Livitikọs

26 “‘Ovwan ma eghẹnẹ ifefe vwọ kẹ oma rẹ ovwaan, ovwan je vwẹ oma ra kare yẹrẹ uchivwo rẹ ẹga vwo viẹ vwọ kẹ oma rẹ ovwaan, ovwan phiẹ orọnvwọn ra vwẹ ukuta vwọ kare phiyọ otọ rẹ ovwan rere ovwan vwẹ uyovwin kpotọ kẹẹ; kidie mẹvwẹ Jihova Ọghẹnẹ rẹ ovwan. 2 Ovwan sẹro rẹ Ẹdẹ Urovwoma mẹ, ovwan ji muọghọ kẹ* asan ọfuanfon mẹ. Mẹvwẹ Jihova.

3 “‘Ovwan da vwẹ ọkieje vwo nene irhi mẹ, sẹro rẹ iji mẹ, ji ru nene ayen, 4 ke me cha kẹ ovwan osio vwẹ ọke ro fori, otọ na kọ cha vwẹ emu rọyen phia, irhe rẹ udju na ke cha vwẹ emamọ rayen vwọ phia. 5 Ovwan che wonro ibi ekankọn rhirin re te ọke rẹ orhọ rẹ igrepu rẹ ovwan, orhọ rẹ igrepu rẹ ovwan cha dia re te ọke rẹ ovwan vwọ kọn ekankọn; kẹ ovwan cha re ibrẹdi* rẹ ovwan vọn evun je dia vwọrẹ ofuvwegbe vwẹ otọ rẹ ovwan. 6 Mi che phi ufuoma phiyọ otọ na, o vwo ohwo vuọvo rọ cha nẹrhẹ oshọ mu ovwan ọke rẹ ovwan de sherhẹn totọọ; ki mi che si eranvwe rẹ aghwa re djoma nẹ otọ na, ọlọkọ rẹ ofovwin vuọvo cha wan otọ rẹ ovwan vrẹẹ. 7 Ovwan cha vwọtua ivwighrẹn rẹ ovwan, ovwan cha vwẹ ọlọkọ vwọ nyavwe ayen hwe vwẹ obaro rẹ ovwan. 8 Ovwan ihwo iyorin cha vwọtua 100, ovwan ihwo 100 cha vwọtua 10,000, ovwan cha vwẹ ọlọkọ vwọ nyavwe ivwighrẹn rẹ ovwan hwe vwẹ obaro rẹ ovwan.

9 “‘Mi che dje ẹroesiri mẹ kẹ* ovwan, me cha nẹrhẹ ovwan vwiẹ ji bunphiyọ, me je cha sẹro rẹ ọphọ re me vẹ ovwan rere. 10 Ovwan je vwọ ria emamọ awanre rẹ ukpe rọ wanre na, kẹ ovwan cha ghwẹ e rẹ awanre na no rere ovwan mrẹ asan ghwẹ ekpokpọ phiyọ. 11 Mi che mu itabanako mẹ phiyọ ohri rẹ ovwan, me* cha sen ovwaan. 12 Me cha yan vwẹ ohri rẹ ovwan je dia Ọghẹnẹ rẹ ovwan, vwọ kẹ ovwan, ovwan cha dia ihwo mẹ. 13 Mẹvwẹ Jihova Ọghẹnẹ rẹ ovwan, rọ reyọ ovwan nẹ otọ rẹ Ijipt rhe rere ovwan vwo jẹ eviẹn rayen ẹdia ọfa, mi vwirhin urhekpe rẹ ovwan, me da nẹrhẹ ovwan yan vẹ uyovwin ra kpare kpenu.

14 “‘Ẹkẹvuọvo ovwan rha kerhọ mẹ yẹrẹ sẹro rẹ iji nana ejee, 15 ovwan da sen irhi mẹ, ovwan de ji vwo utuoma kpahen orhiẹn-ebro mẹ, rere ovwan vwo jẹ iji mẹ eje enene, ovwan de ji gbe ọphọ mẹ ẹgua, 16 vwọ kẹ vwẹ, enẹ yen mi che ru ovwan: Me cha vwẹ ukpokpogho vwo gboja kẹ ovwan, ọtiọyen ji te owọnrhe ọgangan* kugbe odo ọgangan, e cha nẹrhẹ ẹro rẹ ovwan she divwin je nẹrhẹ arhọ rẹ ovwan ghwọrọ kufia. Ovwan cha kọn ubi rẹ ovwan kufia, kidie ivwighrẹn rẹ ovwan cha re ayen. 17 Me cha vwọso ovwan, ivwighrẹn rẹ ovwan che phi ovwan kparobọ; ihwo ri vwo utuoma kpahen ovwan ki che chiyin ovwan muotọ, ovwan cha djẹ jẹ ohwo vuọvo vwọtua ovwaan.

18 “‘Ọnana rha je nẹrhẹ ovwan kerhọ mẹẹ, ke me cha vwẹ ọghwọku ọgangan vwọ ke ovwan abọ ighwrẹn vwo nene oborẹ imwemwu rẹ ovwan hepha. 19 Me cha nẹrhẹ ovwan dobọ rẹ udu ọgangan vẹ omaẹkparọ rẹ ovwan ji, je nẹrhẹ idjuvwu rẹ ovwan dia kerẹ utehru, otọrakpọ rẹ ovwan kerẹ ẹrovwo. 20 Ovwan cha vwẹ ẹgba rẹ ovwan vwọ wian kufia kidie otọ rẹ ovwan cha vwẹ emu phiaa, irhe rẹ otọ na je cha mọ emamọọ.

21 “‘Ẹkẹvuọvo ovwan da vwọso ovwẹ je sen nẹ ovwan cha kerhọ mẹẹ, ke me cha ghwiẹ ovwan abọ ighwrẹn, vwo nene oborẹ imwemwu rẹ ovwan bun te. 22 Mi che ji eranvwe rẹ aghwa rẹ udju na ro ohri rẹ ovwan, kẹ ayen cha nẹrhẹ emọ rẹ ovwan ghwu va ovwan abọ, kẹ ayen che hwe eranvwe rẹ ovwan re dia orere, ji si unu rẹ ihwo rẹ ovwan kpotọ, ke che chojojo mrẹ ihwo vwẹ idjerhe rẹ ovwan.

23 “‘Enana da phia jẹ ovwan je rhọnvwe rhiabọreyọ ọkpọvi mẹẹ, ovwan da je vwọso ovwẹ, 24 ke me je cha vwọso ovwan, mẹvwẹ komobọ cha ghwiẹ ovwan abọ ighwrẹn fikirẹ imwemwu rẹ ovwan. 25 Ke me cha vwẹ ọlọkọ rẹ orukeri vwọ rhe enu rẹ ovwan fikirẹ ọphọ mẹ rẹ ovwan gbeku. Ovwan de si oma rẹ ovwan koko ro irere rẹ ovwan, mi che ji ọga ro ohri rẹ ovwan, kẹ ovwan che she ro abọ rẹ ọvweghrẹn. 26 Me da ghwọrọ asan rẹ ibrẹdi* rẹ ovwan nẹ cha, eya ihwe ki se ru ibrẹdi rẹ ovwan vwẹ ovunu ọvo, ayen me ghare ibrẹdi rẹ ovwan vwo nene ọnyẹ rọyen; kẹ ovwan cha re ẹkẹvuọvo evun cha vọn ovwaan.

27 “‘Ọnana da phia nu, jẹ ovwan je rhọnvwe kerhọ mẹẹ, ovwan de ji ru udu gangan vwọso ovwẹ, 28 ke me cha vwọso ovwan ganphiyọ, mẹvwẹ komobọ cha ghwọku ovwan abọ ighwrẹn fikirẹ imwemwu rẹ ovwan. 29 Kẹ ovwan cha re uvwo rẹ emeshare rẹ ovwan, ovwan me je re uvwo rẹ emetẹ rẹ ovwan. 30 Me cha ghwọrọ asan ri kpenu rẹ ovwan da ga ẹga je nyavwe asan rẹ ovwan da torhẹ insẹnsi she, mi che koko irivwin rẹ ovwan phiyọ enu rẹ irivwin rẹ ema rẹ ovwan ri tuoma na,* ki mi che chukoku ovwan kidie ovwan tun vwẹ oma. 31 Me cha vwẹ irere rẹ ovwan vwọ kpahotọ kẹ ọlọkọ je ghwọrọ asan efuanfon rẹ ovwan, mi rhe che nyo ọnrhe ọvwevwerhen rẹ izobo rẹ ovwaan. 32 Mẹvwẹ komobọ cha nẹrhẹ otọ na dia ofefe, ivwighrẹn wẹn re dia otọ na ke cha tẹnrovio vwọrẹ igbevwunu. 33 Me cha hra ovwan nene ẹgborho na, mi che yoro ọlọkọ phia vwọtua ovwan; otọ rẹ ovwan cha dia ofefe, irere rẹ ovwan ke cha ghwọrọ kufia.

34 “‘Otọ na cha hwosa rẹ ẹdẹ urovwoma rọyen vwẹ ẹdẹ na eje rọ cha vwọ dia ofefe na, ọke rẹ ovwan dahẹ otọ rẹ ivwighrẹn rẹ ovwan. Ọke yena otọ na ko che rovwoma, kidie o che jẹ osa rẹ ẹdẹ urovwoma rọyen ẹhwaa. 35 Vwẹ ẹdẹ na eje rọ vwọ dia ofefe na, ko che rovwoma, kidie o rovwoma vwẹ ẹdẹ urovwoma rẹ ovwan ọke rẹ ovwan vwọ dia evun rọyeen.

36 “‘Vwọ kẹ ihwo ri sivwin rhọ, me cha nẹrhẹ oshọ vọn ubiudu rayen vwẹ otọ rẹ ivwighrẹn rayen; edo rẹ ẹbe rẹ odju muẹ cha nẹrhẹ ayen djẹ, kẹ ayen cha djẹ kerẹ ohwo rọ djẹ kẹ ọlọkọ, ayen mi she jẹ ohwo vuọvo vwọtua ayeen. 37 Ayen che she teyen enu rẹ ohwohwo kerẹ ihwo re djẹ kẹ ọlọkọ, dede nẹ ohwo vuọvo vwọtua ayeen. Ovwan che se mudia vwọso ivwighrẹn rẹ ovwaan. 38 Ovwan che ghwu vwẹ ohri rẹ ẹgborho na, otọ rẹ ivwighrẹn rẹ ovwan ko mu ovwan rọ. 39 A cha yanjẹ ovwan ri chekọ na vwo rere ovwan rioja* vwẹ etọ rẹ ivwighrẹn rẹ ovwan fikirẹ oruchọ rẹ ovwan. E, ayen cha rioja* fikirẹ oruchọ rẹ esẹ rayen. 40 Kẹ ayen cha fan oruchọ romobọ rayen kugbe oruchọ vẹ jẹ evun ẹfuọn rẹ esẹ rayen, ayen me rhọnvwe nẹ ayen fuevuun womarẹ ayen vwọ reyọ vwọso ovwẹ. 41 Me da je vwọso ayen womarẹ me vwọ reyọ ayen kpo otọ rẹ ivwighrẹn rayen.

“‘Ọkiọvo ubiudu rayen ra yanvweree* na kọ cha vwomakpotọ, ọke yena kẹ ayen cha hwosa rẹ oruchọ rayen. 42 Me cha karophiyọ ọphọ re me vẹ Jekọp rere, kugbe ọphọ re me vẹ Aizik rere, me cha karophiyọ ọphọ re me vẹ Ebraham rere, me je cha karophiyọ otọ na. 43 Ọke rẹ ayen vwo gbobọnyẹ otọ na, ọ hwosa rẹ ẹdẹ urovwoma rọyen, ọ je dia ofefe ọke rẹ ayen vwo vrẹn no, kẹ ayen hwosa rẹ oruchọ rayen, kidie ayen sen orhiẹn-ebro mẹ, ayen* de ji vwo utuoma kpahen irhi mẹ. 44 Dede nẹ ọ dia ọtiọyen ọke rẹ ayen vwọ hẹ otọ rẹ ivwighrẹn rayen na, me cha sen ayen karekare yẹrẹ kpairoro vrẹ ayen te ẹdia re me da ghwọrọ ayen rere mi gbe ọphọ re me vẹ ayen rere ẹguaa, kidie mẹvwẹ Jihova Ọghẹnẹ rayen. 45 Fikirẹ ayen, me cha karophiyọ ọphọ re me vẹ esẹ rayen ride rere, ihwo re me reyọ vwo nẹ otọ rẹ Ijipt rhe vwẹ irharo rẹ ẹgborho na, rere mi se vwo dje oma mẹ phia kerẹ Ọghẹnẹ rayen. Mẹvwẹ Jihova.’”

46 Enana yen iji, orhiẹn-ebro, kugbe irhi rẹ Jihova vwo mu vwẹ uvwre rọyen vẹ ihwo rẹ Izrẹl vwẹ Ugbenu ri Sainai womarẹ Mosis.