Livitikọs

27 Jihova da rhoma ta ota kẹ Mosis, ọ da ta: 2 “Ta ota kẹ ihwo rẹ Izrẹl rere wọ vuẹ ayen nẹ, ‘Ohwo de ve ive rẹ oghẹresan rọ vwọ vwẹ unu igho re rorori nẹ ohworakpọ* muru vwọ kpahotọ kẹ Jihova, 3 unu igho re rorori nẹ ọshare rọhẹ uvwre rẹ ẹgbukpe 20 fiẹ 60 muru cha dia shẹkẹl* 50 rẹ idọnọ efuanfon vwo nene uwan ri shẹkẹl rẹ asan ọfuanfon na.* 4 Ẹkẹvuọvo ọ da dia aye, unu igho re rorori na cha dia shẹkẹl 30. 5 Ikpe rọyen da dia ẹgbukpe 5 fiẹ 20, unu igho re rorori vwọ kẹ ọshare na cha dia 20, ọ rẹ aye na me rha dia shẹkẹl 10. 6 Ọ da dia ọmọ rẹ emeranvwe ọvo fiẹ ẹgbukpe iyorin, unu igho re rorori vwọ kẹ ọmọshare na me dia shẹkẹl rẹ idọnọ efuanfon iyorin, ọ rẹ ọmọtẹ na me rha dia shẹkẹl rẹ idọnọ efuanfon erha.

7 “‘Ikpe rọyen da dia 60 je vrẹ ọtiọyen re, unu igho re rorori na cha dia shẹkẹl 15 vwọ kẹ ọshare na kugbe shẹkẹl 10 vwọ kẹ aye na. 8 Ẹkẹvuọvo ọ da dia ogbere te asan ọ rha sa hwa uchunu igho re rorori naa, ohwo na ko che mudia obaro rẹ orherẹn na, orherẹn na kọ cha vuẹ obo rọ cha hwa. Orherẹn na cha vuẹ obo rọ cha hwa vwo nene oborẹ ohwo ro ve ive na sa hwa.

9 “‘Ọ da dianẹ ive na churobọ si eranvwe re se vwo ze izobo kẹ Jihova, kemu kemu ra cha vwọ kẹ Jihova me dia obo re fonro. 10 Ọ cha sa vwẹ eranvwe ro yovwirin vwo wene ọ rọ dọnre yẹrẹ vwẹ ọ rọ dọnre vwo wene ọ ro yovwiriin, ẹkẹvuọvo ọ da vwẹ eranvwe ọvo vwo wene ọfa, ọrẹsosuọ na vẹ ọ re vwo wene na cha dia obo re fonro. 11 Ọ da dia eranvwe ro jẹfuọn ra cha sa vwọ kpahotọ kerẹ izobo vwọ kẹ Jihovaa, kọ cha vwẹ eranvwe na vwo mudia obaro rẹ orherẹn na. 12 Orherẹn na kọ cha vuẹ obo rọ cha hwa vwo nene oborẹ eranvwe na hepha sẹ o yovwirin yẹrẹ ọ dọnre. Unu igho rẹ orherẹn na rorori yen ọ cha hwa. 13 Ẹkẹvuọvo ọ da guọnọ dẹ rhivwin, kọ vwẹ ẹkẹn ọvo rẹ ẹkẹn iyorin rọyen vwọ ba unu igho ro muru na.

14 “‘Asaọkiephana ohwo da vwẹ uwevwin rọyen vwọ kpahotọ kerẹ orọnvwọn rọ pha fuanfon vwọ kẹ Jihova, orherẹn na kọ vuẹ obo rọ cha hwa owenẹ ọ dia ọ ro yovwirin yẹrẹ ọ ro miovwirin. Oborẹ orherẹn na vuẹrẹ yen ọ cha hwa. 15 Ẹkẹvuọvo ọ da dianẹ ohwo rọ vwẹ uwevwin rọyen vwọ kpahotọ na guọnọ dẹ rhivwin, ọ me vwẹ ẹkẹn ọvo rẹ ẹkẹn iyorin rẹ igho na vwọ ba unu igho re rorori na, kọ cha dia ọrọyen.

16 “‘Ohwo da vwẹ ẹbẹre ọvo rẹ udju rọ riuku rọyen vwọ kpahotọ kẹ Jihova, a cha vwẹ uche ibi ra sa kọn phiyọ vwo roro unu igho ro muru; homa* ọvo rẹ ibi rẹ ibali cha dia shẹkẹl 50 rẹ idọnọ efuanfon. 17 Ọ da vwẹ udju rọyen vwọ kpahotọ vwẹ Ukpe rẹ Ugbomọphẹ na, unu igho re rorori na che wenee. 18 Ọ da vwẹ udju rọyen vwọ kpahotọ ọke rẹ Ukpe rẹ Ugbomọphẹ na da wan nu, orherẹn na ko che roro uchunu rọyen vwọ kẹ vwo nene uche ikpe ri chekọ tavwen a ke mrẹ ukpe rẹ Ugbomọphẹ rọ vwọ kpahen ọyena, e mi ji si nẹ unu igho ro muru na. 19 Ẹkẹvuọvo ọ da dianẹ ohwo rọ vwerọ kpahotọ na dẹrẹ rhivwin, ọ me vwẹ ẹkẹn ọvo rẹ ẹkẹn iyorin rẹ igho na vwọ ba unu igho re rorori na, kọ cha dia ọrọyen. 20 Asaọkiephana ọ da dianẹ ọ rha dẹ udju na rhivwiin, a da shẹ udju na vwọ kẹ ohwo ọfa, ọ rha cha sa dẹ rhivwiin. 21 Ọke re de siobọnu udju na vwẹ Ukpe rẹ Ugbomọphẹ na, kọ cha dia orọnvwọn rọ pha fuanfon vwọ kẹ Jihova, kerẹ udju ra vwọ kpahotọ kẹ. Kọ cha dia ọ rẹ irherẹn na.

22 “‘Ọ da dianẹ ohwo vwẹ udju rọ dẹre rọhẹ usun rẹ ekuakua rọ riuku rọyeen vwọ kpahotọ kẹ Jihova, 23 orherẹn na che roro uchunu rọyen re te ukpe rẹ Ugbomọphẹ na vwọ kẹ, kọ cha vwẹ unu igho re rorori na vwọ kpahotọ vwẹ ẹdẹ yena. Ọyen orọnvwọn rọ pha fuanfon vwọ kẹ Jihova. 24 Vwẹ Ukpe rẹ Ugbomọphẹ na, udju na che rhivwin bru ohwo rọ dẹrẹ mie na, ohwo ro vwo otọ na.

25 “‘Uwan ri shẹkẹl rẹ asan ọfuanfon na yen a cha vwọ vwanvwe uwan ri kemu kemu. Shẹkẹl na me dia igira* 20.

26 “‘Ẹkẹvuọvo e jẹ ohwo vuọvo vwẹ ọmọkpako rẹ eranvwe kpahotọọ, kidie e vwiẹrẹ kerẹ ọmọkpako vwọ kẹ Jihova. Owenẹ ọ dia erhuẹn yẹrẹ ogodẹ, ọ dia ọ ri Jihova nure. 27 Ọ dahẹ usun rẹ eranvwe ri jẹfuọn na, ọ da je tan hirhe vwo nene unu igho re rorori, ọ me vwẹ ẹkẹn ọvo rẹ ẹkẹn iyorin rọyen vwọ ba. Ẹkẹvuọvo ọ rha dẹ rhivwiin, ka shẹ vwo nene unu igho re rorori na.

28 “‘Ẹkẹvuọvo o vwo orọnvwọn vuọvo rẹ ohwo vwọ kpahotọ karekare* vwọ kẹ Jihova vwẹ usun rẹ erọnvwọn ro vwori ra sa shẹ yẹrẹ dẹ rhivwiin, owenẹ ọ dia ohworakpọ yẹrẹ eranvwe yẹrẹ udju rọ riuku rọyen. Kemu kemu ra vwọ kpahotọ, ọyen orọnvwọn rọ ma fon vwọ kẹ Jihova. 29 Kpobarophiyọ, e jẹ a tan ohwo vuọvo re brorhiẹn hwe ra vwọ kpahotọ vwọ kẹ oghwọrọ hirhee. O vwo obo rọ wanree, e jẹ a teyọn hwe.

30 “‘Ẹkẹn ọvo rẹ ẹkẹn ihwe eje rẹ otọ na, owenẹ ọ dia obo ri nẹ ekankọn rẹ udju na yẹrẹ emamọ rẹ irhe na rhe, ọ ri Jihova. Ọyen orọnvwọn rọ fonro vwọ kẹ Jihova. 31 Ohwo da guọnọ dẹ ọvo vwẹ usun rẹ ẹkẹn ọvo rẹ ẹkẹn ihwe rọyen rhivwin, e jẹ ọ vwẹ ẹkẹn ọvo rẹ ẹkẹn iyorin rọyen vwọ ba. 32 Vwọ kẹ ẹkẹn ọvo rẹ ẹkẹn ihwe eje rẹ erhuẹn vẹ igodẹ kugbe ẹvwe na, erọnvwọn eje re wan obotọ rẹ ọkpọ rẹ osuigodẹ na, ẹkẹn ọvo rẹ ẹkẹn ihwe rẹ eranvwe* na me dia orọnvwọn rọ fonro vwọ kẹ Jihova. 33 E jẹ ọ fuẹrẹn sẹ o yovwirin yẹrẹ ọ dọnree, o ji wenee. Ẹkẹvuọvo ọ da davwẹngba ro vwo wene, ọrẹsosuọ na vẹ ọ re vwo wene na me dia obo re fonro. Ọ rha cha sa dẹ rhivwiin.’”

34 Enana yen iji rẹ Jihova vwọ kẹ Mosis nẹ ọ vwọ kẹ ihwo rẹ Izrẹl vwẹ Ugbenu ri Sainai.