Livitikọs

23 Jihova da rhoma ta ota kẹ Mosis, ọ da ta: 2 “Ta ota kẹ ihwo rẹ Izrẹl rere wọ vuẹ ayen nẹ, ‘Erẹ ri Jihova rẹ ọke sansan rẹ ovwan che ghwoghwo, eyen eghwẹkoko efuanfon. Enana yen erẹ mẹ rẹ ọke sansan:

3 “‘Ovwan se ruiruo vwẹ ẹdẹ esan, ẹkẹvuọvo ẹdẹ righwrẹn na ọyen ẹdẹ urovwoma rẹ omaerovwon re karekare, ọghwẹkoko ọfuanfon. Ovwan ruiruo vuọvoo. Ọ cha dia ẹdẹ urovwoma kẹ Jihova vwẹ kasan kasan rẹ ovwan dia.

4 “‘Enana yen erẹ ri Jihova rẹ ọke sansan, eghwẹkoko efuanfon rẹ ovwan che ghwoghwo vwẹ ọke re bruphiyọ kẹ ayen: 5 Vwẹ emeranvwe rẹsosuọ, vwẹ ẹdẹ 14 rẹ emeranvwe na, vwẹ ovwọnvwọn* ọyen Ọwanvrẹ kẹ Jihova.

6 “‘Ẹdẹ 15 rẹ emeranvwe nana ọyen Orẹ rẹ Ibrẹdi ro Jephuo kẹ Jihova. Ovwan me re ibrẹdi ro jephuo vwẹ ẹdẹ ighwrẹn. 7 Vwẹ ẹdẹ rẹsosuọ na, ovwan mi ru ọghwẹkoko ọfuanfon. Ovwan ruiruo ọgangan vuọvoo. 8 Ẹkẹvuọvo ovwan me vwẹ izobo ra vwẹ erhanre torhẹ vwọ kpahotọ kẹ Jihova vwẹ ẹdẹ ighwrẹn. Ọghwẹkoko ọfuanfon cha dia vwẹ ẹdẹ righwrẹn na. Ovwan ruiruo ọgangan vuọvoo.’”

9 Jihova da rhoma ta kẹ Mosis: 10 “Ta ota kẹ ihwo rẹ Izrẹl rere wọ vuẹ ayen nẹ, ‘Ọke rẹ ovwan de rhi te otọ re me cha vwọ kẹ ovwan na, ovwan de vun orhọ rọyen, ovwan mi mu ekrun rẹ eka ọvo rẹ emamọ rẹsosuọ rẹ orhọ rẹ ovwan vwo rhe orherẹn na. 11 O mi dju ekrun na kpuko kparo vwẹ obaro ri Jihova rere ovwan sa vwọ mrẹ ẹroesiri. Orherẹn na che djuo vwẹ ẹdẹ rọ vwọ kpahen Ẹdẹ Urovwoma na. 12 Vwẹ ẹdẹ re dju ekrun rẹ eka na, ovwan me vwẹ egbon otete rọhẹ ukpe rẹsosuọ rọyen rẹ oma rọyen gbare vwọ kpahotọ kerẹ izobo rẹ ẹtorhẹ kẹ Jihova. 13 Izobo rẹ eka rọyen cha dia ẹkẹn ivẹ rẹ ẹkẹn ihwe rẹ ifah* rẹ omamọ rẹ iflawa re gbe kugbe vẹ evwri kerẹ izobo ra vwẹ erhanre torhẹ kẹ Jihova ro gbon ọnrhe ọvwevwerhen. Izobo rẹ udi rọyen cha dia ẹkẹn ọvo rẹ ẹkẹn ẹne rẹ ovwanvwọ ri hin* rẹ iwaini. 14 Ovwan re ibrẹdi rẹ eka ra vwọ tọn yẹrẹ eka kpokpọ vuọvo bẹsiẹ rẹ ẹdẹ nana vwo tee, bẹsiẹ rẹ ovwan vwọ vwẹ izobo rẹ Ọghẹnẹ rẹ ovwan rhe. Ọyen urhi ri bẹdẹ vwọ kẹ uvwiẹ rẹ ovwan eje vwẹ kasan kasan rẹ ovwan dia.

15 “‘Ovwan mi kere ẹdẹ urovwoma ighwrẹn vwo nẹ ẹdẹ rọ vwọ kpahen Ẹdẹ Urovwoma na, vwo nẹ ẹdẹ rẹ ovwan reyọ ekrun rẹ eka rẹ izobo rẹ edjuo na vwọ rhe na. Ayen me dia idughwrẹn re gbare. 16 Ovwan che kere ẹdẹ 50 re te ẹdẹ rọ vwọ kpahen Ẹdẹ Urovwoma righwrẹn na, kẹ ovwan cha vwẹ izobo rẹ eka kpokpọ vwọ kpahotọ kẹ Jihova. 17 Ovwan me reyọ ibrẹdi ivẹ nẹ asan rẹ ovwan dia rhe kerẹ izobo rẹ edjuo. E me dia obo ra vwẹ ẹkẹn ivẹ rẹ ẹkẹn ihwe rẹ ifah* rẹ omamọ rẹ iflawa vwo ru. A me vwẹ iphuephu* vwọ ba ru ayen kerẹ emamọ rẹsosuọ kẹ Jihova. 18 Ovwan me vwẹ ibrẹdi na vẹ imigodẹ eshare ighwrẹn rẹ ẹgbukpe ọvo rẹ oma rayen gbare, kugbe erhuẹn otete ọvo vẹ egbon ivẹ vwọ kpahotọ. Ayen me dia izobo rẹ ẹtorhẹ kẹ Jihova, ọ vẹ izobo rẹ eka kugbe izobo rẹ udi ra cha vwọ ba ayen, kerẹ izobo ra vwẹ erhanre torhẹ ro gbon ọnrhe ọvwevwerhen kẹ Jihova. 19 Ovwan me vwẹ ẹmẹvwe ọvo vwọ kpahotọ kerẹ izobo rẹ umwemwu kugbe igodẹ eshare ivẹ rẹ ẹgbukpe ọvo kerẹ izobo rẹ ọrekugbe. 20 Orherẹn na mi dju ayen kpuko kparo vẹ ibrẹdi rẹ emamọ rẹsosuọ na, kugbe imigodẹ eshare ivẹ na kerẹ izobo rẹ edjuo vwẹ obaro ri Jihova, ayen me dia kerẹ orọnvwọn rọ pha fuanfon kẹ Jihova vwọ kẹ orherẹn na. 21 Vwẹ ẹdẹ nana, ovwan che ru aghwoghwo rẹ ọghwẹkoko ọfuanfon vwọ kẹ oma rẹ ovwan. Ovwan ruiruo ọgangan vuọvoo. Ọyen urhi ri bẹdẹ vwẹ asan rẹ ovwan diare eje vwọ kẹ uvwiẹ rẹ ovwan ejobi.

22 “‘Ọke rẹ ovwan de vun orhọ rẹ otọ rẹ ovwan, ovwan vuẹn ọkọkọ rẹ udju rẹ ovwan karekaree, ovwan je tọrọ obo ri chekọ vwẹ orhọ rẹ ovwaan. Ovwan me yan jovwo kẹ igbere na kugbe erhorha na. Mẹvwẹ Jihova Ọghẹnẹ rẹ ovwan.’”

23 Jihova da rhoma ta ota kẹ Mosis, ọ da ta: 24 “Vuẹ ihwo rẹ Izrẹl nẹ, ‘Vwẹ emeranvwe righwrẹn na, ẹdẹ rẹsosuọ rẹ emeranvwe na, ọyen ẹdẹ rẹ omaerovwon re karekare vwọ kẹ ovwan, ẹkarophiyọ re che djephia womarẹ edo rẹ owanre, ọghwẹkoko ọfuanfon. 25 Ovwan ruiruo ọgangan vuọvoo, ovwan cha vwẹ izobo ra vwẹ erhanre torhẹ vwọ kpahotọ kẹ Jihova.’”

26 Jihova da rhoma ta ota kẹ Mosis, ọ da ta: 27 “Ẹkẹvuọvo ẹdẹ rihwe rẹ emeranvwe righwrẹn nana ọyen Ẹdẹ Arhuẹrẹ. Ovwan ru ọghwẹkoko ọfuanfon, ovwan mi gboja kẹ oma rẹ ovwan,* je vwẹ izobo ra vwẹ erhanre torhẹ vwọ kpahotọ kẹ Jihova. 28 Ovwan ruiruo vuọvo vwẹ ẹdẹ nanaa kidie ọyen ẹdẹ arhuẹrẹ re che vwo ru arhuẹrẹ kẹ ovwan vwẹ obaro ri Jihova Ọghẹnẹ rẹ ovwan. 29 Kohwo kohwo* rọ rhọnvwe gboja kẹ oma rọyen* vwẹ ẹdẹ nanaa, ke bro* nẹ ohri rẹ ihwo rọyen. 30 Me cha ghwọrọ kohwo kohwo* ro ru koka koka rẹ iruo vwẹ ẹdẹ nana nẹ ohri rẹ ihwo rọyen. 31 Ovwan ruiruo vuọvoo. Ọyen urhi ri bẹdẹ vwọ kẹ uvwiẹ rẹ ovwan eje vwẹ kasan kasan rẹ ovwan diare. 32 Ọyen ẹdẹ urovwoma rẹ omaerovwon re karekare kẹ ovwan, ovwan mi gboja kẹ oma rẹ ovwan* vwẹ ẹdẹ rirhirin rẹ emeranvwe na vwẹ ovwọnvwọn. Ovwan mi ru ẹdẹ urovwoma rẹ ovwan na vwo nẹ ovwọnvwọn re te ovwọnvwọn.”

33 Jihova da rhoma ta ota kẹ Mosis, ọ da ta: 34 “Vuẹ ihwo rẹ Izrẹl nẹ, ‘Ẹdẹ 15 rẹ emeranvwe righwrẹn nana ọyen Orẹ rẹ Itughẹ re che ru vwẹ ẹdẹ ighwrẹn kẹ Jihova. 35 Ọghwẹkoko ọfuanfon cha dia vwẹ ẹdẹ rẹsosuọ na, ovwan ruiruo ọgangan vuọvoo. 36 Ovwan me vwẹ izobo ra vwẹ erhanre torhẹ vwọ kpahotọ kẹ Jihova vwẹ ẹdẹ ighwrẹn. Vwẹ ẹdẹ rẹrenren na, ovwan mi ru ọghwẹkoko ọfuanfon, ovwan me vwẹ izobo ra vwẹ erhanre torhẹ vwọ kpahotọ kẹ Jihova. Ọyen ọghwẹgbe ọfuanfon. Ovwan ruiruo ọgangan vuọvoo.

37 “‘Enana yen erẹ ri Jihova rẹ ọke sansan rẹ ovwan che ghwoghwo kerẹ eghwẹkoko efuanfon ra da vwẹ izobo ra vwẹ erhanre torhẹ vwọ kpahotọ kẹ Jihova: izobo rẹ ẹtorhẹ na kugbe izobo rẹ eka na vẹ izobo rẹ udi na vwo nene ọrhuẹrẹphiyotọ ri kẹdi kẹdẹ na. 38 Enana yen a vwọ ba obo ra vwọ kpahotọ vwẹ ẹdẹ urovwoma ri Jihova, vẹ okẹ rẹ ovwan, izobo rẹ ive rẹ ovwan, kugbe okẹ ro nẹ otọ rẹ ẹwẹn rhe rẹ ovwan cha vwọ kẹ Jihova. 39 Ẹkẹvuọvo vwẹ ẹdẹ 15 rẹ emeranvwe righwrẹn na, ovwan de koko emamọ rẹ otọ na nu, ovwan me re orẹ ri Jihova vwẹ ẹdẹ ighwrẹn. Ẹdẹ rẹsosuọ na ọyen ẹdẹ rẹ omaerovwon re karekare, ẹdẹ rẹrenren na jẹ ẹdẹ rẹ omaerovwon re karekare. 40 Vwẹ ẹdẹ rẹsosuọ na, ovwan me reyọ emamọ rẹ irhe iyoyovwin, ewanvwe rẹ iriẹ, eghọn rẹ irhe ri vwo ẹbe buebun kugbe irhe* re djẹ vwẹ iyara,* ovwan me ghọghọ vwẹ obaro ri Jihova Ọghẹnẹ rẹ ovwan vwẹ ẹdẹ ighwrẹn. 41 Ovwan mi ruo kerẹ orẹ vwọ kẹ Jihova vwẹ ẹdẹ ighwrẹn vwẹ ukpe na. Ovwan me re orẹ rọyen vwẹ emeranvwe righwrẹn na kerẹ urhi ri bẹdẹ vwẹ uvwiẹ rẹ ovwan eje. 42 Ovwan me dia evunrẹ itughẹ vwẹ ẹdẹ ighwrẹn. Emotọ rẹ Izrẹl eje me dia evunrẹ itughẹ na, 43 rere uvwiẹ rẹ ovwan re cha vwẹ obaro vwọ riẹn nẹ itughẹ yen me nẹrhẹ ihwo rẹ Izrẹl dia ọke re me vwọ reyọ ayen nẹ otọ rẹ Ijipt cha. Mẹvwẹ Jihova Ọghẹnẹ rẹ ovwan.’”

44 Ọtiọyena Mosis da vuẹ ihwo rẹ Izrẹl kpahen erẹ ri Jihova rẹ ọke sansan na.