Livitikọs

14 Jihova da rhoma ta ota kẹ Mosis, ọ da ta: 2 “Ọnana yen cha dia urhi ro shekpahen ọhọnvwoti vwẹ ẹdẹ rẹ orufon rọyen re vwo djephia nẹ ọ fonro, vwẹ ọke ra cha vwọ reyọ bru orherẹn na ra. 3 Orherẹn na che kpo otafe rẹ asan re wonphiyọ* na ra fuẹrẹn. Oti na de kpo nẹ oma rẹ ọhọnvwoti na re, 4 orherẹn na che ji iji kẹ nẹ ọ reyọ ephran ivẹ rehẹ akpọ re je fon rhe, ọtiọyen ji te urhe rẹ isida, amwa ọvwavware, kugbe hisọp vwọ kẹ orufon rọyen. 5 Orherẹn na me vwẹ iji phia nẹ e hwe ọphran ọvo vwevunrẹ ochẹ vwẹ enu rẹ ame re vo nẹ urhie rhe. 6 Ẹkẹvuọvo ọ me reyọ ọphran rọhẹ akpọ na vẹ urhe rẹ isida na, amwa ọvwavware na, kugbe hisọp na, o mi duvwun ayen eje phiyọ evunrẹ ọbara rẹ ọphran re hweri vwẹ enu rẹ ame re vo nẹ urhie rhe na. 7 O de ru ọyena nu, ọ me fẹrẹn abọ ighwrẹn ku ohwo ro ruẹ oma rọyen fuan vwo nẹ oti na, o mi ghwoghwo nẹ ọ fonro, o mi siobọnu ọphran rọhẹ akpọ na vwevunrẹ aghwa.

8 “Ohwo ro ruẹ oma rọyen fuan na me fọnrhọn iwun rọyen, ọ me wanre ẹton rọyen eje, ọ me je vwẹ ame vwọ họ, kọ cha fon. O de ru ọyena nu, kọ sa ro evunrẹ asan rẹ ayen wonphiyọ na, ẹkẹvuọvo ọ cha dia otafe rẹ utughẹ rọyen vwẹ ẹdẹ ighwrẹn. 9 Vwẹ ẹdẹ righwrẹn na, e jẹ ọ wanre ẹton rẹ uyovwin rọyen eje, ẹtuegban rọyen, kugbe ẹton ẹro rọyen eje no. Ọ da wanre ẹton rọyen eje nu, ọ me vwẹ ame vwọ fọnrhọn iwun rọyen je họ oma rọyen, kọ cha fon.

10 “Vwẹ ẹdẹ rẹrenren na, kọ cha reyọ egbon itete ivẹ rẹ oma rayen gbare, ogodẹ otete rẹ aye ọvo rẹ oma rọyen gbare rọhẹ ukpe rẹsosuọ rọyen, ẹkẹn erha rẹ ẹkẹn ihwe rẹ ọvwanvwọ rẹ ifah* rẹ omamọ rẹ iflawa re gbe kugbe vẹ evwri kerẹ izobo rẹ eka kugbe ovwanvwọ ri lọg ọvo* rẹ evwri; 11 orherẹn ro ghwoghwiro nẹ ọ fonro na cha vwẹ ohwo ro ruẹ oma rọyen fuan na vẹ izobo na vwọ kpahotọ vwẹ obaro ri Jihova vwẹ asan ra wan rua utughẹ ra da vwoma na. 12 Orherẹn na cha reyọ egbon otete ọvo, ọ me vwọ kpahotọ kerẹ izobo rẹ abe, ọ vẹ ovwanvwọ ri lọg rẹ evwri na, ko che dju ayen kpuko kparo kerẹ izobo rẹ edjuo vwẹ obaro ri Jihova. 13 Ko che hwe egbon otete na vwẹ asan re de hwe eranvwe re vwo ze izobo rẹ umwemwu kugbe ọ re vwo ze izobo rẹ ẹtorhẹ na, vwẹ asan ọfuanfon, kidie kerẹ izobo rẹ umwemwu na, izobo rẹ abe na ọ rẹ orherẹn na. Ọyen orọnvwọn rọ ma fon.

14 “Orherẹn na kọ cha reyọ evo vwẹ usun rẹ ọbara rẹ izobo rẹ abe na, orherẹn na ko che phio phiyọ orhọ rẹ obọrhen rẹ ohwo ro ruẹ oma rọyen fuan na vẹ urhiobọ rode rẹ obọrhen rọyen kugbe urhiowọ rode rẹ owọrhen rọyen. 15 Orherẹn na kọ cha reyọ evo vwẹ usun rẹ ovwanvwọ ri lọg rẹ evwri na, o mi kuo phiyọ ẹhẹrhobọ rẹ obohwẹre romobọ rọyen. 16 Orherẹn na ko che duvwun urhiobọ rẹ obọrhen rọyen phiyọ evunrẹ evwri rọhẹ ẹhẹrhobọ rẹ obohwẹre rọyen na, ọ me vwẹ urhiobọ rọyen vwọ fẹrẹn evo vwẹ usun rẹ evwri na abọ ighwrẹn vwẹ obaro ri Jihova. 17 Orherẹn na ko che phi evo vwẹ usun rẹ evwri ro chekọ vwẹ ẹhẹrhobọ rọyen phiyọ orhọ rẹ obọrhen rẹ ohwo ro ruẹ oma rọyen fuan na kugbe urhiobọ rode rẹ obọrhen rọyen vẹ urhiowọ rode rẹ owọrhen rọyen vwẹ enu rẹ ọbara rẹ izobo rẹ abe na. 18 Orherẹn na ko che phi evwri ro chekọ vwẹ ẹhẹrhobọ rọyen na phiyọ uyovwin rẹ ohwo ro ruẹ oma rọyen fuan na, orherẹn na ko ru arhuẹrẹ kẹ vwẹ obaro ri Jihova.

19 “Orherẹn na che ze izobo rẹ umwemwu na, o mi ji ru arhuẹrẹ kẹ ohwo ro ruẹ oma rọyen fuan vwo nẹ jẹfuọn rọyen na, o de ru ọyena nu, ko che hwe eranvwe rẹ izobo rẹ ẹtorhẹ na. 20 Orherẹn na che ze izobo rẹ ẹtorhẹ vẹ izobo rẹ eka na vwẹ enu rẹ agbada na, orherẹn na ji che ru arhuẹrẹ kẹ, ọ me fon.

21 “Ẹkẹvuọvo ọ da dia ogbere, ọ rha sa dẹ erọnvwọn nanaa, kọ cha reyọ egbon otete ọvo vwọ kpahotọ kerẹ izobo rẹ abe re che vwo ru izobo rẹ edjuo rere o vwo ru arhuẹrẹ kẹ oma rọyen, ọ vẹ ẹkẹn ọvo rẹ ẹkẹn ihwe rẹ ovwanvwọ rẹ ifah* rẹ omamọ rẹ iflawa re gbe kugbe vẹ evwri kerẹ izobo rẹ eka, ovwanvwọ ri lọg rẹ evwri, 22 kugbe erurẹ itete ivẹ yẹrẹ ilekuku itete ivẹ, vwo nene oborẹ ẹgba rọyen muru. Ọvo cha dia izobo rẹ umwemwu, ọ ro chekọ na ke rha izobo rẹ ẹtorhẹ. 23 Vwẹ ẹdẹ rẹrenren na, ọ cha vwẹ ayen rhe orherẹn na vwo dje orufon rọyen phia, vwẹ asan ra wan rua utughẹ ra da vwoma na vwẹ obaro ri Jihova.

24 “Orherẹn na cha reyọ egbon otete rẹ izobo rẹ abe na kugbe ovwanvwọ ri lọg rẹ evwri na, orherẹn na ko che dju ayen kpuko kparo kerẹ izobo rẹ edjuo vwẹ obaro ri Jihova. 25 Ko che hwe egbon otete rẹ izobo rẹ abe na, orherẹn na kọ cha reyọ evo vwẹ usun rẹ ọbara rẹ izobo rẹ abe na, o mi phio phiyọ orhọ rẹ obọrhen rẹ ohwo ro ruẹ oma rọyen fuan na, vẹ urhiobọ rode rẹ obọrhen rọyen kugbe urhiowọ rode rẹ owọrhen rọyen. 26 Orherẹn na che ku evo vwẹ usun rẹ evwri na phiyọ ẹhẹrhobọ rẹ obohwẹre romobọ rọyen, 27 kọ cha vwẹ urhiobọ rẹ obọrhen rọyen vwọ fẹrẹn evo vwẹ usun rẹ evwri rọhẹ ẹhẹrhobọ rẹ obohwẹre rọyen na abọ ighwrẹn vwẹ obaro ri Jihova. 28 Orherẹn na che phi evo vwẹ usun rẹ evwri rọhẹ ẹhẹrhobọ rọyen na phiyọ orhọ rẹ obọrhen rẹ ohwo ro ruẹ oma rọyen fuan na, vẹ urhiobọ rode rẹ obọrhen rọyen, kugbe urhiowọ rode rẹ owọrhen rọyen vwẹ asan vuọvo ro phi ọbara rẹ izobo rẹ abe na phiyọ. 29 Orherẹn na ko che phi evwri ro chekọ vwẹ ẹhẹrhobọ rọyen na phiyọ uyovwin rẹ ohwo ro ruẹ oma rọyen fuan na, rere o vwo ru arhuẹrẹ kẹ vwẹ obaro ri Jihova.

30 “Ọ cha vwẹ ọvo vwẹ usun rẹ erurẹ itete na yẹrẹ ọvo vwẹ usun rẹ ilekuku itete na vwọ kpahotọ, vwo nene oborẹ ẹgba rọyen muru, 31 ọ rọ sa dẹ eje kerẹ izobo rẹ umwemwu, ọ ro chekọ na kerẹ izobo rẹ ẹtorhẹ, ọtiọyen ji te izobo rẹ eka na; orherẹn na ko che ru arhuẹrẹ vwọ kẹ ohwo ro ruẹ oma rọyen fuan na vwẹ obaro ri Jihova.

32 “Ọnana yen urhi ro shekpahen ohwo ro vwo ọga rẹ oti jovwo na, jẹ o vwo obo ra guọnọree vwẹ ọke re de djephia nẹ ọ fonro.”

33 Jihova da ta kẹ Mosis vẹ Erọn: 34 “Ọke rẹ ovwan da ro evunrẹ otọ ri Kenan re me cha vwọ kẹ ovwan kerẹ ughwẹ na, me da vwẹ ọga rẹ oti vwo mu uwevwin ọvo vwẹ otọ rẹ ovwan, 35 ohwo ro vwo uwevwin na mi bru orherẹn na rhe, ọ me ta kẹ nẹ, ‘Oka rẹ emiavwe ọvo vwomaphia vwẹ uwevwin mẹ.’ 36 Orherẹn na cha vwẹ iji phia nẹ e mu ekuakua rẹ uwevwin na no tavwen ọ ke rhe fuẹrẹn emiavwe na, rere o vwo jẹ eghwoghwo nẹ erọnvwọn eje rehẹ evunrẹ uwevwin na fonroo; e de ru ọyena nu, orherẹn na me rhe rhe fuẹrẹn uwevwin na. 37 Ọ cha fuẹrẹn asan rọ da vwomaphia na, ọ da dianẹ igbẹhẹ rẹ uwevwin na vwo asan re pẹtiẹn ro evun ri yẹlo ji grini yẹrẹ re vwara, i de ji kodo vrẹ orhoma rẹ igbẹhẹ na, 38 orherẹn na kọ cha ro otafe nẹ uwevwin na vwo kpo asan ẹchẹ rẹ uwevwin na, ọ me kanre uwevwin na vwẹ ẹdẹ ighwrẹn.

39 “Orherẹn na ko che rhivwin rhe vwẹ ẹdẹ righwrẹn na, ọ me fuẹrẹn, ọ da dianẹ emiavwe na hra nene igbẹhẹ rẹ uwevwin na re, 40 orherẹn na kọ cha vwẹ iji phia, e mi kporon ikuta rẹ emiavwe na muru na no, e mi do ayen phiyọ otafe rẹ orere na, phiyọ asan ro jẹfuọn. 41 E de ru ọyena nu, ọ me tanẹ a nabọ hroro igbẹhẹ rẹ obevun rẹ uwevwin na, a me ghwẹ ọphiẹn ọyaya re hroro no na kufia vwẹ otafe rẹ orere na, vwẹ asan ro jẹfuọn. 42 Kẹ ayen che mu ikuta efa phiyọ ẹdia rẹ ikuta rẹ ayen mu no na, ọ me vwẹ ọphiẹn ọfa vwọ rhare uwevwin na.

43 “Emiavwe na de rhivwin, ọ da rhoma vwomaphia vwevunrẹ uwevwin na re vwo kporon ikuta na no nu, re ji vwo hroro uwevwin na je rhoma rharo nu na, 44 orherẹn na kọ cha ro evun rọyen ra fuẹrẹn, ọ da dianẹ emiavwe na hra nene uwevwin na re, kọyen oti ọgangan yen vwomaphia vwevunrẹ uwevwin na. Uwevwin na fonroo. 45 Ọ me tanẹ e kporon uwevwin na totọ, te ikuta rọyen te irhe rọyen kugbe ọphiẹn rẹ uwevwin na eje, rere e mu ayen kpo otafe rẹ orere na, vwo kpo asan ro jẹfuọn. 46 Ẹkẹvuọvo kohwo kohwo rọ ro uwevwin na vwẹ ọvo vwẹ usun rẹ ẹdẹ ra vwọ kanrọ na cha dia ẹdia ri jẹfuọn re te ovwọnvwọn; 47 kohwo kohwo ro sherhẹn uwevwin na me fọnrhọn iwun rọyen, kohwo kohwo rọ riemu vwẹ uwevwin na me je fọnrhọn iwun rọyen.

48 “Ẹkẹvuọvo orherẹn na da rhe, ọ da mrẹ nẹ emiavwe na je rhe hra nene uwevwin na rhanvwẹ ọke ra vwọ rhoma rhare uwevwin na nu naa, orherẹn na ko che ghwoghwo nẹ uwevwin na fonro kidie emiavwe na kpo re. 49 Rere o se vwo ru uwevwin na fon vwo nẹ jẹfuọn,* ọ cha reyọ ephran ivẹ, urhe rẹ isida, amwa ọvwavware, kugbe hisọp. 50 O mi hwe ọphran ọvo vwevunrẹ ochẹ vwẹ enu rẹ ame re vo nẹ urhie rhe. 51 Ọ me reyọ urhe rẹ isida na, hisọp na, amwa ọvwavware na, kugbe ọphran rọhẹ akpọ na, o mi duvwun ayen phiyọ evunrẹ ọbara rẹ ọphran re hweri vwẹ enu rẹ ame re vo nẹ urhie rhe na, ọ me fẹrẹn ku uwevwin na abọ ighwrẹn. 52 Ọ me vwẹ ọbara rẹ ọphran na, ame re vo nẹ urhie rhe na, ọphran rọhẹ akpọ na, urhe rẹ isida na, hisọp na, kugbe amwa ọvwavware na vwo ru uwevwin na fon vwo nẹ jẹfuọn.* 53 O de ru ọyena nu, o mi siobọnu ọphran rọhẹ akpọ na vwẹ otafe rẹ orere na, vwevunrẹ aghwa, o mi ru arhuẹrẹ vwọ kẹ uwevwin na, ọ me fon.

54 “Ọnana yen urhi ro shekpahen koka koka rẹ oti, ọga rẹ ekrekruyovwin, yẹrẹ ẹtuegban, 55 oti rẹ ewun yẹrẹ ọ rẹ uwevwin, 56 o ji shekpahen asan re vwọre, eka, kugbe ipe, 57 rere a sa vwọ riẹn ọke rẹ orọnvwọn vwọ fon, kugbe ọke rẹ orọnvwọn vwo jẹfuọn. Ọnana yen urhi ro shekpahen oti.”