Livitikọs

3 “‘Ọ da dianẹ izobo rọyen ọyen izobo rẹ ọrekugbe,* ọ je cha vwọ kpahotọ vwo nẹ ohri rẹ erhuẹn na rhe, owenẹ ọ dia ọ rẹ ọshare yẹrẹ ọ rẹ aye, e jẹ ọ vwẹ eranvwe rẹ oma rọyen gbare vwọ kpahotọ vwẹ obaro ri Jihova. 2 Ọ me ghwobọ rọyen kpahen uyovwin rẹ eranvwe ro che vwo ze izobo na, e mi hwe eranvwe na vwẹ asan ra wan rua utughẹ ra da vwoma na; emọ rẹ Erọn re dia irherẹn na me fẹrẹn ọbara na ku ẹbẹre eje rẹ agbada na. 3 Ọ cha vwẹ ẹbẹre ọvo rẹ izobo rẹ ọrekugbe na vwọ kpahotọ kerẹ izobo ra vwẹ erhanre torhẹ kẹ Jihova: ivwri ri rhurhu ivun na, ivwri na eje re riariẹ ivun na phiyọ, 4 kugbe ibiehun ivẹ na re kẹrẹ ehun na vẹ ivwri re tamu ayen. O ji che si ivwri rẹ irhue na vẹ ibiehun na no. 5 Emọ rẹ Erọn cha nẹrhẹ o bru ivwirhi vwẹ agbada na, vwẹ enu rẹ izobo rẹ ẹtorhẹ re mu kpahen irhe rehẹ enu rẹ erhanre na; ọyen izobo ra vwẹ erhanre torhẹ ro gbon ọnrhe ọvwevwerhen kẹ Jihova.

6 “‘Ọ da dianẹ ọ reyọ izobo rẹ ọrekugbe rọyen kẹ Jihova vwo nẹ ohri rẹ igodẹ yẹrẹ ẹvwe rhe, ọ cha vwẹ eranvwe ọshare yẹrẹ ọ rẹ aye rẹ oma rọyen gbare vwọ kpahotọ. 7 Ọ da dia egbon otete yen o che vwo ze izobo, ọ cha vwọ kpahotọ vwẹ obaro ri Jihova. 8 Ọ cha ghwobọ rọyen kpahen uyovwin rẹ eranvwe ro che vwo ze izobo na, ke che hwe eranvwe na vwẹ obaro rẹ utughẹ ra da vwoma na. Emọ rẹ Erọn ke cha fẹrẹn ọbara rọyen ku ẹbẹre eje rẹ agbada na. 9 Ọ cha vwẹ ivwri rẹ izobo rẹ ọrekugbe na vwọ kpahotọ kerẹ izobo ra vwẹ erhanre torhẹ kẹ Jihova. O che si ivwri rẹ urhurhu na eje re kẹrẹ ubeku rẹ ugbuko na no, ivwri ri rhurhu ivun na, ivwri na eje re riariẹ ivun na phiyọ, 10 kugbe ibiehun ivẹ na re kẹrẹ ehun na vẹ ivwri re tamu ayen. O ji che si ivwri rẹ irhue na vẹ ibiehun na no. 11 Orherẹn na kọ cha nẹrhẹ o bru ivwirhi vwẹ enu rẹ agbada na kerẹ emuọre,* izobo ra vwẹ erhanre torhẹ kẹ Jihova.

12 “‘Izobo rọyen da dia ẹvwe, kọ cha vwọ kpahotọ vwẹ obaro ri Jihova. 13 Ọ cha ghwobọ rọyen kpahen uyovwin rẹ ẹvwe na, ke che hwe ẹvwe na vwẹ obaro rẹ utughẹ ra da vwoma na, emọ rẹ Erọn ke cha fẹrẹn ọbara rọyen ku ẹbẹre eje rẹ agbada na. 14 Ivwri ri rhurhu ivun na, ivwri na eje re riariẹ ivun na phiyọ na yen ẹbẹre rọ cha vwọ kpahotọ kerẹ izobo rọyen ra vwẹ erhanre torhẹ kẹ Jihova, 15 kugbe ibiehun ivẹ na re kẹrẹ ehun na vẹ ivwri re tamu ayen. O ji che si ivwri rẹ irhue na vẹ ibiehun na no. 16 Orherẹn na cha nẹrhẹ ayen bru ivwirhi vwẹ enu rẹ agbada na kerẹ emuọre,* izobo ra vwẹ erhanre torhẹ ro gbon ọnrhe ọvwevwerhen. Ivwri na eje, e ri Jihova.

17 “‘Ọyen urhi ri bẹdẹ vwọ kẹ uvwiẹ rẹ ovwan vwẹ asan rẹ ovwan diare eje: Ovwan nama ria ivwri yẹrẹ ọbara kakakaa.’”