Livitikọs

22 Jihova da rhoma ta ota kẹ Mosis, ọ da ta: 2 “Vuẹ Erọn vẹ emọ rọyen nẹ ayen jomaotọ kpahen oborẹ ayen ruẹ* erọnvwọn efuanfon rẹ ihwo rẹ Izrẹl wan, ayen phọphọ odẹ ọfuanfon mẹ womarẹ erọnvwọn rẹ ayen ruẹ fuan kẹ vwẹ naa. Mẹvwẹ Jihova. 3 Vuẹ ayen nẹ, ‘Vwẹ uvwiẹ rẹ ovwan eje, kọmọ kọmọ rẹ ovwan rọhẹ ẹdia ri jẹfuọn ro sikẹrẹ erọnvwọn efuanfon rẹ ihwo rẹ Izrẹl ru fon kẹ Jihova, ke bru* ohwo* yena nẹ obaro mẹ. Mẹvwẹ Jihova. 4 E jẹ ohwo ọvuọvo vwẹ usun rẹ emọ rẹ Erọn rọ họnvwa oti yẹrẹ rẹ ame oma rọyen hwẹ ria nẹ erọnvwọn efuanfon naa bẹsiẹ rọ vwọ fon, yẹrẹ ohwo ro djobọte ohwo rọhẹ ẹdia ri jẹfuọn kidie nẹ o djobote orivwin rẹ ohwo* yẹrẹ ọshare rẹ ame oma rọyen hwẹ, 5 yẹrẹ ohwo ro djobọte ọvo vwẹ usun rẹ emama ri jẹfuọn re yan ẹkuẹko yẹrẹ ro djobọte ohwo ro jẹfuọn, rọ rhe nẹrhẹ ọ dia ẹdia ri jẹfuọn. 6 Ohwo* ro djobọte ọvo vwẹ usun rẹ erọnvwọn nana cha dia ẹdia ri jẹfuọn re te ovwọnvwọn, ọ cha sa re ọvuọvo vwẹ usun rẹ erọnvwọn efuanfon naa, ẹkẹvuọvo e jẹ ọ vwẹ ame vwọ họ oma rọyen. 7 Ọnre na de shekpotọ nu, kọ cha fon, ọke yena kọ sa re evo vwẹ usun rẹ erọnvwọn efuanfon na, kidie ọyen emu rọyen. 8 Vwọba, e jẹ ọ ria eranvwe vuọvo ro ghwuru yẹrẹ orọnvwọn vuọvo rẹ eranvwe rẹ aghwa hweri rere ọ dia ẹdia ri jẹfuọn wan oma rọyeen. Mẹvwẹ Jihova.

9 “‘Ayen mi ru nene ive rẹ ayen ve kẹ vwẹ, rere ayen vwo jẹ umwemwu eruo ji ghwu fiki rọyen kidie nẹ ayen phọphọ. Mẹvwẹ Jihova, ohwo ro ruẹ ayen fuan na.

10 “‘Ohwo ra rhọnvwe kẹẹ* cha sa re orọnvwọn vuọvo rọ fonroo. Ọrhorha ro won orherẹn yẹrẹ ọwiowian ra reyọ phiyọ iruo cha sa re orọnvwọn vuọvo rọ fonroo. 11 Ẹkẹvuọvo orherẹn da vwẹ igho robọ rọyen vwọ dẹ ohwo,* ohwo yena sa re vwọ. Eviẹn re vwiẹre vwevunrẹ uwevwin rọyen je sa re vwẹ emu rọyen. 12 Ọ da dianẹ ọmọ rẹ orherẹn na ọmọtẹ kọ rọvwọn ohwo rọ dia orherẹẹn,* ọmọtẹ na cha sa re nẹ erọnvwọn efuanfon ra vwọ kpahotọ naa. 13 Ẹkẹvuọvo ọ da dianẹ ọmọtẹ rẹ orherẹn rhe dia ayeuku yẹrẹ ọ fan orọnvwe, o rhe vwo ọmọọ, o de rhivwin kpo uwevwin rẹ ọsẹ rọyen kirobo rọ hepha vwẹ ọke eghene, ọ sa re nẹ emu rẹ ọsẹ rọyen; ẹkẹvuọvo ohwo ra rhọnvwe kẹẹ* riọọ.

14 “‘Asaọkiephana ọ da dianẹ obọ chọ ohwo vwọ re orọnvwọn ọfuanfon, ọ cha vwẹ ẹkẹn ọvo rẹ ẹkẹn iyorin vwọ ba uwan rọyen, ọ me vwẹ izobo ọfuanfon na kẹ orherẹn na. 15 Ọtiọyena e jẹ ayen gbe erọnvwọn efuanfon rẹ ihwo rẹ Izrẹl rẹ ayen vwọ kpahotọ kẹ Jihova na ẹguaa 16 rere ayen vwo jẹ obo re cha nẹrhẹ ayen rioja fikirẹ abe rayen eruo, rẹ ayen vwọ re erọnvwọn efuanfon rayen; kidie mẹvwẹ Jihova, ohwo ro ruẹ ayen fuan na.’”

17 Jihova da rhoma ta ota kẹ Mosis, ọ da ta: 18 “Ta ota kẹ Erọn vẹ emọ rọyen kugbe ihwo rẹ Izrẹl eje, rere wọ vuẹ ayen nẹ, ‘Siẹrẹ ohwo rẹ Izrẹl yẹrẹ ọrhorha rọ dia evunrẹ Izrẹl da vwẹ izobo rẹ ẹtorhẹ vwọ kpahotọ kẹ Jihova vwo nene ive rọyen yẹrẹ vwo ze izobo ro nẹ otọ rẹ ẹwẹn rhe, 19 e jẹ ọ vwẹ eranvwe ọshare rẹ oma rọyen gbare vwọ kpahotọ vwẹ usun rẹ erhuẹn na, egbon itete na, yẹrẹ ẹvwe na, rere ọ sa vwọ mrẹ ẹroesiri. 20 Ovwan vwẹ orọnvwọn vuọvo rẹ ẹbẹre ọvo rẹ oma rọyen shechọ vwọ kpahotọọ, kidie ọ cha sa nẹrhẹ ovwan mrẹ ẹroesirii.

21 “‘Ọ da dianẹ ohwo vwẹ izobo rẹ ọrekugbe vwọ kpahotọ kẹ Jihova vwọ hwosa rẹ ive yẹrẹ kerẹ okẹ ro nẹ otọ rẹ ẹwẹn rhe, e jẹ ọ dia eranvwe rẹ oma rọyen gbare vwẹ usun rẹ erhuẹn na yẹrẹ igodẹ vẹ ẹvwe na rere ọ sa vwọ mrẹ ẹroesiri. E jẹ asan vuọvo shechọ vwẹ oma rọyeen. 22 E jẹ eranvwe vuọvo re che vwo ze izobo rhuẹro, vwirhin ubeku, vwo ora, vwo igẹn, vwo eshẹ ro vwo orin, yẹrẹ ephrẹvwee;* ovwan vwẹ ọvuọvo vwẹ usun rẹ enana vwọ kpahotọ kẹ Jihova yẹrẹ ze izobo tiọyena vwẹ agbada na kẹ Jihovaa. 23 Wọ sa vwẹ erhuẹn yẹrẹ ogodẹ rẹ ẹbẹre ọvo rẹ oma rọyen gron nọ yẹrẹ krẹ nọ vwọ kpahotọ kerẹ okẹ ro nẹ otọ rẹ ẹwẹn rhe, ẹkẹvuọvo e che rhiabọreyọ vẹ ẹroesiri siẹrẹ wọ da vwọ kpahotọ kerẹ izobo rẹ ivee. 24 Ovwan vwẹ ọ rọ wan oma vwẹ ibi ivwrite yẹrẹ ọ rẹ ibi ivwrite rọyen pẹtiẹnre yẹrẹ ọ re yoro ibi ivwrite rọyen yẹrẹ bru ibi ivwrite rọyen no vwọ kpahotọ kẹ Jihovaa, ovwan vwẹ eranvwe tiọyena vwo ze izobo vwẹ otọ rẹ ovwaan. 25 Ovwan reyọ ọvuọvo vwẹ usun rẹ enana mie ọrhorha vwọ kpahotọ kerẹ ibrẹdi rẹ Ọghẹnẹ rẹ ovwaan, kidie ayen ruoka, oma rayen ji shechọ. E che rhiabọreyọ ayen mie ovwan rere ovwan vwọ mrẹ ẹroesirii.’”

26 Jihova da rhoma ta ota kẹ Mosis, ọ da ta: 27 “E de vwiẹ erhuẹn yẹrẹ egbon otete yẹrẹ ẹvwe, ọ vẹ oni rọyen cha dia ẹdẹ ighwrẹn, ẹkẹvuọvo vwo nẹ ẹdẹ rẹrenren yanran ke se rhiabọreyọ kerẹ izobo, izobo ra vwẹ erhanre torhẹ kẹ Jihova. 28 Vwọ kẹ erhuẹn yẹrẹ ogodẹ, ovwan hwe vẹ ọmọ rọyen vwẹ ẹdẹ ọvuọvoo.

29 “Ovwan de ze izobo rẹ akpẹvwẹ kẹ Jihova, ovwan ze izobo na vwẹ idjerhe rẹ ovwan da sa mrẹ ẹroesiri kẹ oma rẹ ovwan. 30 E jẹ a riọ vwẹ ẹdẹdẹ yena. Ovwan yanjẹ ọvuọvo rọyen vwo te urhiọkee. Mẹvwẹ Jihova.

31 “Ovwan me yọnrọn irhi mẹ ji ru nene ayen. Mẹvwẹ Jihova. 32 Ovwan phọphọ odẹ ọfuanfon mẹẹ, ukperẹ ọtiọyen, ovwan mi ru vwe fon vwẹ ohri rẹ ihwo rẹ Izrẹl. Mẹvwẹ Jihova, ohwo ro ruẹ ovwan fuan na, 33 ọ rọ reyọ ovwan nẹ otọ rẹ Ijipt rhe rere mi vwo djephia nẹ mẹvwẹ Ọghẹnẹ rẹ ovwan. Mẹvwẹ Jihova.”