Shẹm.
Shẹm hẹ ẹgbukpe 100 ọke ro vwo vwiẹ Apakshad, ẹgbukpe ivẹ rẹ Oghwe na vwo ku nu. 11 O vwo vwiẹ Apakshad nu, Shẹm da je dia ikpe 500. O ji vwiẹ emetẹ vẹ emeshare efa.
12 Apakshad vwọ dia te ẹgbukpe 35, o de vwiẹ Shila. 13 O vwo vwiẹ Shila nu, Apakshad da je dia ikpe 403. O ji vwiẹ emetẹ vẹ emeshare efa.
14 Shila vwọ dia te ẹgbukpe 30, o de vwiẹ Iba. 15 O vwo vwiẹ Iba nu, Shila da je dia ikpe 403. O ji vwiẹ emetẹ vẹ emeshare efa.
16 Iba vwọ dia te ẹgbukpe 34, o de vwiẹ Pilẹg. 17 O vwo vwiẹ Pilẹg nu, Iba da je dia ikpe 430. O ji vwiẹ emetẹ vẹ emeshare efa.
18 Pilẹg vwọ dia te ẹgbukpe 30, o de vwiẹ Riu. 19 O vwo vwiẹ Riu nu, Pilẹg da je dia ikpe 209. O ji vwiẹ emetẹ vẹ emeshare efa.
20 Riu vwọ dia te ẹgbukpe 32, o de vwiẹ Sirọg. 21 O vwo vwiẹ Sirọg nu, Riu da je dia ikpe 207. O ji vwiẹ emetẹ vẹ emeshare efa.
22 Sirọg vwọ dia te ẹgbukpe 30, o de vwiẹ Nehọ. 23 O vwo vwiẹ Nehọ nu, Sirọg da je dia ikpe 200. O ji vwiẹ emetẹ vẹ emeshare efa.
24 Nehọ vwọ dia te ẹgbukpe 29, o de vwiẹ Tira. 25 O vwo vwiẹ Tira nu, Nehọ da je dia ikpe 119. O ji vwiẹ emetẹ vẹ emeshare efa.
26 Tira vwọ dia te ẹgbukpe 70, o de vwiẹ Ebram, Nehọ, kugbe Heran.
27 Ọnana ikuegbe ri Tira.
Tira da rhe dia ọsẹ ri Ebram, Nehọ, kugbe Heran; Heran da rhe dia ọsẹ ri Lọt. 28 Ọke rẹ ọsẹ rọyen Tira je vwọ hẹ akpọ, Heran de ghwu vwẹ otọ re de vwiẹ, vwẹ Ọr rẹ ihwo ri Kaldia. 29 Ebram vẹ Nehọ da reyọ eya kẹ oma rayen. Odẹ rẹ aye rẹ Ebram yen Serai, odẹ rẹ aye ri Nehọ ke rha Milka, ọmọtẹ ri Heran, rọ dia ọsẹ ri Milka vẹ Iska. 30 Asaọkiephana Serai kẹ ẹgan, o vwo ọmọọ.
31 Tira da reyọ Ebram ọmọ rọyen kugbe Lọt uvwrọmọ rọyen, ọmọ ri Heran, kugbe Serai aye rẹ ọmọ rọyen, aye rẹ Ebram ọmọ rọyen, ayen de nene vrẹn nẹ Ọr rẹ ihwo ri Kaldia vwo kpo otọ ri Kenan. Ọke vwọ yanran na, ayen de rhi te Heran, etiyin kọyen ayen dia. 32 Ẹdẹ rẹ Tira dia akpọ da dia ikpe 205. Tira de ghwu vwẹ Heran.