Livitikọs

6 Jihova da ta kẹ Mosis: 2 “Ohwo* de ru umwemwu, o de ji jẹ evun ẹfuọn kpahen Jihova womarẹ ọ vwọ phiẹn ọrivẹ rọyen vwọ kpahen orọnvwọn ra vwọ kẹ yọnre, yẹrẹ orọnvwọn ra vwọ kẹ nẹ ọ sẹro rọyen, yẹrẹ o de gborho ọrivẹ rọyen yẹrẹ kọ ghwa rọ re, 3 yẹrẹ kọ mrẹ orọnvwọn ro ghwruru, o de gun efian kpahọn, o de ji duvwun iyorin rẹ efian kpahen ọvo vwẹ usun rẹ imwemwu tiọyena ro ruru, ọnana yen obo ro che ru: 4 Ọ da dianẹ o ru umwemwu, ọ da je riabe, kọ vwẹ obo ro chori rhivwin, obo ro gborhori, obo rọ vwẹ ọghware vwọ reyọ, obo ra vwọ kẹ yọnre, yẹrẹ orọnvwọn ro ghwruru rọ mrẹre, 5 yẹrẹ kemu kemu ro duvwun iyorin rẹ efian kpahen na, kọ hwosa rọyen vọnvọn, kọ vwẹ ẹkẹn ọvo rẹ ẹkẹn iyorin rọyen vwọ ba. Ọ cha vwọ kẹ ohwo ro vworo vwẹ ẹdẹ re djerephia nẹ ọ riabe na. 6 Ọ cha reyọ egbon rẹ oma rọyen gbare vwo nẹ ichuru rọyen vwo rhe orherẹn na kerẹ izobo rẹ abe rọyen vwọ kẹ Jihova, vwo nene obo re roro iwan na phiyọ vwọ kẹ izobo rẹ abe. 7 Orherẹn na ko ru arhuẹrẹ kẹ vwẹ obaro ri Jihova, ke vwo ghovwo kemu kemu ro ruru rọ nẹrhẹ ọ riabe na.”

8 Jihova da je ta kẹ Mosis nẹ: 9 “Vwẹ iji kẹ Erọn vẹ emọ rọyen nẹ, ‘Ọnana yen urhi rẹ izobo rẹ ẹtorhẹ na: Izobo rẹ ẹtorhẹ na cha dia enu rẹ erhanre na vwẹ enu rẹ agbada na vwẹ ason na eje re te urhiọke, erhanre na kọ cha rha la vwẹ enu rẹ agbada na. 10 Orherẹn na che ku ewun rọyen ra vwẹ amwa oyoyovwin vwo ru na phiyọ, ko che ku iwun rẹ agada* ra vwẹ amwa oyoyovwin vwo ru na phiyọ vwo rhurhu oma rọyen. Kọ cha ghwẹ iwurhie* rẹ izobo rẹ ẹtorhẹ rẹ erhanre na torhẹre vwẹ agbada na no, ko che ku ayen phiyọ orhoma rẹ agbada na. 11 Ko che ku iwun rọyen nu, o mi ku iwun efa phiyọ, ọ me ghwẹ iwurhie na kpo asan rọ fonro vwẹ otafe rẹ asan rẹ ayen wonphiyọ* na. 12 Erhanre na kọ cha rha la vwẹ enu rẹ agbada na, o che fuun. Orherẹn na me torhẹ irhe vwẹ enu rọyen kurhiọke kurhiọke, ọ me rhuẹrẹ izobo rẹ ẹtorhẹ na phiyọ enu rọyen, ọ me nẹrhẹ ivwri rẹ izobo rẹ ọrekugbe na bru ivwirhi vwẹ enu rọyen. 13 Erhanre me rha la vwẹ enu rẹ agbada na ọkieje. E jẹ o fuẹẹn.

14 “‘Asaọkiephana, ọnana yen urhi rẹ izobo rẹ eka na: Ovwan re dia emọ rẹ Erọn me vwọ kpahotọ vwẹ obaro ri Jihova, vwẹ obaro rẹ agbada na. 15 Ọvo vwẹ usun rayen me ghwẹ obọ rọyen vọn vẹ omamọ rẹ flawa rẹ izobo rẹ eka na kugbe evo vwẹ usun rẹ evwri rọyen vẹ ifrankisẹnsi na eje rehẹ enu rẹ izobo rẹ eka na, ọ me nẹrhẹ o bru ivwirhi vwẹ enu rẹ agbada na kerẹ ọnrhe ọvwevwerhen, rọ vwọ dia ẹkẹn rẹ ẹkarophiyọ kẹ Jihova. 16 Erọn vẹ emọ rọyen cha re obo ri chekọ vwọ. A me riọ kerẹ ibrẹdi ro jephuo vwẹ asan ọfuanfon. Ayen cha riọ vwevunrẹ otegodo rẹ utughẹ ra da vwoma na. 17 E jẹ a vwẹ orọnvwọn vuọvo ro vwo iphuephu* vwọ ba kakọọ. Me vwerọ kẹ ayen kerẹ ẹkẹn rayen vwo nẹ izobo mẹ ra vwẹ erhanre torhẹ. Ọyen orọnvwọn rọ ma fon, kerẹ izobo rẹ umwemwu na kugbe izobo rẹ abe na. 18 Kọshare kọshare vwẹ usun rẹ emọ rẹ Erọn cha riọ. Ọyen ẹkẹn rayen ri bẹdẹ vwẹ uvwiẹ rẹ ovwan eje, vwo nẹ izobo ri Jihova ra vwẹ erhanre torhẹ. Kemu kemu ro te ayen* kọ dia fuanfon.’”

19 Jihova da rhoma ta kẹ Mosis: 20 “Ọnana yen izobo rẹ Erọn vẹ emọ rọyen cha vwọ kpahotọ kẹ Jihova vwẹ ẹdẹ ra reyerọ vwo mu: ẹkẹn ọvo rẹ ẹkẹn ihwe rẹ ifah* rẹ omamọ rẹ iflawa kerẹ izobo rẹ eka rẹ ọkieje, ubro rọyen vwẹ urhiọke, ubro rọyen vwẹ ovwọnvwọn. 21 A me vwẹ evwri vwo ruo vwevunrẹ omoze re muẹ kpahan erhanre. Wọ me nabọ vwẹ evwri vwọ gua tavwen wọ ke reyọ rhe, wọ me vwọ kpahotọ ibribro kerẹ orọnvwọn ra kakere vwevunrẹ ovunu kerẹ ọnrhe ọvwevwerhen kẹ Jihova. 22 Orherẹn re vwo mu rọ reyọ ẹdia rọyen vwẹ usun rẹ emọ rọyen yen che ruo. Ọyen urhi ri bẹdẹ: E che ruo rere o bru ivwirhi kẹ Jihova kerẹ izobo ọsoso. 23 Kizobo kizobo rẹ eka rẹ orherẹn me dia izobo ọsoso. A riọọ.”

24 Jihova da rhoma ta ota kẹ Mosis, ọ da ta: 25 “Vuẹ Erọn vẹ emọ rọyen nẹ, ‘Ọnana yen urhi rẹ izobo rẹ umwemwu na: Asan re de hwe eranvwe rẹ izobo rẹ ẹtorhẹ na yen e de ji che hwe eranvwe rẹ izobo rẹ umwemwu na vwẹ obaro ri Jihova. Ọyen orọnvwọn rọ ma fon. 26 Orherẹn rọ vwerọ vwo ze fikirẹ umwemwu cha riọ. A cha riọ vwẹ asan ọfuanfon, vwẹ otegodo rẹ utughẹ ra da vwoma na.

27 “‘Kemu kemu ro te uvwo rọyen kọ dia fuanfon, ohwo da fẹrẹn evo vwẹ usun rẹ ọbara rọyen ku ewun rọyen, wọ me fọnrhọn obo ra fẹrẹn ọbara ku na vwẹ asan ọfuanfon. 28 E mi hwe ochẹ re vwo chere na, ẹkẹvuọvo ọ da dianẹ ochẹ rẹ ẹrovwo yen e vwo chere, e mi hroro ochẹ na je vwẹ ame vwọ hworhẹ.

29 “‘Kọshare kọshare vwẹ usun rẹ irherẹn na cha riọ. Ọyen orọnvwọn rọ ma fon. 30 Ẹkẹvuọvo e jẹ a ria izobo rẹ umwemwu vuọvoo, ọ da dianẹ a reyọ evo vwẹ usun rẹ ọbara rọyen rhe evunrẹ utughẹ ra da vwoma na rhi ru arhuẹrẹ vwẹ asan ọfuanfon na. A me vwẹ erhanre vwọ torhẹ.