Livitikọs

7 “‘Ọnana yen urhi rẹ izobo rẹ abe na: Ọyen orọnvwọn rọ ma fon. 2 Ayen che hwe eranvwe rẹ izobo rẹ abe na vwẹ asan rẹ ayen de hwe eranvwe rẹ izobo rẹ ẹtorhẹ na, a me fẹrẹn ọbara rọyen ku ẹbẹre eje rẹ agbada na. 3 Ọ cha vwẹ ivwri rọyen eje vwọ kpahotọ, ọtiọyen ji te ivwri rẹ urhurhu na, ivwri ri rhurhu ivun na, 4 kugbe ibiehun ivẹ na re kẹrẹ ehun na vẹ ivwri re tamu ayen. O ji che si ivwri rẹ irhue na vẹ ibiehun na no. 5 Orherẹn na cha nẹrhẹ ayen bru ivwirhi vwẹ enu rẹ agbada na, kerẹ izobo ra vwẹ erhanre torhẹ kẹ Jihova. Ọyen izobo rẹ abe. 6 Kọshare kọshare vwẹ usun rẹ irherẹn na cha riọ, a me riọ vwẹ asan ọfuanfon. Ọyen orọnvwọn rọ ma fon. 7 Urhi ro shekpahen izobo rẹ umwemwu na ji shekpahen izobo rẹ abe na; ọyen ọ rẹ orherẹn rọ vwerọ vwo ru arhuẹrẹ na.

8 “‘Siẹrẹ orherẹn na da vwẹ izobo rẹ ẹtorhẹ na vwọ kpahotọ fikirẹ ohwo, ohọrọ rẹ eranvwe rẹ izobo rẹ ẹtorhẹ ra vwọ kẹ orherẹn na kọ dia ọrọyen.

9 “‘Kizobo kizobo rẹ eka ra kakere vwevunrẹ ovunu yẹrẹ ra vwẹ ipani yẹrẹ omoze re muẹ kpahan erhanre vwo ru, ọ rẹ orherẹn rọ vwerọ vwọ kpahotọ na. Kọ dia ọrọyen. 10 Ẹkẹvuọvo kizobo kizobo rẹ eka re ku kugbe vẹ evwri yẹrẹ ọ re ku evwri phiyọọ, kọ dia ọ rẹ emọ rẹ Erọn eje; ayen ohwo ọvuọvo che vwo ẹkẹn rẹ abavo.

11 “‘Asaọkiephana ọnana yen urhi rẹ izobo rẹ ọrekugbe rẹ ohwo sa vwọ kpahotọ kẹ Jihova: 12 Ọ da vwọ kpahotọ kerẹ akpẹvwẹ, ọ cha vwẹ izobo rẹ akpẹvwẹ na vwọ kpahotọ vẹ ibrẹdi ro jephuo re ru họhọ ubiosa ra vwẹ evwri vwọ ba ru, ibrẹdi ro jephuo rọ pha pẹpẹghẹ ra vwẹ evwri ghworo, kugbe ibrẹdi re ru họhọ ubiosa ra vwẹ omamọ rẹ iflawa vwo ru, ra nabọ gbe kugbe, ra je vwẹ evwri vwọ ba ru. 13 Ọ cha vwẹ izobo rọyen vwọ kpahotọ vẹ ibrẹdi re phi iphuephu* phiyọ re ru họhọ ubiosa, kugbe izobo rẹ akpẹvwẹ rẹ izobo rẹ ọrekugbe rọyen. 14 Ọ cha vwẹ ọvuọvo rẹ izobo sansan na vwọ kpahotọ kerẹ ẹkẹn ọfuanfon kẹ Jihova; ọ me dia ọ rẹ orherẹn rọ fẹrẹn ọbara rẹ izobo rẹ ọrekugbe na. 15 E jẹ a ria uvwo rẹ izobo rẹ akpẹvwẹ rẹ izobo rẹ ọrekugbe rọyen vwẹ ẹdẹ rọ vwerọ vwọ kpahotọ na. E jẹ ọ sẹro rẹ ọvuọvo rọyen tẹ urhiọkee.

16 “‘Izobo rọ vwọ kpahotọ da dia ive yẹrẹ okẹ ro nẹ otọ rẹ ẹwẹn rhe, e jẹ a riọ vwẹ ẹdẹ rọ vwẹ izobo rọyen vwọ kpahotọ na, a je sa re obo ri chekọ vwọ vwẹ ẹdẹ rọ vwọ kpahọn. 17 Ẹkẹvuọvo kemu kemu ro chekọ vwẹ uvwo rẹ izobo na vwẹ ẹdẹ rerha, ka vwẹ erhanre vwọ torhẹ. 18 Ẹkẹvuọvo a da re uvwo rẹ izobo rẹ ọrekugbe rọyen vwẹ ẹdẹ rerha, e che rhiabọreyọ ohwo rọ vwerọ vwọ kpahotọ naa. O che fi erere kẹẹ; ọyen emu rẹ ẹgua, ohwo* rọ re vwọ cha rioja fikirẹ oruchọ rọyen. 19 Uvwo ro te kemu kemu ro jẹfuọn, e jẹ a riọọ. E jẹ a vwẹ erhanre vwọ torhẹ. Kohwo kohwo rọ fonro sa re uvwo rọ fonro na.

20 “‘Ẹkẹvuọvo kohwo kohwo* ro jẹfuọn rọ re uvwo rẹ izobo rẹ ọrekugbe rọ dia ọ ri Jihova na, ke bru* ohwo* yena nẹ ohri rẹ ihwo rọyen. 21 Ohwo* de djobọte kemu kemu ro jẹfuọn, owenẹ ọ dia jẹfuọn rẹ ohworakpọ yẹrẹ eranvwe ro jẹfuọn yẹrẹ orọnvwọn rẹ ẹgua ro jẹfuọn, ọ da re vwo nẹ uvwo rẹ izobo rẹ ọrekugbe rọ dia ọ ri Jihova na, ke bru ohwo* yena nẹ ohri rẹ ihwo rọyen.’”

22 Jihova da rhoma ta ota kẹ Mosis, ọ da ta: 23 “Ta kẹ ihwo rẹ Izrẹl nẹ, ‘Ovwan ria ivwri rẹ erhuẹn yẹrẹ egbon otete yẹrẹ ẹvwe vuọvoo. 24 Ivwri rẹ eranvwe ro ghwuru kugbe ivwri rẹ eranvwe rẹ eranvwe ọfa hweri, a sa reyọ vwo ru kemu kemu, ẹkẹvuọvo ovwan riọ kakakaa. 25 Kidie kohwo kohwo rọ re ivwri rẹ eranvwe rọ vwọ kpahotọ kerẹ izobo ra vwẹ erhanre torhẹ kẹ Jihova, ke bro* nẹ ohri rẹ ihwo rọyen.

26 “‘Ovwan ria ọbara vuọvo vwẹ kasan kasan rẹ ovwan diaa, owenẹ ọ dia ọ rẹ ephran yẹrẹ ọ rẹ eranvwe. 27 Kohwo kohwo* rọ re ọbara, ke bro* nẹ ohri rẹ ihwo rọyen.’”

28 Jihova da ta kẹ Mosis: 29 “Ta kẹ ihwo rẹ Izrẹl nẹ, ‘Kohwo kohwo rọ vwẹ izobo rẹ ọrekugbe rọyen vwọ kpahotọ kẹ Jihova, me vwẹ ẹbẹre ọvo rẹ izobo rẹ ọrekugbe rọyen na vwo rhe Jihova. 30 Ọ cha vwẹ abọ rọyen vwo mu ivwri na vẹ evie na rhe kerẹ izobo ra vwẹ erhanre torhẹ kẹ Jihova, ko che djuo kpuko kparo kerẹ izobo rẹ edjuo vwẹ obaro ri Jihova. 31 Orherẹn na cha nẹrhẹ ivwri na bru ivwirhi vwẹ enu rẹ agbada na, ẹkẹvuọvo evie na kọ cha dia ọ rẹ Erọn vẹ emọ rọyen.

32 “‘Ovwan cha vwẹ owọrhen na vwọ kẹ orherẹn na kerẹ ẹkẹn ọfuanfon vwo nẹ izobo rẹ ọrekugbe rẹ ovwan. 33 Ọmọ rẹ Erọn rọ vwẹ ọbara rẹ izobo rẹ ọrekugbe na vẹ ivwri na vwọ kpahotọ, cha reyọ owọrhen na kerẹ ẹkẹn rọyen. 34 Kidie me reyọ evie rẹ izobo rẹ edjuo na kugbe owọ rẹ ẹkẹn ọfuanfon na vwo nẹ izobo rẹ ọrekugbe rẹ ihwo rẹ Izrẹl, me vwẹ ayen kẹ Erọn orherẹn na kugbe emọ rọyen kerẹ urhi ri bẹdẹ vwọ kẹ ihwo rẹ Izrẹl.

35 “‘Ọnana yen ẹkẹn ra reyọ nẹ izobo ri Jihova ra vwẹ erhanre torhẹ, re che si no vwọ kẹ irherẹn na, vwọ kẹ Erọn vẹ emọ rọyen, vwẹ ẹdẹ ra vwẹ ayen vwo mu rẹ ayen vwọ ga kerẹ irherẹn kẹ Jihova. 36 Jihova ji iji nẹ a vwẹ ẹkẹn nana ra reyọ mie ihwo rẹ Izrẹl vwọ kẹ ayen vwẹ ẹdẹ ra vwẹ ayen vwo mu. Ọyen urhi ri bẹdẹ vwẹ uvwiẹ rayen.’”

37 Ọnana yen urhi ro shekpahen izobo rẹ ẹtorhẹ na, izobo rẹ eka na, izobo rẹ umwemwu na, izobo rẹ abe na, izobo rẹ evwomuẹ na, kugbe izobo rẹ ọrekugbe na, 38 kirobo rẹ Jihova ji iji kẹ Mosis vwẹ Ugbenu ri Sainai, vwẹ ẹdẹ rọ vwẹ iji kẹ ihwo rẹ Izrẹl nẹ ayen vwẹ izobo rayen vwọ kpahotọ kẹ Jihova vwẹ aton ri Sainai.