Livitikọs

16 Jihova da ta ota kẹ Mosis ọke rẹ emọ rẹ Erọn ivẹ vwo ghwu nu kidie nẹ ayen vwomaphia vwẹ obaro ri Jihova. 2 Jihova da ta kẹ Mosis: “Vuẹ oniọvo wẹn Erọn nẹ ọ cha sa ro asan ọfuanfon na vwẹ obuko rẹ ikọtini na re mudia obaro rẹ urhurho rẹ Ekpeti rẹ Ọphọ na kọke kọke ro jeree, rere o vwo jeghwo, kidie me cha vwomaphia vwẹ enu rẹ urhurho na vwevunrẹ evwru.

3 “Ọnana yen oborẹ Erọn cha ghwa nene oma ọke rọ da rhe evunrẹ asan ọfuanfon na: erhuẹn otete ọvo vwọ kẹ izobo rẹ umwemwu kugbe egbon ọvo vwọ kẹ izobo rẹ ẹtorhẹ. 4 E jẹ o ku ewun ogrongron ọfuanfon ra vwẹ amwa oyoyovwin vwo ru phiyọ, iwun rẹ agada* ra vwẹ amwa oyoyovwin vwo ru mi rhurhu ugboma rọyen, ọ me je vwẹ umuehun ra vwẹ amwa oyoyovwin vwo ru vwo mu ehun rọyen, je vwẹ ọpharuyovwin rẹ oghẹresan ra vwẹ amwa oyoyovwin vwo ru vwọ phare uyovwin rọyen. Ayen iwun efuanfon. Ọ me vwẹ ame vwọ hworhẹ oma rọyen rere o ku ayen phiyọ.

5 “E jẹ ọ reyọ omokri* ivẹ vwọ kẹ izobo rẹ umwemwu kugbe egbon ọvo vwọ kẹ izobo rẹ ẹtorhẹ mie ọghwẹgbe rẹ ihwo rẹ Izrẹl.

6 “Erọn me vwẹ erhuẹn rẹ izobo rẹ umwemwu rọ vwọ rhe fikirẹ oma rọyen na vwọ kpahotọ, o mi ru arhuẹrẹ fikirẹ oma rọyen kugbe uwevwin rọyen.

7 “Ọ me reyọ ẹvwe ivẹ na, ọ me vwẹ ayen vwo mudia obaro ri Jihova vwẹ asan ra wan rua utughẹ ra da vwoma na. 8 Erọn che duvwun itẹ phiyọ ẹvwe ivẹ na, itẹ ọvo vwọ kẹ Jihova, itẹ ro chekọ na vwọ kẹ Azezẹl.* 9 Erọn me reyọ ẹvwe rẹ itẹ muru vwọ kẹ Jihova na vwọ kpahotọ, o mi vwo ze izobo rẹ umwemwu. 10 Ẹkẹvuọvo a me reyọ ẹvwe rẹ itẹ muru vwọ kẹ Azezẹl na rhe ọkpokpọ, e mi vwo mudia obaro ri Jihova rere e se vwo ru arhuẹrẹ na wan oma rọyen, e se vwo siobọno ro evunrẹ aton na yanran vwo kpo Azezẹl.

11 “Erọn me vwẹ erhuẹn rẹ izobo rẹ umwemwu rọ vwọ rhe fikirẹ oma rọyen na vwọ kpahotọ, o mi ru arhuẹrẹ fikirẹ oma rọyen kugbe uwevwin rọyen; o de ru ọtiọyen nu, o mi hwe erhuẹn rẹ izobo rẹ umwemwu rọ vwọ rhe fikirẹ oma rọyen na.

12 “Kọ cha reyọ orọnvwọn ra vwọ torhẹ insẹnsi rọ vọnre vẹ imwerhanre nẹ agbada na vwẹ obaro ri Jihova kugbe omamọ insẹnsi ro gbon phanphanphan rọ ghwẹ vọn abọ ivẹ, ọ me reyọ ayen ro evunrẹ ikọtini na. 13 O ji che phi insẹnsi na phiyọ erhanre na vwẹ obaro ri Jihova, ivwirhi rẹ insẹnsi na ko che rhurhu urhurho rẹ Ekpeti na rọhẹ enu rẹ Oseri na, rere o vwo jeghwo.

14 “Ọ cha reyọ evo vwẹ usun rẹ ọbara rẹ erhuẹn na, ọ me vwẹ urhiobọ rọyen vwọ fẹrẹn vwẹ obaro rẹ urhurho na vwẹ ẹbẹre ọnre va nẹcha na, ọ me je vwẹ urhiobọ rọyen vwọ fẹrẹn evo vwẹ usun rẹ ọbara na abọ ighwrẹn vwẹ obaro rẹ urhurho na.

15 “Ko che hwe ẹvwe rẹ izobo rẹ umwemwu rẹ ihwo na vwọ rhe na, ọ me reyọ ọbara rọyen ro evunrẹ ikọtini na, ọ me vwẹ ọbara rọyen vwo ru obo rọ je vwẹ ọbara rẹ erhuẹn na vwo ru; ọ me fẹrẹn kpo ẹbẹre rẹ urhurho na hepha kugbe obaro rẹ urhurho na.

16 “O mi ru arhuẹrẹ kẹ asan ọfuanfon na fikirẹ irueru ri jẹfuọn rẹ ihwo rẹ Izrẹl kugbe oruchọ rayen vẹ imwemwu rayen, ọyena yen obo ro che ru vwọ kẹ utughẹ ra da vwoma na rọhẹ ohri rayen vwẹ ohri rẹ irueru ri jẹfuọn rayen.

17 “E jẹ ohwo ọfa dia evunrẹ utughẹ ra da vwoma na vwo nẹ ọke rọ vwọ ro evun rọyen re ru arhuẹrẹ vwẹ asan ọfuanfon na re te ọke rọ vwọ ro otafee. O che ru arhuẹrẹ fikirẹ oma rọyen vẹ uwevwin rọyen kugbe ọghwẹgbe rẹ Izrẹl eje.

18 “Ọ me ro otafe vwo kpo asan rẹ agbada na hepha vwẹ obaro ri Jihova, o mi ru arhuẹrẹ fiki rọyen, ọ me reyọ evo vwẹ usun rẹ ọbara rẹ erhuẹn na kugbe evo vwẹ usun rẹ ọbara rẹ ẹvwe na, o mi vwo ghworo idjo rehẹ ẹbẹre eje rẹ agbada na. 19 Ọ je cha vwẹ urhiobọ rọyen vwọ fẹrẹn evo vwẹ usun rẹ ọbara na kuo abọ ighwrẹn, o mi ruo fon je nẹrhẹ ọ dia fuanfon vwo nẹ irueru ri jẹfuọn rẹ ihwo rẹ Izrẹl.

20 “O de ru arhuẹrẹ vwọ kẹ asan ọfuanfon na, utughẹ ra da vwoma na, kugbe agbada na nu, kọ je cha vwẹ ẹvwe rọhẹ akpọ na vwọ kpahotọ. 21 Erọn cha ghwabọ rọyen ivẹ kpahen uyovwin rẹ ẹvwe rọhẹ akpọ na, ọ me fan oruchọ eje rẹ ihwo rẹ Izrẹl vẹ urhiẹchọ rayen eje kugbe imwemwu rayen eje kuo, o mi mu ayen kpahen uyovwin rẹ ẹvwe na, o mi siobọno ro evunrẹ aton na womarẹ ohwo re vwo mu nẹ o ru ọnana.* 22 Ẹvwe na che mu oruchọ rayen eje ro evunrẹ otọ rọ yare, ko che siobọnu ẹvwe na ro evunrẹ aton na.

23 “Erọn kọ cha ro evunrẹ utughẹ ra da vwoma na, o mi ku iwun ra vwẹ amwa oyoyovwin vwo ru na nu, e rẹ o kuphiyọ ọke rọ vwọ ro evunrẹ asan ọfuanfon na, ọ me vwẹ ayen kpahotọ vwẹ etiyin. 24 Ọ me vwẹ ame vwọ họ oma rọyen* vwẹ asan ọfuanfon rere o ku iwun rọyen phiyọ; o de ru ọyena nu, ọ me ro otafe re ze izobo rẹ ẹtorhẹ rọyen kugbe izobo rẹ ẹtorhẹ rẹ ihwo na ji ru arhuẹrẹ kẹ oma rọyen kugbe ihwo na. 25 Ọ cha nẹrhẹ ivwri rẹ izobo rẹ umwemwu na bru ivwirhi vwẹ enu rẹ agbada na.

26 “Ọshare ro siobọnu ẹvwe na vwo kpo Azezẹl na me fọnrhọn iwun rọyen je vwẹ ame vwọ họ, o de ru ọtiọyen nu, kọ sa rhe asan rẹ ayen wonphiyọ* na.

27 “A me reyọ erhuẹn rẹ izobo rẹ umwemwu na kugbe ẹvwe rẹ izobo rẹ umwemwu na re mu ọbara rayen ro asan ọfuanfon na vwo ru arhuẹrẹ na vwo kpo otafe rẹ asan rẹ ayen wonphiyọ na, a me vwẹ erhanre vwọ torhẹ ohọrọ rayen kugbe uvwo rayen kugbe isọn rayen. 28 Ohwo rọ torhẹ ayen me fọnrhọn iwun rọyen je vwẹ ame vwọ họ, o de ru ọtiọyen nu, kọ sa rhe asan rẹ ayen wonphiyọ na.

29 “Ọ cha dia urhi ri bẹdẹ kẹ ovwan vwẹ emeranvwe righwrẹn na, vwẹ ẹdẹ rihwe rẹ emeranvwe na, ovwan mi gboja kẹ oma rẹ ovwan,* ovwan ruiruo vuọvoo, owenẹ ọ dia ọmotọ yẹrẹ ọrhorha rọ dia ohri rẹ ovwan. 30 E che ru arhuẹrẹ kẹ ovwan vwẹ ẹdẹ nana, rere e vwo ghwoghwo nẹ ovwan fonro. Ovwan ke cha fon vwo nẹ imwemwu rẹ ovwan ejobi vwẹ obaro ri Jihova. 31 Ọyen ẹdẹ urovwoma re karekare kẹ ovwan, ovwan mi gboja kẹ oma rẹ ovwan.* Ọyen urhi ri bẹdẹ.

32 “Orherẹn re ku evwri ku re ji vwo mu* nẹ ọ ga kerẹ orherẹn vwẹ ẹdia rẹ ọsẹ rọyen che ru arhuẹrẹ ji ku iwun ra vwẹ amwa oyoyovwin vwo ru na phiyọ, iwun efuanfon na. 33 O che ru arhuẹrẹ vwọ kẹ asan ọfuanfon na, utughẹ ra da vwoma na, kugbe agbada na; o ji che ru arhuẹrẹ vwọ kẹ irherẹn na kugbe ihwo eje rehẹ ọghwẹgbe na. 34 Ọnana cha dia urhi ri bẹdẹ kẹ ovwan, re vwo ru arhuẹrẹ vwọ kẹ ihwo rẹ Izrẹl fikirẹ imwemwu rayen eje obọ ọvo ẹgbukpe.”

Ọtiọyena o de ruo kirobo rẹ Jihova ji iji rọyen kẹ Mosis.