Livitikọs

2 “‘Asaọkiephana ọ da dianẹ ohwo* vwẹ izobo rẹ eka vwọ kpahotọ kẹ Jihova, izobo rọyen me dia omamọ rẹ iflawa, o mi ku evwri phiyọ je vwẹ ifrankisẹnsi vwọ ba. 2 Ọ me reyọ vwo rhe emọ rẹ Erọn re dia irherẹn na, orherẹn na me ghwẹ obọ rọyen vọn vẹ omamọ rẹ iflawa na, evwri na, kugbe ifrankisẹnsi rọyen eje, ọ me nẹrhẹ o bru ivwirhi kerẹ ẹkẹn rẹ ẹkarophiyọ vwẹ agbada na, izobo ra vwẹ erhanre torhẹ ro gbon ọnrhe ọvwevwerhen kẹ Jihova. 3 Kemu kemu ro chekọ vwẹ izobo rẹ eka na, ọ rẹ Erọn vẹ emọ rọyen kerẹ orọnvwọn rọ ma fon vwo nẹ izobo ri Jihova ra vwẹ erhanre torhẹ.

4 “‘Ọ da dianẹ wọ vwẹ izobo rẹ eka ra kakere vwevunrẹ ovunu vwọ kpahotọ, ọ me dia omamọ rẹ iflawa, ibrẹdi ro jephuo re ru họhọ ubiosa, ra vwẹ evwri vwọ ba ru, yẹrẹ ibrẹdi ro jephuo rọ pha pẹpẹghẹ ra vwẹ evwri ghworo.

5 “‘Ọ da dianẹ izobo wẹn ọyen izobo rẹ eka ro nẹ omoze re muẹ kpahan erhanre rhe, ọ me dia omamọ rẹ iflawa ra vwẹ evwri vwọ ba ru ro vwo iphuephuu.* 6 E mi vwirhon ibribro, wo mi ku evwri phiyọ. Ọyen izobo rẹ eka.

7 “‘Izobo wẹn da dia izobo rẹ eka ra vwẹ ipani vwo ru, wọ me vwẹ omamọ rẹ iflawa vẹ evwri vwo ruo. 8 Wọ me reyọ izobo rẹ eka ra vwẹ enana ru vwo rhe Jihova, ka cha vwọ kpahotọ kẹ orherẹn na rọ dia ohwo ro che muo kẹrẹ agbada na. 9 Orherẹn na me ghwẹ nẹ izobo rẹ eka na kerẹ ẹkẹn rẹ ẹkarophiyọ, ọ me nẹrhẹ o bru ivwirhi vwẹ agbada na kerẹ izobo ra vwẹ erhanre torhẹ ro gbon ọnrhe ọvwevwerhen kẹ Jihova. 10 Obo ri chekọ vwẹ izobo rẹ eka na, ọ rẹ Erọn vẹ emọ rọyen, kerẹ orọnvwọn rọ ma fon vwo nẹ izobo ri Jihova ra vwẹ erhanre torhẹ.

11 “‘E jẹ izobo rẹ eka ru wọ cha vwọ kpahotọ kẹ Jihova vwo iphuephuu, wọ nẹrhẹ iphuephu yẹrẹ ame ọnyọn vuọvo bru ivwirhi kerẹ izobo ra vwẹ erhanre torhẹ kẹ Jihovaa.

12 “‘Ovwan sa vwẹ ayen kpahotọ kẹ Jihova kerẹ izobo rẹ emamọ rẹsosuọ, ẹkẹvuọvo ovwan muẹ ayen phiyọ enu rẹ agbada na kerẹ ọnrhe ọvwevwerheen.

13 “‘Kizobo kizobo rẹ eka ru wo che ze me dia obo ra vwẹ ughwanka vwọ gua; wo jẹ ughwanka rẹ ọphọ rẹ Ọghẹnẹ wẹn kanra izobo rẹ eka wẹẹn. Wọ me vwẹ ughwanka vwọ ba kizobo kizobo wẹn eje.

14 “‘Wọ da vwẹ izobo rẹ eka rẹ emamọ rẹsosuọ kẹ Jihova, wọ me vwẹ eka kpokpọ ra vwẹ erhanre tọn, ra lọre vworovworoo vwọ kpahotọ kerẹ izobo rẹ eka rẹ emamọ rẹsosuọ wẹn. 15 Wo mi ku evwri phiyọ ji ku ifrankisẹnsi phiyọ. Ọyen izobo rẹ eka. 16 Orherẹn na me nẹrhẹ o bru ivwirhi kerẹ ẹkẹn rẹ ẹkarophiyọ, kọyen evo vwẹ usun rẹ eka ra lọre vworovworoo na, kugbe evwri vẹ ifrankisẹnsi rọyen eje, kerẹ izobo ra vwẹ erhanre torhẹ kẹ Jihova.