Livitikọs

25 Vwo kpobarophiyọ, Jihova da ta kẹ Mosis vwẹ Ugbenu ri Sainai: 2 “Ta ota kẹ ihwo rẹ Izrẹl rere wọ vuẹ ayen nẹ, ‘Ọke rẹ ovwan de rhi te otọ re me cha vwọ kẹ ovwan na, otọ na ko che vwo ẹdẹ urovwoma ọvo kẹ Jihova. 3 Ovwan me kọn ubi phiyọ udju rẹ ovwan vwẹ ẹgbukpe esan, ovwan me je vwẹrote ogba rẹ ivaini rẹ ovwan vwẹ ẹgbukpe esan, ovwan mi koko emamọ rẹ otọ na. 4 Ẹkẹvuọvo vwẹ ukpe righwrẹn na, ẹdẹ urovwoma re karekare me dia vwọ kẹ otọ na, ẹdẹ urovwoma kẹ Jihova. Ovwan kọn ubi phiyọ udju rẹ ovwan yẹrẹ vwẹrote ogba rẹ ivaini rẹ ovwaan. 5 Ovwan vuẹn obo ri mu djẹ vwo nẹ eka re vun chekọ vwẹ orhọ naa, ovwan ji koko igrepu rẹ ivaini ri mu djẹ nẹ otọ na rhee. E jẹ ẹgbukpe ọvo rẹ omaerovwon re karekare dia vwọ kẹ otọ na. 6 Ẹkẹvuọvo ovwan sa riemu re djẹ vwẹ otọ na vwẹ ẹdẹ urovwoma rọyen; te ovwan te eviẹn rẹ ovwan eshare vẹ e rẹ eya, ewiowian rẹ ovwan kugbe erhorha ri nene ovwan dia sa riọ, 7 ọtiọyen ji te eranvwe re dia orere kugbe eranvwe rẹ aghwa rehẹ otọ rẹ ovwan. Ovwan sa re kemu kemu ro nẹ otọ na rhe.

8 “‘Ovwan che kere ẹdẹ urovwoma ighwrẹn rẹ ikpe, ikpe ighwrighwrẹn ako ighwrẹn, ẹdẹ urovwoma ighwrẹn rẹ ikpe na ke cha dia ikpe 49. 9 Ovwan mi hworo ọgban na gangan vwẹ emeranvwe righwrẹn na, vwẹ ẹdẹ rihwe rẹ emeranvwe na; vwẹ Ẹdẹ Arhuẹrẹ na, ovwan me nẹrhẹ e nyo edo rẹ ọgban na vwẹ otọ rẹ ovwan eje. 10 Ovwan mi ru ukpe 50 na fon ji ghwoghwo ugbomọphẹ vwẹ otọ na vwọ kẹ ihwo eje re dia evun rọyen. Ọ me dia Ukpe rẹ Ugbomọphẹ kẹ ovwan, ovwan ohwo ọvuọvo che rhivwin kpo otọ rọ riuku rọyen, ovwan ohwo ọvuọvo mi ji rhivwin bru orua rọyen ra. 11 Ukpe rẹ 50 na cha dia Ukpe rẹ Ugbomọphẹ vwọ kẹ ovwan. Ovwan cha kọn ubi yẹrẹ vun obo ri mu djẹ vwo nẹ eka re vun chekọ yẹrẹ koko igrepu rẹ ivaini ri mu djẹ nẹ otọ na rhee. 12 Kidie ọyen Ukpe rẹ Ugbomọphẹ. Ọ me dia fuanfon kẹ ovwan. Obo ri mu djẹ nẹ otọ na rhe ọvo yen ovwan sa re.

13 “‘Vwẹ Ukpe rẹ Ugbomọphẹ nana, ovwan ohwo ọvuọvo mi rhivwin kpo otọ rọ riuku rọyen. 14 Ovwan da shẹ orọnvwọn kẹ ọrivẹ rẹ ovwan yẹrẹ ovwan da dẹ mie, ovwan ghwa ohwohwo riaa. 15 Ọke ru wọ da dẹ mie ọrivẹ wẹn, wo mi roro kpahen uche ikpe re herọ siẹrẹ Ukpe rẹ Ugbomọphẹ na da wan nu, ọ me je shẹ kẹ wẹ vwo nene uche ikpe ri chekọ re vwo koko ekankọn. 16 Ikpe ri chekọ na de bun, o se phiba igho ra cha vwọ dẹ, ikpe ri chekọ na da hanvwe, o mi si nẹ igho ra cha vwọ dẹ, kidie uche ekankọn ri che nẹ otọ na rhe yen ọ shẹ na. 17 E jẹ ohwo vuọvo vwẹ usun rẹ ovwan na ghwa ọrivẹ rọyen riaa, wọ me djoshọ rẹ Ọghẹnẹ wẹn kidie Mẹvwẹ Jihova Ọghẹnẹ wẹn. 18 Ovwan da yọnrọn irhi mẹ ji ru nene orhiẹn-ebro mẹ, kẹ ovwan dia vwọrẹ ofuvwegbe vwẹ otọ na. 19 Otọ na cha vwẹ emamọ rọyen phia, kẹ ovwan cha re evun vọn je dia etiyin vwọrẹ ofuvwegbe.

20 “‘Ẹkẹvuọvo ovwan da ta: “Die yen avwanre cha re vwẹ ukpe righwrẹn na, ọ da dianẹ avwanre cha sa kọn ubi yẹrẹ koko ekankọn rẹ avwanree?” 21 Mi che siobọnu ebruphiyọ mẹ kẹ ovwan vwẹ ukpe resan na, otọ na kọ cha vwẹ ekankọn phia ro che te re vwẹ ẹgbukpe erha. 22 Ovwan cha kọn ubi vwẹ ukpe rẹrenren na, ovwan me re nẹ ekankọn awanre na bẹsiẹ rẹ ukpe rirhirin na ki te. Ovwan me re nẹ ekankọn awanre na bẹsiẹ rẹ ekankọn rọyen ke vwomaphia.

23 “‘Ovwan shẹ otọ na bẹdi bẹdẹẹ, kidie otọ na ọmẹ. Vwọ kẹ vwẹ, ovwan erhorha kugbe ihwo re dia evunrẹ otọ na. 24 Vwẹ otọ rẹ ovwan cha riuku rọyen na, ovwan mi rhie uphẹn phiyọ ra vwọ rhoma dẹ otọ na rhivwin.

25 “‘Ọ da dianẹ oniọvo wẹn rhe dia ogbere, ọ da shẹ ekuakua rọyen evo, ohwo rẹ orua rọyen rọ kẹrerẹ rọ sa tan, me rhe rhe dẹ oborẹ oniọvo rọyen shẹre na rhivwin. 26 Ọ da dianẹ ohwo vwo ohwo rọ sa taan, ẹkẹvuọvo o rhi fe ji vwo obo rọ sa vwọ tan rhivwin, 27 e jẹ o roro uche ro muru vwẹ uche ikpe rọ shẹrẹ re na rere ọ rhan uche rọ kpahenrọ na rhivwin kẹ ohwo rọ shẹrẹ kẹ. Ọke yena ko se rhivwin kpo otọ rọyen.

28 “‘Ẹkẹvuọvo o rhe vwo obo rọ sa vwọ dẹ mie rhivwiin, obo rọ shẹre na me dia obọ rẹ ohwo rọ dẹrẹ na bẹsiẹ rẹ Ukpe rẹ Ugbomọphẹ na vwo te; a me reyọ vwọ kẹ vwẹ Ukpe rẹ Ugbomọphẹ na, o mi rhivwin kpo otọ rọ riuku rọyen.

29 “‘Asaọkiephana ohwo da shẹ uwevwin rọhẹ evunrẹ orere ra gbogba riariẹ phiyọ, o che vwo uturhi rọ vwọ dẹ rhivwin bẹsiẹ ro vwo te oba rẹ ukpe na, vwo nẹ ọke rọ vwọ shẹ nu; uturhi rọ vwọ dẹ rhivwin na cha dia vwẹ ọsoso rẹ ẹgbukpe ọvo. 30 Ẹkẹvuọvo ọ rha sa dẹ rhivwin vwẹ oba rẹ ẹgbukpe ọvoo, uwevwin rọhẹ evunrẹ orere ra gbogba riariẹ phiyọ na kọ cha dia ọ rẹ ohwo rọ dẹrẹ na bẹdẹ vwẹ uvwiẹ rọyen eje. E che siobọno vwẹ Ukpe rẹ Ugbomọphẹ naa. 31 Ẹkẹvuọvo e jẹ e ni iwevwin rehẹ asan rẹ ihwo dia ra gbogba riariẹ phiyọọ kerẹ ẹbẹre ọvo rẹ udju rẹ eko na. Uturhi ra vwọ dẹ rhivwin me dia, e mi ji siobọno vwẹ Ukpe rẹ Ugbomọphẹ na.

32 “‘Vwọ kẹ iwevwin rẹ ihwo ri Livae rehẹ evunrẹ irere rayen, ihwo ri Livae na che vwo uturhi ri bẹdi bẹdẹ ra vwọ dẹ ayen rhivwin. 33 A rha dẹ uwevwin rẹ ihwo ri Livae na rhivwiin, uwevwin rayen rẹ ayen shẹre vwevunrẹ orere na, e ji che siobọno vwẹ Ukpe rẹ Ugbomọphẹ na, kidie iwevwin rẹ ihwo ri Livae na rehẹ evunrẹ orere na, eyen ekuakua rayen vwẹ ohri rẹ ihwo rẹ Izrẹl. 34 Vwo kpobarophiyọ, a shẹ udju rẹ eranvwe da ria odin rọ riariẹ irere rayen phiyọọ, kidie ọyen ughwẹ rayen ri bẹdẹ.

35 “‘Ọ da dianẹ oniọvo wẹn rọ dia kẹrẹ owẹ rhe dia ogbere, ọ rha sa vwẹrote oma rọyeen, wọ me vwẹ ukẹcha kẹ kirobo ru wo che ru kẹ ọrhorha vẹ ohwo rọ dia otọ rẹ ovwan, rere ọ vẹ owẹ sa vwọ rhọ. 36 Wo suẹn oborẹ wo momo kẹ yẹrẹ reyọ vwọ mrẹ ereree. Wọ me djoshọ rẹ Ọghẹnẹ wẹn, wẹ vẹ oniọvo wẹn ke sa rhọ. 37 Wo suẹn igho ru wo momo kẹ yẹrẹ mrẹ erere vwo nẹ emuọre ru wọ vwọ kẹẹ. 38 Mẹvwẹ Jihova Ọghẹnẹ rẹ ovwan, rọ reyọ ovwan nẹ otọ rẹ Ijipt rhe, rere me vwọ vwẹ otọ ri Kenan kẹ ovwan, ji dje kẹ ovwan nẹ mẹvwẹ Ọghẹnẹ rẹ ovwan.

39 “‘Ọ da dianẹ oniọvo wẹn rọ dia kẹrẹ owẹ rhe dia ogbere, ọ da shẹ oma rọyen kẹ wẹ, wọ gba vwo ruiruo rẹ ọviẹẹn. 40 Wo mi nene yerin kerẹ ọwiowian ra reyọ phiyọ iruo, kerẹ ohwo rọ dia otọ na. E jẹ ọ ga wẹ re te Ukpe rẹ Ugbomọphẹ na. 41 Kọ cha yanjẹ uwe vwo, ọ vẹ emọ* rọyen re vẹ ọyen gba herọ, o mi rhivwin bru orua rọyen ra. O che rhivwin kpo otọ rẹ esẹ rọyen ride. 42 Kidie ayen eviẹn mẹ re me reyọ nẹ otọ rẹ Ijipt rhe. E jẹ ayen shẹ oma rayen kirobo ra shẹ ọviẹẹn. 43 Wọ vwẹ oja riọọ, wọ me djoshọ rẹ Ọghẹnẹ wẹn. 44 Eviẹn wẹn rẹ eshare vẹ eya mi nẹ ẹgborho re riariẹ ovwan phiyọ rhe, ovwan sa dẹ ọviẹn rẹ aye yẹrẹ ọshare mie ayen. 45 Ovwan da dẹ eviẹn mie emọ rẹ erhorha ri nene ovwan dia na, ovwan sa dẹ mie ayen vẹ ihwo rẹ orua rayen re vwiẹ kẹ ayen vwẹ otọ rẹ ovwan, ayen me dia e rẹ ovwan. 46 Ovwan sa yanjẹ ayen vwo kẹ emọ rẹ ovwan rere ayen vwẹ ayen riuku kerẹ ughwẹ ri bẹdẹ. Ovwan sa reyọ iniọvo rẹ ovwan re dia ihwo rẹ Izrẹl vwo ru ewiowian, ẹkẹvuọvo ovwan gboja kẹ ayeen.

47 “‘Ẹkẹvuọvo ọrhorha yẹrẹ ohwo rọ dia ohri rẹ ovwan de rhi fe, oniọvo rẹ ovwan kọ rhe dia ogbere vwẹ ọke vuọvo na, ọ da shẹ oma rọyen kẹ ọrhorha yẹrẹ ohwo rọ dia ohri rẹ ovwan na, yẹrẹ vwọ kẹ ọvo vwẹ usun rẹ ihwo rẹ orua rẹ ọrhorha na, 48 o ji che vwo uturhi rọ sa vwọ tan oma rọyen hirhe siẹrẹ ọ da shẹ oma rọyen nu. Ọvo vwẹ usun rẹ iniọvo rọyen sa dẹ rhivwin, 49 yẹrẹ oniọvo rẹ ọsẹ rọyen rẹ ọshare yẹrẹ ọmọ rẹ oniọvo rẹ ọsẹ rọyen sa dẹ rhivwin, yẹrẹ oniọvo* rọyen ọfa rọ kẹrerẹ, ọvo vwẹ usun rẹ ihwo rẹ orua rọyen sa dẹ rhivwin.

“‘Yẹrẹ ọyen komobọ de rhi fe, ọ je sa dẹ oma rọyen rhivwin. 50 Ọ vẹ ohwo rọ dẹrẹ na mi roro uchọke rọ rorọ vwo nẹ ọke rọ vwọ shẹ oma rọyen kẹ re te Ukpe rẹ Ugbomọphẹ na, igho ra shẹrẹ na vẹ uche ikpe na me dia abavo. Uche igho ra hwa kẹ ọwiowian ra reyọ phiyọ iruo yen e che ni vwọ fuẹrẹn ẹdẹ rẹ iruo rọyen vwẹ uvwre rẹ ọke yena. 51 Ikpe ri chekọ na de bun, e jẹ ọ hwa uche igho ra cha vwọ dẹ rhivwin na vwo nene uche ikpe ri chekọ. 52 Ẹkẹvuọvo ọ da dianẹ ikpe ri chekọ tavwen e ki rhi te Ukpe rẹ Ugbomọphẹ na bunruu, e gbe jẹ ọyen komobọ roro rere ọ hwa igho ra cha vwọ dẹ rhivwin na vwo nene uche ikpe ri chekọ. 53 E jẹ ọ rha ga onini rọyen nẹ ukpe ra ro ukpe kerẹ ọwiowian ra reyọ phiyọ iruo; ovwan mi vwo imuẹro nẹ o gboja kẹẹ. 54 Ẹkẹvuọvo ọ rha sa dẹ oma rọyen rhivwin vwo nene obo ra tare naa, e che siobọno vwẹ Ukpe rẹ Ugbomọphẹ na, ọ vẹ emọ* rọyen re vẹ ọyen gba herọ.

55 “‘Kidie ihwo rẹ Izrẹl eyen eviẹn romobọ mẹ. Ayen eviẹn mẹ re me reyọ nẹ otọ rẹ Ijipt rhe. Mẹvwẹ Jihova Ọghẹnẹ rẹ ovwan.