Livitikọs
17 Jihova da ta kẹ Mosis: 2 “Ta kẹ Erọn vẹ emọ rọyen kugbe ihwo rẹ Izrẹl eje, rere wọ vuẹ ayen nẹ, ‘Ọnana yen oborẹ Jihova ji iji rọyen:
3 “‘“Kọshare kọshare vwẹ uwevwin rẹ Izrẹl ro hwe erhuẹn yẹrẹ egbon otete yẹrẹ ẹvwe vwevunrẹ asan rẹ ayen wonphiyọ* na yẹrẹ o de hwe vwẹ otafe rẹ asan rẹ ayen wonphiyọ na, 4 ukperẹ ọ vwọ reyọ rhe asan ra wan rua utughẹ ra da vwoma na rere ọ vwọ kpahotọ kerẹ izobo vwọ kẹ Jihova vwẹ obaro rẹ itabanako ri Jihova, ọshare yena riabe. O sun ọbara te otọ, ke bru* ọshare yena nẹ ohri rẹ ihwo rọyen. 5 Ọnana dia ọtiọyen rere ihwo rẹ Izrẹl vwo mu izobo rẹ ayen ze vwẹ otafe asaọkiephana vwo rhe Jihova vwẹ asan ra wan rua utughẹ ra da vwoma na, rere a vwẹ ayen kẹ orherẹn na. Ayen mi ze izobo nana kerẹ izobo rẹ ọrekugbe kẹ Jihova. 6 Orherẹn na cha fẹrẹn ọbara na ku agbada ri Jihova rọhẹ asan ra wan rua utughẹ ra da vwoma na, ọ me nẹrhẹ ivwri na bru ivwirhi kerẹ ọnrhẹ ọvwevwerhen kẹ Jihova. 7 Rere ayen vwọ dobọ rẹ izobo rẹ ayen ze vwọ kẹ emekashe rẹ Idẹbono re họhọ ẹvwe* ji, e re vẹ ayen gbe gbe ọfanrhiẹn na. Ọnana cha dia urhi ri bẹdẹ kẹ ovwan vwẹ uvwiẹ rẹ ovwan eje.”’
8 “Wọ me ta kẹ ayen nẹ, ‘Kohwo kohwo vwẹ uwevwin rẹ Izrẹl yẹrẹ kọrhorha kọrhorha rọ dia ohri rẹ ovwan, rọ vwẹ izobo rẹ ẹtorhẹ vwọ kpahotọ yẹrẹ ro ze izobo 9 jẹ ọ reyerọ kpo asan ra wan rua utughẹ ra da vwoma na rere ọ vwọ kpahotọ kẹ Jihovaa, ke bro* nẹ ohri rẹ ihwo rọyen.
10 “‘Kohwo kohwo vwẹ uwevwin rẹ Izrẹl yẹrẹ kọrhorha kọrhorha rọ dia ohri rẹ ovwan rọ re koka koka rẹ ọbara, vwọrẹ imuẹro ke me vwọso ohwo* yena rọ ria ọbara na, ki mi che bro* nẹ ohri rẹ ihwo rọyen. 11 Kidie arhọ* rẹ uvwo na hẹ evunrẹ ọbara na, mẹvwẹ komobọ vwerọ kẹ ovwan vwẹ enu rẹ agbada na rere ovwan reyọ vwo ru arhuẹrẹ vwọ komobọ rẹ ovwan,* kidie ọbara na yen ruẹ arhuẹrẹ womarẹ arhọ* rọhẹ evun rọyen. 12 Ọyensorọ me vwọ ta kẹ ihwo rẹ Izrẹl: “E jẹ ohwo vuọvo* vwẹ usun rẹ ovwan ria ọbaraa, e jẹ ọrhorha vuọvo rọ dia ohri rẹ ovwan je ria ọbaraa.”
13 “‘Ọ da dianẹ ọvo vwẹ usun rẹ ihwo rẹ Izrẹl yẹrẹ ọrhorha rọ dia ohri rẹ ovwan ra bẹre ibefi, o de mu eranvwe rẹ aghwa yẹrẹ ọphran ra sa re, e jẹ o ku ọbara rọyen kuotọ rere ọ ghwẹ ekpẹn rhurho. 14 Kidie arhọ ri koka koka rẹ uvwo yen ọbara rọyen, kidie arhọ* na hẹ evun rọyen. Kọyensorọ me vwọ ta kẹ ihwo rẹ Izrẹl: “Ovwan ria ọbara ri koka koka rẹ uvwoo, kidie arhọ* ri koka koka rẹ uvwo yen ọbara rọyen. Kohwo kohwo rọ riọ, ke bro* kufia.” 15 Kohwo kohwo,* owenẹ ọ dia ọmotọ yẹrẹ ọrhorha da re eranvwe ro ghwuru yẹrẹ ọ rẹ eranvwe rẹ aghwa hweri, ọ me fọnrhọn iwun rọyen, vwẹ ame vwọ họ, je dia ẹdia ri jẹfuọn re te ovwọnvwọn; ọke yena kọ cha fon. 16 Ẹkẹvuọvo ọ rha fọnrhọn ayen je họ oma rọyeen,* kọ rioja fikirẹ oruchọ rọyen.’”